གནས་ཚུལ་དང་པར་རིས་མཁོ་འདོན་པ། ཀླུ་བསྟན་འཛིན་ཕན་ཐོགས།
དེ་ཡང་ཟླ་འདིའི་ཕྱི་ཚེས་༢༢དགོང་མོར་མདོ་སྨད་ཀླུ་ཆུའི་ཤིས་ཚང་ཡུལ་(ཀན་སུའུ་ཞིང་ཆེན་ཀན་ལྷོ་ཁུལ་ཀླུ་ཆུ་རྫོང་མ་ངེས་ཞང་དཔལ་སྒུར་རུ་ཁག་གསུམ་པ་སྟེ་ནགས་རི་ཚོ་བ)གྱི་རྒྱལ་གཅེས་དཔའ་བོ་ན་གཞོན་རྟ་མགྲིན་སྐྱབས་ཀྱིས་རང་ལུས་མེ་སྲེག་བྱས་ཏེ་སྐུ་འདས་གྲོངས་སུ་ཕྱིན་པ་ནས་ཉིན་བཞིན་ཤིས་ཚང་དགོན་པའི་དགེ་འདུན་པ་ཚོ་ཚོར་ཤུགས་ཆེན་པོས་འདས་པོ་ཁོང་གི་ཁྱིམ་དུ་སྨོན་ལམ་གསུང་བར་ཆེད་དུ་ཕེབས་དང་ཕེབས་ཀྱིན་ཡོད་ལ། དེ་རིང་སྟེ་ཕྱི་ཚེས་༢༥ཉིན་གྱི་བོད་ནང་གི་ཞོགས་པའི་ཆུ་ཚོད་༦དང་ཕྱེད་ཀའི་སྟེང་ནམ་ཟླའི་འཁྱག་གྲང་དང་ལམ་ཐག་རིང་བའི་དཀའ་ངལ་ལ་མ་འཛེམ་པར་རྐང་ཐང་དུ་འདས་པོ་ཁོང་གི་སྐུ་ཕུང་བྱ་སྦྱིན་བྱེད་སའི་ཤིས་ཚང་དགོན་པའི་ཡར་རྒྱབ་ཀྱི་ཧག་ཆེན་ཀླད་(འདིའི་དག་ཆ་མ་ངེས)ཅེས་པར་ཕེབས་ཏེ་སྨོན་ལམ་རྒྱ་ཆེན་གསུངས་ཡོད་པ་རེད།
དེ་བཞིན་ཉིན་རྒྱབ་ཆུ་ཚོད་བཞིའི་སྟེང་དུའང་དགོན་པ་དང་རྒྱང་ཐག་སྤྱི་ལེ་བརྒྱད་ལྷག་ཡོད་པའི་འདས་པོ་ཁོང་གི་སྐྱེས་ཡུལ་དཔལ་སྒུར་སྡེ་བའི་རང་ཁྱིམ་དུ་ཕེབས་ཏེ་སྨོན་ལམ་གསུང་འདོན་གནང་ཡོད་འདུག ད་དུང་ཡང་མུ་མཐུད་དུ་བདུན་གཅིག་གི་རིང་ལ་ཉིན་ལྟར་སྨོན་ལམ་གསུང་འདོན་གནང་བར་ཆེད་ཕེབས་གནང་ངེས་རེད། ཐེངས་འདིར་རྒྱལ་གཅེས་དཔའ་བོ་རྟ་མགྲིན་སྐྱབས་ཀྱིས་རང་ལུས་མེར་སྲེག་བྱས་པ་ནི་མདོ་སྨད་ཀླུ་ཆུའི་ཡུལ་དུ་དངོས་སུ་རྒྱ་གཞུང་ལ་རང་སྲེག་ངོ་རྒོལ་བྱས་པ་ཐེངས་དང་བོ་ཆགས་ཡོད།
ཕྱི་ཚེས་ ༢༥ ཞོགས་པར་ཤིས་ཚང་དགོན་པའི་དགེ་འདུན་པ་ཚོས་དུར་ཁྲོད་དུ་སྨོན་ལམ་གསུང་བཞིན་པ།
དུར་ཁྲོད་དུ་སྨོན་ལམ་གསུངས་གྲུབ་རྗེས་ཕྱིར་དགོན་པར་ལོག་བཞིན་པ།
ཤིས་ཚང་དགོན་པའི་དགེ་འདུན་པ་ཚོ་དཔལ་སྒུར་སྡེ་བའི་འདས་པོའི་རང་ཁྱིམ་དུ་ཕེབས་བཞིན་པ།
ཤིས་ཚང་དགོན་པ་ནས་གླ་བྱེད་རླངས་འཁོར་དུ་བཞུགས་ཏེ་སྨོན་ལམ་གསུང་བར་ཕེབས་བཞིན་པ།
དཔལ་སྒུར་སྡེ་བའི་འདས་པོའི་རང་ཁྱིམ་དུ་ཕེབས་བཞིན་པ།
མེ་ལྕེའི་ཀློང་དུ་༧རྒྱལ་བའི་མཚན་ནས་འབོད།།
ས་ལ་འགྱེལ་ཁར་མི་རིགས་རང་དབང་འབོད།།
ཚེ་སྲོག་མེ་ལ་ཐིམ་པའི་རྣམ་ཤེས་ཡིས།།
མི་མངོན་དབྱིངས་ནས་བོད་ལ་ཅེར་ནས་འདུག།།
མི་སེམས་སྒུལ་བའི་སྙན་ངག་འདི་འཕྲིན་ཕྲན་དྲ་གྲོགས་ཤིག་གིས་བྲིས་འདུག སྐད་ཆ་འདི་དངོས་གནས་བདེན་པ་རེད། ང་ཚོས་ཚེ་སྲོག་མེ་ལ་ཐིམ་པའི་དཔའ་བོ་དཔའ་མོ་ཚོའི་དམིག་འདུན་སྒྲུབ་མ་ཐུབ་ན་ང་ཚོ་ནི་ཁོང་ཚོའི་རྣམ་ཤེས་ཀྱི་མདུན་དུ་ནམ་ཡང་ཉེས་ཅན་པ་རེད།
རང་ལུས་མེར་སྲེག་གི་གནད་དོན་གྱི་འབྱུང་རྩ་ནི་རྒྱ་ནག་གཞུང་ལ་ཐུག་ཡོད་པས། བོད་མིའི་རེ་འདོད་ག་དུས་བསྒྲུབ་ན། དེ་དུས་རང་ལུས་མེར་སྲེག་མཚམས་ཆད་ནི་རེད། ཅེས་ཟེར་མཁན་གྱི་ཆབ་སྲིད་པ་ཚོ་ལ་ལྟོས་དང་།
རྒྱ་ནག་དམར་ཤོག་ལ་ཡ་ང་སྙིང་རྗེ་མེད་པ་བདེན་ལ། བོད་མི་ནང་ཁུལ་ལ་ཆབ་སྲིད་ཀྱི་མིག་འཁྲུལ་སྟོན་པ་དང་ཚེ་སྲོག་ལ་ཕངས་སེམས་མེད་པའི་སྐད་ཆ་བཤད་མི་འདི་ཚོ་ལའང་ཡ་ང་སྙིང་རྗེ་ཞིག་མི་འདུག
བོད་ནང་གི་སྤུན་སྲིང་རྣམས་ཀྱིས་སྲོག་ལ་བབས་ཀྱང་མྱ་ངན་ཞུ་བ་དང་སྨོན་ལམ་འདོན་པ་སོགས་ཀྱིས་གདུང་སེམས་མཉམ་བསྐྱེད་བྱེད་པ་ནི་བདག་ལས་བརྒྱ་འགྱུར་སྟོང་འགྱུར་གྱི་མཛད་རྗེས་ཡོད་པས་གུས་འདུད་གྲངས་མེད་ཞུ།