ཆང་སྐྱེས།
རྒྱལ་བའི་འཁྲུངས་སྐར་ལ།
རྒྱལ་བ་རིན་པོ་ཆེ་ལགས
དེ་རིང་ནི་ཁྱེད་རང་དགུང་གྲངས་གྱ་དྲུག་ལ་སླེབས་པའི་བཀྲ་ཤིས་པའི་ཉིན་མོ་རེད
ཁྱེད་ཀྱི་འཁྲུངས་སྐར་ལ་བཀྲ་ཤིས་བདེ་ལེགས་གྲངས་མེད་ཞུ
རྒྱལ་བ་རིན་པོ་ཆེ་ལགས
ཁྱོད་ནི་བོད་མི་ས་ཡ་དྲུག་གི
གཙུག་གི་ནོར་བུ་དང
སེམས་ཀྱི་ཉི་མ
གཏན་གྱི་སྐྱབས་མགོན་ཡིན་པས
ཁྱེད་རང་ཅིས་ཀྱང་ཡུན་རིང་དུ་བཞུགས་རོགས
རྒྱལ་བ་རིན་པོ་ཆེ་ལགས
ཁྱེད་ཀྱིས་བོད་མི་ས་ཡ་དྲུག་གི་ཆེད་དུ
མི་ལོ་བདུན་བཅུའི་རིང་ལ
སྐུ་ངལ་མང་པོ་མང་པོ་ཞིག་བཞེས་སོང་ལ
ཐུགས་ངལ་དེ་བས་ཀྱང་ཧ་ཅང་མང་པོ་ཞིག་མྱངས་སོང
རྒྱལ་བ་རིན་པོ་ཆེ་ལགས
ཁྱེད་ནི་འཛམ་གླིང་གོ་ལ་ཧྲིལ་བོ་འདིའི
དེད་དཔོན་ཆེན་མོ་དང
དུས་རབས་ཉེར་གཅིག་པའི
སེམས་དཔའ་ཆེན་མོ་ཁོ་ན་དེ་ཡིན་པས
ཁྱེད་རང་ཅིས་ཀྱང་ཡུན་རིང་དུ་བཞུགས་རོགས
རྒྱལ་བ་རིན་པོ་ཆེ་ལགས
འཛམ་གླིང་འདིའི་ཐོག་གི་རྒྱལ་ཁབ་དང
ཡུལ་གྲུ
མི་རིགས
ཆོས་ལུགས་ཀྱི་དབྱེ་བ་མེད་པར
མི་སུ་ཞིག་ཡིན་རུང་ཁྱེད་ཀྱི་མཚན་སྙན་་ཐོས་པ་དང
ཞལ་གསུང་མཇལ་བ་ཙམ་གྱིས
ལག་ཟུང་ཐལ་མོ་སྦྱར་ཏེ
མིག་ཆུ་དབང་མེད་དུ་ཤོར་འགྲོ་བ་ནི
ཁྱེད་ཀྱིས་བྱང་སེམས་ཀྱི་གཤོག་པ་བརྐྱངས་ཏེ
སྙིང་རྗེ་ཡི་རིལ་བུ་བསྩལ་བའི་བྱིན་རླབས་ཅི་ལ་མིན
རྒྱལ་བ་རིན་པོ་ཆེ་ལགས
ཁྱེད་རང་ཅིས་ཀྱང་ཡུན་རིང་དུ་བཞུགས་རོགས
ང་ཚོ་ཆོལ་གསུམ་བོད་མི་རྣམས་ཀྱིས
མཐུན་སྒྲིལ་གྱི་ལག་གདང་སྦྲེལ་ཏེ
འཆམ་མཐུན་གྱི་སེམས་པ་གླན་ནས
བོད་སྐད་བཤད་ཞོར་དང
བོད་ཡིག་འབྲི་ཞོར་དུ་ལོ་རྟག་པར
རྒྱལ་བ་རིན་པོ་ཆེ་མཆོག་གི་འཁྲུངས་སྐར་བསུ་ཆོག
རྒྱལ་བ་རིན་པོ་ཆེ་ལགས
ཁྱེད་རང་ཅིས་ཀྱང་ཡུན་རིང་དུ་བཞུགས་རོགས
ཆང་སྐྱེས་ཀྱིས་གུས་ཕུལ།