རེ་མདོ་སེངྒེ་།
ཡོ་རོབ་ཏུ་རྒྱལ་སྤྱིའི་བོད་རིག་པའི་ཚོགས་ཆེན་ཐེངས་བཅུ་བཞི་པར་བསྐྱོད་པའི་སྐབས་ཀྱི་མཐོང་ཐོས་འགའ་ཤས། {ཚན་པ་བརྒྱད་པ།}
༄༅།། ཕྱི་ཟླ་ ༧ ཚེས་ ༤ ཉིན་བྷེ་རྗམ་གྱི་གྲོང་ཁྱེར་གྲགས་ཅན་ཨོ་སི་ཊེན་ཌེན་ Ocstenden གྲོང་ཁྱེར་ནང་ལྟ་སྐོར་དུ་ཕྱིན། གྲོང་ཁྱེར་འདི་རྒྱ་མཚོའི་རྒྱུད་དུ་ཆགས་པའི་གྲོང་ཁྱེར་མཛེས་སྡུག་ལྡན་པ་ཞིག་རེད་འདུག་ལ། ཡུལ་སྐོར་སྤྲོ་འཆམ་པ་འཛོམས་ཆེ་ཤོས་ཀྱི་གྲོང་ཁྱེར་སྙན་གྲགས་ཅན་ཞིག་ཡིན་འདུག གནམ་གཤིས་ཤིན་ཏུ་དྭངས་པའི་སྐབས་འདིའི་མཚོ་རྒྱུད་ནས་བལྟས་ན་དབྱིན་ཇིའི་རྒྱལ་ས་ཨེང་ལན་གྱི་གྲོང་ཁྱེར་མཐོང་ཐུབ་པའི་ཤོད་སྲོལ་འདུག ངེད་གཉིས་ཀྱིས་མཚོ་རྒྱུད་ལ་ལྟ་སྐོར་གྲུབ་པའི་རྗེས། དེ་ནས་ཆུ་ཚོད་གཅིག་ཡས་མས་ཀྱི་ལམ་ཐག་ཡོད་པའི་བྷུ་རུ་ཤེའ་ Brugge ཞེས་པའི་གྲོང་ཁྱེར་ལ་ལྟ་སཀོར་དུ་ཕྱིན།
གྲོང་ཁྱེར་འདིའི་མིང་ལ་བྷུ་རུ་ཤེའ་ཟེར་བ་ནི་ནེའུ་ངྷི་ལན་ཊིའི་སྐད་ཐོག་ནས་བཏགས་པ་ཞིག་རེད་འདུག་ལ། བྷུ་རུ་ཤེའ་ཟེར་བ་ནི་ཟམ་པའི་དོན་ཡིན། མིང་འདི་ལྟར་ཐོགས་དགོས་པའི་རྒྱུ་མཚན་ནི་གྲོང་ཁྱེར་འདིའི་ཕྱི་ནང་གཉིས་ཀར་ཆུའི་ཡུར་བ་ཤིན་ཏུ་མང་པོ་འཐེན་འདུག་པ་དང་མཉམ་དུ་ཟམ་པ་མང་པོ་བཟོས་འདུག་པར་བརྟེན་མིང་དེ་ལྟར་ཐོགས་པ་ཡིན་འདུག གྲོང་ཁྱེར་འདི་དེ་ཙམ་ཆེན་པོ་མིན་པའི་ཚོད་ཀྱིས་ཟམ་པ་ཤིན་ཏུ་མང་བས་ཟམ་པའི་གྲོང་ཁྱེར་ཞེས་མིང་བཏགས་འདུག་པ་དོན་ལ་གནས་པ་རེད་སྙམ། གྲོང་ཁྱེར་འདིའི་མཐའ་ཡོངས་རྫོགས་གཙང་པོས་སྐོར་འདུག་ཅིང༌། ཕྱོགས་བཞི་ན་སྒོ་ཆེན་རེ་ཡོད་པ་དང་། སྒོ་ཆེན་མདུན་གྱི་ཟམ་པ་རྣམས་ནང་དུ་འཐེན་པའི་རྗེས་ནང་མི་ཕྱི་ལ་མི་ཐར་བ་དང༌། ཕྱི་མི་ནང་ལ་མི་ཐར་བའི་བཙན་དྲགས་ལྡན་པ་ཞིག་འདུག
གྲོང་ཁྱེར་ནང་གི་ཁང་པ་དང་ལམ་ཁ་ཡོངས་རྫོགས་གནའ་སྔ་མོའི་གནས་སྟངས་ལ་འགྱུར་བ་གཏན་ནས་མ་བཏང་བར་རང་སོར་བཞག་འདུག་པས། འདིར་ཐོག་མར་སླེབས་པའི་སྐབས་དེང་རབས་ཀྱི་དཔལ་ཡོན་ཤིན་ཏུ་དར་ཆེ་བའི་ཡོ་རོབ་ལུང་པ་ན་ཡང་། ཡར་རྒྱས་ལ་བསྙད་བཏགས་པའི་སྒྱུར་བཅོས་གཏན་ནས་མ་བྱས་པར། གནའ་བོའི་གྲོང་རྙིང་གི་རྣམ་པ་རང་སོར་གནས་པ་འདི་འདྲ་འདུག་སྙམ་པའི་ཚོར་སྣང་དམིགས་བསལ་བ་ཞིག་རང་བཞིན་གྱིས་སྟེར་ཡོང་གི་འདུག
གྲོང་ཁྱེར་གཞན་དག་ལས་ཀྱང་འདིར་ཡུལ་སྐོར་སྤྲོ་འཆམ་པ་ཤིན་ཏུ་མང་པོ་འདུག་ཀྱང་། གྲོང་ཁྱེར་ནང་གི་ལྟ་སྐོར་ཡོངས་རྫོགས་གྲུ་གཟིངས་བརྒྱུད་ནས་འགྲོ་བ་མ་གཏོགས། འདིའི་ཁྲོམ་གཞུང་དུ་རླངས་འཁོར་ཡོང་རྒྱུར་བཀག་འགོག་ཡོད་སྟབས་ཤིན་ཏུ་ལྷིང་འཇགས་དང་ཁ་ཁུ་སིམ་པོ་ཞིག་འདུག
ཡོ་རོབ་ལུང་པ་སྤྱི་མཚུངས་ལྟར་གྲོང་ཁྱེར་འདིའི་ནང་དུ་ཡི་ཤུའི་ཆོས་ཁང་མཐོ་ཞིང་བརྗིད་ཉམས་ལྡན་པ་ཞིག་འདུག་པ་ནི་གྲོང་ཁྱེར་འདིའི་གཙུག་གི་ནོར་བུ་ལྟ་བུའི་མཛེས་རྒྱན་དུ་གྱུར་འདུག་ཅིང༌།ཕར་བལྟས་པ་ཙམ་གྱིས་ཆོས་ཁང་འདི་ཤིན་ཏུ་རྙིང་པ་ཞིག་ཡིན་པ་རྟོགས་ཐུབ། ལར་ནས་བྷེ་རྗམ་འདི་དམག་འཁྲུག་གཉིས་པའི་སྐབས་བར་གནས་རྒྱལ་ཁབ་ཀྱི་ཚུལ་དུ་གནས་ཐུབ་ཡོད་སྟབས། ལོ་རྒྱུས་ཀྱི་དུས་ཡུན་རིང་པོའི་ནང་རྒྱལ་ཁབ་འདི་ལ་དམག་འཁྲུག་གི་གཏོར་བཅོམ་བྱུང་མི་འདུག་པས། གནའ་བོའི་འཛུགས་བསྐྲུན་མང་ཆེ་བ་རྒྱུན་གནས་ཐུབ་ཡོད་ལུགས་བཤད།
ཕྱི་དྲོ་འདི་གའི་གྲོང་ཁྱེར་ནང་གནས་སྡོད་བྱེད་བཞིན་པའི་རྡོ་ར་ཚུལ་ཁྲིམས་ནང་མིས་གོ་སྒྲིག་བྱས་འདུག་པ་ལྟར་ངེད་གཉིས་དེ་གར་ཕྱིན། དགོང་མོ་ཆུ་ཚོད་བརྒྱད་པ་ཡས་མས་བར་ང་ཚོ་ལྷོད་སྡོད་བྱས་ཤིང་། དེ་ནས་ངེད་གཉིས་ལམ་ལ་ཐོན་ཏེ་ཕྱིར་ཨན་ཊའོ་ཕེན་ Antwerpen ལ་ཡོང༌། དར་རྒྱས་རྒྱ་མཚོ་རླང་འཁོར་གཏོང་རྒྱུར་གོམས་ཆ་འདུག་པར་མ་ཟད། ལམ་བཟང་བའི་ཐོག་ཁོང་གིས་རླངས་འཁོར་ཤིན་ཏུ་འཇམ་པོ་གཏོང་གི་འདུག་པས་ངེད་གཉིས་གང་དུ་ཕྱིན་ཡང་དཀའ་ངལ་གཏན་ནས་མ་བྱུང་། འགྲུལ་བཞུད་རིང་ངེད་གཉིས་ཀྱིས་གླེང་མོ་སྣ་ཚོགས་བྱས་པའི་བརྒྱུད་རིམ་ནས། ཁོ་ཡོ་རོབ་ཏུ་འབྱོར་བའི་ལོ་ངོ་བདུན་བརྒྱད་འདིའི་རིང་ལོ་ན་ལ་དཔག་པའི་ཉམས་མྱོང་ཤིན་ཏུ་ཕུན་སུམ་ཚོགས་པར་གྱུར་འདུག་པར་མ་ཟད། ཁྲིམས་ལུགས་དང་ཡུལ་གྱི་གོམས་པའི་གཤིས་ལུགས་ལ་ཡང་གོ་རྟོགས་ངེས་ཅན་བརྙེས་འདུག་པའི་ཚུལ་མཐོང་བ་ན་བློ་གདེང་འཕེར་བའི་སྤྲོ་སྣང་ཞིག་བྱུང་།
ཁོའི་རང་གཤིས་ལ་ཕྱི་ནང་གི་མི་སུ་ལ་ཡང་ཁ་ཡག་ངོ་དགའ་ཤོད་པའི་ལུགས་མེད་ཀྱང་། ལས་དོན་ཆེ་ཆུང་ཀུན་གྱི་ཐོག་ཤིན་ཏུ་གཟབ་ནན་བྱེད་མཁན་ཞིག་ཡིན་པ་ངས་ཤེས་ཀྱི་ཡོད། ངེད་གཉིས་ལུང་པ་དང་གྲོང་ཁྱེར་གང་དུ་ཕྱིན་ཡང་ཁོང་གིས་ངའི་ཡུལ་སྐོར་སྤྲོ་སྣང་ལྡན་པ་ཡོང་བར་ཤིན་ཏུ་གཟབ་ནན་བྱེད་ཀྱི་འདུག་ཅིང་། ཁོའི་ལས་དོན་ཆེ་ཆུང་ཀུན་གྱི་ཐོག་བཅོས་མའི་གཡའ་ཏིལ་ཙམ་མཐོང་དུ་མེད་ལ། འདི་ནི་མི་མང་པོ་ཞིག་གིས་ཁོང་ལ་བློ་ཐག་ཉེ་བོ་བྱེད་པའི་མི་གཞིའི་གཏིང་རིམ་གྱི་ཡོན་ཏན་གཙོ་བོ་ཞིག་ཡིན་པ་སྨོས་མ་དགོས།
གང་ལྟར་དུས་ཡུན་བདུན་ཕྲག་གཅིག་ལྷག་རིང་ངེད་གཉིས་མཉམ་འགྲོ་མཉམ་འདུག་དང༌། ནང་མའི་གླེང་མོ་སྣ་ཚོགས་བྱེད་ཐུབ་པ་བྱུང་བ་ནི་ཤིན་ཏུ་སྐྱིད་སྣང་ལྡན་པ་ཞིག་ཏུ་ཚོར་བྱུང་ལ། བྱེས་ཀྱི་ནང་མི་ལྷན་འཛོམས་ཀྱི་དུས་ཐུང་འདི་ནི་ང་ལ་མཚོན་ན་ཤིན་ཏུ་སྤྲོ་སེམས་འཁོལ་བའི་མི་ཚེའི་ཆ་ཤས་ཤིག་ཏུ་ངོས་འཛིན་བྱེད་དགོས་པ་བྱུང་།
ཕྱི་ཟླ་ ༧ ཚེས་ ༥ ཉིན་གྱི་ཞོགས་པ་ཨན་ཊའོ་ཕེན་ནས་བྷེ་རྗམ་གྱི་རྒྱལ་ས་དང༌། ཡོ་རོབ་མཉམ་འབྲེལ་གྲོས་ཚོགས་དང་ཡོ་རོབ་མཉམ་འབྲེལ་སྒྲིག་འཛུགས་ཀྱི་ལྟེ་གནས་ཡིན་པའི་ Brussels བྷུ་རུ་སལ་ལ་ཕྱིན། ཉིན་འདིར་ངའི་གྲོགས་པོ་སྒང་ཚ་འོད་ཟེར་ལགས་ཆེད་མངགས་ང་ལ་རོགས་པར་ཡོང་ཡོད་སྟབས། ངེད་གཉིས་ཐོག་མར་ Ttomium ཞེས་པའི་ལྕགས་སྒོང་གིས་སྦྲེལ་བའི་མཆོད་རྟེན་ལྟ་བུ་སྙན་གྲགས་ཅན་ཞིག་འདུག་པ་དེ་ལ་ལྟ་བར་ཕྱིན། འདི་ལ་ལོ་རྒྱུས་ཀྱི་དོན་སྙིང་ཆེན་པོ་ཡོད་མེད་གང་ལྟར་ཡང་བཟོ་བཀོད་དང་ཁྱད་ཆོས་ནི་བཤད་མི་ཤེས་པ་ལྟ་བུ་ཞིག་འདུག འདིའི་དཀྱིལ་ནས་ཡར་མར་སྐྱེལ་བྱེད་ཀྱི་འཐེན་སྐས་ཤིག་འདུག་པ་ནི། འཛམ་གླིང་གི་འཐེན་སྐས་མགྱོགས་ཤོས་ཡིན་ཞེས་སྣེ་ཤན་པ་རྣམས་ཀྱིས་འགྲེལ་བཤད་བྱེད་ཀྱི་འདུག གང་ལྟར་འོད་ཟེར་དང་ངེད་གཉིས་ཀྱིས་ལྕགས་སྒོང་སྦྲེལ་བའི་མཆོད་རྟེན་ལྟ་བུ་འདིའི་སྟེང་འོག་ཡོངས་རྫོགས་ལ་ལྟ་སྐོར་གྲུབ་པའི་རྗེས། འདིའི་ཉེ་འགྲམ་དུ་ Mini Europe ཞེས་པའི་སྤྱི་གླིང་ཆུང་ངུ་ལྟ་བུ་ཞིག་འདུག་ཅིང་། འདིའི་ར་སྐོར་དུ་ཡོ་རོབ་གླིང་གི་སྙན་གྲགས་ཅན་གྱི་འཛུགས་སྐྲུན་མང་ཆེ་བའི་མཚོན་བྱེད་རེ་བཟོས་འདུག མཚོན་བྱེད་འདི་དག་གི་གནས་སྟངས་ལ་ཞིབ་ཏུ་ལྟ་ཐུབ་ན་ཡོ་རོབ་སྤྱི་ཡོངས་ཀྱི་གནས་སྟངས་རོབ་ཙམ་རྟོགས་ཐུབ་པའི་དགེ་མཚན་ལྡན་པ་ཞིག་འདུག
ཉིན་གུང་ཡོལ་བའི་སྐབས་ཤིག་ལ་བྷེ་རྗམ་བོད་ཀྱི་ཤེས་རིག་འཛིན་སྐྱོང་ཁང་གི་དྲུང་ཆེའི་འགན་བཞེས་བཞིན་པ་ངའི་གྲོགས་པོ་འབྲིང་བ་འཇིགས་མེད་ལགས་ང་ཚོས་དུས་ཚོད་གོ་སྒྲིག་བྱས་པ་ལྟར་སླེབས་པས། ང་ཚོ་མཉམ་དུ་ཡོ་རོབ་མཉམ་འབྲེལ་གྲོས་ཚོགས་ཁང་དུ་ཕྱིན། ཡོ་རོབ་མཉམ་འབྲེལ་གྲོས་ཚོགས་སུ་ལྟ་སྐོར་བྱ་རྒྱུ་ནི་ལྗི་ནེ་ལྦ་ལ་ཡོད་པའི་མཉམ་འབྲེལ་རྒྱལ་ཚོགས་སུ་འགྲོ་བ་ལྟ་བུའི་དམ་དྲགས་མི་འདུག་ལ། འདིར་ཡོ་རོབ་མཉམ་འབྲེལ་གྲོས་ཚོགས་ཀྱི་ཚོགས་ཁང་ལྟེ་བ་ཞིག་ཡོད་པ་དེ་མ་གཏོགས་གཞན་པ་འགྲེམས་སྟོན་ལྟ་བུའི་རིགས་གང་ཡང་མི་འདུག
དེ་ནས་བྷེ་རྗམ་གྱི་རྒྱལ་པོའི་རྒྱལ་ཁང༌གི་མདུན་བརྒྱུད་ནས་ཕྱིན་པའི་སྐབས། རྒྱལ་ཁང་ར་སྐོར་ནང་དུ་དམག་མི་འགའ་ཤས་ཀྱིས་རུ་སྒྲིག་ལྟ་བུས་དམག་རྩེད་བྱེད་ཀྱི་འདུག ངས་ཤེས་ཚོད་ལྟར་ན་བདུན་ཕྲག་རེའི་ནང་ཐེངས་རེར་རྒྱལ་པོ་དང་གཞུང་གི་ཆབ་སྲིད་དབུ་ཁྲིད་གཉིས་རྒྱལ་ཁང་འདིར་ལྷན་འཛོམས་གནང་གི་ཡོད་ལུགས་ཟེར། གང་ལྟར་ང་ཚོས་འཆར་གཞི་བསྒྲིགས་པ་ལྟར་རིམ་པས་ལྟ་སྐོར་བྱས་ནས་ཕྱིན་པ་ཡིན་ལ། གྲོང་ཁྱེར་གྱི་སྲང་མདོ་ཞིག་ཏུ་མཱ་ཁེ་སི་ཕྱག་ཏུ་དཔེ་དེབ་བཟུང་འདུག་པའི་འབག་སྐུ་ཞིག་བཞེངས་འདུག་ལ། འབག་སྐུ་དེ་ཕར་ལྟས་ཚོད་ཀྱིས་སྐྱོ་ཉམས་ལྡན་པའི་ཐོག་ཁྱི་ཞིག་གིས་མཱ་ཁེ་སིའི་བུས་མོའི་སྟེང་ལ་དྲི་མ་སྣོམ་བཞིན་ཡོད་པ་ཞིག་ཀྱང་བཟོས་འདུག་པས། སྐབས་དེར་མཱ་ཁེ་སི་འཚོ་གོས་ཀྱི་གནས་སྟངས་ཤིན་ཏུ་དཀའ་ངལ་ཆེན་པོའི་འོག་ཏུ་ཡོད་པ་མཚོན་ཐུབ་སྙམ། ལར་ནས་མཱ་ཁེ་སིའི་ལོ་རྒྱུས་ལ་ལྟ་མྱོང་མཁན་ཞིག་ཡིན་ན་གསལ་པོར་མཁྱེན་ངེས་ལྟར། ཁོང་ནི་བོད་ཀྱི་མཁས་དབང་དགེ་འདུན་ཆོས་འཕེལ་གྱི་གནས་སྟངས་དང་འདྲ་བར། མི་ཚེ་ཧྲིལ་པོར་འཚོ་བ་ངན་ངོན་ལ་བརྟེན་དགོས་བྱུང་བར་མ་ཟད། མཁས་བླུན་མང་པོ་ཞིག་གིས་ལྟ་ལོག་པར་ངོས་འཛིན་དང་འུད་སྒྲོག་བྱས་ཏེ། མི་གྲལ་ནས་ཕུད་པས་མི་ཚེ་སྨད་མང་ཆེ་བ་ཁེ་རྐྱང་དང་དབུལ་ཕོངས་ཀྱི་འཚོ་བ་སྐྱེལ་དགོས་བྱུང་ཡོད།
དེ་ནས་ཐག་མི་རིང་བའི་སྲང་ལམ་ཁུག་ཀྱོག་ཅིག་ན་བྱིས་པ་ལོ་གཉིས་གསུམ་གྱི་ཚད་གཞི་ཅན་ཞིག་གིས་གཅིན་པ་གཏོང་བཞིན་པའི་རྡོ་སྐུ་ཞིག་བཞེངས་འདུག་ཅིང༌། འདི་ནི་འཛམ་གླིང་དམག་ཆེན་དང་པོའི་སྐབས་བཙན་འཛུལ་བས་ས་གནས་འདིར་འབར་གས་འགེད་རྩིས་ཀྱིས་མེ་རྟ་ལ་མེ་སྒྲོན་ནས་འགས་འཐོར་འབྱུང་ལ་ཉེ་བའི་སྐབས། བྱིས་པ་ཞིག་གིས་མེ་རྟའི་ཐོག་གཅིན་པ་བཏང་སྟེ་མེ་སད་པར་བརྟེན་མི་ཁྲི་ཕྲག་མང་པོའི་ཚེ་སྲོག་སྐྱོབ་ཐུབ་པ་བྱུང་ཡོད། དེར་བརྟེན་བྱིས་པ་འདིའི་དྲན་རྟེན་ལྟ་བུར་གཅིན་པ་གཏོང་བཞིན་པའི་རྡོ་སྐུ་འདི་བཞེངས་པ་ཡིན་འདུག་
སྤྱིར་བྷེ་རྗམ་གྱི་གནའ་སྔ་མོའི་ལོ་རྒྱུས་ཐོག་ནས་བཤད་ན། འཛམ་གླིང་ཐོག་མི་སེར་སྤེལ་བའི་ལམ་ལུགས་ཐོག་མར་གསར་གཏོད་དང༌། ལག་བསྟར་བྱེད་མཁན་ཨང་དང་པོ་བྷེ་རྗམ་ཡིན་པའི་ལོ་རྒྱུས་འདུག་ལ། ཕྱིས་སུ་དུས་རབས་བཅུ་དགུ་པའི་ནང་བཟོ་ལས་གསར་བརྗེ་བྱེད་མཁན་གྱི་རྒྱལ་ཁབ་གཙོ་གྲས་ཤིག་ཀྱང་བྷེ་རྗམ་ཡིན་པའི་ལོ་རྒྱུས་ཡོད། དེ་ལྟར་ན་བྷེ་རྗམ་འདི་གནའ་སྔ་མོ་ནས་འཛམ་གླིང་གི་ལོ་རྒྱུས་ཀྱི་འགྱུར་བ་མང་པོ་ཞིག་གི་སྣེ་ཁྲིད་པའི་ཚུལ་དུ་ཡོང་མྱོང་ཡོད་པ་གསལ་ཡང༌། རྒྱལ་ཁབ་ཆུང་བའི་སྟབས་ཀྱིས་ཡིན་ནམ་གང་ལྟར་གཡས་གཡོན་གྱི་རྒྱལ་ཁབ་ཕལ་ཆེ་བའི་དབང་སྒྱུར་འོག་ཐེངས་མ་མང་པོར་གནས་དགོས་བྱུང་འདུག
བྷེ་རྗམ་གྱི་དཔལ་འབྱོར་གྱི་རྟེན་གཞི་གཙོ་བོ་ནི། མཚོ་ལམ་གྱི་སྐྱེལ་འདྲེན་དང༌། རིན་པོ་ཆེའི་རིགས་ཀྱི་ལས་སྣོན་ལག་རྩལ། རྡོ་སྣུམ། བཟའ་བཏུང་གི་རིགས་སྣ་ཚོགས་ཀྱི་རྒྱུ་ཆ་དང་ལག་རྩལ་སོགས་ཡིན་འདུག་ཅིང༌། དཔེར་ན། དེང་སང་རྒྱལ་ཁབ་གང་སར་དར་ཁྱབ་ཆེ་བའི་ཨ་ལོ་སིལ་བུ་སྣུམ་སྲེག་French fries ཞེས་པའི་ལག་རྩལ་འདི་ཐོག་མར་བྷེ་རྗམ་ནས་བྱུང་བ་རེད་འདུག ཁོང་ཚོས་བཤད་སྟངས་བྱས་ན་ཨ་ལོ་ཐོག་མར་བཟའ་ཆས་ཀྱི་རིགས་སུ་རྙེད་སོན་བྱུང་མཁན་ཨ་མེ་རི་ཀ་ཡིན་པ་དང༌། སྣུམ་སྲེག་གི་ལག་རྩལ་འདི་ཐོག་མར་བྷེ་རྗམ་པས་གསར་གཏོད་བྱས་པ་ཡིན་ཟེར། དེའི་མཚོན་རྟགས་ལྟ་བུར་བྷ་སའི་གྲོང་ཁྱེར་ནང་ཐེངས་དང་པོ་ཨ་ལོ་སིལ་བུ་སྣུམ་སྲེག་གི་ལག་རྩལ་སྤེལ་ས་རེད་ཅེས་པའི་ས་གནས་ཤིག་འདུག་ལ། འདིར་དེང་སང་ཡང་ཐབ་ཀ་དམིགས་བསལ་ཆེན་པོ་ཞིག་གི་ཐོག་ཨ་ལོ་སྣུམ་སྲེག་བྱེད་བཞིན་མཆིས།
གཞན་ཡང་རི་མོའི་མཛེས་རྩལ་དང༌། བརྐོ་རིས་མཛེས་རྩལ། ཁང་བཟོའི་ལག་རྩལ། ལྦུ་ཆང༌གི་རིགས། ཅོ་ཁོ་ལེ་ཀྲི་ Chocolatier བཅས་ནི་བྷེ་རྗམ་རྒྱལ་ཁབ་ཀྱི་རིག་གཞུང་དང་ཁྱད་ཆོས་ཀྱི་ངོ་བོ་མཚོན་བྱེད་ལྟ་བུར་ངོས་འཛིན་བྱེད། དཔེར་ན། བྷེ་རྗམ་ལ་ལྦུ་ཆང་རིགས་མ་འདྲ་བ་སྟོང་ཕྲག་ལྷག་ཡོད་པའི་ཤོད་རྒྱུན་འདུག་ཅིང་། བྷེ་རྗམ་ལ་འདི་ལྟར་ལྦི་ཆང་གི་རིགས་མ་འདྲ་བ་མང་པོ་ཡོད་དགོས་པའི་རྒྱུ་མཚན་ནི། བྷེ་རྗམ་གྱི་འཐུང་ཆུ་དེ་ཙམ་བཟང་རྒྱུ་མེད་པར་བརྟེན་བཏུང་བའི་རིགས་ལ་རྫས་འགྱུར་གྱི་ཐོག་ནས་བཅོས་བརྒྱབས་པ་རེད་ཟེར་བའི་ཤོད་རྒྱུན་མཆིས། གང་ལྟར་ད་ལྟའི་ཆར་བྷེ་རྗམ་གྱི་དཔལ་འབྱོར་གནས་སྟངས་འཛམ་གླིང་གི་དཔལ་འབྱོར་ཡར་རྒྱས་ཀྱི་ཨང་བཅུ་པར་སླེབས་ཡོད་འདུག
བྷེ་རྗམ་གྱི་སའི་རྒྱ་ཁྱོན་ནི་སྤྱི་ལེ་གྲུ་བཞི་མ་ ༣༠.༥༢༨ དང༌། མི་འབོར་ ༡༡.༡༩༨.༦༣༨ཡོད་འདུག་ཅིང་། རྒྱལ་ཁབ་འདི་སྐད་ཡིག་གསུམ་དང་ས་ཁུལ་གསུམ་གྱིས་གྲུབ་པའི་མཉམ་འབྲེལ་གྱི་རྒྱལ་ཁབ་ཅིག་ཡིན་པ་དང༌། སྐད་ཡིག་གསུམ་ནི་ནེའུ་རྡི་ལན་ཀྲི་དང༌། ཧྥ་རན་སི། འཇར་མན་བཅས་ཀྱི་སྐད་ཡིག་ཡིན་པ་ལས། གཞུང་འབྲེལ་གྱི་སྐད་ཡིག་དང་མང་ཚོགས་ཁྲོད་བཀོལ་སྤྱོད་ཆེ་ཤོས་ནེའུ་རྡི་ལན་ཀྲིའི་སྐད་ཡིག་ཡིན་འདུག
བྷེ་རྗམ་ནང་གནམ་བདག་ཆོས་ལུགས་དང༌། ཡི་ཤུའི་ཆོས་ལུགས། ཁ་ཆེ་ཆོས་ལུགས། རྗེའུ་ཆོས་ལུགས་སོགས་ཆོས་ལུགས་མ་འདྲ་བ་སྣ་ཚོགས་ཡོད་པ་ལས། གཞུང་འབྲེལ་གྱི་ཆོས་ལུགས་དང་ཆོས་ལུགས་ཁྱབ་ཆེ་ཤོས་ནི་གནམ་བདག་ཆོས་ལུགས་ཡིན།
ཡོ་རོབ་ཀྱི་ས་གནས་གང་འདྲ་ཞིག་ཏུ་སོང་ཡང་ཁ་ཆེ་མེད་ས་ཕལ་ཆེར་མེད་ཅིང༌། བྷེ་རྗམ་ནང་ཁ་ཆེ་བའི་གྲངས་ཚད་ཤིན་ཏུ་མཐོ་བོར་སླེབས་ཡོད་ཀྱང༌། ཁ་ཆེ་ལྷ་ཁང་ཞིག་གཏན་ནས་མཐོང་རྒྱུ་མི་འདུག་པ་ནི་རང་བཞིན་གྱིས་བསམ་བློ་གཏོང་དགོས་པའི་གནས་ཚུལ་ཞིག་ཆགས་ཀྱི་འདུག་
ཕྱི་ཟླ་ ༧ ཚེས་ ༦ ཉིན་གྱི་སྔ་དྲོ་བྷ་རུ་སལ་རྒྱལ་སྤྱིའི་གནམ་ཐང་ནས་ར་ཤི་ཡའི་རྒྱལ་ས་མོ་སུ་ཁོ་བརྒྱུད་ནས་ཕྱིར་རྒྱ་གར་ལ་ཡོང༌།
རྒྱལ་སྤྱིའི་བོད་རིག་པའི་ཚོགས་ཆེན་ཐེངས་བཅུ་བཞི་པར་བསྐྱོད་པའི་སྐབས་ཀྱི་མཐོང་ཐོས་འགའ་ཤས་ཞེས་པའི་དྲན་ཐོ་རེ་ཞིག་མཇུག་གྲུབ་པར་བྱས་པ་ཡིན་ལ། འདི་ནི་ཡུལ་དངོས་སུ་ཟིན་ཐོ་བཀོད་པའི་གནས་ཚུལ་རྣམས་དྲན་ཐོ་རྩོམ་ཡིག་གི་ལུགས་འགོད་པའི་ཚོད་ལྟའི་ཆེད་བཀོད་པ་ལས་ཆེད་དུ་ཞིབ་འཇུག་བྱ་རྒྱུ་བྱུང་མེད། འོན་ཀྱང་གནས་ཚུལ་སྣ་ཚོགས་ཀྱི་རིགས་ཀྱི་ལ་ཐུགས་སྣང་མཛད་མཁན་རིགས་ཤིག་ལ་ཅུང་ཟད་ཕན་ཡང་སྲིད་སྙམ་པས་སྤེལ་བ་དགེའོ།།
འབྲི་རྩོམ་གྱི་མཇུག་རྫོགས་བཅུག་པར་དགའ་སོང་། གཞན་ཅང་ཞུ་རྒྱུ་མེད།
ཚང་མ་བཀླགས། བོད་རིག་པའི་ཚོགས་འདུའི་སྐོར་བྲོ་བ་ཆེ་ཙམ་བྱུང་། གཞན་རྣམས་དེང་གི་དུས་ན་མ་ཤེས་མ་ཐོས་པའི་མི་ཞིག་ཨེ་སྲིད་ན། ཅིས་ཀྱང་སྲིད། བོད་མཐོ་སྒང་གི་ལ་ཁུག་ལུང་ཁུག་ན། ཐུགས་རྗེ་ཆེ།
ཨ་ལོ་་་ཞོག་ཁོག་ཅེས་བྲིས་ན་མི་ལེགས་སམ།