རྔ་ཁུལ་གྱི་རང་གྲོལ་རྗེས་དྲན་ཐེངས་དང་པོ།

སྤྱི་ལོ་༢༠༡༣ལོའི་ཟླ་༢ཚེས་༢ཉིན་བོད་ཨ་མདོ་རྔ་བ་ནས་མི་བུ་ལྔ་བཅུ་ལྷག་གིས་གྲུབ་པའི་རང་གྲོལ་རྗེས་དྲན་སྐབས་དང་བོ་འཚོགས་ཡོད་ལ། རྗེས་དྲན་བགྲོ་གླེང་སྟེང་ནས་སོ་སོའི་རང་གྲོལ་ལ་བཟུང་བའི་ལྟ་ཚུལ་དང་རང་གྲོལ་གླེང་དགོས་པའི་རྒྱུ་མཚན་སོགས་ཕྱི་དྲོའི་དུས་ཚོད་དྲུག་ནས་དགོང་མོའི་དུས་ཚོད་དགུ་དང་སྐར་ཉི་ཤུའི་བར་བགྲོ་གླེང་བྱས་ཡོད། འདི་ནི་ང་ཚོ་བོད་ཨ་མདོ་རྔ་བའི་ལོ་རྒྱུས་གསར་བའི་ཤོག་ལྷེ་ཞིག་ཡིན་ཞེས་བརྗོད་ཀི་ཡོད།
གཤམ་ནས་གཏམ་གླེང་མི་སྣ་སོ་སོའི་གླེང་གཞིའི་ཁ་བྱང་དང་གནད་དོན་རགས་རིམ་ཙམ་འགོད་པར་བྱ།
སྔོན་གླེང་། མདོ་འཛིན་པ་བཙན་སྒྲ།
མདོ་འཛིན་པས་རང་གྲོལ་རྗེས་དྲན་ཚོགས་འདུ་དབུ་བཟུང་ཞིང་། རྗེས་དྲན་ཚོགས་འདུའི་འགྲིག་ལམ་དང་རྗེས་དྲན་བྱེད་དགོས་པའི་རྒྱུ་མཚན། དམིགས་ཡུལ་སོགས་གླེང་།
༡ མིང་།རྭ་འཕྲིན་ལས། ཁ་བྱང་། རང་གྲོལ་གྱི་ལོ་རྒྱུས་ངོ་སྤྲོད།
རང་གྲོལ་ལགས་ཀྱི་ལོ་རྒྱུས་སྤྱིའི་ཆ་ནས་གླེང་ཞིང་། བྱེ་བྲག་ཁོང་གི་བྱ་བཞག་སོགས་ཀྱི་སྟེང་ནས་གཏམ་བཤད་གནང་།
༢ བསེ་ཤེས་རབ། ཁ་བྱང་། ཤེས་རབ་ཀྱིས་རང་གྲོལ་གླེང་བ།
ང་ཚོས་རང་གྲོལ་མ་གླེང་ཐབས་མེད་ཡིན་པའི་རྒྱུ་མཚན་དང་། ཁོང་བསམ་བློ་གསར་བའི་སྣེ་ཁྲིད་པ་དང་རྩོམ་རིག་ལ་ཡང་བྱས་རྗེས་བླ་ལྷག་བཞག་ཡོད་པའི་སྐོར་དང་། ཁོང་གིས་རང་སྲོག་རང་གིས་བཅད་པར་ཡིད་སྐྱོ་ཞིང་། དེ་ནི་རང་གྲོལ་ལགས་ཀྱི་སྐྱོན་དུ་བལྟས་པ་སོགས་གླེང་།
༣ མཁའ་དབྱིངས། ཁ་བྱང་། རང་ཉིད་ཡིད་ལ་འཇོག་པ།
ང་ཚོས་རང་གྲོལ་དྲན་དགོས་པའི་རྒྱུ་མཚན་གཉིས་སྟེ། ཁོང་རྩོམ་རིག་གསར་པའི་ཤིང་རྟའི་སྲོལ་འབྱེད་དང་། ཁོང་གིས་སྒེར་གཅོད་ལ་རྒོལ་བའི་སྙིང་སྟོབས་སོགས་ཀྱི་སྟེང་ནས་གཏམ་བཤད་གནང་།
༤ དགའ་ལྡན་བརྩོན་འགྲུས། ཁ་བྱང་། རང་གྲོལ་གྱི་སྙིང་སྟོབས།
རང་གྲོལ་གྱིས་དུས་བབས་དེ་འདྲ་ཞིག་གི་འོག་ནས་སྤྲུལ་སྐུ་ངེས་པར་གླེང་དགོས་པའི་རྒྱུ་མཚན་སོགས་གཙོ་བོ་སྒྲུང་རྩོམ་ཕྱོགས་ནས་གླེང་།
༥ གླག་སྒྲོ། ཁ་བྱང་། རང་གྲོལ་གཡུལ་ལ་ཞུགས་ཚུལ།
ཨ་མདོ་རྔ་བ་ནས་སླར་ཡང་རང་གྲོལ་དྲན་དགོས་པའི་རྒྱུ་མཚན་དང་། ཁོང་གིས་སྤྱི་ཚོགས་ཀྱི་གནོན་ཤུགས་མང་པོ་ཞིག་མ་ཐེག་པ་ཁོང་གི་སྐྱོན་དུ་བཟུང་ནས་གླེང་བ།
༦ གནམ་ལྷུན། ཁ་བྱང་། རང་གྲོལ་ལས་འཕྲོས་ཏེ་དངོས་ཡོད་འཚོ་བའི་དགེ་སྐྱོན་གླེང་བ།
རང་གྲོལ་ལགས་དེང་གི་དུས་དང་བསྟུན་ནས་དེང་གི་བསམ་བློ་གསར་བའི་སྣེ་ཁྲིད་པ་ཡིན་མིན་ལ་མི་འཐད་པའི་ཚུལ་གླེང་བ་དང་། ཁོང་གི་སྒྲུང་རྩོམ་སྤྲུལ་སྐུའི་སྐོར་ནས་གཏམ་བཤད་གནང་།
༧ གསའ་རང་འབར། ཁ་བྱང་། རང་གྲོལ་ལ་བཟུང་བའི་ལྟ་ཚུལ།
རང་གྲོལ་རང་ཉིད་ཀྱི་དུས་སུ་བསམ་བློ་གསར་བའི་སྣེ་ཁྲིད་པ་སོགས་སུ་བརྩི་རུང་ན་ཡང་། ད་ལྟ་ང་ཚོའི་དུས་རབས་འདིའི་ནང་དུ་དེས་ཚབ་བྱེད་དུ་མེད་པ་སོགས་གླེང་བ།
༨ རྒྱུ་ཙ་སྐམ་པོ། ཁ་བྱང་། ཁ་བྱང་མ་རྙེད་པའི་རང་གྲོལ།
རང་གྲོལ་ལོ་རྒྱུས་གསར་བའི་དབུ་འཁྱུད་ཡིན་པ་བདེན་པའི་རྒྱུ་མཚན་དང་། ཁོང་མི་རབས་ཤིག་གི་སྙིང་གསོན་པོ་ཡིན་པའི་རྒྱུ་མཚན་སོགས་ཁོང་ལ་གུས་འདུས་དང་བཅས་གཏམ་གླེང་མཛད།
༩ དགོན་ཚེ། ཁ་བྱང་། རང་གྲོལ་གླེང་དགོས་པའི་རྒྱུ་མཚན།
ཅི་ཞིག་ལ་རང་གྲོལ་གླེང་བའི་ཆ་ནས་གླེང་གཞི་གཙོ་བོ་གཅིག་དང་ཕལ་བ་གཅིག་གི་སྒོ་ནས་གླེང་བ།
༡༠ དོན་ཁོ། ཁ་བྱང་། མེད།
རང་གྲོལ་ལགས་བསམ་བློ་གསར་བརྗེ་བ་མཐུས་ཚང་མ་ཡིན་པ་དང་། ཁོང་ལ་མཐོང་ཆེན་བྱེད་དགོས་པའི་རྒྱུ་མཚན་ཁོང་གི་ཚོར་བ་ཟབ་མོ་དེས་དབང་གིས་རང་སྲོག་བློས་བཏང་བ་སོགས་གླེང་།
༡༡ རྭ་རྩེ་དམར། ཁ་བྱང་། དུས་རབས་ཀྱི་མེ་སྟག
རང་གྲོལ་ལགས་ཀྱི་ཤི་རྐྱེན་ལས་འཕྲོས་ཏེ། མི་སོ་སོའི་ལྟ་ཚུལ་སོགས་གླེང་གཞི་བྱས་པ།

༡༢ བློ་མིག ཁ་བྱང་། ལག་དམར་དེ་སུ་རེད།
ང་ཚོ་རྗེས་དྲན་བྱེད་པར་མི་དགའ་བའི་སྐོར་དང་། རང་གྲོལ་ལགས་སྲོལ་རྒྱུན་གྱིས་བཀྲོངས་སོང་བ་དང་། རང་གྲོལ་ལགས་ལ་མི་གཞིའི་གས་ཁ་མེད་པ་སོགས་གླེང་།
༡༣ ཁྲག་ཐིགས། ཁ་བྱང་། རང་གྲོལ་ལས་འཕྲོས་པའི་ལྟ་ཚུལ་ཐུང་ངུ་།
སྤྱི་ཚོགས་འདི་ལ་དོ་ཁུར་བྱེད་པའི་རིགས་ཀྱིས་ཁོང་ལ་རྗེས་དྲན་མི་བྱེད་ཅིང་། ཁོང་བསམ་བློ་བ་མིན་པའི་སྐོར་སོགས་གླེང་།
༡༤ ཨ་ཚབ་འཇམ་དཔལ། ཁ་བྱང་། རང་གྲོལ་ལས་འཕྲོས་པའི་བསམ་ཚུལ།
རང་གྲོལ་ལགས་གསར་བཏོད་པ་དང་བསམ་བློ་བ་ཡིན་ལ། བོད་ཀྱི་ལོ་རྒྱུས་ཁྲོད་ན་གསར་བཏོད་པ་དང་བསམ་བློ་བ་ཡིན་པའི་སྐོར་སོགས་གླེང་།
༡༥ བཙན་སྒྲ། ཁ་བྱང་། རང་གྲོལ་ལ་གྱེས་བརྡ་གཏོང་བ།
རྩོམ་རིག་གི་སྟེང་ལ་གསར་བཏོད་བཏང་ཡོད་པ་དང་། དེ་རིང་ནས་ང་ཚོས་རང་གྲོལ་ལ་གྱེས་བརྡ་གཏོང་དགོས་པའི་རྒྱུ་མཚན་སོགས་གླེང་།
༡༦ ཧོར་བསྟན། ཁ་བྱང་། དོན་འགྲུལ་རྒྱལ་ལ་བཟུང་བའི་ལྟ་ཚུལ།
ལོ་རབས་བརྒྱད་ཅུ་དང་དེང་གི་དུས་རབས་བསྡུར་སར་མི་འགྲོ་བས་ཁོང་ལ་ལྟ་ཚུལ་གླེང་བ།
༡༧ ཇོ་ཤེར། ཁ་བྱང་། རང་གྲོལ་དང་འབྲེལ་བའི་ཁ་བརྡ།
བློ་འབྱེད་ཀྱི་ཆ་དང་གསར་བཏོད་ཀྱི་ཆ་སོགས་ནས་ཁོང་གླེང་དགོས་པའི་རྒྱུ་མཚན་དང་། རང་གྲོལ་དང་འབྲེལ་ནས་སྤྱི་ཚོགས་གླེང་དགོས་ན་སྤྱི་ཚོགས་ཀྱི་ཁ་གཏད་དུ་འགྲེང་ཐུབ་མིན་སོགས་ཀྱི་སྐོར་ནས་གླེང་།
༡༨ འཕྲིན་ལས། ཁ་བྱང་། རང་གྲོལ་གྱིས་སྟེར་བའི་བློ་སྐྱེད།
རྗེས་དྲན་འདི་དང་དེ་ལྟ་བུ་ལ་བྱེད་དགོས་ན། མང་བོ་ཞིག་ལ་རྗེས་དྲན་བྱེད་དགོས། དེ་ལྟར་ཡིན་ན་མི་སོ་སོའི་དུས་ཚོད་བརླག་འགྲོ་སྙམ་ན་ཕངས་འགྱོད་དང་། ཅི་ཞིག་ལ་བློ་སྐྱེད་ཟེར་ན་ཁོང་གི་བརྩམ་ཆོས་དག་གིས་གནང་བ་སོགས་གླེང་།
༡༩ གདུ་འཕྱུར། རང་གྲོལ་དང་སྙན་ངག་གླེང་བ།
ཁོང་སྙན་ངག་པ་ཡིན་མིན་གྱི་སྐོར་ནས་ཁོང་སྙན་ངག་པ་མ་ཡིན་པའི་རྒྱུ་མཚན་སོགས་གླེང་བ།
༢༠ ཨ་མདོ་བློ་གྲོས། ཁ་བྱང་། རང་གྲོལ་དང་བློ་འབྱེད་བཤད་པ།
རང་གྲོལ་ལགས་བློ་འབྱེད་པའི་མི་སྣར་གླེང་བར་མི་འཐད་པའི་སྐོར་དང་། ཁོང་འཆི་རྐྱེན་ཐད་ནས་ཁོང་ཤི་བ་སྔ་མེད་པའི་སྐོར་སོགས་གླེང་།
༢༡ རྔ་འབྲུག ཁ་བྱང་། བསམ་བློའི་འཐབ་མོ་བ།
དུས་རབས་གཉིས་ཀྱི་བར་མཚམས་ནས་ཁོང་ལ་རྗེས་དྲན་བྱེད་དགོས་པའི་རྒྱུ་མཚན་སོགས་གླེང་།
༢༢ ལོ་པེ། ཁ་བྱང་།ང་དང་ཁྱོད་ཀྱི་རྙེད་དོན་དུ་གྱུར་བའི་རང་གྲོལ་གཉིས།
རང་གྲོལ་བཤད་དགོས་པའི་རྒྱུ་མཚན་ཁོང་ལ་མི་དྲི་བྲོ་བ་དང་། གསར་བཏོད་པ་སོགས་མིན་པའི་ཆ་གླེང་ཞིང་། ཁོང་ལ་སློབ་སྦྱོང་མི་བྱེད་པའི་རྒྱུ་མཚན་སོགས་གླེང་བ།
མཇུག་མཐར་སྐད་ཆ་དེ་དག་ལ་ལྟ་ཚུལ་གྱི་བགྲོ་གླེང་མང་བོ་བྱས་ཤིང་མདོ་འཛིན་པས་བགྲོ་གླེང་གི་མཇུག་བསྡུས།

གསལ་བཤད།འདི་ནི་ཁོ་བོས་རང་ཚོད་ཀྱིས་ཟིན་བྲིས་སུ་བཏབ་པ་ཡིན་པས་འདི་ལ་ནོར་འཁྲུལ་གྱི་ཆ་སོགས་ཡོད་ན་གྲོགས་པོ་ཡོངས་ལ་དགོངས་དག་ཞུ་རྒྱུ་དང་། ལྷག་ཏུ་གཏམ་བཤད་མི་སྣ་དག་གིས་སྐྱོན་བརྗོད་དང་བཟོད་སྒོམ་ཐེངས་ཤིག་ཅེས་འབོད་ཀི་ཡོད་དོ།།

མཁོ་སྤྲོད་པ་བློ་བཟང་ཆོས་འཛིན།