ཕྱི་ལོ་ ༢༠༡༡ ཟླ་ ༨ ཚེས་ ༣༠ ཉིན་བོད་ཨ་མདོ་རྔ་པ་རྫོང་གཅའ་ཞང་ཕྱུགས་ལས་འགབ་མའི་བློ་བཀྲ་ཚང་གི་རྔ་པ་ཀིརྟི་དགོན་པའི་གྲྭ་བློ་བཟང་བསྟན་འཛིན། (བསྟན་འཛིན་རྒྱ་མོ་ཁ་)རང་ལོ་ ༢༢ ཕ་མིང་ལ་བསོད་ནམས་དང༌། མ་མིང་ལ་སྒྲོལ་དཀར་ཡིན་པ་ཁོང་ལ་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་རྫོང་མི་མང་ཁྲིམས་ཁང་ཟེར་བས་རྒྱལ་གཅེས་དཔའ་བོ་ཕུན་ཚོགས་ལགས་གསོན་མཁན་ལག་རོགས་གྱི་ཉེས་མིང་གཡོགས་ནས་ལོ་ ༡༣ གྱི་བཙོན་འཇུག་དང༌། ལོ་གསུམ་གྱི་ཆབ་སྲིད་ཁེ་དབང་འཕྲོག་པའི་ཐག་གཅོད་བྱས་ཡོད་ཀྱང༌། ཁོང་གིས་ནག་ཉེས་ངོས་ལེན་བྱས་མེད་ནའང་བཙན་དབང་ཁོ་ནས་དེ་ལྟར་ཐག་གཅོད་བྱས་པ་ཞིག་ཀྱང་ཡིན་པར་མ་ཟད། རྒྱ་གཞུང་གི་བཀོད་སྒྲིག་བྱས་པའི་ཁྲིམས་རྩོད་པ་ཞིག་ལས་ནང་མི་ལ་ཁྲིམས་རྩོད་པ་གླ་རྒྱུའི་གོ་སྐབས་སོགས་རྩ་བ་ནས་སྤྲད་མེད་འདུག ཁོང་འདི་ལོའི་ཕྱི་ཟླ་ ༣ ཚེས་ ༢༣ ཉིན་ཀིརྟི་དགོན་པའི་ནང་ནས་འཛིན་བཟུང་གིས་ད་བར་གནས་ཚུལ་གང་ཡང་ཤེས་རྟོགས་མ་ཐུབ་པར་བཀག་ཉར་བྱས་ཤིང༌། འདི་ཟླའི་ཚེས་ ༢༨ ཉིན་འབར་ཁམས་ལ་ཐོན་དགོས་པའི་བརྡ་ཐོ་འབྱོར་ཡོད་པ་ལྟར་ཕ་བསོད་ནམས་སོང་ཡོད་འདུགཁོང་ཆུང་དུས་ནས་རྔ་པ་ཀིརྟི་དགོན་དུ་གྲྭ་པ་བྱས་ཤིང༌། བརྒྱུད་པ་གྲྭ་ཚང་གི་གྲྭ་པ་ཡིན་འདུག
དེ་བཞིན་རྔ་པ་རྫོང་གཅའ་ཞང་ནག་ཚང་མའི་པདྨ་ཚང་གི་རྔ་པ་ཀིརྟི་དགོན་གྱི་གྲྭ་བློ་བཟང་བསྟན་འཛིན། (ནག་བསྟན་)རང་ལོ་ ༢༡ ཕ་མིང་ལ་པདྨ་དང༌། མ་མིང་ལ་བསོད་སྒྲོན་ཡིན་པ་ཁོང་ལ་ཡང་གོང་ཚེས་ཉིན་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་རྫོང་མི་མང་ཁྲིམས་ཁང་ཟེར་བས་རྒྱལ་གཅེས་དཔའ་བོ་ཕུན་ཚོགས་ལགས་གསོད་མཁན་ལག་རོགས་གྱི་ཉེས་མིང་གཡོགས་ནས་ལོ་ ༡༠ བཙོན་འཇུག་དང༌།ལོ་གཉིས་ཀྱི་ཆབ་སྲིད་ཁེ་དབང་འཕྲོག་པའི་ཐག་གཅོད་བྱས་ཡོད་པར། རྒྱ་གཞུང་གི་བཀོད་སྒྲིག་བྱས་པའི་ཁྲིམས་རྩོད་པ་ཞིག་ལས་ནང་མི་ལ་ཁྲིམས་རྩོད་པ་གླ་རྒྱུའི་གོ་སྐབས་སོགས་རྩ་བ་ནས་སྤྲད་མེད་འདུག ཁོང་འདི་ལོའི་ཕྱི་ཟླ་ ༣ ཟླ་མཇུག་ཙམ་ལ་འཛིན་བཟུང་གིས་བཀག་ཉར་བྱས་པ་ནས་འདི་ཟླའི་ཚེས་ ༢༨ ཉིན་འབར་ཁམས་ལ་ཐོན་དགོས་པའི་བརྡ་ཐོ་འབྱོར་ཡོད་པ་ལྟར་ཁོང་གི་ཕ་མ་གཉིས་སོང་ཡོད་འདུག ཁོང་ཆུང་དུས་ནས་རྔ་པ་ཀིརྟི་དགོན་དུ་གྲྭ་པ་བྱས་ཤིང༌། མཚན་ཉིད་གྲྭ་ཚང་ཡིན་འདུག
བཞུགས་སྒར་ཀིརྟིའི་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༡ ཟླ་ ༨ ཚེས་ ༣༠ ལ།