རྗར་མེ་ནི་བོད་ཀྱི་ཁང་པར་༼རྒྱང་ལྟ་བྱ་དགའ༽ཐོབ་པ།

གནས་ཚུལ་མཁོ་གཏོང་བ། གངས་འདབས།

ཤེས་རིག་དང་། སྒྱུ་རྩལ། སྤྱི་ཚོགས་གཞན་ཕན་བཅས་ཀྱི་ལས་ཀར་འདི་ལོའི་Weitsichtpreisརྒྱང་ལྟའི་བྱ་དགའ་དེ་རྗར་མེ་ནི་བོད་ཀྱི་ཁང་པར་སྤྱི་ཟླ་བཅུ་གཅིག་པའི་ཚེས་དགུའི་དགོང་མོར་སྤྲད་སོང་། Dieter Glogowski ཡིས་བཙུགས་པའི་རྒྱང་ལྟའི་དུས་སྟོན་ཞེས་པ་དེ་ ༡༩༩༢ ནས་ལོ་རེར་གཉེར་སྲོལ་ཡོད་པ་ལས། དུས་སྟོན་དེའི་ཉིན་གཏམ་བཤད་དང་། དཔར་རིས་ Multi-Diashow མཉམ་སྦྱར་གྱིས་མི་རྣམས་ལ་ལྟད་མོ་སྟོན་གྱིན་ཡོད། གཏམ་བཤད་དང་། དཔར་རིས་ཀྱི་བརྗོད་བྱ་གཙོ་བོ་ཡུལ་སྐོར་བ་སོ་སོས་རང་ཉིད་ཡུལ་ཕྱོགས་གཞན་ལ་བསྐྱོད་པའི་མྱོང་བ་དང་། ས་ཕྱོགས་དེ་ཚོའི་ལོ་རྒྱུས། ཡུལ་ལྗོངས། མི་དམངས་ཀྱི་འཚོ་བ་སྐྱལ་སྟངས་ལ་སོགས་པ་རྗར་མན་གྱི་དམངས་ཁྲོད་ལ་སྟོན་པ་དང་། ངོ་སྤྲོད་བྱེད་པའི་རྒྱུན་སྲོལ་ཞིག་ཆགས་ཡོད།

ང་ཚོས་ལོ་རེར་སྤྲོད་བཞིན་པའི་རྒྱང་ལྟའི་དུས་སྟོན་གྱི་བྱ་དགའ་དེ་བཞིན་ད་ལོ་བོད་ཀྱི་ཁང་པར་ཕུལ་རྒྱུ་བྱུང་བར་དགའ་སྤོབས་ཆེན་པོ་བྱུང་། བོད་ཀྱི་ཁང་པས་གཉེར་བཞིན་པའི་བྱེད་སྒོ་ཁག་ལས་བོད་ཀྱི་རིག་གནས་ཤེས་བྱས་རྗར་མན་གྱི་སྤྱི་ཚོགས་དང་། མི་དམངས་ལ་ཕན་པ་རྒྱ་ཆེར་སྒྲུབ་བཞིན་ཡོད་པར་ངོས་འཛིན་མཚོན་ཆེད་ཡིན། ལྷག་པར་དུ་བོད་ཀྱི་ཁང་པས་བོད་ཀྱི་ཤེས་རིག་དེ་བཞིན་ང་ཚོའི་སྤྱི་ཚོགས་ནང་གོ་རྟོགས་དང་། ཤེས་རྟོགས་གཏིང་ཟབ་ཡོང་བར་བྱས་རྗེས་ངེས་ཅན་ཞིག་སྒྲུབ་བཞིན་འདུག་པས་ན། ང་ཚོས་བྱ་དགའ་འདི་སྤྲོད་རིན་ཡོད་པར་གདམས་པ་ཡིན།༽ཞེས་བོད་ཀྱི་གྲོགས་པོ་དང་། དུས་སྟོན་སྲོལ་གཏོད་པ་ཌི་ཊ་གོ་ལོ་གོ་དེ་ཀི་Dieter Glogowski ཡིས་གསུངས་སོང་།

རྒྱང་ལྟའི་དུས་སྟོན་གྱི་སྡིངས་ཆ་དེ་བརྒྱུད་བོད་དང་། བལ་ཡུལ། རྒྱ་གར་ལ་སོགས་པའི་སྐོར་མི་རྣམས་ལ་རྒྱུས་མངའ་ཡོང་རྒྱུར་ཕན་ཐོགས་ཆེན་པོ་བྱུང་ཡོད། ད་ལོ་ནི་དུས་སྟོན་དེ་མགོ་བཙུགས་ནས་ལོ་ཉི་ཤུ་འཁོར་བའི་རྟེན་འབྲེལ་གྱི་ཉིན་མོ་ཡིན་པ་དང་། བྱ་དགའ་སྤྲོད་པའི་དགོང་མོ་དེར་གསོལ་ཚིགས་དང་འབྲེལ་ཏེ་་གཞས་སྣ་ཁག་གཅིག་གོ་སྒྲིག་ཞུས་འདུག བོད་ཀྱི་གྲོགས་པོ་དང་། ལོ་མང་ནས་བོད་ཀྱི་ཁང་པར་ཐུགས་བཀུར་རྒྱབ་སྐྱོར་གནང་མཁན་ཌི་ཊྲར་ལ་སྙིང་དབུས་ནས་ཐུགས་རྗེ་ཆེ་ཞུ་རྒྱུའི་མཚོན། བྱ་དགའ་དེ་འདྲ་གནང་བ་དེས་ང་ཚོའི་ལས་ཀར་ཆེ་མཐོང་གནང་བ་དང་། སྤྱི་ཚོགས་ནང་ཕན་ཐོགས་ངེས་ཅན་ཞིག་སྒྲུབ་ཐུབ་ཀྱི་ཡོད་པར་ངོས་ལེན་གནང་གི་ཡོད་པ་མཚོན་གྱི་འདུག་ཅེས་བོད་ཀྱི་ཁང་པའི་དབུ་འཛིན་ནས་ཐུགས་རྗེ་ལེགས་ཕུལ་མཚོན་ཆེད་གསུངས་སོང་།
བྱ་དགའ་དེ་དང་མཉམ་དུ་ཡོ་སྒོར་ལྔ་སྟོང་གནང་སྲོལ་ཡོད་འདུག www.tibethaus.com