མར་མེ།
གངས་ཅན་ས་ཐག་རིང་བའི་གྲོང་སྡེ་ཞིག་ན།།
ཡིག་དྲུག་དབྱངས་ལ་གྱེར་བའི་དད་སེམས་ཀློང་ན།།
འཕགས་མཆོག་མི་འཇིགས་སྤོབས་པའི་ཁྲི་ལ་བཞུགས་ཏེ།།
ཟབ་རྒྱས་ཆོས་ཆར་འབེབ་པའི་སྐལ་བཟང་ཤར་བྱུང་།།
སྨག་རུམ་རིམ་གྱིས་ཡལ་བའི་ཞོགས་པ་དེ་ལ།།
བོད་ལྭ་གཙང་མ་བཀླུབས་པའི་དགའ་སྤྲོའི་ཁྲོད་ན།།
དྲི་མེད་ཨ་ཤེ་དཀར་པོ་འཐེན་སྟངས་ཞིག་ལས།།
བླ་མའི་གསེར་ཞལ་མཇལ་བའི་སྐལ་བཟང་ཤར་བྱུང་།།
ཉི་ཟེར་རིམ་གྱིས་འཕྲོ་བའི་ཉིན་བཟང་དེ་ལ།།
སྐད་རིགས་འདྲ་མིན་སྨྲ་བའི་མི་ཚོགས་དབུས་ན།།
རང་སྐད་རང་རྐྱ་འཕེར་བའི་སྤོབས་པའི་ཁྲོད་ན།།
བླ་མའི་གསུང་དབྱངས་ཐོས་པའི་སྐལ་བཟང་ཤར་བྱུང་།།
མོས་ངོར་འཇིག་རྟེན་མགོན་པོའི་ཐུགས་ཀའི་ཐད་ན།།
རང་སེམས་ཆོས་སྐུར་རྟོགས་པའི་འོད་དཀར་དབུས་ན།།
གཞན་ཕྱིར་ཐར་བ་བསྒྲུབ་པའི་ཆོས་སེམས་རྡོ་རྗེ།།
ཉིན་རེར་དྲན་པ་བྱེད་རྒྱུ་བླ་མའི་བཀའ་ཡིན་།།
རང་རེ་གང་དུ་རྒྱུ་ཡང་ཤ་རུས་བོད་ཡིན།།
གནས་བབ་ཇི་འདྲར་གྱུར་ཡང་བདེན་དོན་མ་བརྗེད།།
ཞུམ་པས་ཕམ་ལས་མ་བརྒྱལ་བློ་སྟོབས་བསྐྱེད་ལ།།
སྤྱོད་བཟང་བུ་ཕྲུག་སྐྱོངས་ཤིག་བླ་མས་གསུངས་བྱུང་།།
སྙན་པའི་རྔ་སྒྲ་འཛམ་གླིང་ཁྱོན་འདིར་ཁྱབ་པའི།།
ཞི་བདེའི་དེད་དཔོན་མཚན་ཅན་ལྷ་སྐལ་དེ་ལ།།
འདྲེན་བྱེད་ལྕགས་ཞྭས་བསྒྲིབས་པའི་ལོག་ལྟའི་ཚོགས་ཀྱིས།།
གཞི་མེད་ཅལ་སྒྲོག་བྱེད་ལ་ཡ་མཚན་སྐྱེས་བྱུང་།།
ཐར་བའི་ས་བོན་ཡིད་ཀྱི་ས་གཞིར་བཏབ་སྟེ།།
སྨོན་ལམ་བྱེད་རྐྱེན་སྦྱར་བའི་སྐལ་བཟང་ཉིན་དེར།།
ལག་ཟུང་སྙིང་ཁར་སྦྱར་བའི་སྟངས་སྟབས་ཁྲོད་ན།།
འདྲེན་བྱེད་མཆི་མས་བཀང་བ་དོན་དང་ལྡན་ཡོད།།
གཉིས་པའི་བདུན་དང་བརྒྱད་ཀྱི་སྐལ་བཟང་ཉིན་ལ།།
གངས་ཅན་ལྷ་སྐལ་མཇལ་བའི་དགའ་སྤྲོའི་རླབས་ཕྲེང་།།
འགོག་མེད་དྲན་པའི་མཚོ་མཁར་ཡང་ཡང་འཕྱུར་བ།།
མཛུབ་མོའི་རྩེ་ནས་དགའ་བ་འབུམ་གྱིས་བཞུར་སོང་།།