རྭ་རྒྱ་གངས་རྡེའུ།
རྡ་སའི་རྐང་ལམ་དེད་ནས་རི་ལ་སོང་།།
མེག་ལོར་ཟེར་བའི་རི་མགོའི་གྲོང་ཞིག་ཡོད།།
བོད་མི་རྣམས་ཀྱིས་རྒྱལ་ས་གཉིས་པ་ཞེས།།
སྙན་ངག་ལྕེ་བརྒྱ་ཅན་ཚོས་ཡང་ཡང་བསྔགས།།
སྲང་མདོ་གསུམ་དང་ལམ་ཕྲན་ཉིས་རྐྱ་ཞིག།།
རྐང་སྣམ་འདོམས་ནས་དར་གྱི་ཁུག་པ་བཞིན།།
གཡས་དང་གཡོན་དུ་ར་བཟིའི་རྐང་རྗེས་ལྟར།།
འཐེན་པ་དེ་ནི་བོད་མིའི་ཁྲོམ་ར་ཡིན།།
རེ་སྒུག་ཐང་དང་བླ་ཅོལ་རྐུབ་བཀྱག་སོགས།།
ཉུལ་བའི་རྣམ་ཐར་ལས་མེད་ཅན་ལ་དབང་།།
ཆབ་སྲིད་འཐེན་འཁྱེར་བླ་ཅོལ་གླུ་དབྱངས་རྣམས།།
ཉི་མ་རིང་པ་ཅན་ཚོས་ཉིན་རྒྱུན་ལེན།།
རྐང་ཤག་གཉིས་པ་བཅད་ནས་མར་ལ་ཕེབས།།
འཛམ་གླིང་མིག་གཅིག་ཞི་བདེ་དེད་དཔོན་མཆོག།
བཞུགས་གནས་གཙུག་ལག་དགའ་ལྡན་ཕོ་བྲང་སོགས།།
གཅིག་ལས་གཅིག་ལྷག་ཡོན་ཏན་བརྗོད་མཐའ་བྲལ།།
དེ་ཡི་མདུན་དུ་འཛམ་གླིང་ཡུལ་གྲུའི་མགྲོན།།
ཉིན་མཚན་ཀུན་ཏུ་རེ་བའི་མིག་ཟུང་ནས།།
དད་པའི་ཕྱག་དང་དོགས་པའི་རྣ་རིང་ཡང་།།
གཞན་ཕན་བྱམས་བརྩེས་འཛུམ་མེར་ཀུན་ལ་གཟིགས།།
དེ་ཡི་གཡས་སུ་རི་ངོས་གཙུག་ལག་ཁང་།།
རྔམ་བརྗིད་རི་བོར་ལ་ཐོད་བཅིངས་པ་དེ།།
རོང་ཆེན་བསྟན་པའི་མངའ་བདག་ཅེས་གྲགས་པའི།
གདན་ས་ཆེན་པོ་བྱེས་པ་གྲྭ་ཚང་ཡིན།།
དེ་ནས་གདོང་ཁ་བཅད་ནས་མར་ལ་ཕེབས།།
ཕྱི་སྡོད་བོད་མིའི་སྒྲིག་འཛུགས་གངས་སྐྱིད་ཅེས།།
འཛམ་གླིང་ཀུན་ལ་གྲགས་པའི་བཙན་བྱོལ་གཞུང་།།
དཔེ་མཛོད་སྨན་རྩིས་བཀའ་སྤྱི་རིམ་གྱིས་བསྒྲིགས།།
ཆབ་སྲིད་མིག་དང་དོགས་པའི་རྣ་མེད་ཚེ།།
ཕྱག་གསུམ་འཚལ་ནས་རྡ་ཤོད་གཞོང་ལ་ཕེབས།།
གྱ་གྱུ་ལམ་ཕྲན་བརྒྱུད་ནས་ཡར་ཕེབས་དང་།།
ནོར་གླིང་སྐལ་བཟང་ཕོ་བྲང་གཉིས་པ་མཇལ།།
གཙུག་ལག་རིན་ཆེན་ནོར་དང་ལག་ཤེས་སོགས།།
བོད་དྲིའི་སྣུམ་ཞག་ད་དུང་ཡལ་མེད་ངང་།།
འཛུམ་མེར་མཛེས་སེ་འབར་པའི་འོད་སྣང་གིས།།
བོད་མིའི་ལོ་རྒྱུས་སྐས་ཚིགས་འདོམ་ལ་གཞལ།།
དེ་ནས་ཡར་ཙམ་སོང་བའི་སུ་ངྷའི་བྷིར།།
རྒྱལ་དབང་ཀརྨའི་འཚུར་ཕུ་བླ་བྲང་དང་།།
དཔལ་ལྡན་སྟོད་བརྒྱུད་གཙུག་ལག་ཆེན་མོ་སོགས།།
ལོ་རྒྱུས་རང་བཞིན་ལྡན་པའི་ས་གནས་ཡིན།།
བྱིན་རླབས་ངོ་མཚར་འཆད་པའི་ལྕེ་བརྒྱ་དང་།།
ཡོན་ཏན་རབ་བཏགས་བརྗོད་པའི་ཚིག་སྦྱོར་སོགས།།
ཀུན་ལ་དཔྱིས་ཕྱིན་ཆུད་པའི་གཏམ་མེད་ཀྱང་།།
ཡོན་ཏན་རང་བཞིན་བརྗོད་པ་དེ་ཙམ་མོ།།
ཕྱི་ལོ་ 2017 ལོ་ 3 པའི་ཚེས་ 1 ལ་བྲིས།
ཡག་པོ་བྲིས་འདུག
སྤྱན་ཆེན་པོ་ལགས་ཡག་པོ་ད་ཕྲིས་མ་སོང་ད། བཟོ་ཅིག་བྱས་ཡོད། གང་ལྟར་ཀློག་པར་བཀའ་དྲིན་ཆེ།