བདེ་ཆེན་སྒྲོལ་མ།
ང་ཚོ་མི་ཡུལ་དུ་ལྷུང་ནས་མི་ལོ་བཞི་བཅུ་ལྷག་ངང་གིས་བཞུར་སོང༌། ཞིབ་ཏུ་བསམས་ན། ལོ་འདི་དག་ནི་བོད་པ་ཚང་མེ་རུ་འབར་བའི་དུས་ཚོད་ཡིན་ལ་འཁྱག་ལ་འབྱར་བའི་དུས་ཚོད་ཅེས་བརྗོད་ཀྱང་མི་རུང་བ་གཏན་ནས་མེད།
ྋགོང་ས་མཆོག་ས་སྒང་རིལ་པོ་འདིའི་ཤར་ནུབ་གང་དུ་ཕེབས་ན། དེ་རུ་བོད་དོན་གྱི་མེ་ལྕེ་འབར་གྱིན་ཡོད་ལ། ྋགོང་ས་མཆོག་ས་སྒང་རིལ་པཽ་འདིའི་ཤར་ནུབ་གང་དུ་བཞུགས་ན། དེ་རུ་བྱམས་བརྩེ་དང་ཞི་བདེ་ཡི་འོད་སྟོང་འཕྲོ་བཞིན་ཡོད། ཡིན་ནའང༌། རྡ་རམ་ས་ལ་འདི་མི་ལོ་སྟོང་ཕྲག་རིང་གི་སྲིད་པའི་གངས་རྒན་བཞིན་སྔར་ལྟར་འཁྱག་ལ་འབྱར་ནས་ཡོད།
ས་མཐའི་ལྡོམ་པོ་ཡོད་ཚད་སྐབས་འཚོལ་བ་རྐྱང་རྐྱང་ཡིན་པའི་བདེན་ཁ་སུས་ཀྱང་སྤྲོད་དཀའ་ཡང༌། མི་ཚང་མ་འཚང་ཁ་ཤིག་ཤིག་གིས་བཞུར་ས་གཅིག་ལ་བཞུར་འགྲོ་བ་དངོས་ཡོད་ཀྱི་བདེན་པ་དམར་རྗེན་ཞིག་ཡིན།
རྡ་ས་ནས་འཕྲོས་པའི་ཉི་འོད་སྣུམ་པོ་དེས་འཛམ་གླིངགི་མུན་པ་དང་གྲང་འཁྱག་ཡོངས་སུ་གསལ་སོང༌། དུས་དེ་ནས། རྡ་རམ་ས་ལའི་སྐད་སྒྲ་ཉི་མ་ལྷ་ས་ལས་བརྒལ་ཏེ་འཛམ་གླིང་ཡོངས་ལ་ཁྱབ་སོང༌། འཛམ་གླིང་ཡོངས་ཀྱིས་ཤེས་སོང་ཡང༌། རྡ་རམ་ས་ལའི་རྒྱ་སྟག་དང་དོམ་སྨྱོན་ཚོ་ད་དུང་ཆེ་ཚུགས་ཀྱིས་འགྱིང་ཞིང་མགོ་བོ་ཨ་རི་དང་རྐང་སྣེ་རྡ་སར་བཞག་ནས་གཉིད་ལ་རོལ། རྡ་རམ་ས་ལའི་མུན་པ་ཧ་ཅང་མཐུག་ལ་གྲང་འཁྱག་སྔར་བཞིན་རྩུབ།
འཛམ་གླིང་གང་ས་ཡི་མི་རིགས་མང་པོ་ཕྱོགས་ཕྱོགས་ནས་རྡ་སར་འབྱོར་རྗེས། ཁོང་ཚོས་གཞི་ནས་རྡ་རམ་ས་ལ་གད་སྙིགས་ཀྱི་གླིང་ཕྲན་ཞིག་དང༌། རྡ་རམ་ས་ལའི་གནམ་གཤིས་ཀྱི་དྲོད་གྲང་གཉིས་ཀ་མཉམ་དུ་རྟོགས་བཞིན་ཡོད།
མི་ཚེ་རྡ་སར་བསྟིམས་པའི་རྒད་པོ་བློ་དཀར་ཞིག་གིས་ཀྱང༌། རྡ་རམ་ས་ལ་འཛམ་གླིང་གི་ཚོང་ར་ཆེ་ཤོས་ཤིག་ཡིན། ཚོང་པ་ཚོར་གནས་ལུགས་མེད་ལ་ཚོས་རྫས་ལ་ཁྱད་པར་མེད་པར། སྟབས་འགྲིག་ན་རང་གི་ནང་མི་ཡིན་ཡང་རང་གི་ཚོང་རྫས་ཡིན་ཟེར།
གཞན་ཡང༌། རྡ་རམ་ས་ལ་སྨུག་སྤྲིན་གྱིས་གཡོག་ཡོང་དུས་ཀྱི་གནམ་གཤིས་ཧ་ཅང་འཇིགས་སུ་རུང་བ་ཞིག་ཡིན་ལ། རྒྱ་སྟག་དང་དོམ་སྨྱོན་དག་གིས་སྡེར་མོ་བགྲད་ནས་མཆོང་ཡོང་དུས་ཀྱི་རང་གཤིས་ཀྱང་ཧ་ཅང་གདུག་རྩུབ་དང་ལྡན་པ་ཞིག་ཡིན།