དགའ་དགའ།
རྡ་སའི་སྨུག་སྤྲིན་གྱི་གསེང་ན། །
མཆིན་པ་སེམས་པ་ལ་འབྱར་བའི། །
སྙན་ངག་ལྕགས་མདོག་དེའི་ཕག་ན། །
གཟི་བརྗིད་འོད་གོར་གྱིས་བསྒྲིབས་པའི། །
མཐོང་ན་མི་དགའ་ནི་མེད་པ། །
ཐོས་ན་འཛུམ་དགོད་ནི་རང་འཆོར། །
ང་ཡི་གྲོགས་པོ་ཡི་དྭངས་མ། །
བསྟན་རབ་བོན་རྒྱ་བ་བདེ་འམ། །
ཟུར་ལ་ལེབ་ཁ་ཡི་ཁ་སྤྲོད། །
ལེབ་མོར་མདུང་ཚུགས་ཀྱིས་བསྣུན་པ། །
རང་གཤིས་ངར་ཤུགས་ཀྱིས་མདེའུ། །
བཀའ་བློན་ཁྲི་བ་ལ་འཕང་ངམ། །
སྡོང་བོ་ལོ་མ་ཡི་གསེབ་ཏུ། །
ལྐོག་ལྐོག་སུད་སུད་ཀྱི་མི་ཚོགས། །
རེ་དོགས་མིག་ཟུང་གི་འགྱུ་བ། །
འགྱུར་བ་སྐྱེན་ཙམ་ནི་གདའ་མོད། །
རིགས་པའི་དཔའ་བོ་ཡི་གོ་ཆ། །
བདེན་པའི་ཡ་ལད་ནི་བསྒོས་ཏེ། །
ང་རོས་རི་ལུང་ཀུན་འགེངས་པ། །
ང་ཚོའི་ཁ་དན་ན་ལུས་ཡོད། །
ལབ་ནི་དེ་འདྲ་བ་ལབ་མོད། །
སོ་ཚིས་ལྟོ་གོས་ཀྱིས་གཅིར་ན། །
གཅིན་སྐྱག་ཉལ་ས་ན་འཆོར་བ། །
བདེན་པ་འདི་ལས་གང་འདུག་གམ། །
ཡིན་ཡང་རྡ་སྨུག་གྱི་གསེང་ནས། །
སེམས་ངལ་གསོ་བྱེད་ཀྱི་སྙན་ངག །
བུམ་པ་གང་ཙམ་ནི་འཐོར་བ། །
ཡིད་ཀྱི་བྱབས་ཁྲུས་སུ་ཆོག་གོ །
ཡིན་ཡང་རྡ་སྨུག་གི་གསེང་ནས། །
མེ་སྟག་ཕྲན་ཙམ་ནི་མཆེད་པ། །
གྲོགས་པོ་བོན་རྒྱ་བའི་གཙུབས་པའི། །
བརྡར་ཤིང་མཁྲེགས་པོ་དེར་གོ་ཆོག །
ཁོ་བོ་སྲོག་བདག་གི་རྨུགས་ནས། །
ཅང་མེད་ཀེང་རུས་སུ་ལྟ་ཡང་། །
གཞོན་པའི་སེམས་པ་ཡི་རྒྱུན་ཞིག །
ཡོད་པ་ཉུང་ཉུང་འདི་མགུ་ཨང། །
མདུན་གྱི་སྨུག་སྤྲིན་འདི་འཐིབས་ནས། །
ལམ་ཕྱོགས་གསལ་བོ་ནི་མི་འདུག །
འགག་མ་ཆད་པ་ཡི་ཚེ་སྲོག །
སྒྱུ་མའི་དབྱིངས་རིམ་ནས་ཆད་ཤོག །
ཉིས་སྟོང་བཅུ་ལོའི་ཟླ་བདུན་པའི་ཚེས་བཅུ་གཉིས་དགོང་མོར།
བོད་ནི་རང་དབང་གི་རྒྱལ་ཁབ་ཡིན་པ་ཙམ་དུ་མ་ཟད་རྒྱལ་ས་དང་རྒྱལ་དར་ནི་ལོས་ཡོད།
ཁྱིམ་མཚེས་ཀྱི་རྒྱལ་ཁབ་མང་པོ་ཞིག་གིས་དེ་ཤེས་རྒྱུ་དེ་གལ་ཆེན་པོ་རེད།
འོན་ཀྱང་བོད་ཀྱི་རང་དབང་ཤོར་བ་ནི་བོད་རང་གི་མ་འབྱོན་པ་ལས་གཞན་ལ་ཁག་འདོག་ས་མེད་པ་རེད།
མི་རབས་གསར་པ་ཚོས་ཤེས་དགོས་པ་ནི་བོད་ཀྱི་རང་དབང་སླར་གསོའི་ཆ་རྐྱེན་གང་དགོས་པ་དེེ་ཤེས་དགོསཔ་རེད།