གཙང་མེ་ལྕེ།
འུར་ཤོབ་ཆེན་པོའི་སྐད་ཆ་ཞིག་གིས་འགྲམ་ལྕག་གཞུས་པའི་ཉམས་མྱོང་ང་ཚོར་ཡོད་པ་རེད། ངས་ནི་མི་ལོ་བཞིའི་ཡར་སྔོན་ཞིག་ཏུ་དམངས་གཙོའི་འོས་བསྡུ་བྱས་པའི་བརྒྱུད་རིམ་ཆ་ཚང་མཐོང་ཡོད། འོས་ཤོག་ཡོད་ཚད་ཧུབ་ཀྱིས་མིད་པའི་ཁ་སྟབས་ཤིག་ལ་དམ་བཅའ་གསུམ་གྱིས་ལྷན་པ་བརྒྱབ་ཀྱང་མ་འཁེབ་པའི་འདི་ལོ་ཟེར་ན་ངས་ནི་འོས་མི་ལྡུད་པའི་ལོ་ནག་སྣ་ནག་ཅིག་ཡིན།
ཆོལ་ཁ་དང་ཆོས་ལུགས་ཀྱི་ཕྱོགས་ཞེན་བར་དུ་ང་ལ་དངོས་གཞིའི་འོས་མི་འོས་པ་ཞིག་མ་རྙེད་ཅིང་འོས་བསྡུ་འགན་འཛིན་འོས་པ་ཞིག་དེ་བས་ཀྱང་མ་རྙེད་པས་ངས་ནི་འོས་མི་ལྡུག་ཟེར་བ་ཡིན། སྔོན་འགྲོའི་འོས་ཤོག་རྒྱལ་ཁབ་གཅིག་ནས་བླུགས་ཤིང་འོས་སྒམ་རྒྱལ་ཁབ་གཞན་དུ་ཁྱེར་བའི་ལམ་བར་དག་ཏུ་ཨ་སྒོར་ཡོ་སྒོར་དག་གིས་བཅོམ་ཚུལ་ཐོས་པ་ལ་ཡང་བདེན་ཤས་ཆེ་བས་འོས་ཤོག་ཆུ་ལ་གཡུག་གི་མིན། མེ་ལ་སྒྲོན་རྒྱུ་ཡིན་ཟེར་བ་ཡིན།
གཅིག་བྱས་ན་ཆོལ་ཁ་དང་ཆོས་ལུགས་ལ་ཞེན་ཁོག་ཆེ་བའི་སྲང་བར་གྱི་རྒྱུགས་ཁྱི་དང་འདོགས་ཁྱི་གང་ཡིན་ཡང་རྒྱུ་མཚན་མེད་པར་ཟུག་ཤས་ཆེ་སྟེ། ཁྱོད་ཚོར་མྱི་སྐད་ཀྱི་ལམ་ནས་གསལ་བཤད་ཅིག་བྱས་ན། འདི་ལོའི་སྔོན་འགྲོའི་འོས་བསྡུ་བྱས་པའི་བརྒྱུད་རིམ་ནས་སྒེར་གཅོད་ཟེར་བ་དེ་དང་རུལ་སུངས་ཞེས་པ་གཉིས་ཀ་རྡ་སའི་རི་སྒང་ནས་གངས་ཅན་སྐྱིད་གཤོང་བར་དུ་ཁྱབ་ནས་ཡོད་པ་ཤེས་སོང་ཟེར་བ་ཡིན། ད་དུང་ངས་འོས་ལྡུད་མི་འདོད་པའི་རྒྱུ་མཚན་གཅིག་ནི་བཙན་བྱོལ་བོད་མིའི་སྲིད་གཞུང་གི་སྒྲོམ་གཞི་ཙམ་ལ་གུས་བསྐུར་ཞུ་སྟངས་ཤིག་ཡིན་པ་ལས་རྒོ་ངོལ་བྱ་སྟངས་ཤིག་མིན་པ་ཤེས་དགོས་པ་ཞིག་གོ།
སྐད་ཆ་དྲི་ངན་ཅན་འདི་ཚོར་གད་མོ་ཤོར་ཡ་རེད།
ཨ་ལས་དང་པོ། བཙན་བྱོལ་ནང་ལ། རྡོ་ཐབ་གསུམ་འཛུགས་སའི་ས་ཆ་ག་ན་ཡོད། ལགས།
ལར་ནས་ཁྱོད་ཚོས་སེམས་ཚེགས་བྱ་མི་དགོས་པ་ཞིག་ལ་ང་ལ་དབང་བའི་འོས་ཤོག་འདི་ནི་སྒེར་གཅོད་པ་གཅིག་གི་རྒྱབ་བརྟེན་ཉན་པ་ལས་རྡོ་ཐབ་གསུམ་གྱི་བར་དུ་ཚག་སྒྲ་དང་བཅས་ཆོལ་ཁ་གསུམ་རེ་མཚོན་པར་བྱས་ཏེ་མེ་ལ་སྒྲོན་རྒྱུ་ཡིན་ཟེར་བ་ཡིན།
ཉིན་ཤས་སྔོན་དུ་ངས་རྡོ་ཐབ་གསུམ་གྱི་བར་དུ་འོས་ཤོག་མེ་ལ་བསྲེག་གི་ཡིན་ཞེས་པའི་རྒྱུ་མཚན་ཁ་ཤས་བྱས་པའི་རྩོམ་ཐུང་ཞིག་ཁ་བརྡ་དྲྭ་ཚིགས་སོགས་སུ་བཀོད་པ་ཡིན། དེ་དང་འབྲེལ་བའི་སྐད་ཆ་འགའ་ཞིག་འདིར་བརྗོད་འདོད་པ་ཡིན། མི་ཚོ་རྒྱལ་ཁབ་གཞན་པ་ཚོ་ཇི་ལྟར་ཡིན་ཡང་ང་ཚོ་བཙན་བྱོལ་ཡུལ་དུ་འོས་ཤོག་ལྡུག་པའི་ལས་སྐལ་འཛོམས་ཏེ་མི་ལོ་ཁ་ཤས་ཤིག་ལས་སོང་མེད་པ་རེད་ལ་འོས་མི་སླེབས་ནས་ཀྱང་ལོ་ཤས་དེ་ག་ལས་སོང་མེད་པ་རེད། སྐབས་འདི་འདྲ་ཞིག་ལ་འོས་མིས་འོས་མི་ཞིག་གི་ཚད་ནས་ལང་། འོས་ལྡུག་པ་ཚོས་ཀྱས་འོས་ལྡུག་པ་ཞིག་གི་ཚད་ནས་བལྟས། འོས་བསྡུ་ལྷན་ཁང་གིས་ཀྱང་འོས་བསྡུ་ལྷན་ཁང་ཞིག་གི་ཚད་ནས་འོས་བསྡུའི་ལས་རིམ་སོགས་ཏན་ཏན་ཏིག་ཏིག་ཅིག་སོང་པ་ཡིན་ན། འོས་བསྡུ་དྲང་མོ་ཞིག་ལས་འོས་མི་དྲང་མོ་ཞིག་ང་ཚོ་རང་ལ་རག་གི་རེད་མ་གཏོགས་ལུང་ཚན་དང་ཆོལ་ཁ་འཐེན་ཁྱེར་གྱི་བསླུས་པའི་སྲིད་སྐྱོང་ཞིག་ང་ཚོར་རེག་སྲིད་ཀྱི་མ་རེད། དེ་བས་དེང་སང་མི་བུ་བློ་མིག་མེད་པ་སྐོར་ཞིག་གིས་ནི་ཅི་ཞིག་བྱུང་ན་འབྱུང་དུ་ཆུགས་བློ་སེང་ལ་འོས་ལྡུག་གི་ཡིན་ཟེར་བ་དང་། ཅི་ཞིག་བྱུང་ན་འབྱུང་དུ་ཆུགས་སྤེན་ཚེ་ལ་འོ་ལྡུག་གི་ཡིན་ཟེར་བ་སོགས་ནི་ཁྱོད་རང་གི་རང་མདོག་ཐལ་མདོག་དེ་བསྟན་པ་རེད་མ་གཏོགས་གཞན་གང་ཡང་མ་རེད། ངས་ནི་འདི་ལོའི་དངོས་གཞིའི་འོས་ཤོག་སུ་ལའང་མི་ལྡུག་པའི་ནག་ཉེས་ནི་འོས་བསྡུ་ལྷན་ཁང་ལ་ཡོད་ཟེར་བ་ཡིན།