ཀླུ་སྨྱོན།
ཚེ་སྲོག་གྲངས་མེད་ཅིག་རྡོ་བ་ལས་སྐྱེས་རྗེས།
འཇིག་རྟེན་འདི་འཁོར་སྐྱོད་བྱེད་མཚམས་བཞག་སོང་།
སྲིན་བུ་མེ་འཁྱེར་རེ་ཟུང་མཚན་མོའི་མེལ་ཚེ་བར་གྱུར་ཅིང་།
དགོན་པའི་མཐོ་སར་ཆགས་པའི་གྲྭ་ཤག་ཅིག་གི་སྒེའུ་ཁུང་ལས།
ཞོགས་པ་སྔ་བོར་སྒྲོན་འོད་ཅིག་དྲ་མར་སྦྱར་བའི་ཤོག་དཀར་སྟེང་འཕྲོས་སོང་།
བླ་མ་དེ་གསོ་རིག་སྨན་པ་ཞིག་མིན་ཡང་།
ཁོང་གི་གཟིམ་ཤག་ཧྲིལ་བོ་དྲི་བཟང་གིས་ཁྱབ་ཡོད།
དགོན་ཆེན་ཚོ་ཡང་མུན་ནག་གི་ཀློང་ཆེན་པོར་སྔུར་བ་འཐེན་བཞིན་གཉིད་དུ་ཡུར།
རྡོ་སྐས་ཀྱག་ཀྱོག་ཅིག་ཁོང་གི་གཟིམ་ཤག་གི་ཕྱོགས་དེར་བསྲིངས་ཡོད།
ཆུ་རྡོ་དང་རྫ་རྡོ་གང་ཡིན་ཡང་།
དེ་ཚོར་རང་རང་གི་མཛེས་པ་ཡོད།
སྐྱེ་བོ་གྲངས་མེད་ཅིག་གི་འབབ་སྟེགས་བྱས་ཀྱང་།
རྡོ་བའི་ཚེ་སྲོག་ལ་གས་ཆག་ཅི་ཡང་མི་འདུག
དེ་ནི་བླ་མ་འདིའི་ཐུགས་གཤིས་བཞིན།
རྡོ་སྐས་དེའི་སྣེ་མོ་ས་ལམ་དང་འདྲེས་ཤིང་།
ས་ལམ་རྡོ་ལམ་ལ་མཐུད་ཅིང་དེ་ནས་སྣུམ་ལམ་ལ་གྱུར་འདུག
ལོ་ཟླ་ཅི་ཙམ་འདས་ཀྱང་།
བླ་མའི་ཞོགས་པ་སྔ་བོར་བཞེངས་པའི་དུས་ཚོད་ལ་འགྱུར་བ་མེད་པ་ཅི་བཞིན།
རྡོ་བ་དེ་ཚོའི་ངོས་ཀྱི་རི་མོ་དག་ལ་ཡངའགྱུར་བ་ཅི་ཡང་མ་བྱུང་།
དེ་ལྟར་ལོ་ངོ་བརྒྱད་ཅུ་འདས་ཤིང་།
འཇིག་རྟེན་ལ་འགྱུར་ལྡོག་སྣ་ཚོགས་ཤིག་བྱུང་ཟིན།
ཐ་ན་གཙང་བོ་རྒས་ཤིང་རི་རབ་འགྱེལ།
ཁང་བརྩེགས་ཞིག་ཅིང་ནགས་ཚལ་ཡལ།
ད་དུང་བླ་མའི་དྲི་བཟང་དང་དུས་ཚོད་ཁོ་ནར་རྟག་བརྟན་གྱི་རི་མོ་མཛེས་ཤིང།་
རྡོ་བ་དེ་དག་ལ་གཞོན་ཤ་ཆགས་ཏེ་འོད་དུ་འཚེར།
དྲ་བདག་ལགས། རང་མོས་སྙན་ངག་འདི་འབོལ་རྩོམ་ལྟ་བུར་ཤར་འདུག འདི་ལ་དམིགས་ཏེ་ལམ་སྟོན་ཞིག་གནང་རོགས།