གླིང་གཅེར་བུ།
_______________སྙན་ངག་པ་ཡི་དམ་ཚེ་རིང་ལགས་ལ་རྗེས་དྲན་དུ།
ཁྱེད་རང་སྐྱེས་པ་ནས་ཨ་མའི་ངག་གི་དབྱངས་རྟ་ལ་གོམས་པས
ཁྱེད་ཀྱིས་གངས་རི་དང་རྩྭ་ཐང་བརྗེད་མྱོང་མེད
ཁྱེད་རང་ཁ་བ་དང་བུ་ཡུག་མཉམ་དུ་འཚར་བས
ཁྱེད་ཀྱི་དཔའ་དང་སྙིང་རྩིད་ལ་གཞར་ནས་ཚར་རྒྱུ་མེད
ཀྱེ། ང་ཡི་མེས་པོ ང་ཡི་སྙན་ངག་པ
གངས་ཀྱི་རལ་བ་ནས་འཇུས་ཏེ
སྙན་ངག་གིས་ས་ཆེན་རྡུང་མྱོང་མཁན་ཁྱོད
ལོ་རྒྱུས་ཀྱི་བུ་ཡུག་འཚུབ་ཤུལ་ན
མི་རབས་ཤིག་གི་རྣམ་ཤེས་ལ་བླ་འབོད་བྱས་པས
སེང་དཀར་མོའི་གཡུ་རལ་རྒྱས་པ་དྲན་བྱུང་ངམ
ཁྱེད་ཀྱིས་ཨ་མའི་ཅན་ཕོར་ལ་བདག་པོ་མ་ཐུབ་པས
མིག་ཆུ་ཡིས་སྒང་བ་བོད་ལ་འགྱོད་བཤགས་བྱས་པ་ལྡན་ན
ང་ཚོས་ཉིད་ཀྱི་རྔ་ཆེན་རོལ་དབྱངས་ཀྱི་ང་རོ་མ་ཁུག་པས
མྱ་ངན་གྱི་གདུང་དབྱངས་ཁྲོད་ནས་ཁྱེད་རང་ཡང་ཡང་དྲན་གྱིན་ཡོད
ཀྱེ། ང་ཡི་མེས་པོ ང་ཡི་སྙན་ངག་པ
དགོད་སླ་ལ་ངུ་ཡང་སྐྱེན་པའི་གངས་རིའི་མི་བོ་ཆེ
ཁྱེད་རང་སྔ་མོ་ནས་གངས་ལ་འཐིམས་སོང་ཡང
ཁྱེད་ཀྱིས་བླ་དང་རྣམ་ཤེས་ཀྱིས་བཞེངས་བའི་སྙན་ངག་གི་ཡིག་འབྲུ་རེ་རེ
མི་རབས་ཤིག་གི་ནང་སེམས་ཀྱི་སྤོབས་པ་རུ་གྱུར་ཡོད
སྙན་ངག་པ
ཁྱེད་རང་གངས་རི་དང་ཁ་བ་ཡི་སེམས་ན་ནམ་ཡང་མིང་ནས་བོས་ཆོག་ཆོག་གི་ཨ་མའི་བུ་དེ་ཡིན
ཁྱེད་རང་ནམ་ཡང་སྙན་ངག་གི་འཇིག་རྟེན་ན་གནམ་བསྐོས་ཀྱི་རྒྱལ་སྲས་དཔའ་བོ་ཞིག
ཀྱེ། ང་ཡི་སྙན་ངག་པ ང་ཡི་མེས་པོ།
ཟླ་༡༠ བའི་ཚེས་༢༤ ཉིན།