ཆང་སྐྱེས།
ཆར་བ་ཟ་ཟིམ་འབབ་པའི་ཉིན་མོ་ཞིག་སྟེ།།
ཐ་མག་ཚེ་སྲོག་རྔུབ་པའི་མྱི་རྐྱང་ཁེར་འདུག།
འདས་པའི་ལོ་ཟླ་རིང་མོའི་ངོ་གདོང་ནག་པོ།།
དེ་རིང་བཙན་གྱིས་བསྒྲིགས་པའི་སྙན་ངག་མ་ཡིན།།
ནག་པོ་བདུད་སྡེ་དཔུང་གི་སྟོབས་ཤུགས་རེད་དང་།།
རང་མགོ་རང་གིས་གཡོག་པའི་བྱས་ཉེས་ཡིན་ནམ།།
གང་ལྟར་དགུན་ཁ་ཞིག་གི་ས་སྲོད་ཀློང་ནས།།
སྐད་ཅིག་ཉིད་ལ་ཡོད་ཚད་ལག་ནས་ཤོར་སོང་།།
ཡར་འབྲོག་གཡུ་ཡི་མཚོ་མོ་ཙག་གིས་བསྡམས་ཏེ།།
ཁྲུང་ཁྲུང་ཁྱུ་ཞིག་ལྷོ་ཕྱོགས་རི་ལ་འཕུར་སོང་།།
ཅེ་སྤྱང་སོ་བ་ཉི་མའི་གྲོང་ལ་ཐོན་ནས།།
ལྷ་སའི་བར་བསྐོར་གླིང་གི་ལྷིང་འཇགས་དཀྲོགས་སོང་།།
ཟུར་གསུམ་ལྕགས་ཀྱི་མདའ་མོ་འཕུར་སྟངས་ཤིག་གིས།།
པོ་ཏཱ་ལ་ཡི་གདོང་ལ་སེར་ཁ་གཏད་བྱུང་།།
གསེར་གྱི་གླེགས་བམ་མེ་ཡི་ཞལ་དུ་མཆོད་ནས།།
ཨ་ཅེ་ཝ་མོས་ཞབལ་བྲོ་ཡང་ཡང་འཁྲབ་སོང་།།
སྐེ་ལ་རལ་གྲི་བཞག་པའི་བཙན་གནོན་ཞིག་དང་།།
ལ་ཕུག་ཐམ་ཀ་དམར་པོའི་བསླུ་བྲིད་འོག་ནས།།
དོན་ཚན་བཅུ་བདུན་ཅན་ལ་མིང་རྟགས་བཀོད་པ།།
ང་ཚོ་བོད་པ་ཚང་གི་ངོ་ཚ་ཨེ་ཡིན།།
གསར་བརྗེ་ལམ་ན་བདེ་སྐྱིད་འཚོ་བ་ཡོད་ཞེས་།།
རྫུན་གྱིས་བསྒྲིགས་ཏེ་འ་དང་འུར་གྱིས་བསྒྲགས་ཀྱང་།།
ང་བརྒྱད་ལོ་ཡི་ལོ་གསར་ཚེས་གཅིག་ཉིན་ནས།།
མི་ཡིས་མི་ཤ་བཟས་ལ་ཅི་ལྟར་འགྲེལ་ལམ།།
རྒྱ་རིགས་དང་ནི་བོད་ཀྱི་མི་རིགས་གཉིས་ཀ།།
ཨ་མ་གཅིག་གི་མིང་སྲིང་སྤུན་མཆེད་ཞེས་པའི།།
དབྱངས་རྟ་སྙན་མོ་དེ་ཡི་ཁུགས་སོ་དག་ན།།
གསོན་པོར་དམར་གསོད་བཏང་བའི་ཚེ་སྲོག་ག་ཙམ།།