ཆང་སྐྱེས།
མདང་དགོང་ཉལ་བའི་རྨི་ལམ་ནང་ལ།།
ས་ཐག་ལེ་བར་སྟོང་གིས་བཅད་པའི།།
ཆུང་འདྲིས་ཟུར་གསུམ་སྙིང་གི་བུ་མོ།།
ཡིད་འོང་སྟོང་གིས་འཁོ་འཁོར་བྱས་བྱུང་།།
ཞོགས་པའི་ཉི་ཟེར་རི་ལ་ཕོག་དུས།།
མལ་ལས་ལངས་ཏེ་ལས་ལ་ཞུགད་སོང་།།
ཆ་མ་ཤོག་གཅིག་མཆན་ལ་བཙིར་ནས།།
ནང་ལ་སོང་སྟེ་ནངས་ཇ་བསྐོལ་ཐལ།།
ཁང་པའི་ཀླད་ཀྱི་དུད་ཁུང་ནང་ནས།།
དུད་ཞགས་སྔོན་མོ་ལྷོག་ལྷོག་འཕྱུར་བྱུང་།།
ཁང་ཁྱིམ་ཕྱི་ནང་གཙང་ཕྱག་བྱས་རྗེས།།
བཟའ་ཚང་གང་བོས་ནངས་ཇ་འཐུང་ཐལ།།
མགོ་དཀྲི་དམར་པོ་ཐོད་ལ་བཅིངས་ཏེ།།
སླེ་བོ་ཆུང་ཆུང་རྒྱབ་ལ་འཁུར་ནས།།
གོམ་པའི་འདེགས་འཇོག་དལ་གྱིས་ལེན་བཞིན།།
གྲོ་ཞིང་གྲུ་བཞི་ཁ་ལ་ཐོན་ཐལ།།
མགོ་བོ་སྒུར་ནས་ཡུར་མ་ཡུར་བཞིན།།
མཛའ་གཞས་སྙན་མོ་ཞིག་ཀྱང་བླངས་སོང་།།
ཁ་དོག་དཀར་པོའི་སྟོད་ཙེ་འོག་གི།།
འདོད་པའི་མྱོས་བུམ་ལུ་གུ་ལྡིང་ལྡིང་།།
མཚམས་རེར་ལག་གཡས་ཐོད་ལ་འཁུར་ཏེ།།
མིག་གི་དབང་བོ་རྒྱང་ལ་གཏད་སོང་།།
ལན་རེར་ཁ་པར་ངོ་ལ་ལྟ་བཞིན།།
དགའ་བའི་འཛུམ་ཞིག་ཡུན་གྱིས་བསྟན་བྱུང་།།
འདི་ལྟར་ཁོ་མོའི་མཛེས་སྡུག་རེ་རེ།།
ལོངས་སུ་སྤྱོད་པའི་སྐད་ཅིག་དེ་ལ།།
སྐྱ་རེངས་བུ་མོ་མཁའ་ནས་འཛུམ་ཏེ།།
རྨི་ལམ་སྐྱིད་པོ་རྨང་ནས་དཀྲོགས་སོང་།།
༢༠༢༡ ༠༣ ༡༩
༄༅། ལྷོ་འཛམ་གླིང་ཉི་མ་ལྷོ་ལ་བརྒལ། ནུབ་ཟླ་བ་དཀར་པོ་སྤྲིན་གྱིས་བསྒྲིབས།
དགུང་སྐར་ཚོགས་ཆར་སྤྲིན་དཀྱིལ་དུ་ལྷུང།གངས་ཁ་བ་དཀར་པོ་རིམ་བཞིན་འབབ།
གཉེན་སྤུ་གྲོགས་མ་མཇལ་སེམས་རེ་སྐྱོ། སྡོད་ས་ཐག་རིང་ནས་མ་མཇལ་ཡང།
སེམས་ཉེ་ཞིང་བརྗེད་མེད་སྙིང་བཅངས་ཡོད། དྲིན་བླ་མས་སྐྱོབས་ཤིག་རྗེས་སུ་འཛིན།།