གྲིབ་གཟུགས།
རྨི་ལམ་མི་བདེན་རྫུན་ནོ་ཞེས།།
བདག་གིས་སྔར་ནས་ཤེས་མོད་ཀྱང་།།
རྨི་ལམ་ནང་གི་ཁ་བ་དེ།།
ངོ་མ་གསོན་ཉམས་ལྡན་པ་ཞིག།།
དལ་འབབ་ཁ་བའི་མེ་ཏོག་དང་།།
ཁ་བའི་རོལ་རྩེད་ཁ་བའི་མདངས།།
སོབ་འཇམ་ཁ་བའི་རེག་བྱ་དག།
རྨི་ལམ་ནང་ནས་དངོས་སུ་མྱངས།།
ཚ་བས་དུབ་པའི་དབང་པོ་དག།
ལྷོ་མཐའ་འདི་ནས་ཇི་ཙམ་བོར།།
ཁ་བར་རེག་པའི་བདེ་བ་ནི།།
སེམས་ཀྱི་ཁོང་ནས་མྱོང་རྒྱུ་ཙམ།།
རྐང་པའི་འོག་གི་གོམ་སྒྲ་ནི།།
ཐྲིག་ཐྲིག་ཁ་བའི་རོལ་དབྱངས་ཏེ།།
མིག་འདི་འཁྲུལ་པ་མ་ཡིན་ན།།
འོ་མའི་ཐང་ལ་རྒྱུ་བ་བཞིན།།
སྤར་མོའི་དྲོད་ཀྱིས་བསྒྲིལ་བ་ཡི།།
ཁ་བ་དགའ་མར་འཕངས་པ་ན།།
ལྷན་ཅིག་སྐྲ་ལོའི་མདུད་པ་དང་།།
སེམས་ཀྱི་མདུད་པ་གཉིས་ཀ་གྲོལ།།
ཁ་བ་གནམ་ནས་བབས་ན་ཡང་།།
ཁ་བའི་རྩེད་མོས་འདོད་བརྩེ་རྒྱས།།
ཁ་བ་དགུན་དུས་བབས་ན་ཡང་།།
ཁ་བས་དགུན་གྱི་དྲོད་ཁོལ་རུམ།།
ཨ་མའི་ནུ་ཞོ་ཟླ་བའི་འོད།།
འཛུམ་པའི་ཚེམས་ཕྲེང་དགའ་མའི་བཞིན།།
སྙིང་ལ་འདོད་པའི་དཔལ་སྩོལ་ཀུན།།
ཁ་བའི་རང་མདངས་ངོམ་པར་བྱེད།།
གནོང་འགྱོད་ཅན་གྱི་སེམས་པ་འདི།།
ཁ་བའི་རུམ་ན་སྦ་སྙིང་འདོད།།
ར་རིའི་དྲི་མ་མཐའ་དག་ཀྱང་།།
ཁ་བའི་ཆུ་མོས་བཀྲུ་སྙིང་འདོད།།
ཁ་བ་བྱིས་པའི་འཛུམ་ཀོང་ཡིན།།
ཁ་བ་དགུན་གྱི་མེ་ཏོག་ཡིན།།
ཁ་བ་གཞོན་ནུའི་དགོད་སྒྲ་ཡིན།།
ཁ་བ་ཡུལ་མིའི་རེ་བ་ཡིན།།
གནམ་ངོ་གནག་པའི་སྤྲིན་སེབ་ནས།།
ཁ་བ་སིབ་སིབ་འབབ་པ་ན།།
ཡུལ་གྱི་རྒན་གཞོན་ཕོ་མོ་ཀུན།།
ཁ་བ་བསུ་བའི་གླུ་དབྱངས་ལེན།།
པུས་མོ་ནུབ་པའི་ཁ་བ་ཡིས།།
དགུན་རླུང་འཚུབ་མ་མནན་ནས་ནི།།
ཞི་འཇམ་དྲོད་ཀྱི་ནམ་ཟླ་ཞིག།
ཡུལ་མིའི་སེམས་ལ་སྐྱེས་སུ་བྱིན།།
ཁ་བ་མེད་པའི་དགུན་ཁ་ནི།།
མྱ་ངམ་ཐང་དང་ཁྱད་པར་ཅི།།
དགུན་གྱི་མེ་ཏོག་མེད་པ་ན།།
ཡུལ་མིའི་དགའ་འཛུམ་ཅི་ལ་མཐོང་།།
རྨི་ལམ་ནང་གི་ཁ་བ་འདིས།།
ཕ་ཡུལ་ཡིད་ལ་དྲན་དུ་བཅུག།
སྤུན་ཟླའི་ངོ་གདོང་དམར་པོ་དེས།།
སྙིང་ལ་དྲོད་ཅིག་འཁྱིལ་དུ་བཅུག།
ལུང་མ་བསྟན་གྱི་མི་ཚེ་ལ།།
སྤུན་ཟླའི་སྐུལ་འདེད་ཅིས་མི་མཁོ།།
ཚ་བས་ཟིར་བའི་སེམས་པ་ལ།།
ཁ་བའི་སྐོམ་ཆུ་ཅིས་མི་མཁོ།།