ལྷ་རྩེའི་ཁུ་བྱུག
དབྱངས་ཀྱི་གེ་སར་སྒྲ་ལ་དྲངས།།
སྙན་ངག་པདྨ་ཞལ་ལ་བབས།།
ངག་རིག་ཉི་འོད་ལ་འཁྱིལ་བའི།།
སྙིང་གི་ངང་མོ་ལུས་དཀར་མ།།
སྙན་ཚིག་མེ་ཏོག་སྐུད་པ་ཡིས།།
ངག་གི་འཁྲི་ཤིང་ལ་དཔྱངས་པའི།།
སྡེབ་ལེགས་རྐང་དྲུག་དབྱངས་ཀྱི་ངག།
ཐོས་འཛིན་བདུད་རྩིའི་མཛོད་དུ་དགེ།།
ཟླ་བའི་ཞལ་ནས་ག་བུར་སྐྱུག།
ཀུན་བཟང་ནགས་ཀྱི་དྲི་བསུང་འཕུར།།
དབྱངས་ལྷ་ཁུ་བྱུག་དགྲ་ཟླ་མ།།
མགྲིན་པའི་ཁང་བཟང་འོད་ཀྱིས་ཕྱེས།།
ཨ་གར་ལྗོན་པ་ལ་འཛེགས་པའི།།
ལུས་དཀར་འཁྲིལ་ཞིང་ལྡེམ་པ་ན།།
འཇའ་འོད་ཆུན་པོའི་གུར་ཁྱིམ་དུ།།
སྣང་སྟོང་སྒྱུ་མའི་འཛུམ་རིས་ཅན།།
རིན་ཆེན་ལན་ཚར་ལྗོན་པའི་འདབས།།
མེ་ཏོག་བཀོད་པའི་རྫིང་བུ་བཞིན།།
སྟོད་གཡོག་ཆུ་འཛིན་གཡོ་བའི་གསེང་།།
འོ་འཛིན་དྲི་ལ་རྐང་དྲུག་རྩེན།།
ཞལ་རས་སྟོན་ཟླ་པདྨ་བཞིན།།
བརྟན་གཡོའི་མཛེས་པ་ལས་ཕྱུང་བས།།
སྣང་སྲིད་དབྱངས་ཀྱི་དྲི་ཟའི་གདངས།།
ལྷ་མོ་འཛུམ་པའི་ཟོལ་གྱིས་འཕྲོག།
དབྱངས་ལ་དབྱངས་ཀྱིས་མགྲིན་པ་བརྒྱན།།
ཚངས་སྲས་བུ་མོ་མི་མཚར་ཏེ།།
རྒྱུད་མངས་ཁོག་ལ་སྲིད་ཞི་ཆོས།།
ཡོངས་རྫོགས་ཤོང་བ་ཨེ་མ་རྨད།།
རྒྱ་མཚོའི་རླབས་དང་ཡིད་ཀྱི་མཐོངས།།
གསལ་སྟོང་སྐུ་ཡི་སྐྱེ་མཆེད་ནི།།
མ་འདྲེས་པིར་གྱིས་བྲིས་པ་བཞིན།།
མཚན་དཔེའི་འོད་འབར་ལྟ་ན་སྡུག།
ཉིང་འཁྲུལ་རྟོག་པ་ལུ་གུའི་རྒྱུད།།
མི་བདེན་གཡོ་བ་ཆུ་ཟླའི་གར།།
དབྱིངས་ནས་ཤར་བའི་ཡེ་ཤེས་སྐུ།།
མཉམ་ཉིད་ཀློང་དུ་གཅིག་ཏུ་འདྲེས།།
རྨི་ལམ་ནང་གི་དབྱངས་ཅན་མ་ཞེས་པའི་སྙན་ཐུང་འདི་རྨི་ལམ་ཞིག་གིས་རྐྱེན་བྱས་ཏེ་ཡུལ་སྐྱོ་བྲག་གི་རི་ཁྲོད་སྐྱིད་ཕུག་ཉི་མ་གླིང་དུ་ཕྱུགས་བེའུ་ལུག་ལོ་སར་ཚེས་གཅིག་ཉིན་བྲིས་སོ།།