ཡི་གེར་འགོད་མཁན། བསྐལ་བཟང་གཡུང་དྲུང་།
བོད་ཟླ་དང་པོ་ཚེས་གསུམ་གྱི་དགུང་མོར་ཐོབ་རྒྱལ་གསར་བ་སྨན་རིའི་དགོན་འདབས་སུ་རྨིས་པའི་རྨི་ལམ། ཞོགས་པ་དེར་ང་དང་ལྷན་དུ་ཕུ་བོ་བསྐལ་བཟང་གཡུང་དྲུང་དང་དགེ་བཤེས་གཡུང་དྲུང་དགེ་ལེགས་ང་ཚོ་གསུམ་གྱིས་ཞོགས་ཇ་ལ་རོལ་དུས་ངས་མདང་དགུང་རྨི་ལམ་ཡ་མཚན་ཞིག་རྨིས་སོང་ཞེས་བཤད། དེ་མ་ཐག་ཏུ་ཁོང་གཉིས་ཀྱིས་ཞོགས་ཇའང་འཐུང་མཚམས་བཞག་ཏེ་ག་རེ་རྨིས་སོང་ཞེས་ང་ལ་ཚུར་འཚང་ཁའི་ཚུལ་དུ་དྲི་བར་དྲིས་ཤིང་། ཧོན་འཐོར་བའི་ཚུལ་དུ་མིག་གིས་ཀྱང་ཧྲིག་གེར་ངའི་གདོང་ལ་ལྟ་བཞིན་ཡོད་པའི་ཚོར་སྣང་བྱུང་།
ངས་མདང་དགུང་རྨིས་པའི་རྨི་ལམ་ནི་འདི་ལྟར་ཏེ། སྨན་རིའི་ཚོགས་ཁང་ཆེན་པོའི་གཡས་ཕྱོགས་སུ་ཞིང་གཤེགས་དམ་པ་ཁྲི་འཛིན་སོ་གསུམ་པ་མཆོག་གི་སྐུ་གདུང་ཞུགས་འབུལ་བྱ་སའི་གནས་དེར། ཁྲི་འཛིན་རིན་པོ་ཆེ་ཧ་ཅང་གིས་ཐུགས་དགྱེས་ཤིང་ཞལ་གྱི་དཀྱིལ་འཁོར་འཛུམ་གྱིས་ཁེངས་ཤིང་། མཐའ་འཁོར་ལ་མེ་ཏོག་མདངས་ལྡན་སྣ་ཚོགས་གང་སར་བཞད་ཅིང་མགོ་ལྕོག་ལྡེམ་ལྡེམ་དུ་གཡོ་བ་དང་། ད་དུང་གནའ་སྔ་མོའི་སྲོག་ཆགས་འདྲ་མིན་དང་རི་དྭགས་སྣ་ཚོགས་ཀྱིས་རྩེད་འཇོར་རོལ་ཞིང་། འདབ་ཆགས་བྱ་རིགས་སྣ་ཚོགས་ཀྱིས་གཤོག་རྩལ་ངོམ་བཞིན་ཀུན་གྱིས་ཁྲི་འཛིན་རིན་པོ་ཆེའི་ཞལ་གྱི་དཀྱིལ་འཁོར་ལ་ལྟ་བཞིན་འདུག་ལ། ཚོགས་ཁང་དང་སྐུ་གདུང་ཞུགས་འབུལ་བྱ་སའི་མཚམས་དེར་མཁའ་དབྱིངས་སུ་དཀར་ཞིང་གསལ་བའི་ཉ་གང་གི་ཟླ་བ་ཞིག་ཤར་ལ་ཟླ་བ་དེ་ཡང་ནམ་རྒྱུན་དང་མི་འདྲ་བར་སྔར་ལས་ཆེ་ཞིང་སྔར་ལས་གསལ། ད་དུང་ཟླ་བའི་མཐའ་ལ་གཡུ་འབྲུག་དང་རྒྱ་བྱ་འམ་རྨ་བྱ་གཉིས་ཀྱིས་གླུ་དབྱངས་ལེན་ཞོར་དུ་ཟླ་བའི་མཐའ་ནས་སྐོར་བཞིན་མཆིས་ལ། ཅུང་ཙམ་གྱི་རྗེས་སུ་ཁྲི་འཛིན་སོ་གསུམ་པ་མཆོག་གིས་ད་འགྲིག་སོང་ང་འགྲོ་རྒྱུ་ཡིན་ཞེས་གསུངས་སྟེ་ཕེབས་པར་བརྩམ་པ་ན། དེ་མ་ཐག་མོ་ང་ངུ་ཞོར་དུ་ཁོང་གི་ཤམ་ཐབ་ལ་འཇུས་ཏེ་ད་དུང་ཏོག་ཙམ་མ་ཕེབས་བཞུགས་རོགས་ཞེས་ཞུ་བ་འབུལ་བ་རྨིས་སོང་། འོན་ཀྱང་སྐབས་དེར་ངས་དངོས་སུ་ངུ་འབོད་བྱེད་བཞིན་འདུག་པས་རྨི་ལམ་ལས་དཀྲོགས་སོང་ཞེས་བཤད་པ་དང་དགེ་བཤེས་གཡུང་དྲུང་དགེ་ལེགས་ཀྱིས་རྨིས་པའི་རྨི་ལམ་དེ་ཧ་ཅང་ལེགས་མོད། ཚེས་གསུམ་གྱི་དགུང་མོར་རྨིས་པའི་རྨི་ལམ་ལྟར་ཚེས་ལྔ་ཉིན་རང་ཅག་ཀུན་གྱི་གཙུག་རྒྱན་རྗེ་རྒྱལ་བ་གཉིས་པའི་འཁྲུངས་མཆོད་དང་བསྟུན་ནས་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་རྒྱལ་བ་གཉིས་པའི་གསེར་ཁྲིར་མངའ་གསོལ་གྱི་མཛད་སྒོ་དང་འབྲེལ་ཞིང་། དངོས་གནས་རྨི་ལམ་ལེགས་ལ་སྔོན་ལས་དང་འབྲེལ་བའི་རྟགས་རེད་ཅེས་གསུངས་བྱུང་། མ་གཞི་ངས་ཕྱི་བསྐྱོད་ལག་ཁྱེར་ཞུས་ནས་ལོ་གསུམ་ཙམ་ངང་རེ་སྒུག་ཁོ་ནར་བྱས་པའི་མཐར་རང་ལག་ཏུ་སོན་མོད། དེ་མ་ཐག་ཏུ་ཕྱི་རོལ་དུ་བསྐྱོད་པའི་གྲ་སྒྲིག་བྱེད་པའི་སྐབས་དེར། ཐོས་ན་མི་འདོད་པའི་གཏམ་ངན་ཞིག་རྣ་བར་ལྷུང་བ་ནི་སྨན་རིའི་ཁྲི་འཛིན་རིན་པོ་ཆེ་ནུབ་རི་ལ་གཏན་དུ་ཡིབ་ཅིང་སྐུ་ཞིང་ཁམས་གཞན་དུ་གཤེགས་པའི་ཚུལ་དེ་རེད། སྐབས་དེར་ང་ལ་ཡང་ཡིད་ཐང་ཡོངས་སུ་ཆད་དེ་ང་ཅི་འདྲའི་ལས་ངན་ཞིག་རེད་འང་སྙམ་སྟེ་བསམ་གཞིག་གི་ཁྲོད་དུ་ལྷག
ཉིན་མོར་བཟའ་བཏུང་གི་དང་ག་འགག་ཅིང་ཟས་ལ་བྲོ་བ་མེད། མཚན་མོར་མིག་ཆུས་འགྲམ་པ་སྔ་ལ་སྦྱར་ཞིང་བྲང་གཞུང་སྤར་གྱིས་བཟུང་། དེ་ལྟར་སྐྱོ་གདུང་དྲག་པོའི་ངང་བདུན་ཕྲག་འགའ་ཕྱིན་ཞིང་། ཉིན་ཞིག་སྨན་རིའི་ཁྲི་འཛིན་གསར་པ་ཞིག་གསེར་ཁྲིར་མངའ་གསོལ་ཡིན་པར་ཐོས་ཤིང་། འགྲོ་སའི་ཁ་ཕྱོགས་བོར་ཏེ་བྱེ་ཐང་ལ་ཁེར་རྐྱང་དུ་ལྷག་ཅིང་། དབུགས་རྒྱུན་འགག་ལ་ཁད་ཀྱི་བུ་མོ་ང་ལ་སླར་ཡང་སྨན་རིའི་མཁན་པོར་མཇལ་བའི་སྐལ་བཟང་ཤར་བྱུང་སྙམ་ཏེ་སྡུག་གི་མུན་པ་དབྱིངས་སུ་དྭངས་ཤིང་དགའ་བ་འབུམ་གྱིས་མྱོས་ཏེ་རིམ་པར་རྒྱུད་དེ་གདན་ས་ཆེན་པོ་དཔལ་གཤེན་བསྟན་སྨན་རིའི་དགོན་དུ་འབྱོར། ཕྱི་ཉིན་ཁྲི་འཛིན་སོ་བཞི་པའི་པའི་སྐུ་ཡི་གསེར་ཞལ་དངོས་སུ་མཇལ་བའི་སྐལ་བཟང་ཐོབ་ཅིང་། ད་དུང་ང་ལ་ཚུར་ཁྲི་འཛིན་སོ་གསུམ་པའི་གདུང་རུས་དང་གདུང་ཐལ་སྲུང་མདུད་ལ་སོགས་གནང་བར་མ་ཟད་ཞོར་དུ་བཀའ་སློབ་ལམ་སྟོན་གནང་ཏེ། ཁོང་ནི་ཁྲི་འཛིན་གསར་བ་ཡིན་ནའང་། ང་ཚོའི་བར་དུ་ཁ་ཐག་ཇི་ལྟར་རིང་ཡང་སེམས་ཐག་ཉེ་བའི་ནང་མི་ལྟ་བུ་ཡིན་པར་ཡིད་ཆེས་དང་འདུ་ཤེས་བཅང་ཡོད་ལ། གྲྭ་ས་སྨན་རི་དགོན་འདི་ནི་ང་རང་ཚོ་བོན་འབངས་ཀུན་ལ་དབང་བའི་རྩ་བའི་མ་དགོན་ཞིག་ཡིན་པ་ནི་དེ་རིང་ངས་ལོ་རྒྱུས་རྙིང་པ་ཞིག་ལ་འགྲེལ་བཤད་གསར་བ་ཞིག་བཤད་མ་དགོས་པ་ཞིག་རེད། དེས་ཕྱིར་ཁོམ་ལོང་ཡོད་དུས་སུ་དུས་ཚོད་དང་སྟབས་བསྟུན་ནས་སླར་ཡང་སྨན་རིའི་དགོན་དུ་འབྱོར་ཐབས་བྱ་དགོས་ལ། འདིར་ཕྱོགས་དཀའ་ངལ་སོགས་གང་ལ་འཕྲད་ཀྱང་ངས་རོགས་པ་དང་རྒྱབ་སྐྱོར་གང་འཇོན་བྱ་ནས་སེལ་ཐབས་བྱ་ངེས་ཡིན་ཅེས་དང་། ས་ཆ་གང་དུ་སོང་ཡང་སྨན་རིའི་དགོན་འདི་ང་ཚོ་ཀུན་ལ་དབང་བའི་ཐུན་མོང་གི་དགོན་པ་ཡིན་པར་ནམ་ཡང་སེམས་ནས་བརྗེད་མི་རུང་། སྤྱིར་ཞྭ་དཀར་གཡུང་དྲུང་གི་བོན་རིན་པོ་ཆེ་འདི་ལ་དད་གུས་དང་ཡིད་ཆེས་བྱེད་མཁན་ཞིག་ཡིན་ཕྱིན་ཆད་སུ་དང་གང་གི་ཁྱད་པར་མེད་ལ། རྒྱུན་དུ་བྱ་བ་ལམ་སློང་ཡོང་བའི་ཆེད་དུ་སྨོན་འདུན་དང་ཡར་དཀོན་མཆོག་ལ་སྐྱབས་འཇུག་སོགས་ངས་སེམས་ནས་བརྗེད་མི་སྲིད་འ། ཞེས་གསུངས་བྱུང་། དེ་མ་ཐག་ངའི་སེམས་ནས་ཀྱང་དངོས་གནས་རེ་བ་ཆུད་ཟོས་སུ་བྱས་མེད་ལ་མཇལ་ས་ཡང་གཏན་ནས་ནོར་མི་འདུག་འང་སྙམ་པའི་འདུ་ཤེས་གསར་བ་ཞིག་གཞི་ནས་རྙེད་བྱུང་བར་མ་ཟད་བདེ་སྐྱིད་ཀྱི་ཁ་ཞག་དྲོད་མོ་ཞིག་དང་ལྷན་དུ་རང་ཡུལ་ཁ་བ་གངས་ཅན་ལྗོངས་སུ་ལོག་འདོད་བྱུང་།
ཞེས་སྤྱི་ཟླ་ཚེས་ 2018/2/27/ཉིན་རྒྱ་གར་རྒྱལ་ས་རྡི་ལི་ཡོངས་གྲགས་སུ་མན་ཇུ་དྲི་ལ་རུ་འབོད་པའི་གནས་དེར་ཨ་མའི་འཚིག་ཇ་ཁང་དུ་ AMA COFFEE SHOP རྒྱལ་རོང་བ་ཚེ་ལྡན་དབང་མོས་རྨིས་པའི་རྨི་ལམ་དེ་བཤད་ཞོར་བསྐལ་བཟང་གཡུང་དྲུང་གིས་རྒྱལ་རོང་སྐད་ནས་ཚུར་ཡིག་ཐོག་ཏུ་ཕབས་པའོ།