རས་པ།
ཁྱོད་ཀྱི་མིག་ཟུང་གིས་སྡུག་བསྔལ་གྱི་ངོ་གདོང་གཅིག་པུར་གཟིགས།
སྐྱོ་སྡུག་གི་འཚོ་བས་འཁོན་པའི་བོད་ཡུལ་ལ།
ཁྱོད་ཀྱི་དངན་པ་རིང་མོས་གཡས་སྐོར་གཡོན་སྐོར་བྱས།
ཏི་སི་གངས་འདབས་ནས་ཆད་ཟིན་པའི་རྨུ་ཐག་མཐུད་པར་བརྩོན།
རྩྭ་ཐང་གི་རླུང་འཚུབ་ཀྱིས་དཔར་བའི།
ཁྱོད་ཀྱི་མིག་ཁའི་གཉེར་མ་གློག་བརྙན་གྱི་བསམ་གཞིག་ལ་འཕོས་ཤིང་།
སྙིང་རྗེ་མེད་པའི་གངས་རི་དཀར་པོའང་།
ལོ་ཤས་སྔོན་ནས་ཁྱོད་ཀྱི་མགོ་ལ་སྤོས།
ཁྱོད་ཀྱིས་དངན་པ་འཐེན་ཞོར་མུ་མཐུད་དུ་འཁུར།
ཏན་ཏན་ཁྱོད་རང་ཐང་ཆད་ཡོད་ངེས།
ཁྱོད་ཀྱི་ཡིད་བརྙན་གྱི་ནམ་མཁའ་རུ།
མཚོན་སྟོབས་ཆེ་བའི་སྐྱོ་གདུང་གི་རི་མོ་བགྲང་ལས་འདས་ཤིང་།
ཁ་ཁུ་སིམ་པའི་རང་ཉིད་ཀྱི་གོམས་སྲོལ་དེའང་།
བོད་གངས་ཅན་ལྗོངས་ཀྱིས་ཁྱོད་ལ་བསླབ་ཅིང་།
ཁྱོད་ཉིད་སྐྱོ་བར་བྱེད་པ་དེ་རེད་ཨང་།
ཨ་ཕའི་རྨི་ལམ་གྱི་རི་མོར་ཚོན་མདོག་བྱུགས་མེད།
རྩྭ་ཐང་ད་དུང་སྐྱ་བོར་གནས།
ཨ་མའི་བཞོ་དབྱངས་ཀྱི་སྙན་འཇེབས་རྣ་ལ་འཁོར་ཡང་།
ཁྱོད་ཀྱི་བརྙན་མིག་ལ་རེ་ལྟོས་བྱས་ཡོད།
ཡིན་ནའང་།
ཡིད་ལ་ཤོངས་དཀའ་ཞིང་།
དང་ལེན་ཡང་བྱེད་འདོད་མེད་པའི།
བཤད་འཕྲོར་ལུས་པའི་གཏམ་རྒྱུད་དེ་ལ།
བསམ་ཞིང་བསམ་ཞིང་།
ངས་རང་ཉིད་ཀྱི་སྙིང་གི་འཕར་སྒྲར་ཉན་བཟོད་དཀའ་ཨང་།
༢༠༢༣།༥།༩ ཞོགས་པ།