རྩོམ་པ་པོ། འོད། (ཨུ་རུ་སུ།)
མཇལ་འཕྲད་ཀྱི་སྐོར།
ད་ལྟའི་འཛིན་སྐྱོང་བཀའ་ཤག་གི་ངོས་ནས་བོད་སྤྱིའི་ལས་དོན་མང་བོ་ཞིག་འཐུས་ཤོར་དུ་སོང་འདུག ཨ་རི་གཞུང་གི་ངོས་ནས་བོད་དོན་རྒྱབ་སྐྱོར་རྟག་ཏུ་གནང་གིན་ཡོད་ལ། དེ་ཡང་གོང་ས་མཆོག་གི་སྙན་གྲགས་དང་མཚན་གནས་དང་འབྲེལ་བའི་ཐོག་ནས་བོད་མིའི་དཀའ་སྡུག་སེལ་ཐབས་སུ་འབད་ཀྱི་ཡོད། དེ་བཞིན་ཡོ་རོབ་ཁག་ནང་ལའང་གཅིག་མཚུངས་རེད། ལོ་ལྟར་ཨ་རིའི་སྲིད་འཛིན་དག་དང་༧གོང་མཆོག་མཇལ་འཕྲད་གནང་ནས་བོད་དོན་ཐོག་གྲོས་མོལ་གནང་གིན་ཡོད། ཉེ་ཆར་ཨ་རིའི་གྲོས་ཚོགས་གོང་མས་སྲིད་འཛིན་ཊི་རུམ་ཕུ་ལ་གྲོས་འཆར་ཞིག་ཕུལ་ཡོད་པ་དང་། དེའི་ནང་“རྒྱ་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་ཐོག་བོད་ཀྱི་གནད་དོན་སེལ་ཐབས་སུ་ངེས་པར་དུ་ཤུགས་སྣོན་བརྒྱབ་དགོས་པ”འཁོད་འདུག སྐབས་འདི་ལ་ལྟ་བུ་ལ་ང་ཚོས་ཀྱང་༧གོང་ས་མཆོག་ཨ་རིའི་སྲིད་འཛིན་གསར་བ་དང་གནད་ཡོད་མི་སྣར་མཇལ་འཕྲད་གནང་རྒྱུའི་དུས་ཚོད་བཟོ་ཐུབ་དགོས། འོན་ཀྱང་། སྲིད་སྐྱོང་གིས་ཁོ་རང་གལ་ཆེན་དུ་བཟུང་ནས་མི་སྣ་གལ་ཆེན་ལ་མཇལ་འཕྲད་ཨེ་ཐུབ་ཐུབ་བྱས་པས་སྤྱི་བའི་ལས་དོན་འཐུས་ཤོར་དང་། སྤྱི་ལ་གྱོང་གུད་ཚབས་ཆེན་ཐེབས་སུ་བཅུག ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་ནས་ཨ་རིའི་གནད་ཡོད་མི་སྣ་རྡ་སར་ཞུས་ཏེ་༧གོང་ས་མཆོག་དང་མཇལ་འཕྲད་ཞུས་པར་མ་ཟད། ཨ་རིའི་གྲོས་ཚོགས་སུ་༧སྐུའི་འཁྲུངས་ཀྱང་བརྩི་སྲུང་གནང་བ་སོགས་ཕྱག་ལས་གལ་ཆེན་གནང་བཞིན་པའི་སྐབས་འདིར་གནས་དབྱུང་བཏང་ནས་ལས་འགུལ་མང་བོ་འཐུས་ཤོར་དུ་བཏང་ཡོད།
ལྔ་དང་ལྔ་བཅུའི་སྐོར།
སྲིད་སྐྱོང་ནས་ད་བར་དུ“ལྔ་དང་ལྔ་བཅུ”ཞེས་པ་གསུངས་ནས་མི་མང་མགོ་འཐོམས་སུ་བཅུག་ཡོད། དོན་དངོས་སུ་བཤད་ན་“ལྔ་དང་ལྔ་བཅུ”ནི་ཁ་བཤད་ཙམ་རེད། གལ་ཏེ་༧གོང་ས་མཆོག་ལོ་ལྔ་ཡི་རིང་བོད་དུ་གདན་ཞུ་བྱེད་འདོད་ཡོད་ཚེ། མ་མཐའ་ཡང་སྐུ་ཚབ་ཚོགས་ཆུང་ཞིག་བཙུགས་ནས་ཚད་གཞི་གང་ཞིག་ལ་སླེབས་ཐུབ་མིན་གྱི་རྒྱུས་ལོན་བྱེད་དགོས་པ་རེད།འོན་ཀྱང་། སྲིད་སྐྱོང་དང་བཀའ་ཤག་གིས་ངོས་ནས་སྔར་ཡོད་ཚོགས་ཆུང་མེད་པར་བཟོས་ཏེ་ད་ལྟ་ཚོགས་ཆུང་ཙམ་ཡང་མེད་པ་ཆགས་ཡོད། འདི་ཆེས་འཐུས་ཤོར་དང་ཉེན་ཚབ་ཆེ་བ་ཞིག་རེད། ད་ལྟ་བར་དུ་རང་སྲེག་བརྒྱ་དང་བཞི་བཅུ་བརྒལ་བ་གནང་ནས་༧གོང་ས་མཆོག་བོད་དུ་གདན་འདྲེན་ཞུ་དགོས་པའི་འབོད་སྐུལ་ཞུས་པ་ལྟར། བཀའ་ཤག་དང་སྲིད་སྐྱོང་ངོས་ནས་གལ་གནད་དུ་མི་འཛིན་པར་ལྷོད་གཡེང་ངང་བཞག་ནས་གཞིས་ལུས་བོད་མིའི་རེ་འདོད་ལ་ཤུགས་སྣོན་མ་བྱས་པའི་ཉེས་པ་དང་འཐུས་ཤོར་ཁ་གསབ་བྱེད་ཐབས་མེད་པའི་གནས་སུ་གྱུར་ཡོད། ད་དུང་བཙན་བྱོལ་དུའང་རང་ཁ་རང་གསོ་བྱེད་རྒྱུ་ཡིན་ཚུལ་བསྒྲགས་པ་ཙམ་ལས་སྔར་ལྟར་རོགས་དངུལ་ལ་ཤུགས་ཆེན་སྟེན་གྱིན་ཡོད།
དོན་ཚན་བཅུ་ཡི་ངན་གོམས་ཀྱི་སྐོར།
༢༠༡༥ ལོར་སྲིད་སྐྱོང་གིས་ཁོ་རང་ཡང་བསྐྱར་སྲིད་སྐྱོང་འོས་མི་ལང་རྒྱུ་ཡིན་པའི་བསྒྲགས་ཡིག་ཅིག་སྤེལ། དེའི་ནང་དུ་ཁོ་རང་གི་གྲུབ་འབྲས་ཡིན་ཞེས་པའི་དོན་ཚན་བཅུ་བཀོད་འདུག གྲུབ་འབྲས་དེ་ཚོ་༧ གོང་ས་མཆོག་དང་ཟམ་གདོང་རིན་པོ་ཆེ་བཅས་ཀྱིས་སྔར་ནས་རྨང་བཅོས་ཟིན་པ་ཏག་ཏག་རེད། དེ་དག་ཚང་མ་ཁོང་རང་གི་བྱས་རྗེས་དང་གྲུབ་འབྲས་ཡིན་ཞེས་པས་མི་མང་བོ་མགོ་འཐོམས་པར་གྱུར། ད་དུང་༧གོང་ས་མཆོག་དགུང་ལོ་༡༡༣ ལ་བཞུགས་རྒྱུ་ཡིན་པ་དེའང་རང་ཉིད་གྲུབ་འབྲས་ཡིན་ཚུལ་བཀོད་ཡོད། མི་མང་གིས་དོན་ཚན་དག་ལ་མ་དཔྱད་པར་འོས་འཕངས་ནས་ཁོ་ལ་རྒྱལ་ཁ་ཐོབ། ད་ཐེངས་ཀྱང་ཁོས་དོན་ཚན་བཅུ་ཡིས་གྲུབ་པའི་གསལ་བཤད་ཅིག་སྤེལ་ནས་དོན་གཅོད་པ་སྐུ་ངོ་སྤེན་པ་ཚེ་རིང་ལ་སྐྱོན་འཛུགས་བྱས་ཡོད་ལ།ཁོང་གི་སེམས་སུ་སླར་ཡང་འོས་བསྡུའི་སྐབས་ཀྱི་དོན་ཚན་བཅུ་དང་འདྲ་ལམ་ལྷོང་ཡོང་ངེས་བསམ་ཡོད་མོད། སྔར་འོབས་སུ་ལྷུང་བའི་མི་མང་བོ་ཞིག་གཉིད་ལས་སད་ཡོད་སྟབས་དྲང་བདེན་གལ་ཆེན་དུ་བཟུང་བས། ཁོང་གི་ངན་གོམས་ལ་ད་ཐེངས་ལམ་འགྲོ་དེ་ཙམ་རྒྱུག་གི་མེད། འོན་ཀྱང་། སྲིད་སྐྱོང་ནས་དབང་ཆ་ཁོ་ན་བེད་སྤྱོད་བྱེད་པ་འདིས་ང་རང་ཚོའི་མང་གཙོ་དང་།རང་དབང་། ཕྱི་གསལ་ནང་གསལ་ཡིན་ཚུལ་བཅས་ལ་ཕོག་ཐུག་ཆེན་པོ་བཟོས་ཡོད་པ་དང་། ཁྲིམས་ཀྱི་ནུས་པའང་མེད་པར་བཟོ་བཞིན་པའི་སྣང་ཚུལ་གསལ་བོ་རེད།
བྲེལ་བྲེལ་དང་ཚ་གེ་ཚི་གེ།
བོད་ཀྱི་ཐེབས་རྩ་ཁང་གིས་དོན་གཅོད་ཁང་ལ་ཨ་སྒོར་ས་ཡ་གཅིག་ཕྱེད་ཀ་བུ་ལོན་མིན་ཡིན་གྱི་རྩོད་པ་དེ་བསམ་བཞིན་ཆེ་རུ་བཏང་བ་ཞིག་རེད། གཙོ་བོ་སྲིད་སྐྱོང་གིས་སྐུ་ངོ་སྤེན་པ་ཚེ་རིང་ལ་ཕྱི་གསལ་ནང་གསལ་བྱས་ནས་ཤེས་སུ་འཇུག་དགོས་མོད།དེ་ལྟར་མ་བྱས་པར་ཚིག་ཙམ་གྱིས་གསལ་བཤད་དེས་གོ་མ་ཆོད་པར་མ་ཟད། སྐུ་ངོ་སྤེན་པ་ཚེ་རིང་གི་དཀའ་ངལ་ཆེ་རུ་གྱུར་པ་རེད། རྒྱུ་མཚན་ནི་སྐུ་ངོ་སྤེན་ཚེ་དོན་གཅོད་པ་ཡིན་སྟབས་དེའི་སྐོར་འགན་ཁོང་གིས་འཁུར་བ་དགོས་པ་རེད། ཕྱོགས་གཅིག་ནས་བུ་ལོན་ཡིན་པར་བཤད་པ་དང་། སྲིད་སྐྱོང་ནས་བུ་ལོན་མིན་ཚུལ་བཤད་པས་ཁོང་གིས་གང་བདེན་གསལ་རྟོགས་བྱེད་དགོས། སྐབས་འདིར་སྲིད་སྐྱོང་གིས་བདེན་དཔང་གསལ་བོ་མ་བསྟན་པར་མ་ཟད། བཀའ་ཤག་ལ་ཡིད་ཆེས་བྱེད་ཀྱི་མེད་པ་དང་། བྱ་སྤུ་གནོན་གྱི་འོག་ཏུ་མི་འགྲོ་བར་བསྙད་ནས་གནས་དབྱུང་བྱས་པ་རེད་ལ། ཕྱོགས་གཅིག་ནས་རང་ལ་དེ་སྔ་ནས་དམིགས་ཡུལ་ཡོད་པ་ལྟར་ཤེས་རིག་བཀའ་བློན་ཨ་རིའི་དོན་གཅོད་དུ་འཇོག་པའི་གོ་སྐབས་བླངས་པ་རེད། དྲང་མོར་བཤད་ན་ཨ་སྒོར་ས་ཡ་གཅིག་དང་ཕྱེད་ཀའི་སྐོར་དེ་སྐུ་ཚབ་དོན་གཅོད་ལ་ཡིག་ངག་གཉིས་ནས་གསལ་བོ་བཟོས་ནས་ཕྱི་གསལ་ནང་གསལ་བྱས་ན་གཅིག་ནས་དོན་གཅོད་མཆོག་གིས་ཀྱང་ལས་ཀ་བྱེད་བདེ་ཞིང་། གཉིས་ནས་ད་ལྟའི་གནས་བབ་འདི་ཡང་འབྱུང་དགོས་དོན་མེད་མོད། སྲིད་སྐྱོང་གིས་དེ་ལྟར་མ་བྱས་པར་བྲེལ་བྲེལ་དང་ཚ་གེ་ཚི་གེ་བྱས་ནས་ཤེས་རིག་བཀའ་བློན་གཅོད་དོན་བསྐོས་པ་གསལ་བོ་རེད།
མཛད་དཀའ་དང་མཇལ་ཁ།
མི་ཁ་ཅིག་གིས་རྩོད་རྙོག་འདི་ཁར་ཁྱེར་ཏེ་༧གོང་ས་མཆོག་ལ་ཡང་མཛད་དཀའ་བཟོ་ཡི་ཡོད། ཁོ་ཚོས་འདི་ནི་༧གོང་ས་མཆོག་གི་ཐུགས་དགོངས་ཡིན་ཚུལ་ལབ་ཀྱིན་འདུག་པ་ནི་གཏིང་ནག་པོ་ཡིན་པའི་རྟགས་རེད། རྙོག་དྲ་འདི་སྲིད་སྐྱོང་སོགས་ཀྱིས་བཟོས་པ་ལས་༧གོང་ས་མཆོག་ལ་འབྲེལ་གང་ཡང་མེད་པ་ཤེས་ཐུབ། གང་ཞེ་ན། བཀའ་ཤག་གིས་ཐག་གཅོད་ཡིན་ཞེས་དབང་ཆ་བེད་སྤྱོད་བྱས་ཚར་སྟབས། ༧གོང་ས་མཆོག་ནས་གང་ཡང་གསུང་བདེ་བོ་ཡོད་པ་མ་རེད། ད་དུང་སྐུ་ཚབ་གསར་བས་མཇལ་ཁ་ཞུས་པ་དེའང་ཆབ་སྲིད་འཁྲབ་ཀྱི་ཡོད་པ་རེད། ༧གོང་ས་མཆོག་དང་ལྷན་ཅིག་པར་བརྒྱབ་པ་དེ་དག་བེད་སྤྱད་ནས་མི་མང་གི་ཁ་འགོག་འདོད་པ་ཙམ་རེད། འཁྲབ་སྟངས་འདི་ཚང་མ་༧གོང་ས་མཆོག་ལ་མཛད་དཀའ་བཟོ་བའི་ལས་ཀ་ཏག་ཏག་དང་། བོད་སྤྱི་བར་མི་ཕན་པའི་ནང་འཛིང་ཁོ་ནའོ།།
སྐུ་ངོ་སྤེན་པ་ཚེ་རིང་གི་ལམ་ཁའི་དཀའ་ངལ།
སྐུ་ངོ་སྤེན་པ་ཚེ་རིང་གིས་སྤྱི་བའི་ལས་ཀ་གནང་གིན་ཡོད། ཁོང་སྤྱི་འཐུས་ཚོགས་གཙོ་ཡིན་སྐབས་སུ་ཕྱི་རྒྱལ་ཁག་ལ་བོད་དོན་ཆེད་འབྲེལ་འཛུགས་གནང་དུས། རྒྱ་གཞུང་གིས་ཆེད་དུ་བར་ཆད་བཟོས་ལམ་ཁ་འགོག་ཐབས་མང་བོ་བྱས་ཡོད་ལ། ཁོང་སྲིད་སྐྱོང་འོས་མི་ལངས་སྐབས་ཀྱང་རྒྱ་གཞུང་གི་དྲ་བ་སོགས་སུ་ཁོང་ལ་ངན་སྨྲས་དང་ཟུར་ཟ་འདྲ་མིན་བྱས་ནས་འགོག་རྐྱེན་སྣ་ཚོགས་བཟོས་ཡོད། དེ་དག་ལ་ང་ཚོས་མཐུན་སྒྲིལ་བྱས་ནས་གདོང་ལེན་བྱེད་དགོས་མོད། དེ་ཕར་ཞོག་ད་དུང་ནང་ནས་ཀྱང་ཁོང་གི་ལམ་ཁར་འགོག་སྣ་ཚོགས་བཟོས་པ་ཡོངས་སུ་གསལ་བོ་ཡིན། ད་ཐེངས་ཀྱང་ཁོང་གིས་སྒྲུབ་བཞིན་པའི་རླབས་ཆེན་གྱི་བྱ་བཞག་མང་བོ་ཞིག་ལ་འགོག་རྐྱེན་བཟོས་ནས་སྤྱི་དོན་འཐུས་ཤོར་དུ་བཏང་། ད་ནི་རྒྱ་གཞུང་གི་འདོད་པ་ང་ཚོས་བསྒྲུབས་ཏེ་སྐུ་ངོ་མཆོག་དཔུང་རོགས་མེད་པའི་དཔའ་རྒོད་ཁེར་རྐྱང་དུ་ཕུད་པ་ལྟ་བུ་འདི་ལ་ཞེ་གཏིང་སྐྱོ་བྱུང་། ལམ་ཁ་བཀག་པ་འདི་ལ་བསམ་བློ་གཞན་ཞིག་གི་ངོས་ནས་བལྟས་ན། མ་འོངས་པའི་སྲིད་སྐྱོང་ལའང་ཡོང་བར་དོགས་ཏེ་ད་ལྟ་ནས་མགོ་གནོན་གྱིན་ཡོད་པ་རེད། རྒྱ་བོད་གཉིས་ཀས་སྐུ་ངོའི་ལམ་ཁར་འགོག་རྐྱེན་བཟོ་བ་ནི་བོད་སྤྱི་བའི་གྱོང་གུད་ཆེན་པོ་ཞིག་གོ།།
སྐུ་ངོས་བཀའ་ཤག་གི་བཀའ་བརྩིས་པ།
ཕྱི་ལོ་༢༠༡༧/༠༥/༢༣-༢༤ ལ་སོགས་སུ་སྲིད་སྐྱོང་དང་ཨ་རིའི་གནད་ཡོད་མི་སྣ་ཁག་ཅིག་མཇལ་འཕྲད་བྱས་ཡོད། དེ་ནི་སྐུ་ངོས་བཀའ་ཤག་གི་བཀའ་བརྩིས་ནས་བསྒྲུབས་པ་ཞིག་དང་ནུས་པ་ཐོན་པ་ཞིག་རེད། དེའི་སྟེང་ནས་འབྱུང་འགྱུར་གྱི་མཇལ་འཕྲད་དག་ཀྱང་བསྒྲུབ་ངེས་ཡིན་པ་ཧ་ཅང་གསལ། འོན་ཀྱང་། སྲིད་སྐྱོང་གིས་ཁ་སྔོན་གསལ་བཤད་བཅུ་སྤེལ་བའི་ནང་མཇལ་འཕྲད་ཁག་ཅིག་བཟོ་མ་ཐུབ་པར་བརྗོད་ནི་ཁ་གཡོར་ས་ཙམ་རེད། བཤད་བཤད་ཚང་མ་སུས་ཀྱང་འགྲུབ་ཏུ་འཇུག་ཁག་པོ་རེད། གལ་ཏེ་བཤད་ཚད་འགྲུབ་ཐུབ་ཚེ་སྲིད་སྐྱོང་གིས་ཀྱང་ཅི་ཙམ་ཁས་བླངས་པ་ང་ཚོས་ཤེས་གསལ་ལྟར་རེད། གང་ལྟར་སྐུ་ངོ་སྤེན་ཚེ་ཡིས་ཐེངས་འདིའི་གནས་ལུགས་མེད་པའི་བཀའ་ཤག་གི་བཀའ་ཡང་བརྩིས་ནས་དང་དུ་བླངས་ཡོད། འདི་ཁོང་ལ་ནག་ཉེས་ཤིག་ཡོད་ནས་དང་དུ་བླངས་པ་མ་ཡིན་པར་སྒྲིག་གཞི་དང་བཀའ་ཤག་གི་བཀའ་བརྩིས་པ་རེད།
༢༠༡༧/༡༡/༢༥ ཉིན།
རང་གི་དངོས་མིང་ཡང་བརྗོད་མི་ནུས་པའི་ནག་ཁུང་ནང་གི་རྩོམ་པ་པོ་འོད་ལགས་ད་ཐུགས་རྗེ་གཟིགས་ཁོང་རྣམ་གཉིས་སུ་ལའང་སྐྱོན་དང་ཡོན་ཏན་སོགས་ཟང་ཟིང་མང་པོ་མ་བྲིས་རོགས་ནང་དེས་ང་ཚོའི་བོད་མི་སྤྱི་པའི་མཐུན་སྒྲིལ་ལ་གནོད་ཀྱི་འདུག་་ཐུགས་རྗེ་གཟིགས་
ཞིབ་འཇུག་གཏིང་གསལ་གནང་འདུག་པས་ངོ་སོ་ཡར་ལ་བསྟོད། ད་བློ་སེང་ཉིན་མོ་ཟས་མི་འགྲོ་བ་དང་མཚན་མོ་གཉིད་མི་འགྲོ་བ་ཚད་ལ་སླེབས་ཚུལ་གོ་ཐོས་བྱུང་།
སྐུ་ཚེ་ད་སྤེན་པ་ཚེ་རིང་ལ་རྒྱབ་སྐྱོར་ཡོད་མདོག་བསྟན་ནས་དོན་ངོ་མ་ལ་སྤེན་པ་ཚེ་རིང་ནག་པོ་མ་བཟོ་ཐུགས་རྗེས་གཟིགས།
དེང་སང་སྐུ་ཚབ་ཟེར་བ་ཞིག་ཡོད་དམ། སྐུ་ཚབ་དང་གཞུང་ཚབ་གཉིས་ཀྱི་ལས་དོན་གཅིག་ཡིན་ནམ།
བདེན་པ་རྫུན་མ་ཁྲིམས་ཀྱི་དབྱེ་།
ཆུ་དང་འོ་མ་རུས་སྦལ་དབྱེ་ཟེར་བ་ལྟར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་སྒོ་ཕྱེ་ནས་བཞུགས་འདུག་གོ་།
ངར་བ་རེད་བྲིས་ནོ་ར་ཡག་གི
དཀར་ནག་གི་དབྱེ་འབྱེད་པ་ལ་དགའ། ས་ཁུང་གི་ཕྱོགས་རྩོད་པ་ལ་མི་དགའ། རྒྱུ་མཚན། རང་ཉིད་ནི་གླེན་ལྐུགས་ཀྱི་ཚོགས་ཁོག་ནས་སྔ་མོ་ཞིག་ལ་བཏོན་ཚར་བ་ཡིན། བཤད་འདོད་པ་ནི།
ངོ་དང་མིང་མི་གསལ་བའི་ངོ་རྒོལ་བ་འདི་ཚོའི་རྒྱབ་ལོག་ལ་རྒྱལ་ཞེན་ཆེན་པོ་དང་མཐུན་བསྒྲུལ་ལ་དོ་ཁུར་ཆེན་པོ་བཟུང་ཡོད་པའི་ངོ་བོར་གནས་ཡོད་པ་གསལ་པོ་རེད། སྤྱི་དོན་ལ་བཤད་དགོས་བ་དེ་བཤད། ངོ་རྒོལ་བྱེད་དགོས་བ་ཚུན་ཆད་བྱས་ན་ཡག་པོ་རེད། དགའ་བསུ་ཞུ།
རེད་དེ། ཁམས་རིགས་འགའ་ཞིག་གིས་དཔའ་ཡོད་མདོག་དང་དཔུང་ཆེ་མདོག་གིས་སྤྱི་དོན་འདི་སྒར་འཁོན་ཙམ་གྱི་བྱེད་ལས་ཀྱི་ངོ་བོར་བསྒྱུར་ནས་ཁ་ངོ་བསྟན་ན་བཅོས་རྒྱུ་ཡོད་ཚོད་ཀྱི་འཇིག་སྐུལ་བྱེད་པ་ནི། སྤྱི་དོན་གྱི་ཚུལ་ཞག་མེད་པའི་ངན་ཆ་དེ་ཡིན་པ་ཤེས་ན་བཟང་། དགའ་བསུ་མེད།
དཔའ་ཡོད་མེད་ང་ཚོས་ང་ཚོའི་ནང་ལ་ངོམ་དགོས་བའི་དུས་ཞིག་རྩ་ནས་མིན། དཔའ་བོ་ཡིན་ན། ཆོལ་ཁ་གཞན་ལས་མང་པའི་དཔའ་པོ་དེ་འདྲ་མང་པོ་ཞིག་(བཙན་བྱོལ)་ཟེར་བའི་མིང་འདི་འཁུར་བར་ཡོང་མི་སྲིད། བོད་ས་བཟུང་ནས་འདུག་འོས་བ་ཞིག་རེད། རེད་དེ། དེ་ནི་ང་ཚོ་ཚང་མས་མ་བྱུང་བ་རེད། བྱས་དུས། རྫིག་པོ་བཤད་མཚམས་ཞོག།
མཐའ་དོན། ཆོས་དོན་འཐུས་ཚབ་གཅིག་ལས་གྲྭ་ལ་གོན་པའི་སྲིད་དོན་ཞབས་ཁྲི་ཅན་ཡོད་ཚད་དགོན་པ་ལ་གནས་ཕུད་གཏོང་མ་ཐུབ་ན། ལྔ་དང་ལྔ་བཅུ་ནང་བཀྲ་མ་ཤིས་པས་བསྐྱལ་རྒྱུ་ཡིན་པ་གཏན་ཁེད་རེད། ཁོང་ཅོག་གིས་འཚོལ་བ་ནི་རིག་ལམ་གྱི་རྒྱལ་ཁ་རེད། ངེད་ཅོག་ལ་དགོས་བ་ནི་གནས་ལུག་ངོན་གྱུར་གྱི་དཀར་ནག་རེད། ཕ་མ། ཕྲུ་གུ། བཟའ་ཟླ། ཁྱིམ་ཚང་གང་ཡང་མེད་པའི་གྲྭ་ཕོ་ཁ་ཕོ་ཅན་ཞིག་གིས་ཞོ་འོ་མར་བསྒྱུར་བའི་རིག་ལམ་འཚོལ་བ་ལས་འོ་མ་ཞོ་ལ་བསྙལ་བའི་དགོས་བ་མཐོང་མི་སྲིད། ཁོ་ལ་ཅི་ཡང་མེད་པསོ།
སྲིད་སྐྱོང་བློ་བཟང་གིས་འཕང་བའི་མདའ་དེ། ངའི་སྲོག་ལ་ཉན་ཁ་མེད་སའི་ལུས་ཁམས་ཤིག་ལ་ཕོག་ཡོད་ཚོད་རེད། སྤེན་ཚེ་ལ་རྨ་གསོ་བྱེད་པའི་ནུས་པ་མེད་རུང་། ང་མི་ཤི་ཁོ་ཐག་ཡིན། ང་བོད་ཡིན། བོད་ལ་དགའ་བའི་བོད་ཡིན།
གནད་ལ་ཁེལ་བ་ཞིག་བྲིས་འདུག བཀའ་དྲིན་ཆེ། ངས་ཁྱོད་ངོ་མི་ཤེས་ལ་ཤེས་དགོས་དོན་ཡང་མེད། ངས་ཤེས་འདོད་པ་ནི་ཁྱོད་ཀྱིས་བཤད་པའི་བདེན་པ་དང་གནས་ལུགས་སྟོབས་ཆེ་བ་འདི་དག་རེད། བསྐྱར་དུ་བཀའ་དྲིན་ཆེ་ཞུ་འདོད་བྱུང་། བཀའ་དྲིན་ཆེ། གནད་འགག་གི་སྐབས་སུ་མི་ངན་དག་འབུར་དུ་བཏོན་ཡོང་བ་ནི་ཁོ་ཚོ་སྟོབས་ཆེ་བ་མ་ཡིན་པར་མཁས་པ་དག་གིས་ཁ་མི་གྲག་པས་རེད།
བསམ་ཚུལ་ཡག་པོ་གསུང་འདུག སྔར་སྟོན་པ་བཅོམ་ལྡན་འདས་ཀྱིས་གསུང་པར; ཡུལ་དུས་དང་བསྟུན་རྒྱལ་ཁྲིམས་དང་བསྟུན་ཞེས་གསུང་བ་བཞིན། མགོ་ཅི་གཙམ་བདེ་རུང་ཨ་སྒོར་ས་ཡ་གཅིག་དང་ཕྱེ་ཀའི་སྐོར་དེ་ཨ་རིའི་རྒྱལ་ཁྲིམས་དང་མཐུན་ཡོད་ན་བསྒྲིག་པ་ཞིག་རེད་དེ་མིན་ན་དེའི་སྐོར་གྱི་གནད་དོན་ཟ་རི་ཟི་རི་དེ་དོན་སྤྱོད་སྤེན་ཚེ་བོད་མིའི་ཨ་རིའི་སྐུ་ཚབ་དོན་སྤྱོད་ཡིན་སྟབས་གལ་ཏེ་དངུལ་འབོར་ཆེན་པོ་ཞིག་དོན་སྤྱོད་སྔོན་མའི་སྐབས་ཨ་རིའི་རྒྱལ་ཁྲིམས་དང་མི་མཐུན་པའི་ཐོག་མགོ་བདེའི་ལས་ཀ་བྱས་ཡོད་ན་དེས་ང་ཚོ་བོད་མི་ས་ཡ་དྲུག་རྫུན་མ་ཆགས་ཉེན་ལ་དོག་དེ་གནད་ཚུལ་གཙང་མ་བཟོས་ནས་རྒྱལ་སྤྱིའི་ཐོག་བོད་མའི་ཆེ་མཐོང་རྒྱུན་གནད་ཡོང་ཆེས་དོན་སྤྱོད་སྤེན་ཚེས་ལས་འགན་འཁུར་པའི་ཐོག་ནས་གནད་དོན་ཟ་རི་ཟི་རི་དེ་ཚོ་བཟོ་མཁན་སྲིད་སྐྱོང་བློ་སེང་ལ་དྲི་བ་དྲིས་པ་ནི་དོན་སྤྱོད་སྤེན་ཚེ་ནས་བོད་པའི་རྩ་དོན་ལ་ལས་འགན་ཆེན་པོ་འཁྱེར་གྱི་ཡོད་པ་རེད། གཉིས་གལ་ཏེ་སྤེན་ཚེས་ཟླ་སྒྲོལ་ལ་སླབ་བྱ་བྱས་ཡོད་ན་དེ་བྱ་བ་བཟང་པོ་ཞིག་རེད་གང་ཡིན་ཟེ་ན་སྲིད་སྐྱོང་གི་ཟླ་སྒྲོལ་བུ་མོ་ལོ་ཆུང་མ་འོང་མདུན་ལམ་ཆེན་པོ་ཡོད་མཁན་ཞིག་ལ་མི་དམངས་ནས་བློས་བཀེལ་མི་རུང་བའི་ནག་པོ་བཟོ་ནུས་མཁན་གྱི་སྐྱེ་པོ་ཞིག་ཡིན་པ་ཟླ་སྒྲོལ་ལ་སྤེན་ཚེས་སྔོན་ནས་བཤད་པ་དེ་རྣམས དཀར ཆོས་མཐུན་གྱི་བྱ་བ་རེད། གསུམ་སྲིད་སྐྱོང་ཕྱི་རྒྱལ་ཁག་ལ་འགྲོ་རྒྱུརདགའ་པོ་ཡོད་པ་ངས་ཧ་གོ་དོན་དག་གང་ཡོང་གི་ཡོད་པ་ཕལ་ཆེར་གསང་བ་ཡིན་ན་མ་ཐོག་དོན་དག་བྱུང་པ་གང་མཐོང་མ་སོང་ལ་༦གོང་ས་མཆོག་ཕྱ་ིརྒྱལ་ཡུལ་གྲུ་ཁག་ལ་ཕེབས་པ་ནང་བཞིན་སྲིད་སྐྱོང་འགྲོ་བར་རྒྱ་མི་སྐད་ཤོར་གྱི་མི་འདུག་དེར་བསྟན་དོན་མེད་བོད་མི་ས་ཡ་དྲུག་གི་དངུལ་དེ་སྲིད་སྐྱོང་སྐུབ་ལ་ཆུ་བཟོས་སུ་མི་འགྲོ་བའི་ཆེད་སྲིད་སྐྱོང་འགྲོ་འདོད་ཡོད་ཚད་ལ་དོན་སྤྱོད་ནས་མི་ངོ་སྤྲོད་མ་བྱས་པ་དེ་བོད་མི་རང་ཁ་རང་གསོ་ཕར་བཞག་བོད་མི་ལ་སྔར་ནས་རོག་དངུལ་ཕྲན་བུ་རག་སྡད་ཡོད་པ་དེ་ཚོ་གསུང་སྐྱོབ་འཐུབ་པ་དེ་དོན་སྤྱོད་ནས་ལས་འགན་བསྒྲུབ་པ་ཞིག་རེད། དེ་མིན་བྱ་སྤུ་གནོན་ཡོང་དགོས་ན་ཁ་འབོར་ཤོག་མེད་པར་ཚང་མར་ཉམ་ཆུང་དང་༧གོང་ས་མཆོག་བོད་ལ་གདན་འདྲེན་རྒྱུའི་དངོས་ཡོད་ཀྱི་ལས་ཀ་འདི་ཡིན་བསམ་པ་གཅིག་ཀྱང་བསྟོན་རྒྱ་ཕར་བཞག་བཟང་གདོང་རིན་པོ་ཆེ་མཆོག་སྐབས་སུ་ཡོད་པའི་སྐུ་ཚབས་རྣམ་པ་གཉིས་ཀྱང་མེད་པ་བཟོས་ནས་བོད་ནང་གི་བོད་མི་ཚོས་གང་མགྱོགས་༧གོང་ས་མཆོག་མཇལ་རྒྱུའི་གོ་སྐབས་ཤིག་བཤར་ས་རེད་བསམ་པའི་རེ་བ་དེ་འང་མེད་པ་བཟོས་ནས་དོན་དངོས་ཐོག་ཁ་འབོར་ཤོག་ཙམ་ཡིན་སྟབས་ད་ལྟའི་བཀའ་ཤག་ལ་བྱ་སྤུ་གནོན་གྱི་བརྩི་འཇོག་ཞིག་གང་ནས་འོང་། དེ་མིན་རྒྱ་དཔོན་དང་ཨ་དཔོན་གཉིས་ཐུགས་པར་གསང་བ་ཡིན་ན་མ་ཏོག་སྲིད་སྐྱོང་ལ་གང་བྱ྄ེད་རྒྱ་ཡོད། དོད་ཚོགས་ཀྱིས་ཞི་ལ་དགའ་བསུ་བྱས་པ་དོད་ཚོགས་ཀྱི་རྒྱ་དངུལ་ལེན་གྱི་ཡོད་པས་ཡིན་དེ་སྤེན་ཚེའི་ནག་ཉེས་ག་ལ་ཡིན་དེ་ལས་ཉེ་ཁ་ཆེ་བ་སྐལ་རྡོར་སྐབས་དོད་ཚོགས་པ་དང་༧གོང་ས་མཆོག་གི་བཞུགས་གནས་གཅིག་ཆགས་པ་དེར་ཁྱེད་ཀྱི་སྐལ་རྡོར་ལ་ཉེས་པ་མི་འདུག་ཟེ་བའི་འབྲེལ་བཤད་བརྒྱབ་སོང་བར་བསྟན་སྲིད་སྐྱོང་གི་སེམས་འཚབ་དེ་༧གོང་ས་མཆོག་ལ་རེད་ཡང་ན་སྐལ་རྡོར་ལ་རེད།
༄༅། འཇོན་པོ་རྒོད་པོ་དཔའ་ཡོད་མདོག་མདོག་ ཁྲིམས་དང་སྒྲིག་གཞིར་མཁས་མདོག་སྟོན་ནས་
བཀའ་ཤག་ལ་ངོ་ལོག་པ་ལས་། རྒྱལ་ཁབ་བཙན་འཕྲོག་བྱས། བོད་མི་འབུམ་བརྒལ་བ་བསད།
ཆོས་དང་རིག་གཞུང་རྩ་མེད་བཏང་མཁན་དགྲ་བོར་་་་གདོང་ལ་ཁ་རས་གཡོགས་ནས་
ངོ་རྒོལ་བྱེད་བྱེད་ན་་བོད་གཞིས་བྱེས་གཉིས་ནས་དགའ་བསུ་དང་རྒྱབ་སྐྱོར་ཞུ་གི་རེད།
གདོང་ལ་རས་དཀར་གཡོགས་ནས་གཞས་འཁྲབ་མཁན་ཚོའི་རྒྱབ་ལྗོངས་ལ་སུ་ཡོད་ངེས་པར་
དུ་བལྟ་དགོས་པ་ཆགས་འདུག་
ཧ་ཅང་ཡག་པོ་བྲིས་འདུག སོག་ཚང་སྨོན་ལམ་གྱིས་བྲིས་པ་དང་སྐུ་ཞབས་འོད་ལགས་ཀྱིས་བྲིས་པ་གཉིས་ཆ་བསྡེབས་ཏེ་ཁང་གསར་རྡོ་རྗེས་བྲིས་པའི་ཟུར་བརྒྱན་ཚེ། ངས་བསམ་བསྡད་པའང་དེ་རེད། རྩོམ་པ་བོར་བཀའ་དྲིན་ཆེ། ད་ནི་རྒྱ་བོད་གཉིས་ཀས་མཉམ་རུབ་ཀྱིས། སྐུ་ངོ་སྤེན་ཚེའི་ལས་དོན་ལ་བཀག་འགོག་དང་འགལ་རྐྱེན་བཟོ་ཡི་འདུག་པ་གསལ་བོ་རེད།