བཀུར་འོས་རྒྱ་ཆེའི་སྨྱུག་ཐོགས་པ་ཡོངས་ཀྱི་སྙན་ལམ་དུ།
སྐད་ཡིག་འཆི་གསོན་གྱི་རྒྱུ་རྐྱེན་གཅིག་ནི་སྔར་ཡོད་རྒྱུན་འཛིན་དང་ད་ལྟའི་གཙོ་རྒྱུག་སྐད་ཡིག་གི་ཚབ་བྱེད་ཐུབ་མིན་ལ་རག་ལས་ཡོད་པས། རིག་གནས་ལ་དད་མོས་མ་སྨད་པ་རྣམས་ཀྱིས་རང་རང་གི་ས་ནས་ནུས་པ་ཇི་ཡོད་ཀྱིས་འབད་བརྩོན་རེ་བྱེད་བཞིན་ཡོད།
ངེད་ཅག་གི་ངོས་ནས་ཀྱང་བོད་ཀྱི་སྙན་ངག་རྒྱུན་འཛིན་དང་། སྙན་ངག་གི་གཞུང་ལུགས་ཤེས་བྱ་ཁོང་དུ་ཆུབ་པ། སྙན་ངག་ལ་མྱོང་རོལ་བྱེད་པའི་ཁོར་ཡུག་རྒྱ་བསྐྱེད་པ། སྙན་ངག་གསར་རྩོམ་གྱིས་མཚོན་པའི་སྒྱུ་རྩལ་རྩོམ་རིག་པ་སྐྱེད་སྲིང་བྱ་བ། སྙན་ངག་གི་སེམས་ཁམས་མཐོར་འདེགས་ཡོང་བ་སོགས་ཀྱི་ཉེར་མཁོ་ལ་དམིགས་ཏེ། སྔ་ལོ་བཞིན་ལོ་འདིར་ཡང་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་དང་སྟབས་བསྟུན། སྨྱུག་སྡེ་སྙན་ངག་དུས་དེབ་འདོན་ལ་ཉེ་བ་ཡིན་པས། སྙན་ངག་ལ་དགའ་ཞེན་ཆེ་བའི་སྨྱུག་འཛིན་པ་རྣམས་ཀྱིས་རྒྱལ་ཕྱི་ནང་གི་སྙན་ངག་འོས་སྦྱོར། སྙན་ངག་པའི་ལོ་རྒྱུས། སྙན་ངག་གསེད་འགྲེལ། སྙན་ངག་པའི་ཡང་དག་པའི་སེམས་ཁམས། སྙན་ངག་བརྩམས་ཆོས་ཀྱིས་མཚོན་པའི་རྩོམ་ཡིག་རྣམས་སྤྱི་ཟླ་ ༦ ཚེས་ ༥ ནང་ཚུན་གཤམ་གསལ་རྩོམ་སྒྲིག་པའི་ཡིག་ཟམ་ནང་བསྐུར་གནང་ཡོང་བར་ཞུ་རྒྱུ་དང་ཆབས་ཅིག་སྨྱུག་སྡེ་འདོན་ཐེངས་དྲུག་པ་དེ་ཡང་སྙན་ངག་ལ་དང་བ་ཡོད་མཁན་གང་མང་གི་ཕྱག་ཏུ་འཕྲོད་ཐུབ་པ་བྱ་རྒྱུ་དང་། ཁྱེད་རྣམ་པས་ཀྱང་བརྩམས་ཆོས་མྱོང་རོལ་གྱི་སྒོ་ནས་རྩོམ་རིག་གི་ཁོར་ཡུག་གུ་ཡངས་དང་རྒྱ་ཇེ་ཆེར་བསྐྲུན་རྒྱུའི་རམ་འདེགས་མུ་མཐུད་དེ་གནང་བའི་གསལ་འདེབས་ཞུ་རྒྱུ་ཡིན།
སྨྱུག་སྡེ་རྩོམ་སྒྲིག་པས་སྤྱི་ལོ་ ༢༠༡༨ ཟླ་ ༤ ཚེས་ ༦ ཉིན།
གློག་འཕྲིན་ཁ་བྱང་། pengroup@hotmail.com