བསྟན་དཔལ།
༡ ཀུན་དགས་༼ རྩོམ་རིག་ནི་སྐད་ཡིག་ལ་བརྟེན་ནས་སྤྱི་ཚོགས་འཚོ་བ་མཚོན་པའི་སྒྱུ་རྩལ་གྱི་རིགས་ཤིག་ལ་བྱའོ།༽ཞེས་གསུངས་པ་དང་། ༢ བོད་ཡིག་རྩོམ་འབྲིའི་གཞུང་ལུགས་ནང་༼ རྩོམ་རིག་ནི་སྤྱི་ཚོགས་ཀྱི་འདུ་ཤེས་འཛིན་སྟངས་ཀྱི་གྲས་ཤིག་ཡིན་ཞིང་། དེའང་སྐད་ཡིག་ལ་བརྟེན་ནས་གཟུགས་བརྙན་གསར་བསྐྲུན་བྱས་ཏེ་སྤྱི་ཚོགས་ཀྱི་འཚོ་བ་མཚོན་པ་དང་། རྩོམ་པ་པོའི་བསམ་བློའི་ཚོར་འདུ་མཚོན་པའི་སྒྱུ་རྩལ་ཞིག་ཡིན།༽ ཞེས་འཁོད་པ་ལྟར། མདོར་ན་རྩོམ་རིག་ནི་སྤྱི་ཚོགས་ཀྱི་འཚོ་བ་དང་། དེས་རྩོམ་པ་པོའི་སེམས་ལ་བསྐྲུན་པའི་བསམ་བློའི་ཚོར་འདུ་ཞིག་ཡིན། རྩོམ་རིག་གང་འདྲ་ཞིག་ཡིན་ཡང་དེ་ལ་སྙན་ཆ་ལྡན་མི་ལྡན་ཞེས་པ་དེ་བརྗོད་བྱ་གཏིང་ཟབ་ལོས་དང་། བརྗོད་བྱེད་ཚིག་ལ་མཛེས་རྟོག་གི་ཆ་ཡོད་མེད་དེར་རག་ལུས་ཡོད། བརྗོད་བྱེད་ཚིག་ལ་མངོན་བརྗོད་དང་ཚིག་རྒྱན་སོགས་ཀྱིས་ཇི་ཙམ་བཅིངས་པ་དེ་ཙམ་གྱིས་སྙན་ཆ་ལྡན་པ་ཡོང་གི་ཡོད། བརྗོད་བྱ་གཏིང་ཟབ་ལོས་ཡོང་མི་ཡོང་ནི་སྤྱི་ཚོགས་ཀྱི་འཚོ་བར་རྒྱུས་ལོན་ཟབ་མི་ཟབ་དང་། རང་ཉིད་ཀྱི་རིག་སྟོབས་ཀྱིས་སྤྱི་ཚོགས་ཀྱི་འཚོ་བ་ལས་བྱུང་བའི་དགེ་སྡིག་གཉིས་ལ་ལེགས་ཉེས་བླང་དོར་ཐད་དག་ཐེར་བྱེད་ཐུབ་མིན་ལ་རག་ལས་ཡོད། དེ་འདྲའི་བརྗོད་བྱའམ་རྩོམ་གཞི་ལ་དབྱེ་ན་དོན་གྱི་བྱུང་རབས་སྟོན་པའི་རྩོམ་རིག་གི་རྩོམ་གཞི་དང་། སེམས་ཀྱི་ཉམས་སྣང་སྟོན་པའི་རྩོམ་རིག་གི་རྩོམ་གཞི་གཉིས་སུ་འབྱེད་པ་ལས། ད་ལྟ་གཞོན་ནུ་ཟླ་མེད་གཏམ་རྒྱུད་ལ་མཚོན་ན་དོན་གྱི་བྱུང་རབས་དང་སེམས་ཀྱི་ཉམས་སྣང་གཉིས་ཟུང་འབྲེལ་ཐོག་ནས་བྲིས་བཞག་པ་ཞིག་ཡིན་པ་གོར་མ་ཆག དེ་ཡང་དོན་གྱི་བྱུང་རབས་སྟོན་པའི་རྩོམ་གྱི་གྲུབ་ཆ་གཙོ་བོ་ནི་མི་སྣ་དང་། ཁོར་ཡུག བྱུང་རིམ་བཅས་ཡིན་ལ། སེམས་ཀྱི་ཉམས་སྣང་གི་གྲུབ་ཆ་གཙོ་བོ་ནི་ཚོར་འདུ་དེ་དག་ཡིན། དེ་དག་ལས་གཞོན་ནུ་ཟླ་མེད་ཀྱི་གཏམ་བརྒྱུད་ནང་ཁོར་ཡུག་གི་བཀོད་པ་བསྐྲུན་ཚུལ་ལ། ཁོར་ཡུག་གཙོ་བོ་གསུམ་སྟེ། དང་པོ་སྲིད་པའི་རྒྱན་ཞེས་གྲོང་ཁྱེར་ཆེན་པོ་པདྨ་རྒྱས་པ་ཞེས་པ་ཀུན་གསལ་གྱི་ལམ་དུ་སྒྱུ་སྐར་འཕྲེང་བས་མཛེས་པར་བྱས་པ་ལྟ་བུ་མངོན་པར་བཀྲ་བ། ནོར་དང་སྐྱེ་བོས་ཡོངས་སུ་གང་བས་ཁོ་ར་ཁོར་ཡུག་ཏུ་དཀྲིགས་པའི་དབུས་སུ་རྒྱུ་སྐར་གྱི་རྒྱལ་པོ་ཆ་ཤས་ཡོངས་སུ་རྫོགས་པའི་དགེ་མཚན་དངོམས་པ་ལ་དོ་ཟླར་ཆས་པ། ་་་་་་་་་་་་་ ཕོ་བྲང་མཐོ་ཞིང་ཡངས་ལ་ལྟ་བས་ཆོག་མི་ཤེས་པ་ཡང་དག་པར་སྦྱངས་པའི་ས་ལེ་སྦྲམ་གྱི་རྒྱ་ཕུབ་དང་། མདའ་ཡབ་དང་། བྱ་འདབ་འོད་སྟོང་འབར་བས་ཕྱོགས་ཀྱི་འཁོར་ལོ་འགེངས་པ་་་་་་་)ལ་སོགས་པ་བཅས་མདོར་ན་ཀློག་པ་པོའི་སེམས་ཁམས་ལ་ཡིད་འོང་གི་སྒྱུ་མའི་ཕོ་བྲང་ཞིག་བསྐྲུན་ཡོང་པ་ནི་ཁོར་ཡུག་བཞེངས་སྐྲུན་ཀྱི་སྒྱུ་རྩལ་ཁྱད་འཕགས་ཅན་ཞིག་སྟེ་རྩོམ་རིག་བརྩམས་ཆོས་ཀྱི་རྩོམ་གཞི་ལ་མེད་ཐབས་མེད་པ་ཞིག་ཡིན། ཁོར་ཡུག་གཉིས་པ་དང་གསུམ་པ་ནི་མ་ཎི་དི་པ་ཞེས་པའི་ཡུལ་འཁོར་ན་རྒྱལ་ཁབ་ཆེན་པོ་བཀོད་ལེགས་འོད་སྣང་དང་། གྲོང་ཁྱེར་ཆེན་པོ་མེ་ཏོག་རྒྱས་ཚལ་གྱི་ཕོ་བྲང་སྣང་བ་འབུམ་ལྡན་བཅས་གསུམ་ཡིན་ལ། དོན་གྱི་བྱུང་བའི་ནང་གི་མི་སྣ་གཙོ་བོ་སྲིད་པའི་རྒྱན་དུ་བྱུང་པས་དེའི་ཁོར་ཡུག་གྲལ་རྒྱས་པོའི་ལམ་ནས་བཤད་པ་ལས་གཞན་གཉིས་པོར་དེ་ཙམ་གྱི་རྒྱས་བཤད་གནང་མེད། འོན་ཀྱང་སྒྲུང་རིང་འདིའི་ནང་དངོས་སུ་ཞུགས་དུས་ཁོར་ཡུག་ཞིབ་འབྲི་བྱས་ཡོད་ས་མང་དུ་སྣང་བ། དཔེར་ན། མི་སྣའི་སེམས་ཁམས་དང་འབྲེལ་ནས་ཁོར་ཡུག་བཞེངས་སྐྲུན་བྱས་ཡོད་པ། དེ་ཡང་གཞོན་ནུ་ཟླ་མེད་ཀྱིས་ཐོབ་གོ་ས། གཉེན་ཉེ་ཚན་ཡོངས་རྫོགས་དོར་ནས་དབེན་པའི་གནས་ལ་འགྲིམས་རྗེས་ཡིད་འོང་མ་བཀོད་ལེགས་འོད་སྣང་ནས་ཚུར་ལོག་དུས་སྲིད་པའི་རྒྱན་གྱི་ཁོར་ཡུག་བསྐྲུན་སྟངས་ཀྱི་ངོས་ནས་བཀྲ་མ་ཤིས་པའི་རྟགས་མཚན་གསལ་པོ་ཞིག་བསྟན་ཡོད་པ་ནི་འདི་ལྟར། སྐབས་དེར་སྲིད་པའི་རྒྱན་གྱི་དགའ་བ་དབྱར་གྱི་སྐྱེད་མོས་ཚལ་ལྗོན་པ་དང་འཁྲི་ཤིང་ཚར་དུ་དངར་བ་རྣམས་ནི་སྟོན་གྱི་དུས་ལྟར་འདབ་མ་རྣམས་རྙིང་ཤིང་མེ་ཏོག་ཀྱང་ལྷུངས་ལ། ཀོ་ཀི་ལ་སོགས་འདབ་ཆགས་མགྲིན་པ་ནས་སྙན་འགྱུར་བཀྱེ་བ་དེ་རྣམས་ཀྱང་ལྐུགས་པ་བཞིན་དུ་སྒྲ་མི་འབྱིན་པར་སྣང་། ཕོ་བྲང་སྲིད་པའི་རྒྱན་བརྗིད་ཅིང་དཔལ་དང་ལྡན་པ་ཉམས་དགའ་ཞིང་བདེ་སྐྱིད་ལྡན་པ་དེ་ཡང་ཕྱི་ནང་ཀུན་ཐལ་རྡུལ་གྱིས་ཀུན་ནས་དཀྲིགས་པ་་་་་བཅས་མདོར་ན་མི་སྣའི་སེམས་ཁམས་དང་ཁོར་ཡུག་བར་འབྲེལ་བ་ཡོད་པ་ཞིག་ཏུ་བསྐྲུན་ཡིད། ད་དུང་དེ་འདྲའི་ཆ་བརྩམས་སྒྲུང་འདིའི་ནང་མང་ཡང་ཡིག་ཚོགས་ལ་འཇིགས་པས་དེ་ཙམ་བྱའོ།
གཉིས་པ་ནི་མི་སྣ་བཞེངས་སྐྲུན་བྱེད་ཚུལ་ཡིན། གཞོན་ནུ་ཟླ་མེད་ཀྱི་གཏམ་བརྒྱུད་ནང་མི་སྣ་གཙོ་བོ་ལྔ་ཙམ་ཡོད་པ་རྣམས། གཞོན་ནུ་ཟླ་མེད། ཡབ་ཉི་མའི་བློ་གྲོས། ཡུམ་རྣ་ཆ་འཛིན། ཡིད་འོང་མ། ལྷ་ལས་ཕུལ་བྱུང་། སྲིད་པ་གཞོན་ནུ་བཅས་ནི་མི་སྣ་གཙོ་བོ་དེ་དག་ཡིན། ཀློག་པ་པོའི་བསམ་བློར་བག་ཆགས་གཏིང་ཟབ་འཇོག་མཁན་དང་ཡིད་ཀྱི་བརྟན་པ་དབང་མེད་འདྲེན་མཁན་ནི་བརྩམས་ཆོས་ཁྲོད་དུ་ཞིབ་འབྲི་བྱས་པའི་ཕྱི་སྣོད་ཀྱི་བཀོད་པའི་མཚར་སྡུག་དང་། ཐོན་སྐྱེད་ངལ་རྩོལ་གྱི་བྱ་རིམ་སོགས་མ་ཡིན་པར་གསོན་ཉམས་ལྡན་པའི་མི་སྣའི་སྣང་བརྙན་དེ་རེད། དེས་ན་གཏམ་བརྒྱུད་འདི་ནི་རྒྱལ་ཁབ་གསུམ་བར་གྱི་ཆེས་རྙོག་འཛིངས་ཅན་གྱི་བྱུང་རབས་ཤིག་ཡིན་ལ་དེར་བརྟེན་གནད་ཡོད་མི་སྣ་མང་པོ་ཞིག་བཞེངས་སྐྲུན་བྱས་པ་ལས་གཞོན་ནུ་ཟླ་མེད། ཡིད་འོང་མ། སྲིད་པ་གཞོན་ནུ་བཅས་ཀྱི་བཞེངས་སྐྲུན་བྱས་ཚུལ་ཐད་རགས་པ་ཙམ་འཆད་ན། གཞོན་ནུ་ཟླ་མེད་ནི་བརྩམས་སྒྲུང་འདིའི་ནང་གི་མི་སྣ་གཙོ་བོའམ་འདྲེན་པ་དེ་ཡིན་ལ། དེ་ནི་རྩོམ་པ་པོས་སྐྱེས་མ་ཐག་ནས་བྱིས་པ་གཞན་དང་མི་འདྲ་བར་་་་་་་དཔའ་ཞིང་བརྟུལ་ཕོད་པའི་དྲན་པ་བརྙེས་པ། མཚན་བཟང་པོའི་སྐྱེ་མཆེད་ཚང་བ། རིགས་ལྡན་གཟུགས་བཟང་བ་ལ་སོགས་པ་མཐོ་རིས་ཀྱི་ཡོན་ཏན་བདུན་གྱི་དགེ་མཚན་གསལ་བ། མཐོང་ན་མི་མཐུན་པ་མེད་པ། བསོད་ནམས་ཀྱི་དཔལ་མངོན་པར་མཐོ་བ་ཞིག་་་་་་་་་ནར་སོན་རྗེས་རིག་པའི་གནས་ལྔ་ཁོང་དུ་ཆུབ་ཅིང་། སྒྱུ་རྩལ་རྒྱ་མཚོའི་ཆ་ལ་ཡང་གཞན་དྲིང་མི་འཇོག་པའི་སྦྱང་འབྲས་ཕུལ་དུ་ཕྱིན་པར་གྱུར་ཏེ། དེ་ཡང་ཉག་ཕྲན་གྱི་མངོན་སྦྱོར་ལ་སྦྱང་བ་དང་། བཞོན་པའི་སྟེང་ནས་མཚོན་ཆ་འཕང་བར་མཁས་པ་ཙམ་ལ་རྩལ་པོ་ཆེ་ཞེས་བསྙེམས་པ་རྣམས་དང་མི་མཚུངས། ཡི་གེ་དང་ལག་རྩིས་ལ་སོགས་པ་བཟོ་སོགས་སུ་གཏོགས་པ་སུམ་ཅུ། བྲོ་ལ་སོགས་པ་རོལ་མོའི་བྱེ་བྲག་བཅོ་བརྒྱད། བར་མ་ལ་སོགས་པ་གླུ་དབྱངས་ཀྱི་ངེས་པ་བདུན། སྒེག་པ་ལ་སོགས་པ་གར་གྱི་ཆ་བྱད་དགུ་སོགས་སྒྱུ་རྩལ་གྱི་གནས་ཆ་ཚང་ལ་དོ་ཟླ་བྲལ་བ་ཞིག་ཏུ་བསྐྲུན་ཡོད། ད་དུང་གཞོན་ནུ་དེའི་གཤིས་ཀ་དང་བྱ་སྤྱོད་ཀྱི་ཆ་ནས་བཤད་ན། དམ་པའི་ལྷ་ཆོས་གཙུག་ཏུ་བཀུར་པ་དང་། རྒྱལ་སྲིད་ཆོས་བཞིན་དུ་སྐྱོང་མཁན། རང་གི་འབངས་མི་སེར་ལ་བྱམས་དང་བརྩེ་བས་སྐྱོང་མཁན་ཞིག་བསྐྲུན་ཡོད། རྩོམ་པ་པོས་ངེས་པར་དུ་མི་སྣ་བཞེངས་སྐྲུན་བྱེད་སྐབས་ཕྱོགས་སུ་མ་ལྷུང་པ་སྐྱོན་ཡོན་ཏན་གཉིས་ཀ་ཡོད་པ་ཞིག་བསྐྲུན་རྒྱུ་ནི་བརྩམས་སྒྲུང་གི་གྲུབ་ཆ་ཆེན་པོ་ཞིག་ཡིན། དེར་བརྟེན་ཀློག་པ་པོར་མཚོན་ན་བརྩམས་སྒྲུང་ནང་གི་མི་སྣ་དེ་རང་ཉིད་དངོས་ཡིན་པའི་ཚོར་བ་ཞིག་ཀྱང་བསྐྲུན་ཐུབ། དེར་བརྟེན་ང་ཚོས་བརྩམས་སྒྲུང་འདིར་རོལ་སྐབས་མི་སྣའི་ཞན་ཆ་ནས་གླེང་ན། གཞོན་ནུ་ཟླ་མེད་ནི་ཧ་ཅང་གི་ཧམ་སེམས་དང་གཞན་ལ་དམའ་འབེབས་གཏོང་མཁན་གྱི་སྐྱེས་བུ་ཞིག་རེད་ཟེར་ཆོག དཔེར་ན་བཀོད་ལེགས་འོད་སྣང་གི་སྲས་མོ་ཡིད་འོང་མ་གཞན་ལ་མནའ་མ་སྟེར་ཚར་ཡང་ཧམ་སེམས་ཀྱིས་ཀུན་ནས་བསླང་སྟེ་ཐབས་ཤེས་སྣ་དགུས་ཚུར་འཕྲོག་པ་དེ་ནི་འཇིག་རྟེན་མི་ཆོས་དང་དམ་པའི་ལྷ་ཆོས་གཉིས་ལས་བརྒལ་བའི་བྱ་སྤྱོད་ཅིག་ཡིན། ད་དུང་ཁོང་སྣང་བ་འབུམ་ལྡན་ནས་སྲིད་པའི་རྒྱན་ལ་ལོག་རྗེས་རྒྱལ་པོ་ཉི་མའི་བློ་གྲོས་ཀྱིས་ཆུང་མ་གཞན་ཅིག་བསུ་ཡོད་པ་དེར་དམའ་འབེབས་ཚད་མེད་བཏང་ཡོད་པ་དཔེར་ན། ཚོགས་རའི་ནང་ཁོང་གིས། རང་རིགས་སྐྱེ་རྒུའི་གཙུག་གི་ཅོད་པན་བཞིན།། མང་པོས་བཀུར་བ་མཆོག་གི་རྒྱལ་བརྒྱུད་ལ།། དམན་པ་ཕལ་པའི་རིགས་སྐྱེས་གཞོན་ནུ་མ།། བཙུན་མོར་འོས་པའི་གནས་སྐབས་ཅང་ཡོད་དམ།། ཁ་དོག་མཚར་ཞེས་དུག་གི་མེ་ཏོག་ནི།། ཟུར་ཕུད་རྒྱན་རུང་བ་མ་ཡིན་ན།། རྒྱལ་རིགས་སཱ་ལ་ཆེན་པོ་ལྟ་བུ་ཡི།། མཛེས་ཆགས་ཐ་མལ་དགའ་མར་སྤྱོད་འདི་མཚར།། ཞེས་དམའ་འབེབས་ཀྱི་ཚིག་དེ་ལྟ་བུ་ཚོགས་དཀྱིལ་དུ་དབྱུང་བ་དེ་ནས་གཞོན་ནུ་ཟླ་མེད་ཀྱི་གཤིས་ཀ་ལ་སྡོམས་ཤིག་རྒྱག་ཐུབ།
གཉིས་པ་ཡིད་འོང་མ་ལྟ་བུར་མཚོན་ན། རྩོམ་པ་པོས་ཀློག་པ་པོའི་ཡིད་ཀྱི་བརྟན་པ་འཕྲོག་ཕྱིར་ཡིད་འོང་མ་དེ་གཟུགས་མཛེས་ཤིང་ལྟ་ན་སྡུག་པ། ཁ་དོག་མཆོག་དང་ལྡན་པ། མདངས་རྒྱས་པ། ལུས་ལ་ཙན་དན་དང་། ཁ་སྒོར་ཨུཏྤ་ལའི་དྲི་ལྡང་བ། བུད་མེད་ཀྱི་མཚན་བཟང་པོ་བཅོ་བརྒྱད་ཀྱིས་མཛེས་པར་བརྒྱན་པ། སྲེད་ལྡན་མ་ལུས་པའི་ཡིད་ཀྱི་བརྟན་པ་ཅིག་ཅར་འཕྲོག་པ། རྣམ་པ་མི་ལས་འདས་པ་འཆི་མེད་དགའ་མ་དག་གིས་ཀྱང་བསྒྲུན་པར་མི་བཟོད་པ། མཚར་སྡུག་འོད་དུ་ཆགས་པ་ཟླ་བ་གསར་པ་ལྟ་བུའི་ལང་ཚོ་དང་ལྡན་པ་ཞིག་ཏུ་བསྐྲུན་ཡོད། གཤིས་ཀ་དང་བྱ་སྤྱོད་ཀྱི་ཆ་ནས་བལྟས་ན། རང་གི་ཕ་མའི་བཀའ་དྲིན་དྲན་པའི་ཐོག་ནས་ཕ་མ་ལ་བཀུར་སྟི་བྱེད་མཁན་ཞིག་དང་། བློ་རིག་བཀྲ་ལ་གཞན་གྱི་གཡོ་འོག་ཏུ་མི་ཚུད་པ། རང་གི་ཁྱོ་བོ་ལ་གློ་སྙིང་བྲང་གསུམ་ཡོངས་རྫོགས་ཕུལ་མཁན། རྟག་ཏུ་དམ་པའི་ལྷ་ཆོས་བསྒྲུབ་ཅིང་དགོས་པ་དང་རྒྱུ་མཚན་གྱིས་གཞན་མགོ་བསྐོར་བཏང་རྒྱུར་བྱང་ཆུབ་པ་ཞིག་ཏུ་བསྐྲུན་ཡོད།
གསུམ་པ་ལྷ་ལས་ཕུལ་བྱུང་ལྟ་བུར་མཚོན་ན། རྩོམ་པ་པོས་སྲིད་པ་གཞོན་ནུའི་ཁྱད་ཆོས་དང་མཛེས་སྡུག་དེ་དག་ཆུ་ལེན་བུ་མོས་ཡིད་འོང་མར་སྲིད་པ་གཞོན་ནུའི་ལང་ཚོ་སོགས་ཇི་ལྟར་ཡོད་མིན་འགྲེལ་བའི་ཐོག་ནས་མི་སྣ་བཞེངས་བསྐྲུན་བྱས་ཡོད། དེ་ཡང་། ལང་ཚོའི་འཆོར་སྒེག་ཡོན་ཏན་ནི།། འཆི་མེད་རིགས་ཀྱི་ཐིག་ལེར་མཚུངས།། ཡིད་དབང་ཅིག་ཆར་འགུགས་བྱེད་པ།། ལྕགས་ཀྱོའི་ཆོ་ག་རྫོགས་པ་སྟེ།། ཡིད་ཀྱི་བརྟན་པ་འཕྲོག་མཁས་པ།། ཆོམ་རྐུན་དང་ཡང་མཚུངས་པ་ཉིད།། དེ་ལྟ་བུ་ཡི་སྐྱེས་བུ་ནི།། མིག་གི་བདུད་རྩིར་མངར་བ་ལགས།། ཞེས་འཁོད་པ་ལྟར་ཡིན། དེའི་སེམས་ཁམས་དང་བྱ་སྤྱོད་ནི། རང་གི་རྒྱལ་པོ་ཉི་མའི་བློ་གྲོས་དང་གཞོན་ནུ་ཟླ་མེད་བཅས་ལ་ལྷག་བསམ་དཀར་པོའི་ཞབས་འདེགས་ཞུ་མཁན་ཞིག་དང་། དཔའ་བློ་སྟོབས་གང་ཅིའི་ཐད་ནས་འགྲན་ཟླ་བྲལ་བ། ཕོ་བྲང་སྣང་བ་འབུམ་ལྡན་ཐབས་ཇུས་ཁོ་ནས་གཞི་ནས་བཅོམས་མཁན་གྱི་མི་སྣ་ཞིག་ཏུ་བསྐྲུན་ཡོད། གོང་འཁོད་རྣམས་ནི་གཞོན་ནུ་ཟླ་མེད་ཀྱི་གཏམ་བརྒྱུད་ལ་བརྗོད་བྱའམ་རྩོམ་གཞིའི་ཁྱད་ཆོས་སྐོར་ལ་ཞིབ་འཇུག་བྱས་པའམ་འཚོལ་ཞིབ་བྱས་པ་ཞིག་ཡིན།
ད་ནི་བརྗོད་བྱེད་ཚིག་སྦྱོར་གྱི་ཆ་ནས་བཤད་ན། འདི་ནི་སྲོལ་རྒྱུན་གྱི་སྙན་ངག་གི་ཁྱབ་ཁོངས་ཤིག་ཡིན་དུས་ཚིག་སྦྱོར་སྙན་པོ་ཡོང་མི་ཡོང་ནི་གཙོ་བོ་རྒྱན་གྱིས་བརྒྱན་ཡོད་མེད་ལ་རག་ལས་པས། གཞོན་ནུ་ཟླ་མེད་ཀྱི་གཏམ་བརྒྱུད་འདིའི་ཚིག་སྦྱོར་ནི་སྙན་པའི་ཡང་རྩེར་སོན་པ། དེ་ཡང་སྙན་གཞུང་མེ་ལོང་མ་རྒྱབ་རྟེན་དུ་བྱས་ནས་བྲིས་བཞག་པ་ཞིག་ཡིན། ཀློག་པ་པོའི་ཡིད་ཀྱི་བརྟན་པ་དབང་མེད་དུ་ཤོར་སའི་གཏམ་བརྒྱུད་ཅིག་ཡིན། དཔེ་རྒྱན་དང་གཟུགས་རྒྱན། དེ་མིན་རབ་རྟོགས་ཀྱི་རྒྱན་སོགས་ཀྱིས་བཅིངས་ཡོད་ལ། ཆགས་པས་མྱོས་པའི་སྐྱེས་བུའི་མིག་ལམ་དུ་ཡིད་འོང་མ་ཞིག་མཐོང་བའི་རྗེས་སུ་འགྲན་པ་དང་། དུག་རྫས་ལ་ལང་ཤོར་དུ་སོང་བའི་སྐྱེས་བུ་ལ་ཉལ་ཐ་རག་པ་ལྟར། གཏམ་རྒྱུད་དེའི་ཚིག་སྦྱོར་ལ་རོལ་ཚེ་ཀློག་མཚམས་བཞག་ཁག་པའི་གནས་སུ་གྱར་ཡོང་པ་ནི་དེའི་ཁྱད་ཆོས་གཅིག་ཡིན། རྩོམ་ལུས་ཀྱང་སྤེལ་མ་ཡིན་ལ་གླིང་སྒྲུང་ལྟར་ཕན་ཚུན་ཚིགས་བཅད་ཀྱི་ལམ་ནས་མི་སྣའི་ཁ་བརྡ་གཏམ་བརྒྱུད་འདིའི་གྲུབ་ཆ་གཙོ་བོར་བཟུང་ཡོད། སྐད་ཆའི་སྒྱུ་རྩལ་ལྟ་བུར་མཚོན་ན། བང་འགྲིག་པོ་དང་གྲལ་མ་ཉམས་པ། རྙོག་འཛིངས་ཀྱིས་ཁེངས་པའི་སྤྱི་ཚོགས་ཀྱི་སྣང་བརྙན་འབུར་དུ་བཏོན་ཡོད་པ་དང་། ཀློག་པ་པོའི་སེམས་ནང་དགའ་སྐྱོ་ཆགས་སྡང་གི་ཚོར་བ་བསྐྲུན་ཐུབ་པ། ད་དུང་དུས་དང་གནས་ལ་བསྟུན་ནས་སྒྲུང་གི་ཁ་ལོ་བསྒྱུར་མཁས་པ། དཔེར་ན་ཡིད་མོང་མ་སྲིད་པའི་གཞོན་ནུས་བཀོད་ལེགས་འོད་སྣང་ནས་བཙན་འཁྲིད་ཟོལ་གྱིས་ཁྲིད་ཡོང་སྐབས་ལམ་བར་ནས་བློ་རྒོད་ཐར་ལེགས་བཅས་པའི་སྟོང་དམག་ལས་ཐར་ཡོད་ཀྱང་ཕྱིས་སུ་ལུས་པའི་འབངས་འཁོལ་གྱིས་སྡར་མའི་ལས་ལ་བརྟེན་ནས་ཁོང་ཚོ་ཟིམ་ནས་སྣང་བ་འབུམ་ལྡན་དུ་བཟུང་ནས་ཁྲིད་ཡོད། འདི་འདྲའི་སྒྲུང་གི་ཁ་ཕྱོགས་བསྒྱུར་གནང་པ་ནི་ཕྱིས་སུ་སྣང་བ་འབུམ་ལྡན་གཞོན་ནུ་ཟླ་མེད་ཀྱི་དམག་དཔུང་གིས་ཐལ་བར་མ་བརླག་བར་གྱི་སྒྲུང་གི་བྱུང་རྐྱེན་དེ་ཡིན་ལ། དེ་དག་ལ་ལམ་བར་ནས་འགོག་རྐྱེན་དེ་འདྲ་ཞིག་འཕྲད་མེད་ན་སྒྲུང་གི་སྤུས་ཀའི་ཆ་ནས་ཞན་དུ་འགྲོ་སྲིད།
ད་དུང་བརྗོད་སྙིང་ཞེས་པ་ཞིག་ཡོད་ཀྱང་བརྗོད་སྙིང་དེ་ཤུགས་ཆེ་བ་ཞིག་དེང་དུས་ཀྱི་རྩོམ་རིག་ནང་བེད་སྤྱོད་ཀྱི་ཡོད་པ་ལས་སྲོལ་རྒྱུན་རྩོམ་རིག་ནང་ཉུང་ཤས་ལས་མེད་ཅེས་མཁས་དབང་བདུད་ལྷ་རྒྱལ་གྱིས་སྡོམས་ཚིག་ཅིག་བཀོད་ཡོད། དེ་འདྲའི་བརྗོད་སྙིང་ནི་ཟུར་མཁར་བློ་གྲོས་རྒྱལ་པོ་དང་རྒྱལ་དབང་ལྔ་པ་སོགས་ཀྱིས་སྙན་ངག་ལ་སྲོག་ཡོད་མེད་ཅེས་པ་དེར་གོ་ན་འགྲིག་སྙམ། དཔེར་བརྗོད་ཀྱི་ལམ་ནས་བརྗོད་སྙིང་ཞེས་པ་ངོ་སྤྲད་ན། མེ་ཏོག་ལྡུམ་རྭའི་ནང་གི་ཀླན་ཀ་ཞེས་པ་དེའི་ནང་བརྗོད་བྱ་ནི་མེ་ཏོག་དེ་དག་བར་གྱི་རྙོག་གླེང་དང་མེ་ཏོག་སོ་སོའི་གཤིས་ཀ་དེ་དག་བཏོན་ཡོད་པ་དེ་ཡིན། འོན་ཀྱང་དེའི་བརྗོད་སྙིང་ནི་མཐུན་སྒྲིལ་གྱི་གལ་ཆེན་རང་བཞིན་ནམ་མཐུན་སྒྲིལ་ནི་བདེ་སྐྱིད་ཀྱི་རྩ་བ་ཡིན་པ་ཞིག་དང་། ཕྲག་དོག་དང་ང་རྒྱལ་སོགས་མཐུན་སྒྲིལ་གྱི་གནོད་བྱེད་དག་ལ་སུན་འབྱིན་བྱས་པ་བཅས་ཡིན། དེ་མཚུངས་གཞོན་ནུ་ཟླ་མེད་ལྟ་བུར་ཆ་མཚོན་ན་འཁོར་བའི་ཆོས་ལ་སྙིང་པོ་མེད་པ་དང་། རྒྱུ་དཔལ་འབྱོར་མངའ་ཐང་སོགས་ཇི་ཙམ་རྒྱས་ཀྱང་མཐར་འཇིག་འགྲོ་བའི་རང་བཞིན་ཡིན་པ། བདེ་བ་རང་མཚན་པ་དེ་ཐར་པ་དང་ཐམས་ཅད་མཁྱེན་པའི་གོ་འཕངས་ཡིན་པ་སྟོན་པ་ནི་གཏམ་རྒྱུད་དེའི་ཆོས་སྲིད་གཉིས་ལས་ཆོས་ཕྱོགས་དང་འབྲེལ་བའི་བརྗོད་སྙིང་གཅིག་ཡིན། ཡང་བརྩམ་སྒྲུང་དང་གཏམ་རྒྱུད་གང་རུང་སོགས་ཀྱི་བརྗོད་སྙིང་སྡོམས་རྒྱག་པར་ངེས་པར་དུ་རྩོམ་པ་པོ་རང་ཉིད་འཚོ་སའི་སྤྱི་ཚོགས་ཀྱི་གནས་སྟངས་དང་སྐབས་དེའི་མིའི་བསམ་བློ་གཏོང་ཕྱོགས་སོགས་ལ་རྒྱུས་ལོན་བྱ་རྒྱུ་ནི་གལ་གནད་ཆེན་པོ་ཞིག་ཡིན། དེར་བརྟེན་གཞོན་ནུ་ཟླ་མེད་རྩོམ་པ་པོ་མདོ་མཁར་ཞབས་དྲུང་ཚེ་རིང་དབང་རྒྱལ་རང་ཉིད་ལ་མཚོན་ན་སྐབས་དེར་སྤྱི་ཚོགས་ནང་གི་གནད་ཡོད་མི་སྣ་ཞིག་དང་། དཔོན་པོས་འབངས་མི་སེར་ལ་བཤུ་གཞོག་གཉའ་གནོན་ཇི་ལྟར་གཏོང་གི་ཡོད་མེད་དང་། ཐོབ་གོ་ས་དང་བུད་མེད་སོགས་ཀྱི་ཆེད་མི་གསོད་ཁྲག་སྦྱོར་གྱི་ལས་ཡང་སེ་ཡོང་བསྡད་ཡོད་པ་དེ་དག་ཀྱང་གཏམ་རྒྱུད་འདིའི་བརྗོད་སྙིང་ཞིག་ཡིན་པ་ནི་གདོན་མི་ཟའོ།།།།