རྫོགས་པ་ཆེན་པོའི་ལྟ་མགུར་བདེ་གཤེགས་སྙིང་པོ།

ཨེ་མ་ཧོ།

ན་མོ་མ་ཧྰ་གུ་རུ་ཨེ་མ་ཧོ།།
གཞི་གདོད་མའི་མགོན་པོ་ཀུན་ཏུ་བཟང་པོ།།
ལམ་གཉུག་མའི་ཡེ་ཤེས་ཀུན་ཏུ་བཟང་མོ།།
དོན་དབྱེར་མེད་མཇལ་བའི་རང་བྱུང་རིག་པ།།
བུ་སྐལ་བཟང་སྐྱེས་བུའི་སྙིང་ནོར་རྒྱལ་ལོ།།
ཡེ་ཀ་དག་ཆེན་པོའི་རང་བཞིན་སྤྲོས་བྲལ།།
སེམས་རྫོགས་པ་ཆེན་པོས་དེ་ཉིད་རྟོགས་པ།།
གནད་འོད་གསལ་ལྷུན་གྲུབ་བདེ་གཤེགས་སྙིང་པོ།།
ངོ་ཀུན་ཤེས་རིག་འཛིན་རྣལ་འབྱོར་དང་པོ།།
ཕ་བླ་མའི་དགོངས་པ་ཇི་བཞིན་རྟོགས་ཅིང་།།
མ་འགྲོ་དྲུག་འདྲེན་པའི་སྙིང་རྗེ་བཅོས་མིན།།
དོན་ཉིན་མཚན་བར་མེད་ཉམས་ལེན་མཛད་པ།།
སྒོམ་བདེ་གཤེགས་རྒྱུད་འཛིན་རྒྱལ་བའི་སྲས་པོ།།
རང་གཅེས་འཛིན་དྲི་མའི་རྡུལ་དང་བྲལ་ཞིང་།།
གཞན་ཕན་བདེའི་མཛད་པ་བདག་གིར་བཞེས་ནས།།
ཚེ་དབང་བའི་འཇའ་ལུས་ལྷུན་གྲུབ་ངང་ནས།།
གང་འདོད་པའི་དོན་སྒྲུབ་རྣལ་འབྱོར་སྤྱོད་པ།།
ཆོས་ཕྱག་རྒྱ་ཆེན་པོའི་དགོངས་པ་བརྙེས་ནས།།
ལུས་རྩ་རླུང་འཕྲུལ་འཁོར་སྒྱུ་རྩལ་ངོམས་ཏེ།།
ཡུམ་རིག་མའི་དབང་བཞིས་སྨིན་བྱེད་གནང་བ།།
སྐུ་བགྲེས་རྒུད་མེད་པའི་ལམ་བཟང་སྟོན་པ།།
ཀློང་ཆོས་སྐུའི་དགོངས་དབྱིངས་ཟབ་རྒྱས་ངང་ནས།།
ཞིང་ལོངས་སྐུའི་དག་པ་མངོན་སུམ་རོལ་སྟེ།།
དུས་མུ་མཐའ་མེད་པར་འགྲོ་དོན་ཕྲིན་ལས།།
ཕྱོགས་ཀུན་ཁྱབ་མཛད་པའི་རྫོགས་པའི་སངས་རྒྱས།།
འདི་ཕྱི་ནང་འབྱེད་པའི་ནང་པའི་རྒྱལ་པོ།།
སེམས་རིག་པ་དབྱེ་བའི་རྣམ་དཔྱོད་བཙུན་མོ།།
ཆོས་བོན་བན་ཤེས་པའི་མཁས་གྲུབ་བློན་པོ།།
དོན་རྒྱུད་ལ་ཡོད་པའི་བདེ་བཤེགས་སྙིང་པོ།།
ཕོ་སུ་ཡིས་ཤེས་ན་རྫོགས་ཆེན་རྣལ་འབྱོར།།
མོ་སུ་ཡིས་མཐོང་ན་རང་བྱུང་མཁའ་འགྲོ།།
བུ་སྐལ་ལྡན་སྐྱེས་བུའི་སྙིང་ནོར་དམ་པ།།
གྲོགས་ཆོས་མཆེད་ཡོངས་ལ་མཛུབ་མོས་རི་སྟོན།།
ད་མི་འདུག་ཨ་ཏིའི་དགོན་པར་ཆས་འགྲོ།།
དྲ་རྐུད་ལམ་མེད་པའི་དབེན་གནས་དེ་རུ།།
སེམས་ཞི་བདེའི་ངང་ནས་དལ་ཅིག་སྒོམ་ནས།།
ཡུལ་ཚོགས་དྲུག་རང་གྲོལ་སྨོན་ལམ་འདེབས་སོ།།

ཞེས་པ་འདི་ཡང་རབ་གནས་མེ་སྤྲེལ་སྤྲེལ་ཟླའི་རྒྱལ་བ་དང་པོར་དཔལ་ལྡན་བཟོད་པ་ སོགས་དད་ལྡན་སློབ་མ་འགར་རྫོགས་ཆེན་ཡེ་ཤེས་བླ་མའི་སྙན་བརྒྱུད་འཆད་སྐབས་སུ་ གང་ཤར་དག་དབྱིན་ཡུལ་གངས་ལྡན་རི་བོའི་ནས་ཤྲྰི་ཨེ་མ་ཧོས་གླུ་རུ་བླངས་པར་ དགེའོ།། །།