རབ་འབྱོར་ནས།
སྒྲུང་རྩོམ་རྩོམ་པ་པོ་གྲགས་ཅན་ཚེ་རིང་དོན་གྲུབ་གྱིས་”རླུང་དམར་འུར་འུར།”ཟེར་བའི་བརྩམས་སྒྲུང་གསར་པ་ཞིག་གཞུང་འབྲེལ་དཔེ་སྐྲུན་ཁང་མ་བརྒྱུད་ནས་དཔེ་སྐྲུན་བྱས་པ་དེ་ཁྲིམས་འགའ་གྱི་དཔེ་སྐྲུན་ཡིན་པར་བསྙད་དེ་རྩོམ་པ་པོ་ལ་ཉེས་ཆད་ཕོག་ཡོད་སྐད། ཉེས་ཆད་ནི་རྩོམ་པ་པོ་ཁོང་རྨ་ལྷོ་སོག་རིག་རང་སྐྱོང་རྫོང་ཟེར་བའི་རྫོང་གི་ལོ་རྒྱུས་རྩོམ་སྒྲིག་ལས་ཁུངས་ཀྱི་འགན་འཛིན་ཡིན་པ་དེའི་གོ་གནས་ཕབ་པ་དང་། ད་ནས་བཟུང་རྩོམ་པ་པོ་ཁོང་རྫོང་དེའི་ཡིག་ཚགས་དང་ཁ་བཀར་དགོས་པ་དེ་གཉིས་ཡིན་པར་བཤད།
“རླུང་དམར་འུར་འུར་”གྱི་ནང་དུ་ནགས་ཚང་ཞི་འུའི་སྐྱིད་སྡུག་དང་འདྲ་བར། ལོ་རབས་ལྔ་བཅུའི་ནང་ལ་རྨ་ལྷོ་སོག་རིགས་རང་སྐྱོང་རྫོང་ཡིན་ལས་ཆེ་བའི་ས་ཁུལ་ཞིག་ཏུ་རྒྱ་དམར་གྱི་དམག་དཔུང་དང་དབང་ཤུགས་སླེབས་ནས་ས་ཁུལ་དེ་དང་དེའི་བླ་སྤྲུལ་བྱེ་བྲག་པ་ཞིག་ལ་ཆགས་འཇིག་ཅི་བྱུང་དང་། བླ་སྤྲུལ་དེ་བཙོན་ཁང་དུ་སོང་ནས་ཀྱང་སྐབས་དེའི་རྒྱ་དམར་གྱི་བཙོན་ཁང་དང་དེའི་ལས་བྱེད་ཀྱི་གདུག་རྩུབ་དང་ཅོལ་ཆུང་གི་བྱེད་སྤྱོད་རྣམས་རི་མོའི་རྣམ་པར་བཀོད་ཐུབ་ཡོད། སྒྲུང་རྩོམ་དེ་ནགས་ཚང་ཞི་ལུའི་སྐྱིད་སྡུག་དང་མི་འདྲ་ས་ཞིག་ནི། དེའི་ནང་དུ་ལོ་རབས་ལྔ་བཅུའི་ནང་གི་བྱུང་བ་གཅིག་པོ་མ་ཡིན་པར། རིག་གནས་གསར་བརྗེ་ཆེན་པོ་དང་དེའི་རྗེས་སུ་ཆོས་དད་རང་དབང་སླར་གསོ་བྱུང་བའི་བར་དུ་བྲིས་ཡོད་་པ་དང་། བརྩམས་སྒྲུང་འདིའི་ནང་དུ་རྒྱ་ཕྱོགས་ཀྱི་གདུག་རྩུབ་ཀྱི་ངོ་བོ་གསལ་པོར་མངོན་ཡོད་པ་དང་མཚུངས་སུ་བོད་མིའི་ཅོལ་ཆུང་གི་གཤིས་ཀ་འགའ་རེ་ཡང་མངོན་ཡོད།
བརྩམས་སྒྲུང་འདི་ལ་སྔ་དུམ་ཕྱི་དུམ་ཆ་གཉིས་ཡོད་པ་ནགས་ཚང་ཞི་ལུའི་སྐྱིད་སྡུག་པར་སྐྲུན་མ་བྱས་སྔོན་ལ་བརྩམས་ཚར་ཏེ། གཞུང་འབྲེལ་གྱི་དཔེ་སྐྲུན་ཁང་ཞིག་ནས་དཔེ་སྐྲུན་བྱེད་ཐུབ་རེས་དཔེ་སྐྲུན་ཁང་རེ་ཟུང་ལ་འབྲེལ་གཏུགས་བྱས་ན་ཡང་དཔེ་སྐྲུན་ཁང་དེ་དག་གིས་དཔེ་སྐྲུན་གྱི་ཁས་ལེན་བྱེད་ཐུབ་མི་འདུག ཕྱིས་སུ་མཚོ་སྔོན་བོད་ཡིག་གསར་འགྱུར་ཞེས་པའི་ཚགས་པར་གྱིས་དུམ་པ་ཞིག་མུ་འགོད་བྱས་ཚར་འདུག་པ་ཕལ་ཆེར་ཕྱི་དུམ་ཡིན་པ་འདྲ། ན་ནིང་ནས་རྒྱ་གཞུང་ནས་བོད་ཡིག་གི་དཔེ་སྐྲུན་དང་ལྷག་པར་དུ་སྒེར་གྱི་པར་སྐྲུན་གྱི་རིགས་ལ་དོ་དམ་ཇེ་བཙན་ལ་སོང་བར་བརྟེན་”རླུང་དམར་འུར་འུར་”ཡང་གཞུང་འབྲེལ་གྱི་དཔེ་སྐྲུན་ཁང་ཞིག་ནས་དཔེ་སྐྲུན་བྱེད་རྒྱུའི་རེ་བ་ཕལ་ཆེར་མེད་པ་ལྟ་བུར་གྱུར་ཏེ་སྒེར་ངོས་ནས་པར་སྐྲུན་བྱས་པ་རེད་ཟེར།
རྒྱ་གཞུང་ནས་རྩོམ་པ་པོ་འདི་ལ་ཉེས་ཆད་འབེབས་སྐབས། བརྩམས་སྒྲུང་འདི་དཔེ་སྐྲུན་བྱེད་སྟངས་ཀྱི་ཐད་ལ་མ་གཏོགས་ནང་དོན་གྱི་ཐད་ནས་སྐྱོན་འཛུགས་བྱས་མི་འདུག་ཟེར། རྒྱུས་ཡོད་པ་རྣམས་ཀྱི་བསམ་ཚོད་ལ། དཔེ་སྐྲུན་བྱེད་སྟངས་ཁ་གཡོར་ས་བྱེད་ཀྱི་ཡོད་པ་མ་གཏོགས་དོན་གྱིས་བརྩམས་སྒྲུང་དེའི་ནང་དོན་རྒྱ་གཞུང་གི་བློར་འབབ་ཀྱི་ཡོད་པ་མ་རེད། ཡིན་ན་ཡང་ནང་དོན་གྱི་ཐོག་ནས་སྐྱོན་འཛུགས་བྱས་ན་བརྩམས་སྒྲུང་དེ་ལ་མི་རྣམས་ཀྱི་དོ་སྣང་ཇེ་འགྲོ་བར་དོགས་པ་ཡིན་རྒྱུ་རེད་ཟེར།
རྒྱ་བཙོག་འདི་ཚང་གིས་ཡང་རྩོམ་པ་པོ་ཁོང་ལ་དཀའ་ངལ་བཟོས་སོང་། བོད་ཀྱི་རྩོམ་པ་པོ་མཐུན་ཚོགས་ཀྱིས་འདིའི་ཆེད་དུ་ལས་འགུལ་ཞིག་ངེས་པར་དུ་སྤེལ་དགོས་པར་འདོད། ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་དེ་ནམ་ཡང་ཁུ་སུམ་མེར་སྡོད་ཐབས་ཡོད་པ་མ་རེད། འོན་ཀྱང་དེང་སང་ཕྱི་རྒྱལ་དུ་འགྲོ་བར་རྒྱན་བརྒྱབས་ཏེ་ཁ་མ་འཆམ་པའི་སྒང་རེད། འདི་མོ་འདི་ཚོ་གོ་གི་ཨེ་ཡོད་ན།