ལ་རྩེའི་གསལ་བསྒྲགས།

འདས་ལོར་བོད་ཡུལ་དུ་གཏན་འཁེལ་བྱུང་བའི་“བོད་ཀྱི་ཡིག་གཟུགས་ཉིན་མོ་” (སྤྱི་ཟླ་ ༤ ཚེས་ ༣༠)ལ་རྒྱབ་སྐྱོར་དང་མཉམ་ཞུགས། དེ་དར་ཁྱབ་ཏུ་གཏོང་བ་ལ་རམ་འདེགས་བཅས་ཀྱི་ཆེད་དུ་ལ་རྩེ་ནས་འདི་ལོའི་ཟླ་ ༤ ཚེས་ ༢༩ ཨ་རིའི་གྲོང་ཁྱེར་ནེའུ་ཡོག་ཏུ་བོད་ཀྱི་ཡིག་གཟུགས་ཀྱི་ལས་འགུལ་ཞིག་སྤེལ་གཏན་འཁེལ་བ་ཡིན། ང་ཚོས་ཨ་རིའི་གྲོང་ཁྱེར་ནེའུ་ཡོག་ལ་བོད་ཀྱི་ཡིག་གཟུགས་ཀྱི་དུས་སྟོན་འདི་སྤེལ་རྒྱུ་ནི་དུས་སྟོན་འདི་བོད་ཁམས་བརྒལ་ནས་རྒྱལ་སྤྱིའི་སྟེང་ལ་བསྐྱོད་པའི་གོམ་སྟེགས་ཤིག་ལ་ངོས་འཛིན་བྱེད་ཀྱི་ཡོད། ལས་འགུལ་འདི་ནི་ཡིག་གཟུགས་བརྩམས་ཆོས་འགྲེམས་སྟོན་དང་། ཡིག་མཁན་གྱིས་ཡིག་གཟུགས་འབྲི་སྟོན། བོད་ཕྲུག་རྣམས་ལ་ཡིག་གཟུགས་ཀྱི་སྦྱོང་བརྡར་བཅས་ཀྱིས་གྲུབ་པ་ལས། འགྲེམས་སྟོན་བྱ་རྒྱུའི་ཡིག་གཟུགས་ཀྱི་བརྩམས་ཆོས་ནི་མི་རིགས་དང་རྒྱལ་ཁབ་ཀྱི་དབྱེ་བ་མེད་པར། རྒྱལ་སྤྱིའི་སྟེང་ནས་བསྡུ་རྩིས་ཡིན། ལ་རྩེའི་ལས་བྱེད་ཡོངས་ནས་བོད་ཀྱི་ཡིག་གཟུགས་ལ་དགའ་མཁན་དང་འབྲི་མཁན་གང་མང་མང་ཞིག་གི་བརྩམས་ཆོས་ལས་འགུལ་འདིར་ཞུགས་རྒྱུའི་རེ་བ་བྱེད་ཀྱི་ཡོད་ཅིང་། དེ་ལ་ཞུགས་སྟངས་ཀྱི་སྐོར་ལ་དོན་ཚན་འགའ་ཞུ་རྒྱུ་ཡོད་པ་གཤམ་གསལ་ལྟར།

• འདེམས་ཞུགས་བརྩམས་ཆོས་རྣམས་ང་ཚོའི་ཡིག་ཟམ་(email 电子邮箱)info@latse.org དང་སྐད་འཕྲིན་(微信) lartsegrogspo ཞེས་པ་བརྒྱུད་ནས་སྐུར་གཏོང་གནང་རྒྱུ་དང་། ཟླ་ ༣ ཚེས་ ༡༥ ཉིན་ནི་འབྱོར་ཚེས་མཐའ་མ་ཡིན།

• བརྩམས་ཆོས་བསྐུར་སྐབས་དེ་དང་མཉམ་དུ་ཡིག་མཁན་གྱི་མཚན་དང་། བཞུགས་གནས། བརྩམས་ཆོས་ཀྱི་ཆེ་ཆུང་གི་ཚད། ཡིག་མཁན་གྱི་ཕོ་མོའི་དབྱེ་བ་བཅས་གནས་ཚུལ་གནང་རྒྱུ་མ་བརྗེད་རོགས།

•   ཡིག་མཁན་རེ་ནས་འདེམས་ཞུགས་ཀྱི་བརྩམས་ཆོས་གཉིས་རེ་བཏང་ཆོག བརྩམས་ཆོས་ཀྱི་ཆེ་ཆུང་གི་ཚད་ནི་ མཐའ་རྒྱན་འདུས་པའི་ 91cm*122cm (公分ཡང་ན་ལི་སྨི་)ཡིན།

•  དཔྱད་འདེམས་ཚོགས་ཆུང་ནས་དཔྱད་འདེམས་བྱས་རྗེས་འགྲེམས་སྟོན་གྱི་གྲས་སུ་ཚུད་པ་རྣམས་ཟླ་ ༣ ཚེས་ ༡༥ ནས་གཟའ་འཁོར་གཅིག་གི་ནང་ལ་ཁྱབ་བསྒྲགས་བྱ་རྒྱུ།

•   འགྲེམས་སྟོན་དུ་འོས་འདེམས་བྱུང་བའི་བརྩམས་ཆོས་རྣམས་ཟླ་ ༤ ཚེས་ ༢༡ གི་བར་དུ་འདི་ག་ལ་འབྱོར་དགོས།

•   འགྲེམས་སྟོན་ལ་འདེམས་ཐོན་བྱུང་བའི་བརྩམས་ཆོས་རྣམས་འདི་གར་སྐུར་གཏོང་གི་འགྲོ་སོང་ནི་ཡིག་མཁན་རང་གི་འགན་ཁུར་ཡིན།

•   འགྲེམས་སྟོན་ལ་འདེམས་ཐོན་བྱུང་བའི་བརྩམས་ཆོས་རྣམས་ཉོ་མཁན་བྱུང་ན། ཡིག་མཁན་གྱི་མོས་མཐུན་ལྟར་བཙོང་རྒྱུ་ཡིན་པ་དང་། དེའི་རིན་གོང་ནི་འདི་ག་ནས་ཡིག་མཁན་དང་གྲོས་བསྡུར་གྱིས་གཏན་འབེབས་བྱེད་རྒྱུ་ཡིན། • ཚོང་སྒྱུར་བྱས་པའི་རིན་འབབ་ཀྱི་ 50% ཡིག་མཁན་ལ་འབུལ་རྒྱུ་དང་། 50% འདི་ག་ལས་ཁུངསཀྱིས་འགྲེམས་སྟོན་གྱི་ཁང་གླ་གཙོ་བོར་གྱུར་བའི་འབྲེལ་ཡོད་ཀྱི་འགྲོ་སོང་ལ་གཏོང་རྒྱུ་ཡིན། དེ་ནས་ལྷག་ན་ལ་རྩེ་ཡི་བོད་ཀྱི་སྐད་ཡིག་དང་འབྲེལ་བའི་ལས་གཞི་ལ་གཏོང་རྒྱུ་ཡིན།

•   ཚོང་སྒྱུར་བྱེད་མི་འདོད་པ་དང་བྱེད་མ་ཐུབ་ཅིང་། ཡིག་མཁན་གྱི་ཕྱིར་རང་ལ་བསྐུར་འདོད་གནང་ན། ལ་རྩེ་ནས་དེ་ལྟར་ཞུ་རྒྱུ་དང་། སྐུར་ཡོན་གྱི་འགན་ཁུར་ལ་རྩེ་ནས་ལེན་རྒྱུ་ཡིན།

མཇུག་མཐར། འགྲེམས་སྟོན་འདིར་ཞུགས་འདོད་པ་རྣམས་ལ། ལས་འགུལ་འདི་ནི་བོད་ཀྱི་རིག་གནས་དང་སྐད་ཡིག ལྷག་པར་བོད་ཀྱི་ཡིག་གཟུགས་ཀྱི་མཛེས་ཉམས་འདོན་པ་གཙོ་གནད་དུ་གྱུར་བའི་ལས་འགུལ་ཞིག་ཡིན་སྟབས། བྲི་བྱའི་ནང་དོན་ལ་སྲིད་དོན་གྱི་ལྟ་བ་དང་གནས་ཚུལ་སོགས་མི་འགོད་པར་ཐུགས་རྗེ་ཆེ་ཞུ།