སྤོབས་པ་མཐའ་ཡས།
ཁོ་བོས་གོང་མ་མཆོད་ཡོན་དང་ཀྲུང་གོའི་གཞུང་གིས་ན་ནིང་བོད་ཀྱི་སྤྲུལ་སྐུའི་ངོས་འཛིན་ལ་གཞུང་གི་ཆོག་མཆན་ངེས་པར་དུ་དགོས་པའི་ཁྲིམས་གཏན་འབེབས་བྱས་པའི་སྐོར་ལས་འཕྲོས་པའི་རྩོམ་ཡིག་ཅིག་སྤེལ་བ་ལ་མི་རིང་བར་མི་ཞིག་གིས་དྲི་བ་དང་ལན་ཡག་པོ་ཞིག་སྤེལ་འདུག་པར་ཐུགས་རྗེ་ཆེ།
ས་པཎ་ཁུ་དབོན་སོག་པོར་ཕེབས་ནས་བོད་དབུས་གཙང་གི་མི་སྡེ་ཡོངས་རྫོགས་སོག་པོའི་འོག་ཏུ་འཛུལ་བའི་བཀའ་གནང་བ་དེས་གྲུབ་འབྲས་ཤིག་བྱུང་བ་ནི་དེ་རིང་ཀྲུང་གོའི་གཞུང་གིས་བོད་འདི་ཡོན་གོང་མའི་དུས་ནས་ཀྲུང་གོའི་མངའ་ཁོངས་ཀྱི་ཆ་ཤས་ཤིག་ཏུ་གྱུར་པ་རེད་ཅེས་པའི་གཞི་འཛིན་ས་ཞིག་བཟོས་པ་རེད།
བོད་ཀྱི་བླ་ཆེན་ཚོས་རྒྱ་སོག་གི་རྒྱལ་པོ་ཚོའི་ལག་ནས་གོ་ས་དང་ཆོ་ལོ་བླངས་པ་དེ་དག་གིས་བླ་ཆེན་དུ་གྲགས་པའི་མི་དྲགས་དེ་ཚོ་རྒྱ་སོག་གི་རྒྱལ་པོ་ཚོའི་ལག་འོག་གི་ལས་བྱེད་རེ་ཡིན་པར་བསྟན་ཡོད་ལ་དེ་ནི་དེ་རིང་ཀྲུང་གོའི་གཞུང་གིས་བོད་ཀྱི་སངས་རྒྱས་གསོན་པོ་ཚོའི་མགོར་ཐམ་ཀ་རྒྱག་ཡོང་གི་ཡོད་པའི་རྒྱུ་རྐྱེན་ཞིག་ཀྱང་ཡིན། བླ་ཆེན་ཚོས་རྒྱ་སོག་གི་སྡིག་རྒྱལ་ཚོར་བསྟན་པའི་སྦྱིན་བདག་དང༌། འཇམ་པའི་དབྱངས། མིའི་བདག་པོ། གནམ་བསྐོས་གོང་མ་ཞེས་གུས་བཀུར་དང་སྤྲེལ་ལད་བྱས་དྲགས་པ་དེ་ནི་རྒྱ་སོག་གི་སྡིག་རྒྱལ་ཚོ་སྐྱག་ལངས་ལ་བཏང་བའི་དོན་ཡིན།
དགེ་ལུགས་པས་རང་ལ་རྒྱབ་སྐྱོར་ཡོང་ཆེད་སོག་པོ་དང་མན་ཇུའི་ཕྱོགས་ལ་འབྲེལ་བ་བཙུགས་པ་དེས་དགེ་ལུགས་པས་རང་གི་ཕུགས་བསམ་བཞིན་རང་གི་ཆོས་རྒྱུད་བོད་ཀྱི་མཐའ་མཚམས་ཁག་ལ་སྤེལ་ཐུབ་ཡོད་ཅིང་མན་ཇུས་ཀྱང་རང་གི་འདོད་མོས་བཞིན་རང་གི་སྲིད་ཀྱི་དབང་ཤུགས་བོད་ལ་སླེབས་ཐུབས་པ་བྱུང་ཡོད། དེ་ནི་དགེ་ལུགས་པ་ཙམ་མ་ཡིན་པར་བོད་ཀྱི་བླ་ཆེན་གཞན་རྒྱ་སོག་ལ་མཆོད་ཡོན་གྱི་འབྲེལ་བ་བྱེད་མཁན་ཚོར་ཡང་གྲུབ་འབྲས་དེ་དང་ཆ་འདྲ་བ་རེ་བསྐྲུན་ཡོད།
ངས་བལྟས་ན་ད་ལྟའི་བོད་ཀྱི་གནས་སྟངས་འདི་ནང་སོག་དང་ཤར་ཏུར་ཀི་སི་ཐན་ལས་བཟང་བ་གང་མི་འདུག་སྙམ། ད་དུང་བོད་ལྗོངས་ནི་ནང་སོག་དང་ཤིན་ཅང་ལས་ཀྱང་རྗེས་ལུས་སུ་གྱུར་ཡོད། བོད་ཀྱི་བླ་སྤྲུལ་ངོས་འཛིན་ཐད་མན་ཇུའི་གསེར་བུམ་དཀྲུག་པའི་ལམ་སྲོལ་དང་གུང་ཁྲན་ཏང་གིས་ངོས་ལེན་དགོས་པའི་ཁྲིམས་སྲོལ་གཉིས་པོ་ཆེས་འདྲ་ས་ཞིག་ཡོད་པ་ནི་བོད་མིའི་མགོ་ཐོག་ན་སྤྲུལ་སྐུ་ཚོ་ཡོད་ན་ཡང་སྤྲུལ་སྐུ་ཚོའི་མགོ་ཐོག་ན་ཀྲུང་གོའི་གཞུང་ཡོད་པའི་བདག་དབང་གི་རྣམ་པ་གསལ་བོར་སྟོན་ཆེད་ཡིན་པ་དེ་ཡིན། ངོ་བོའི་ཆ་ནས་ཀྱང་ལོ་ཤས་སྔོན་པཎ་ཆེན་ཡང་སྲིད་གསེར་བུམ་དཀྲུག་ནས་ཐག་བཅད་པས་སྔོན་དང་ཁྱད་པར་མེད།
གུ་ཤྲི་བསྟན་འཛིན་ཆོས་རྒྱལ་གྱིས་བོད་ཆོལ་ཁ་གསུམ་པོ་རྒྱལ་བ་ལྔ་པར་ཕུལ་ཞེས་པ་དེ་ལ་བསམ་བློ་གཏོང་ས་གཞན་ཞིག་ཡོད་པ་ནི་རྗེས་སུ་ལྷ་བཟང་ཁང་དང་སྡེ་སྲིད་སངས་རྒྱམ་པའི་བར་ལ་སྲིད་དོན་གྱི་རྩོད་རྙོག་བྱུང་བ་དེར་བལྟས་ན་བོད་ཀྱི་བདག་དབང་ཡོངས་རྫོགས་ཏཱ་ལའི་བླ་མ་སྐུ་ཕྲེང་ལྔ་པར་ཕུལ་ཞེས་པ་དེ་ཡང་རང་ཕྱོགས་ཀྱི་བརྗོད་ཚིག་སྙན་མོ་ཞིག་ལས་སོག་པོས་བོད་ལ་མགོ་འབུལ་ལུས་འབུལ་བྱས་ཡོད་མདོག་མི་ཁ།
རྒྱ་ནག་གོང་མ་ལ་འཇམ་པའི་དབྱངས་ཞེས་པའི་མཚན་བསྟོད་ཕུལ་བ་དེ་ལ་སྤོབས་པ་བྱེད་ཆོག་དང་མི་ཆོག་མི་དབང་རྟོགས་བརྗོད་ཀྱི་ནང་དུ་ང་ལུམ་སྦྱར་གསུམ་སྲོག་ཐོག་ལ་གཏོང་སྟངས་དེར་གཅིག་ལྟོས་དང་གསལ་པོར་ཤེས་ནུས། འདི་ལ་སྤོབས་པ་བྱེད་ས་ཞིག་ཡོད་མེད་མི་ཤེས། དེས་ནི་བོད་ཀྱི་བླ་ཆེན་དུ་གྲགས་པ་དེ་ཚོ་ངོ་དགའ་གཅམ་བུའི་ལས་ལ་ཇི་ལྟར་དགའ་བའི་རང་བཞིན་དེ་གསལ་སྟོན་བྱས་ཡོད། ཆིན་ཝང་བློ་བསྟན་སོགས་ཀྱིས་རྐྱེན་བྱས་ཏེ་རྒྱ་ནང་གོང་མས་ཨ་མདོར་བསྟན་འགྲོར་འཚེ་བ་གང་བྱས་ཁྱེད་རང་གིས་ཀྱང་ཟུར་ཙམ་བྲིས་ཡོད་པ་དེ་ཡིན་སྟབས་གང་ལ་བརྟེན་ནས་ཁྱོད་ལ་རྒྱ་ནག་གོང་མ་འཇམ་པའི་དབྱངས་ཡིན་པའི་སྤོབས་པ་བྱུང༌། དེ་ཀུ་རེ་ཡིན།
སིལ་བུར་འཐོར་བའི་རྒྱལ་ཁབ་དེ་རང་ཉིད་ཀྱིས་ནང་ནས་རྒྱལ་ཁབ་འཛུགས་དགོས་པ་ལས་ཕྱིའི་སྟོབས་ཤུགས་ནང་འདྲེན་བྱས་ན་ཕྱི་དགྲ་ནང་ཁྲིད་བྱས་པ་མ་ཡིན་ནམ། ཕྱི་ཕྱོགས་ལ་འབྲེལ་བ་བྱེད་མི་ཆོག་ཅེས་བརྗོད་ཀྱིན་མེད། ཕྱི་མི་ལ་མགོ་འདོགས་བྱས་པས་མ་འགྲིགས་པ་རེད་ཅེས་བརྗོད་ཀྱིན་ཡོད།
ལན་ཐུང་ངུ་འདི་དེ་རིང་ཁྱེད་ཀྱི་རྩོམ་ཡིག་དེ་མཐོང་མ་ཐག་ཏུ་གློ་བུར་དུ་བྲིས་པ་ཡིན་པས་ཞིབ་གསལ་ཞིག་མ་བྱུང་ཡང་གནད་དོན་གཙོ་ཆེ་བ་འགའ་ཞིག་ལ་རང་གི་བསམ་ཚུལ་ལོ་རྒྱུས་ཀྱི་དཔང་རྟགས་དང་བསྟུན་དེ་ཞུས་པ་ཡིན། ཞིབ་པར་རྗེས་སུ་གླེང་བར་བྱ། དགའ་འོས་པ་ཞིག་ལ་ད་ལྟ་ང་ཚོར་ཁ་བརྡ་དྲྭ་རྒྱ་ལྟ་བུའི་རང་དབང་གི་གླེང་སྟེགས་ཤིག་ཡོད་པ་རེད།