གནས་ཚུལ་གཏོང་མཁན། འོད་ཟེར།
སྤྱི་ནོར་༧གོང་ས་༧སྐྱབས་མགོན་རིན་པོ་ཆེ་མཆོག་གི་དགུང་གྲངས་དོན་བརྒྱད་ལ་སོན་པའི་བཀྲ་ཤིས་པའི་སྐུའི་འཁྲུངས་སྐར་གྱི་ཉིན་མོ་དང་སྟབས་བསྟུན་ནས། རྡ་ས་མདོ་སྨད་ས་གནས་རྒྱུན་ལས་སྐབས་བཅུ་གཉིས་པའི་ངོས་ནས་ས་གནས་ཀྱི་ལས་ཁུངས་གསར་བ་ཞིག དགུ་བཅུ་གསུམ་ལས་འགུལ་ཚོགས་པའི་ཉེ་འཁྲིས་ཀྱི་བཀྲ་ཤིས་ཆོས་གླིང་དགོན་པའི་ཁང་པའི་ནང་དུ་གསར་འཛུགས་གནང་འདུག སྐབས་དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་རྒྱུན་ལས་ཀརྨ་ཆོས་འཕེལ་ལགས་གཙོ་བྱས་པའི་བཀའ་ཟུར་ཐུབ་བསྟན་ལུང་རིགས་ལགས། སྤྱི་འཐུས་རྒྱ་རིགས་ཐར་ལགས། མདོ་སྨད་དབུས་རྒྱུན་ལས་ཁང་གི་ཚོགས་གཙོ་བསྟན་པའི་དངོས་གྲུབ་ལགས། ཀིརྟི་བྱེས་པ་གྲྭ་ཚང་གི་སྐུ་ཚབ། ཀིརྟི་དགེ་རྩ་ཚོགས་པའི་སྐུ་ཚབ། རྡ་ས་ས་གནས་གྲོས་ཚོགས་ཀྱི་སྐུ་ཚབ་དང་ཆོལ་གསུམ་ཆིག་སྒྲིལ་ཚོགས་པའི་སྐུ་ཚབ་སོགས་ཆེད་ཕེབས་ཐོག སྐུ་མགྲོན་གཙོ་བོ་ཀརྨ་ཆོས་འཕེལ་ལགས་ཀྱིས་ལས་ཁུངས་གསར་བའི་དབུ་འབྱེད་ཀྱི་དར་སྣ་བཀྲོལ་བ་དང་། སྣང་གསལ་མར་མེ་ཞལ་འབྱེད་གནང་མཐར།མཁན་པོ་ཕུན་ཚོགས་རིན་པོ་ཆེ་མཆོག་དང་ཨ་ལགས་སྟག་ལུང་རིན་པོ་ཆེ་སོགས་གཙོ་བྱས་པའི་དགེ་འདུན་པ་རྣམས་ཀྱིས་བཀྲ་ཤིས་པའི་རབ་གནས་དང་རྟེན་འབྲེལ་གྱི་ཁ་དར་སོགས་བསྒྲོན།
དེའི་རྗེས་རྔ་རོལ་གསོལ་མགྲོན་ཁང་དུ་བོད་ཀྱི་ལུགས་སྲོལ་ལྟར་བཀྲ་ཤིས་པའི་རྟེན་འབྲེལ་གྱི་འགོ་མ་གྲོ་མ་འབྲས་བསིལ་དང་གསོལ་ཇ་སོགས་འདེགས་འབུལ་ཞུས། སྐབས་དེར་རྡ་ས་མདོ་སྨད་ས་གནས་རྒྱུན་ལས་ཁང་གི་དྲུང་ཆེ་ཁྲི་སྲོང་རྡོ་རྗེ་ཡིས་ཚོགས་འདུ་གཙོ་སྐྱོང་གནང་ཞིང་། ཚོགས་གཙོ་གཡུ་སྒང་འོད་ཟེར་ལགས་ཀྱིས་ས་གནས་ཀྱི་ལས་ཁུངས་གསར་བ་འདི་འཛུགས་དགོས་པའི་དམིགས་ཡུལ་དང་། ས་གནས་རྒྱུན་ལས་སྐབས་བཅུ་གཉིས་པའི་ལོ་གཅིག་ལྷག་གི་ལས་བསྡོམས་སོགས་སྙན་སྒྲོན་ཞུས།
ཁོང་གིས་བརྗོད་དོན། ང་ཚོ་ས་གནས་སྐབས་བཅུ་གཉིས་པའི་ངོས་ནས་ས་གནས་ཀྱི་ལས་ཁུངས་ཤིག་འཛུགས་དགོས་དོན་ནི། ང་ཚོ་རྒྱ་གར་ལ་སྐྱབས་བཅོལ་ལ་སླེབས་ནས་ལོ་ངོ་ཧྲིལ་བོ་ལྔ་བཅུ་ལྷག་དང་། རྡ་ས་མདོ་སྨད་ས་གནས་རྒྱུན་ལས་ཁང་སྐབས་བཅུ་གཅིག་གི་རིང་ལ་ས་གནས་ལ་ལས་ཁུངས་ཤིག་ཡོད་པ་མ་རེད། ས་གནས་ལ་ལས་ཁུངས་མེད་པའི་རྐྱེན་གྱིས་ས་གནས་མི་མང་དང་ས་གནས་རྒྱུན་ལས་ཕྱོགས་གཉིས་ཀར་དཀའ་ངལ་ཆེན་པོ་འདུག ས་གནས་མི་མང་ཚོར་མཚོན་ན་རང་གི་དཀའ་ངལ་དང་། སྙན་ཞུའི་རིགས། རྒྱབ་གཉེར་གྱི་ཡིག་ཆ་རིགས་གང་དགོས་ཀྱང་ས་གནས་རྒྱུན་ལས་རེ་རེ་བཞིན་བཙལ་ནས་འགྲོ་དགོས་པའི་དཀའ་ངལ་དང་། ས་གནས་རྒྱུན་ལས་ཚོར་མཚོན་ནའང་ཚོགས་འདུ་ལྟ་བུ་ཞིག་འཚོགས་ས་ཙམ་ཡང་ཡོད་པ་མ་རེད། རྒྱབ་གཉེར་གྱི་ཡི་གེ་ཞིག་སྤྲོད་པར་དཔར་ལོག་ཅིག་བསྐྱོན་སའང་མེད་པའི་དཀའ་ངལ་ཆེན་པོ་ཡོད་པ་རེད། ལྷག་པར་ས་གནས་མི་མང་དང་ས་གནས་རྒྱུན་ལས་བར་འབྲེལ་གཏུགས་ཀྱི་དཀའ་ངལ་སོགས་ཧ་ཅང་ཆེ་བར་བརྟེན། ང་ཚོའི་ངོས་ནས་མདོ་སྨད་ཀྱི་གནད་ཡོད་མི་སྣ་ཁག་ཅིག་ལ་འདི་ཕྱོགས་ཀྱི་ལམ་སྟོན་དང་ཞལ་འདེབས་སོགས་རེ་སྐུལ་ཞུས་པ་ལྟར། ཁོང་རྣམ་པའི་རྒྱལ་སྐྱོར་ལ་བརྟེན་ནས་དེ་རིང་ང་ཚོ་མདོ་སྨད་ས་གནས་རྒྱུན་ལས་ཁང་གི་ལས་ཁུངས་གསར་བ་འདི་འཛུགས་པར་དགའ་སྤོབས་དང་རོགས་རམ་གནང་མཁན་ཡོངས་ལ་ཐུགས་རྗེ་ཆེ་སོགས་གསུང་བཤད་གནང་།
དེའི་རྗེས་སྐུ་མགྲོན་གཙོ་བོ་བོད་མི་དམངས་སྤྱི་འཐུས་རྒྱུན་ལས་ཀརྨ་ཆོས་འཕེལ་ལགས་ཀྱིས་བཀའ་སློབ་བསྩལ་དོན། ང་དེ་རིང་རྒྱུན་ལས་ཀྱི་ལས་རིམ་བང་བསྒྲིགས་པའི་ཐོ་གཞུང་ལྟར་དེ་རིང་མདོ་སྨད་ས་གནས་རྒྱུན་ལས་ཁང་གི་ལས་ཁུངས་གསར་བའི་རྟེན་འབྲེལ་ལ་བཀྲ་ཤིས་བདེ་ལེགས་ཞུ་གི་ཡོང་བ་ཡིན། ཁྱེད་ཚོ་ས་གནས་ཀྱི་ངོས་ནས་ཆབ་སྲིད་དང་འབྲེལ་བའི་ལས་འགུལ་ཙམ་མ་ཡིན་པར་སྤྱི་ཚོགས་ཞབས་ཞུའི་ལས་རིགས་མང་པོ་སྒྲུབ་བཞིན་པ་གནད་འགག་ཆེན་པོ་རེད། ས་གནས་ཁ་ཤས་ལ་དབུས་ལ་ལས་ཁུངས་ཚག་ཚུད་པོ་མེད་པ་དང་ལས་ཁུངས་མེད་པ་དེ་འདྲ་ཡང་ཡོད་པ་རེད། ཁྱེད་ཚོར་ས་གནས་ཀྱི་ལས་ཁུངས་ཤིག་འཛུགས་ཐུབ་པ་ཡག་པོ་རེད། ས་གནས་ཀྱི་འགན་འཁྱེར་མཁན་རྣམ་པས་སྐུ་ངལ་བསྐྱོན་ཏེ་ཐབས་ཤེས་ཡོད་རྒུ་རྩལ་སྤྲུགས་གནང་ནས་ལས་ཁུངས་ཤིག་བཙུགས་པ་རེད། ལས་ཁུངས་འཛུགས་པར་ལས་སླ་བོ་ཡོད་པ་མ་རེད། ལས་ཁུངས་བཙུགས་ནས་དངུལ་བཟོ་བ་ནི་ཡོད་པ་མ་རེད། ཟ་ཁང་ལྟ་བུ་ཞིག་ཡིན་ན་ཚུར་ཡོང་འབབ་ཅིག་ཡོད་པ་རེད། ལས་ཁུངས་ལ་ལོ་དང་ཟླ་བ་རེ་རེ་བྱས་ནས་ཁང་གླ་དང་། གློག་རིན། ཆུ་རིན་སོགས་སྟེར་དགོས་པ་རེད། ཡིན་ནའང་རྣམ་པ་ཚོས་ཐབས་ཤེས་གནང་ནས་ལས་ཁུངས་གསར་བ་བཙུགས་ཏེ་དེ་རིང་དབུ་འབྱེད་གནང་པར་བཀྲ་ཤིས་བདེ་ལེགས་ཞུ། ཞེས་སོགས་བཀའ་སློབ་གནང་མཐར།
མདོ་སྨད་ས་གནས་རྒྱུན་ལས་ཁང་གི་ངོས་ནས་བཀོད་སྒྲིག་གནང་བ་ལྟར་མདོ་སྨད་ཆོལ་ཁའི་གཞས་པ་གཞས་མ་དྲུག་གིས་༧སྤྱི་ནོར་༧གོང་ས་༧སྐྱབས་མགོན་རིན་པོ་ཆེ་དགུང་གྲངས་དོན་བརྒྱད་ལ་སོན་པའི་སྐུའི་འཁྲུངས་སྐར་གྱི་མཛད་སྒོར་ཐེག་ཆེན་གཙུག་ལག་ཁང་གི་མདུན་ཐད་ནས་དོན་བརྒྱད་དབྱངས་ཀྱི་དགྱེས་མཆོད་ཅེས་པའི་གླུ་གཞས་ལེན་མཁན་རྣམ་པ་ཚོས་རང་མོས་ཀྱི་གླུ་གཞས་དང་མཉམ་གཞས་སོགས་བཏང་ཏེ་དབུ་འབྱེད་མཛད་སྒོ་ལེགས་པར་གྲུབ། མཐར་མདོ་སྨད་ས་གནས་རྒྱུན་ལས་ཁང་གི་དྲུང་ཆེ་ཁྲི་སྲོང་རྡོ་རྗེ་ལགས་ཀྱིས་ཐུགས་རྗེ་ཆེའི་གསུང་བཤད་གནང་སྟེ་རྡ་ས་མདོ་སྨད་ས་གནས་རྒྱུན་ལས་ཁང་གི་ལས་ཁུངས་གསར་བའི་དབུ་འབྱེད་ཀྱི་མཛད་སྒོ་རྒྱལ་ཁའི་ངང་གྲོལ།
རྡ་ས་མདོ་སྨད་ས་གནས་རྒྱུན་ལས་ཁང་ནས།
གང་ལྟར་མདོ་སྟོད་མདོ་སྨད་དབུས་གཙང་གང་དུའང་ཀརྨ་ཆོས་འཕེལ་ལགས་ནི་མེད་ཐབས་མེད་པ་ཞིག་རེད་འདུག་གཟིགས་དང་སྐུ་མགྲོན་གཙོ་བོ་སྐུ་ངོ་ཀརྨ་ཆོས་འཕེལ་ལགས་གདན་འདྲེན་ཞུས་འདུག་ག དྲ་ལམ་ཁག་གཅིག་ནས་ཀརྨ་ཆོས་འཕེལ་ཟེར་དུས་ཕལ་ཆེར་མ་འོ་ཙེ་ཏུང་ལས་སྡུག་ག་ཞིག་ཡིན་པ་ནང་བཞིན་གླེང་བཞིན་འདུག ཡིན་ན་ཡང་རྡ་ས་ལྟ་བུ་མི་ཆེན་བླ་ཆེན་སྐུ་དྲག་གི་ལུང་པ་ཁང་བསྡད་ཡོད་ཀྱང་ཚོགས་སྐྱིད་ཚོས་མིག་ནང་མཐོང་བ་ནི་ཁོང་རང་རེད་འདུག བཟང་ངན་གང་ཞིག་བྱས་རུང་ནུས་ཤུགས་དང་ལྡན་པའི་གཞུང་ཞབས་ཤིག་རེད་འདུག་ག
ལས་མེད་འགྲོ་ས་འདུག་ས་མ་རྙེད་པ་སྐོར་ཞིག་གིས་དམ་ཉམས་རྐར་ཆོས་སྐུ་མགྲོན་གཙོ་བོ་ཟེར་ན། དགོད་སྤྱད་མ་རེད་དམ། ཧཧཧཧཧ དྲང་པོའི་ལམ་ཁར་འགྲོ་མ་ཤེས་ན་འདི་འདྲ་རེད། ཧཧཧཧ
ཀརྨ་ཆོས་འཕེལ་སྤྱི་མཐུས་ནང་ནས། གྲགས་གྲས་ཤིག་རེད།
སྐར་མ་ཆོས་འཕེལ་ནི། གྲུས་ཚོགས་་ཀྱི་རྒྱན་རེད།
དྲང་མོ་དྲང་བཞག ཁ་རི་ཁ་ཐུག་དང་། དམངས་གཙོ་རང་དབང་ལོངས་སུ་སྤྱོད་ཤེས་པའི་རྣམ་དཔྱོད་ལྡན་ཞིང་རྟོགས་སད་ཅན་གྱི་མི་རེད།
ད་ལན་སྐབས་བཅུ་གཉིས་པའི་མདོ་སྨོད་ས་གནས་རྒྱུན་ལས་ཚོས་ངོས་ནས་སྔོན་གནང་མྱོང་མེད་པའི་ཕྱག་ལས་ཞིག་གནང་འདུགས་
དངོས་གནས་དགའ་སོང་ ང་ཚོ་ཚངས་མའི་འདོད་དོན་མྱུར་དུ་འགྲུབ་པའི་སྨོན་མདུན་ཞུ།
མདོ་སྨན་ས་གནས་རྒྱུན་ལས་ཁང་བཙུགས་ཐུབ་པར་ཡག་པོ་རེད་དེ། སྐུ་མགྲོན་གྱི་གཙོ་བོར་ཀརྨ་ཆོས་འཕེལ་ཟེར་བ་དེ་གདན་འདྲེན་ཞུས་པའི་ཆ་ནས་མདོ་སྨད་རྒྱུན་ལས་ཚོས་ཁོང་ལ་བརྩི་བཀུར་བྱེད་པ་མཚོན་ཐུབ། ཁོང་གིས་སྤྱི་འཐུས་ནང་དབུ་མའི་ལམ་དང་རྒྱལ་བའི་དགོངས་པར་ལོག་འགྲེལ་བྱས་པ་ཡིད་ལ་མི་དྲན་ནམ། མདོ་སྨད་པ་ཚོས་བྱེད་སྟངས་ནོར་གི་མེད་འགྲོ
ལས་ཁུངས་འདིའི་འགོ་འཛུགས་བྱེད་མཁན་མི་དེ་ལས་ཅུང་མཐོང་ཚུལ་ལ་ལེགས་པ་ཞིག་བདེན་ཞུ་གནང་ཐུབ་མིན་འདུག་ཀྱང་དངོས་གཞི་ལས་སྐབས་བཙན་བྱོལ་སྤྱི་ཚོགས་ནང་མཐུན་བསྒྲིལ་གོང་ཐོར་གཏོང་རྒྱུ་ལས་ས་ཁུལ་དང་གང་ཟག་གཙོ་ཟུང་གི་ཆབ་སྲིད་ནམ་ཡང་དཔེ་ལེན་མ་གནང་རོགས་གནང་བའི་འགན་ལེན་ཞུས་ན་དགའ་བསུ་ཞུ་རྒྱུ་ཡིན།