གསོན་པོ།
ཡོད་ཚད་ལས་དབང་ལ་བཅོལ་བའི་མི་རིགས་སམ་ལས་དབང་གི་རྟེན་འབྲེལ་ཁས་ལེན་པའི་འགྲོ་བ་མི་ཞིག་ཡིན་ཕྱིན་རང་གི་བདེ་སྡུག་ལེགས་ཉེས་ཡོད་ཚད་ལས་དབང་ལ་བརྟེན་པར་འདོད་ཅིང་དེ་ནི་སུས་ཀྱང་བསྒྱུར་དུ་མེད་པར་གང་བསགས་པའི་ལས་དེའི་འབྲས་བུ་ལས་གསོག་མཁན་རང་ཉིད་ཀྱིས་མྱོང་དགོས་པར་བཤད། རྒྱུ་མཚན་དེས་དབང་གིས་དངོས་བྱུང་སྒྲུང་རྩོམ་འདིའི་ཁ་བྱང་ལ་༼ལས་དབང་གིས་སྤྲད་པའི་བརྩེ་དུང་དངོས་མ་༽ཞེས་བཏགས་པ་ཡིན། དུས་རབས་ཀྱི་འགྱུར་འགྲོས་དང་བསྟུན་ནས་འཚར་བའི་མི་བུ་རྣམས་དཔལ་འབྱོར་དང་ལང་ཚོར་སྲེད་ཞེན་འབར་ཏེ་བརྩེ་དུང་ངོ་མའི་རིན་ཐང་ཆུང་ནས་ཆུང་དུ་ཕྱིན་པའི་སྐབས་འདིར། ད་དུང་ལས་འབྲས་ལ་ཡིད་ཆེས་ཀྱི་ལྷད་མེད་པའི་བརྩེ་དུང་ལ་སྙོར་སྐྱོང་བྱེདཔའི་ན་གཞོན་ཇི་སྙེད་ཅིག་ཡོད་པ་ནི་དགའ་འོས་པའི་བཟང་སྤྱོད་ཅིག་ཅི་ལ་མིན།
དཔལ་འབྱོར་དང་ཤེས་ཡོན་གྱི་ལེགས་ཆ་ནི་ཀུན་ལ་མཁོ་ཞིང་འབད་བརྩོན་དགོས་པའི་ལས་གནས་ཤིག་ཡིན་ཡང་འདི་དག་ལ་འདོད་ཞེན་དྲག་པོས་གཞན་གྱི་བརྩེ་བ་དང་བདེ་སྐྱིད་ཁྱད་བསད་དང་སྣང་མེད་བྱེད་པ་ནི་ཡིད་སྐྱོ་བའི་གནས་སྟངས་ཤིག་ཅིའི་མ་ཡིན། ཚོར་བ་འདི་སྙིང་ཁམས་སུ་བཅངས་ཏེ་ལོ་ཟླ་དང་ཉིན་ཞག་གི་ཁྲོད་ནས་ཁོང་གི་བརྩེ་དུང་སྙོར་སྐྱོང་དང་བདག་གཅེས་བྱས་ཤིང་དེ་ནི་སྡུག་བསྔལ་དང་དགའ་ཚོར་མཉམ་བསྲེས་ཀྱི་སྣང་བ་ཞིག་ལས་དགའ་སྣང་དང་བདེ་སྐྱེད་ཁོ་ནས་འཇིག་རྟེན་ཞིག་ཡིན་པ་ཚོར་མ་བྱུང་། བརྩེ་དུང་ནི་བདེ་སྐྱེད་དང་། བརྩེ་དུང་ནི་མཆོག་གྱུར་གྱི་དགའ་བ། བརྩེ་དུང་ནི་མི་ཚེའི་ནང་གི་སྐྱིད་སྣང་ཡོད་ཚད་ཀྱི་འབྱུང་ཁུངས་སུ་བརྗོད་པ་ནི་མི་བུ་འགའ་ཞིག་ལ་མཚོན་ན་དངོས་ལུགས་ཀྱི་གནས་སྟངས་ལས་བརྒལ་བའང་དངོས་བདེན་ཡིན།
བརྩེ་དུང་གི་མདུད་པ་ནི་དང་པོ་དམ་དཀའ་ལ། མཐའ་མ་གྲོལ་དཀའ་བའི་མདུད་པ་ཞིག་དང་། མདུད་པ་དེ་ནི་མཚམས་རེར་བརྗོད་དཀའ་བའི་བདེ་སྣང་སྦྱིན་ལ་མཚམས་རེར་བཟོད་དཀའ་བའི་གདུང་བ་སྦྱིན་པའི་སེམས་ཁོང་གི་རྣོ་ངར་ལྡན་པའི་རལ་གྲི་ཞིིག་རེད། རལ་གྲི་དེའི་མདུན་ངོས་དང་ལྟག་རྒྱབ་ཏུ་འཇམ་ཞིང་མཉེན་པའི་བདེ་སྐྱིད་ཀྱི་སྣང་བ་འོད་དུ་འཚེར་ལ་རྩུབ་ཅིང་རྣོ་བའི་གདུང་ཡུས་ཀྱི་རྣོ་ངར་ཡང་ཅི་ཡང་ལྡན། འཇིག་རྟེན་གྱི་ཡོད་ཚད་བརྩེ་དུང་གི་ཆེད་དུ་མིན་ཡང་བརྩེ་དུང་ནི་མི་ཚེའི་ཆ་ཤས་གལ་ཆེན་ཞིག་དང་བརྩེ་དུང་མེད་པའི་མི་ཚེ་ནི་སྙིང་པོ་མེད་པའི་འཚོ་གནས་ཤིག་གཏན་གཏན་རེད། འདི་ནི་འཇིག་རྟེན་གྱི་ལས་བྱ་གཉེར་མཁན་ཁོ་ནས་བསམ་དོན་མིན་པར་སྤྱི་ཚོགས་ཡོངས་ལ་ཁྱབ་པའི་སྤྱི་འདུས་ཀྱི་བསམ་ཚུལ་ཞིག་རེད།
ངོ་མཚར་གྱི་ཐུག་འཕྲད།
དུས་རབས་ཉེར་གཅིག་པའི་མཁའ་དབུགས་ནི་བརྡ་འཕྲིན་དང་ཆ་འཕྲིན་གྱི་ཁྲོད་ན་གཡོ་བཞིན་ཡོད་ལ་དུས་རབས་འདིའི་མི་བུ་རྣམས་ཀྱིས་ཀྱང་བརྡ་འཕྲིན་དང་ཆ་འཕྲིན་ཁྲོད་དུ་ཚོར་རྟོག་སྒུམ་བཞིན་ཡོད། སྤྱི་ལོ་ཉིས་སྟོང་དྲུག་ལོའི་ལོ་མཇུག་སྟེ་ཉིས་སྟོང་བདུན་ལོའི་གནམ་ལོ་གསར་བཞད་ཀྱི་དགའ་སྟོན་བསུ་ལ་བྲེལ་བའི་དུས་སྐབས་ཤིག་ཏུ་ང་རང་སྡོད་ཤག་གི་ཡང་ཐོག་ཏུ་བུད་དེ་ཕྱིའི་ཁོར་ཡུག་གི་མཛེས་ལྗོངས་ཞིབ་བལྟ་བྱས་པ་ཡིན། ཧ་ཅང་མཛེས་པའི་སྣང་བ་མི་སྟེར་མོད་ཡིད་ལ་སྤྲོ་སྣང་སྦྱིན་པའི་ལྗང་མདོག་གི་ལྗོན་ཤིང་རྣམས་བསིལ་རླུང་འཇམ་པོ་ཞིག་གིས་ཡོམ་ཡོམ་དུ་སྒུལ་བཞིན་འདུག་ལ། ཉི་རྒས་དམར་བོ་ཞིག་གིས་འོད་དཀར་གྱི་བཀྲག་མདངས་ཡོངས་སུ་བསྡུས་ཏེ་འཇིག་རྟེན་གཞན་ཞིག་ལ་བཞུད་པའི་སྟ་གོན་བྱེད་བཞིན་འདུག ངའི་སེམས་ཁུང་དུ་སྐྱོ་ལྷང་ལྷང་གི་ཚོར་བ་ཞིག་གིས་ག་ལེར་འཁྱུད་བྱུང་ལ་དེ་ནི་ཕ་ཡུལ་གངས་ལྗོངས་དང་རྒྱང་ཐག་རིང་བའི་ས་མཐའ་འདིར་བདག་ལ་ཆེས་བློ་ཐུབ་ཡིད་ཆེས་བྱེད་སའི་སྙིང་གྲོགས་མང་པོ་ཞིག་མེད་པའི་སྐྱོ་གདུང་དང་། ཆེས་ཐག་རིང་གི་གཉེན་ཉེ་རྣམས་དྲན་པའི་གདུང་ཚོར་ཞིག་རེད། ང་རང་ཕྱིར་རངཤག་ཏུ་ལོག་སྟེ་ཁུ་སིམ་སིམ་གྱི་འཚོ་བ་དེར་བསམ་གཞིགས་ཀྱི་སྒོ་གླེག་བྱས་པ་ཡིན།
འཇིག་རྟེན་ནི་ལས་ཀྱིས་གྲུབ་པའི་འཇིག་རྟེན་ཞིག་ཡིན་ལ་བརྩེ་དུང་ནི་སུ་ལ་ཡང་འབྲེལ་མཐུད་བྱེད་པའི་འཆིང་ཐག་ཅིག་རེད། གལ་སྲིད་བདག་ལ་ཆེས་མཛའ་བརྩེ་ཟབ་པའི་གྲོགས་པོ་ཞིག་སྒུག་ཡོད་སྲིད་ལ་དེ་ནི་ངའི་མི་ཚེའི་ནང་གི་གྲོགས་པོ་ཡག་ཤོས་ཤིག་ཡིན་སྲིད། ངས་འདི་ལྟར་བསམ་གཞིགས་བྱེད་བཞིན་ལག་ཐོག་ཁ་པར་དུ་ཚོད་ཚོད་ཀྱིས་ཨང་གྲངས་ཤིག་བྲིས་ཏེ་གལ་སྲིད་བོད་པ་ཞིག་གིས་བརྡ་ལན་སྤྲད་ཚེ་ཁོང་ངའི་འཇིག་རྟེན་འདིའི་གྲོགས་པོ་ལྷད་མེད་ཅིག་ཏུ་བརྩི་རྒྱུའི་དམ་བཅའ་བཞག་པ་ཡིན། བསམ་ཡུལ་ལས་འདས་པ་ཞིག་ལ་གཉོམ་དུང་དུང་གི་སྐད་གདངས་ཤིག་གིས་བདག་ལ་ལན་སྤྲད་བྱུང་། དེ་ནི་བོད་པ་ཞིག་ཡིན་པ་མ་ཟད་རང་གཤིས་དྲང་ལ་སྤྱི་སེམས་ལྡམ་པའི་སྨན་ཆུང་བུ་མོ་ཞིག་གི་གསུང་སྐད་རེད།
ཉིན་དེ་ནས་བཟུང་ངས་ཁོང་ལ་ཁ་པར་གྱི་ལམ་ནས་ངའི་རང་གཤིས་དང་། ངའི་དམིགས་ཡུལ། ངའི་ཤེས་ཚད། ངའི་སྐྱེས་གཟུགས། ངའི་འཆར་གཞི། ངའི་ཕུགས་རེ། ངའི་ལྟ་གྲུབ་སོགས་རེ་རེ་བྱས་ཏེ་འགྲེལ་བཤད་བྱས་པ་ཡིན། དེ་ནས་བཟུང་ས་མཐའ་འདིར་ང་ལ་བློས་ཐུབ་ཀྱི་གྲོགས་པོ་ཞིག་དང་སེམས་གཏིང་གི་གྲོགས་པོ་ཞིག ད་དུང་སྙིང་ཉེ་བའི་གྲོགས་པོ་ཡག་ཤོས་ཤིག་ཡོད་པའི་ཚོར་བ་བརྒྱུད་མར་བྱུང་ལ་ཁོང་དང་དམིགས་བསལ་ཀྱི་སེམས་ཐག་ཉེ་རུ་ཉེ་རུ་ཕྱིན་སོང་། འོན་ཀྱང་དོགས་སྣང་དང་འཇིགས་སྐྲག་གི་ཚོར་བ་ཞིག་ཀྱང་སྐབས་སྐབས་སུ་བྱུང་ལ་དེ་ནི་ངེད་ཀྱི་ཕྱོགས་ནས་རེད། ཕན་ཚུན་རྒྱུས་མངའ་དང་ཐུག་འཕྲད་མེད་པའི་མི་ཆ་མེད་གཉིས་གཅིག་གིས་གཅིག་ལ་ལམ་སེང་ཡིད་ཆེས་དང་བློ་འགེལ་བྱེད་དཀའ་བ་ཞིག་རེད།
དེ་ལྟར་ཡང་ཐབས་ལམ་གཅིག་ཡོད་པ་ནི་ཕན་ཚུན་འདྲི་ཚིག་གི་ལམ་ནས་བརྟག་དཔྱད་དང་རྒྱུས་ལོན་བྱ་རྒྱུ་དེ་རེད། ཐབས་ལམ་འདི་བརྒྱུད་ནས་རྒྱུས་ལོན་གང་མང་བྱས་མཐར་ཁོང་ནི་ལས་དབང་གིས་སྤྲད་པའི་བདག་གི་མཛའ་གྲོགས་ངོ་མ་དེ་ཡིན་པའི་ངེས་ཤེས་སྐྱེས་ཤིང་ཆེས་ཐོག་མའི་བརྩེ་དུང་ཡོད་ཚད་རང་དབང་མེད་པར་ཁོང་གི་ཕྱོགས་སུ་ཤོར་སོང་། ད་དུང་ཡ་མཚན་པའི་གནས་ཚུལ་ཞིག་ལ་ངེད་གཉིས་གྲོགས་པོ་ཆགས་པ་ནས་བཟུང་ངེད་གཉིས་ཀྱི་རང་གཤིས་ལ་འགྱུར་ལྡོག་ཆེན་པོ་བྱུང་། དེ་སྔོན་ང་རང་སེམས་རྒྱ་ཆེན་པོ་དང་བློ་ཕུགས་ཡང་པོ་ཞིག་ཡིན་པའི་གདེང་ཚོད་བྱེད་བཞིན་ཡོད་ཀྱང་ཁོང་དང་ཐུག་པ་ནས་སེམས་རྒྱ་ཆུང་རུ་ཕྱིན་པ་འམ་གང་ལྟར་ཁོང་གི་ཕྱོགས་ནས་རྣམ་འགྱུར་མ་རང་བ་རེ་མངོན་སྐབས་ང་རང་ལམ་སང་མིིག་ཆུ་ཤོར་བཞིན་འདུག ཉིན་ཞིག་ཁོང་གིས་ངེད་གཉིས་ཀྱི་སྐད་ཆ་བཤད་སྐབས་ཁྱིམ་མཚེས་བུ་མོ་ཞིག་གིས་གོ་འདུག་པས། མོས་ཁྱོད་ཀྱིས་མཚམས་བཞག་མ་བྱས་ན་ཁྱོད་ཀྱི་གཅེན་པོ་སོགས་ལ་བཤད་རྒྱུ་ཡིན་ཟེར་བས་དེ་རིང་ནས་ངེད་གཉིས་ཀྱི་ཁ་པར་ལམ་གྱི་སྐད་ཆ་མཚམས་བཞག་དགོས་ཟེར་སྐབས་ང་རང་སྐྱོ་ནས་མིག་ཆུ་ཐོག་མར་ཤོར་བས་ཁོང་ཧ་སང་དེ་མགྱོགས་པོར་རྩེད་མོ་ཡིན་པའི་གསལ་བཤད་བྱས་བྱུང་།
ཁོང་གིས་ཀྱི་དེ་སྔོན་སུ་ལ་འང་བཤད་མི་ཐུབ་པའི་གསང་ཚིག་རྣམས་བདག་ལ་བཤད་ཐུབ་པ་མ་ཟད་ངེད་གཉིས་ཀྱི་ཁ་པར་ལམ་ནས་གླེང་མོལ་བྱེད་སྐབས་ཁོང་ལ་བདེ་ཚོར་དང་དགའ་སྣང་གིས་མྱོས་འོང་གི་འདུག་ཅེས་བདག་ལ་ལན་མང་པོར་བཤད་མྱོང་ལ་དེ་དག་དངོས་དོན་ཡིན་པས་བདེན་དཔང་ཡང་བྱས་བྱུང་། ངེད་གཉིས་དེ་ལྟར་འདྲིས་ཤིང་ང་གཉིས་དེ་ལྟར་ཕན་ཚུན་དགའ་རུང་བཀག་རྒྱ་གང་མང་ཞིག་གིས་ངེད་གཉིས་ཐུག་འཕྲད་ཀྱི་གོ་སྐབས་མ་ཐོབ། ངེད་གཉིས་ཕན་ཚུན་གྱི་འདྲ་པར་མཐོང་བ་ལས་ཕན་ཚུན་གྱི་སེམས་ལ་བརྩེ་སེམས་ཀྱི་འོག་ཐིག་སྦྲུམ་ཞིང་ནམ་ཞིག་དགའ་ལྷང་ལྷང་གི་མཇལ་འཛོམས་ཤིག་ལ་རེ་སྒུག་བྱས་པ་ཡིན། །
མུ་འགོད་་་
རྩོམ་སྒྲིག་པ་ལགས། སེང་རྡོར་དྲ་བ་ན༼ རྒད་པོ་དང་རྒྱ་མཚོ༽ བཀླགས་བྱང་ཞིག་ཡོད། འདིར་སྤེལ་རོགས་ཞུ
མུ་འགོད་ལ་རེ་སྒུག་བྱས་ཡོད། མགྱོགས་མྱུར་འགོད་པར་དགའ་བས་བསུ།