གསོན་པོ།
ཐུག་འཕྲད་དང་གདུང་ཚོར།
ཉིས་སྟོང་བརྒྱད་ལོའི་རྒྱལ་སྤྱིའི་ལུས་རྩལ་འགྲན་ཚོགས་རྒྱ་ནག་པེ་ཅན་དུ་ཚོགས་གཏན་ཁེལ་བས་རྒྱ་ནག་གི་དབང་འཛིན་པ་ཚོས་རྩེད་ཐང་གསར་སྐྲུན་དང་ཕྱོགས་སོ་སོའི་སྐུ་མགྲོན་ཚོར་སྣེ་ལེན་ཟབ་རྒྱས་དང་འབྲེལ་རྒྱ་ནག་དུ་འགྲོ་བ་མིའི་ཐོབ་ཐང་ཡོད་ཁུལ་གི་ཕྱི་ཚུལ་རྫུན་མ་དང་སྟོབས་ཆེན་རྒྱལ་ཁབ་ཀྱི་གཟི་བརྗིད་དགུང་ལ་འདེགས་ཆེད་ཐབས་ཤེས་སྣ་ཚོགས་བྱེད་བཞིན་ཡོད་ལ། དེ་མཚུངས་རྒྱ་ནག་གི་བཙན་གནོན་འོག་མནར་སྤྱོད་མྱོང་བཞིན་པའི་བོད་དང་ཡུ་གར། དེ་བཞིན་རྒྱ་རིགས་མང་གཙོ་དོན་གཉེར་བ་དང་། ཕ་ལོང་སྒོམ་སྒྲུབ་པ་སོགས་ཀྱིས་གོ་སྐབས་འདི་བརྒྱུད་སོ་སོའི་བདེན་དོན་གསལ་ཆེད་དང་། སྤུན་ཟླ་མི་རིགས་རྣམས་མནར་གཅོད་སྡུག་རྩུབ་ཀྱི་རྒྱ་ལས་གྲོལ་ཆེད་ལས་འགུལ་འདྲ་མིན་སྣ་ཚོགས་སྤེལ་བཞིན་ཡོད། ངོ་རྒོལ་སྐད་འབོད་དང་། ཟས་བཅད་ངོ་རྒོལ། མར་མེ་ཁྲོམ་སྐོར་སོགས་ལས་འགུལ་གྱི་ངོ་བོ་མི་འདྲ་ཡང་འགྲོ་བ་མིའི་ཐོབ་ཐང་དགོས་པ་དང་གཙན་གནོན་གདུག་རྩུབ་མཚམས་འཇོག་དགོས་པའི་འབོད་ཚིག་ནི་གཅིག་མཚུངས་ཡིན།
དུས་སྐབས་འདིར་བོད་གཞིས་བྱེས་གཉིས་ཀྱི་བོད་མི་ཚོས་ཀྱང་ལས་འགུལ་གྱི་འགོ་ཁྲིད་པ་དང་། ལས་འགུལ་ལ་རྒྱབ་བཅོལ་བྱེད་པ། ལས་འགུལ་དུ་མཉམ་ཞུགས་བྱེད་པ་སོགས་རང་རང་གི་འཇོན་ནུས་ལ་དཔག་པའི་ལས་འགུལ་རྩོམ་བཞིན་ཡོད། སྤྱི་ལོ་ཉིས་སྟོང་བདུན་ལོའི་ཟླ་བརྒྱད་པའི་ཚེས་བརྒྱད་ནི་རྒྱ་ནག་ཏུ་ཚོགས་རྒྱུའི་ལུས་རྩལ་འགྲན་ཚོགས་ཚོགས་པ་ལ་ལོ་གཅིག་ཏག་ཏག་ཡོད་པའི་ཉིན་མོ་ཡིན་ཞིང་། བོད་ཀྱི་གཞོན་ནུ་ལྷན་ཚོགས་ཀྱིས་བཀོད་སྒྲིག་དང་སྣེ་ཁྲིད་འོག་བོད་མི་ཁྲི་ཚོ་བརྒལ་བ་རྒྱ་གར་གྱི་རྒྱལ་ས་ལྡི་ལིར་འཛོམས་ཏེ། ཞི་བའི་རྔམ་སྟོན་ཁྲོམ་སྐོར་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུའི་གསལ་བསྒྲགས་སྔོན་དུ་སོང་བ་བཞིན་བོད་མི་གང་མང་ཞིག་རྒྱལ་ས་ལྡི་ལིར་འོང་བའི་གྲ་སྒྲིག་བྱེད་བཞིན་འདུག ང་རང་ལས་འགུལ་འདིར་མཉམ་ཞུགས་བྱེད་པར་འོང་འདོད་ཡོད་ཀྱང་སློབ་སྦྱོང་དང་ལས་ཀའི་བྲེལ་ཟིང་ཆེ་བས་བློ་དོག་ངང་གནས་ཡོད་སྐབས་ཁོང་གིས་ཁ་པར་འབྱོར་བྱུང་། ཁོང་གིས་ང་ལྡི་ལིར་འོང་བའི་རེ་བ་བྱེད་བཞིན་འདུག་ལ་ཁོང་ལས་འགུལ་འདིར་མཉམ་ཞུགས་བྱེད་འཆར་ཡོད་འདུག ངས་དགའ་སྤྲོའི་ངང་ཁོང་གི་རེ་བ་བཞིན་ལྡི་ལིར་ཡོང་བའི་བློ་ཐག་བཅད་དེ་ཡུན་རིང་བསམ་པའི་བརྩེ་དུང་གི་དགའ་སྟོན་དེར་རོལ་འདོད་ཀྱི་རྨི་ལམ་སྒོམ་པ་ཡིན། ང་ལྡི་ལིར་མ་ཡོང་པའི་སྔོན་དུ་ངས་ཁོང་ལ་གསང་བ་དང་འདོད་གཏམ་ཡོད་ཚད་བཤད་དེ་ངེད་གཉིས་ཐུག་དུས་ངོ་ཚ་དང་འཚེར་སྣང་མི་ཡོངས་པའི་ཐབས་ཤེས་བྱས་པ་ཡིན། ངས་ཁོང་ལ་བརྩེ་དུང་མཚོན་པའི་ལག་སྐྱེས་དང་འདྲ་པར་སོོགས་ཁུར་ཏེ་འོང་ཞིང་ངེད་གཉིས་ལྷོད་དལ་ངང་ཐུག་འཕྲད་ཡོང་བའི་རེ་བ་བཅངས་པ་ཡིན།
སྤྱི་ལོ་ཉིས་སྟོང་བདུན་ལོའི་ཟླ་བརྒྱད་པའི་ཚེས་བདུན་ཉིན་ང་ཚོ་རྒྱ་གར་གྱི་རྒྱལ་ས་ལྡི་ལིར་འབྱོར་ཞིང་བོད་ཀྱི་གཞོན་ནུ་ཚོགས་པའི་སྟངས་འཛིན་འོག་ཁ་ཆེའི་ལྷ་ཁང་ཞིག་ཏུ་བསྡད་པ་ཡིན། ཁོང་མོས་མ་ཇུས་ཊྲི་ལར་ཡོང་དགོས་པའི་སྐུལ་མ་བྱས་པ་བཞིན་ཕྱི་དྲོའི་ཆུ་ཚོད་བཞི་བ་ཙམ་ལ་ལག་རྟགས་རྣམས་ཁུར་ཏེ་ཁོང་ལ་ཐུག་པར་འོང་བ་ཡིན། ལྡི་ལི་ནི་རྒྱ་གར་གྱི་གྲོང་ཁྱེར་ཆེ་གྲས་ཤིག་ཡིན་ཞིང་ཉིན་མཚན་མེད་པར་མི་རྣམས་ཟང་ཟིང་ལང་ལོང་གིས་དུས་འདའ་བའི་གྲོང་ཁྱེར་ཞིག་རེད། མ་ཇུས་ཊྲི་ལ་ནི་ལྡི་ལིར་ཡོད་པའི་བོད་པའི་གཞིས་ཆགས་ཤིག་ཡིན་ལ། དེར་ཟ་ཁང་དང་། ཚོང་ཁང་། མགྲོན་ཁང་སོགས་ཚང་མ་བོད་པས་གཉེར་བ་ཤ་སྟག་རེད། འདིར་ཡོད་པའི་མགྲོན་ཁང་ཟ་ཁང་མང་ཆེ་བ་དགོན་པ་ཁག་སོ་སོའི་ཡིན་ཞིང་། འདི་དག་གི་བཟོ་དབྱིབས་དང་མཛེས་བཀོད་སོགས་ལས་བོད་པའི་གྲོང་ཁྱེར་ཞིག་གི་ཚོར་བ་རང་བཞིན་གྱིས་སྐྲུན་བཞིན་འདུག གུ་དོག་པའི་སྲང་ལམ་དང་སྲང་ལམ་ཕར་ཚུར་གྱི་ཚོང་ཁྲོམ་དག་མཐོང་དུས་བོད་ཀྱི་རྒྱལ་ས་ལྷ་སའི་བར་སྐོར་སྲང་ལམ་གྱི་རྣམ་པ་དྲན་གསོ་ཐུབ་ཀྱི་འདུག
གུ་དོགས་པའི་སྲང་ལམ་ཀྱག་ཀྱོག་དེ་ལས་ཡར་ཡོངས་སྐབས་ཁོ་མོ་མཐོང་བྱུང་། ཁོང་ནི་ངས་མཐོང་བའི་འདྲ་པར་གྱི་མཛེས་སྡུག་ལས་རང་དུ་བརྒལ་ཏེ་ལྷའི་སྲས་མོ་མི་ཡུལ་དུ་བྱོན་པ་ལྟ་བུའི་འཇོ་སྒེག་དང་མཛེས་སྡུག་གིས་བརྒྱན་འདུག ངས་ཡང་བསྐྱར་ཁོང་ལ་བལྟས་པ་ཡིན། ཁོང་གི་སྐུ་གཟུགས་ཅུང་ཐུང་ལ་དྲང་ཞིང་ལྡེམ་པ་དང་། གོམ་པ་རེ་བཞིན་མདུན་དུ་སྤོ་དུས་ཧ་ཅང་མཛེས་ཤིང་ཡིད་དུ་འོང་བ་ཞིག་རེད། ཁོང་གི་སྤྱན་མིག་གཉིས་ཁྲ་ཞིང་གོར་ལ་སྨིན་མ་དང་རྫི་མ་རྣམས་བཟོ་བོ་མཁས་པའི་ལག་རྩལ་ལས་ཐོན་པ་དང་ཀུན་ནས་མཚུངས། ཁོང་གི་ཞལ་རས་དུང་གི་ཟླ་བ་བཞིན་དཀར་ཞིང་མཛེས་ལ་ཅུང་འབིར་དུ་དོད་པའི་མཆུ་སྒྲོས་གཉིས་ཀྱི་བར་ལས་དུང་མདོག་གི་སོ་འཕྲེང་ཅུང་ཙམ་མངོན་བཞིན་ངའི་ཕྱོགས་སུ་འོང་བཞིན་འདུག ངེད་གཉིས་ཕན་ཚུན་ལག་འཇུ་བྱས་ཏེ་འཚམས་འདྲི་ཞུས་ཤིང་ཅུང་ཁུག་ཀྱོག་ཅིག་ཏུ་ཕྱིན་ཏེ་ལག་རྟགས་རྣམས་སྤྲད་པ་ཡིན། སྐབས་དེར་ངེད་གཉིས་ཀྱི་སེམས་ནང་ཞེད་སྣང་དང་དངངས་འཚབ་ཆེན་པོ་བྱུང་ཞིང་ཁོང་གི་གདོང་བ་དམར་བོར་གྱུར་ཏེ་ངའི་གཅེན་པོ་ལྡི་ལིར་སླེབ་ཡོད་པས་མཐོང་མི་ཡོངས་ངམ་ཟེར་བཞིན་ཡར་མར་ལྟ་བཞིན་ངེད་གཉིས་ཡུན་རིང་འདིར་བསྡད་མི་ཉན་པའི་ཉེན་བརྡ་བཏང་བྱུང་བས་ངེད་གཉིས་སོ་སོར་གྱེས་པ་ཡིན།
ངས་བསམ་གཞིག་བྱེད་བཞིན་ཕྱིར་སྡོད་གནས་སུ་ལོག་ཡོང་བ་ཡིན། ལམ་འགྲམ་གཡས་གཡོན་གྱི་མོ་ཁྲ་ཚང་མ་འགྲན་སྡུར་བྱེད་པ་བཞིན་རྒྱུགས་གཞིན་འདུག་ལ་བསིལ་རླུང་འཇམ་པོ་ཞིག་གིས་ལུས་ལ་རེག་པས་ཉིན་གང་ཚ་གདུང་གིས་མནར་བའི་རྔུལ་ཆུ་རྣམས་ཕྱིས་སོང་བ་ལྟར་བདེ་ཚོར་ཁྱད་པར་བ་ཞིག་གིས་བཟི་འོང་ཞིང་། ད་ལྟ་རང་མཐོང་བའི་ཆེས་མཛེས་སྡུག་གི་ལང་ཚོ་དེ་ཡང་མིག་མདུན་ལ་གསལ་བར་འཆར་བཞིན་འདུག ཁོང་ནི་ངའི་མི་ཚེ་འདིའི་ཆེས་དགའ་བའི་གྲོགས་པོ་ཡག་ཤོས་དེ་ཡིན་པའི་ངོས་འཛིན་བྱས་པ་ཡིན། དེའི་ཕྱི་ཉིན་ཏེ་ཟླ་བརྒྱད་པའི་ཚེས་བརྒྱད་ཉིན་གྱི་ཞོགས་ཀའི་ཆུ་ཚོད་བདུན་པ་ནས་འཛོམས་དགོས་པའི་བརྡ་ཁྱབ་བཀྲམ་པ་བཞིན་སྐད་འབོད་དང་བྱེད་མཁན་དང་། གཏམ་བཤད་བྱེད་མཁན། གསར་འགོད་པ་སོགས་ལས་འགུལ་བ་ཚང་མ་འཛོམས་བྱུང་། ཕལ་ཆེར་མི་གྲངས་ཁྲི་ལ་ཉེ་བ་འདུག་པས་ཐམས་ཅད་སེམས་ཤུགས་འཕར་ཏེ་འདི་ལྟ་བུའི་མི་མང་འདུ་འཛོམས་ཀྱི་ལས་འགུལ་རྒྱ་ཆེན་སྤེལ་བ་དང་པོ་ཡིན་ཞེས་ཧ་ལས་ལས་བྱེད་བཞིན་འདུག
ད་ལོ་འདི་འདྲའི་ལས་འགུལ་རྒྱ་ཆེན་སྤེལ་ཐུབ་པ་དང་། མི་མང་འདུ་འཛོམས་ཤུགས་ཆེན་འོང་བའི་རྒྱུ་རྐྱེན་གཙོ་བོ་ནི་རྒྱལ་སྤྱིའི་འགྱུར་འགྲོས་དང་བསྟུན་བོད་དོན་ལ་རེ་བ་གསར་བ་ཞིག་མཐོང་བ་དང་། མ་ཤི་བར་ཟས་བཅད་ངོ་རྒོལ་བྱེད་མཁན་རྒྱལ་གཅེས་དཔའ་བོ་བརྒྱད་ཀྱིས་ཟས་བཅད་ངོ་རྒོལ་གྱི་ལས་འགུལ་སྤེལ་ཏེ་ཉིན་གྲངས་ཉི་ཤུར་འགྲོ་བཞིན་ཡོད་པས་དེ་དག་ལ་གདུང་སེམས་མཉམ་བསྐྱེད་ཀྱི་སེམས་ཁུར་ལས་བྱུང་པ་རེད། ཆུ་ཚོད་དགུ་བ་ཙམ་ནས་གངས་སེང་དར་ཆས་བར་སྣང་གང་ཞིང་འབོད་ཚིག་སྣ་ཚོགས་ཀྱི་ལྡིར་སྒྲའི་ཁྲོད་མི་མང་མདུན་སྐྱོད་ལས་འགུལ་ཆེན་མོའི་འགོ་བཙུགས་ཏེ་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱལ་གཅེས་དཔའ་བོ་དཔའ་མོ་གཤེགས་ཟིན་པ་ཚོར་མྱ་ངན་གུས་བཏུད་ཀྱི་ལས་རིམ་གྲུབ་རྗེས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སྒོ་དྲུག་སྐལ་བཟང་ཕུན་ཚོགས་ཀྱིས་གཏམ་བཤད་སྤེལ་ཏེ་ལས་འགུལ་གྱི་ངོ་བོ་འཚེ་བ་མེད་པ་ཡིན་པ་དང་། མདུན་སྐྱོད་ཆེན་མོའི་ལས་འགུལ་ལ་མི་མང་འདི་ཙམ་མཉམ་ཞུགས་ཐུབ་པ་ནི་ཆེས་བསྔགས་འོས་དང་། བོད་དོན་ཐོག་སེམས་ཚོར་ལྡན་པའི་མི་བུ་ཚོ་དགའ་འོས་པའི་གྲུབ་འབྲས་ཤིག་ཡིན་པའི་འགྲེལ་བརྗོད་གནང་། ཉིན་གང་ངོ་རྒོལ་སྐད་འབོད་དང་། ཟས་བཅད་ངོ་རྒོལ། ཞལ་འདོན་ཀློག་འདོན་སོགས་བྱས་ཏེ་དགུང་མོའི་ཆུ་ཚོད་བརྒྱད་པ་ཟིན་ལ་ཉེ་སྐབས་རྒྱ་གར་གཉེན་རྟོག་པའི་བཀའ་རྒྱ་ལྟར་ངོ་རྒོལ་ལས་འགུལ་མཚམས་འཇོག་དགོས་པར་བཤད་དེ་ཚང་མ་རང་རང་གི་སྡོད་གནས་སུ་ལོག་དགོས་པའི་གསལ་བསྒྲགས་བྱས་བྱུང་།
ང་ཚོ་སོ་སོའི་སྡོད་གནས་མགྲོན་ཁང་གླས་མེད་པ་རྣམས་སློབ་གྲྭའི་སྒོ་རྭ་ཞིག་ཏུ་སྡོད་དགོས་བྱུང་ཞིང་མི་མང་རྣམས་དེར་འབྱོར་མཚམས་སུ་ལས་འགུལ་གྱིས་འདོད་པ་ཁེངས་མ་ཁེངས་དང་། གྲུབ་འབྲས་ཀྱི་སྐོར་ལ་བསམ་ཚུལ་སྣ་ཚོགས་བཤད་བཞིན་འདུག ངས་ཁོ་མོར་ཁ་པར་བཏང་ཡང་ཁ་པར་སྒོ་བརྒྱབ་འདུག་པས་ཁོ་མོ་གར་ཡོད་ཤེས་རྟོགས་མ་བྱུང་། ཚེས་དགུ་ཉིན་གྱི་ཉིན་གུང་ཙམ་ལ་ཁོང་གི་ཁ་པར་འོང་ཏེ་དུས་བཅད་བྱས་པ་བཞིན་ངེད་གཉིས་ཐུག་འཕྲད་བྱས་པ་ཡིན། འོང་ཀྱང་བཀག་རྒྱ་གང་མང་ཞིག་གིས་ལྷོད་དལ་གྱི་གླེལ་མོལ་འཇུག་པའི་སྐལ་བ་མ་བྱུང་ཡང་ཁོང་གིས་ང་ལ་ཤོག་ཁུག་ཅིག་སྤྲད་དེ་སེམས་སྐྱོ་ལྷང་ལྷང་ངང་ངེད་གཉིས་ཁ་བྲལ་བ་ཡིན།
ང་རང་གཅིག་པུར་རྒྱ་གར་གྱི་ཇ་ཁང་ཆུང་ཆུང་ཞིག་ཏུ་སོང་སྟེ། ་ཤོག་ཁུག་དེའི་ཁ་ཕྱེས་པ་ཡིན། ཐོག་མར་མིག་མདུན་དུ་མངོན་འོང་བ་ནི་ཁ་དོག་དམར་ལ་འདབ་མ་གྲོལ་བའི་མེ་ཏོག་ཅིག་གི་འདྲ་པར་རེད། འདི་ནི་སྨན་ཆུང་བུ་མོ་ཞིག་གི་ངོས་ནས་ཆེས་རྩ་ཆེ་བའི་ལག་རྟགས་ཕུལ་སའི་མི་དེ་རང་གི་སྙིང་ནང་གི་མེ་ཏོག་དམར་བོ་ལྟར་བརྩེ་བའི་མཚོན་རྟགས་ཡིན་ཞེས་ཁོང་གིས་རྗེས་སུ་ང་ལ་གསུང་བྱུང་། ད་དུང་བརྩེ་བའི་འཛུམ་མདངས་གྲོལ་བའི་འདྲ་པར་གཉིས་དང་ཧིན་སྒོར་ལྔ་བརྒྱ་འདུག ངས་འདྲ་པར་རྣམས་ཉིན་ཐོ་འབྲི་དེབ་ཀྱི་བར་དུ་བཅུག་སྟེ་ཁོང་ཚོ་འགྲོ་བའི་ལམ་ཁར་ཁོང་ལ་སྐྱེལ་མ་བྱེད་དུ་སོང་བ་ཡིན། ཚ་བ་མེ་ལྟར་འབར་བའི་གྲོང་ཁྱེར་དེ་ལས་གྱེས་ཏེ་ཚུར་ལོག་འོང་ཞིང་ངོ་རྒོལ་སྐད་འབོད་ཀྱི་ལས་འགུལ་དེའི་གྲུབ་འབྲས་དང་། བོད་མི་རིགས་ཆགས་འཇིག་གི་དུས་སྐབས་འདིར་རང་གི་འཇོན་ནུས་ཀྱི་ལས་བྱ་གང་ཞིག་གཉེར་ཐུབ། སྙིང་གི་གྲོགས་དམ་པ་ཁོང་དང་ཡང་བསྐྱར་མཇལ་འཛོམས་ཀྱི་སྐལ་བ་ལྡན་ནམ། བསམ་གཞིག་འདི་དག་གི་སློང་ནས་འགྲུལ་བཞུད་བྱས་ཤིང་དེ་ནི་དཀའ་ཚེགས་ཆེ་བའི་འགྲུལ་བཞུད་ཅིག་ཀྱང་རེད།
མུ་འགོད་་་་་
རྩོམ་འདིས་ཆབ་སྲིད་གླེང་མཚམས་བཞག་སྟེ་བརྩེ་དུང་རྐྱང་རྐྱང་གླེང་ན་ཡག
རྩོམ་འདི་ས་སྟེང་གི་ཚེར་མར་མི་འགྱུར་བར་ས་འོག་གི་མྱུ་གུར་འགྱུར་ན་ལེགས།
རྩོམ་འདི་རལ་གྲིའི་སོ་ཁར་བྱུགས་པའི་སྦྲང་རྩིར་མི་འགྱུར་བར་སྨོན།
རྩོམ་འདི་སྙིང་གི་མཛའ་མོར་ཕུལ་བའི་རྒྱ་སེ་མེ་ཏོག་རྐང་གཅིག་ཏུ་འགྱུར་བར་སྨོན།
རྩོམ་འདི་ཡི་ནང་དོན་དུས་ཚོད་རྫོགས་ཟིན་པ་ཞིག་རེད་རྗེས་ལུས་རེད་འདུག རྩོམ་འདི་ཡང་ན་ཁ་བརྡའི་དྲ་རྒྱའི་མཛོད་དུ་ལུས་པ་ཡིན་ནམ། ཉིས་སྟོང་བརྒྱད་རྫོགས་ནས་ཉིས་སྟོང་བཅུ་གསུམ་སླེབས་ཡོད། རྩོམ་འདི་ཡི་དབུར་གཟིགས་དང་གཞི་ནས་ཡོང་རྒྱུའི་སྐད་ཆ་བཤད་འདུག
ཁོང་དང་ཁོ་མོ་ཁྱད་པར་བྱས་ནས་བྲིས་ན་ལེགས་པར་འདོད།