གསོན་པོ།
རྨི་ལམ་མངོན་གྱུར་དང་གྱེས་ཁའི་སྐྱོ་གདུང་།
རླུང་བུ་བསིལ་མོོ་ཞིག་གིས་ལུས་ཁམས་ཡོངས་ལ་ཕྱིལ་ཕྱིལ་ཐེངས་གཅིག་བྱས་པས་དྲན་གདུང་གིས་ན་ཟུག་ཅིག་གིས་བདེ་སྣང་ཕྲ་མོ་དེའི་ལྡོག་ཕྱོགས་ནས་ལངས་བྱུང་ལ་དེ་ནི་ཐེངས་གཅིག་ཙམ་མིན་པར་རླུང་བུ་གཡུག་ཐེངས་རེ་དང་མེ་ཏོག་བཞད་ཐེངས་རེ། ནགས་ལོ་རྒྱས་ཐེངས་རེ། ཆར་བ་འབབ་ཐེངས་རེ། བྱིའུ་གྲག་ཐེངས་རེ། དཔེ་དེབ་སྔོག་ཐེངས་རེ། འདྲ་པར་ལྟ་ཐེངས་རེ་སྟེ་དྲན་པའི་བརྩེ་སེམས་ཀྱི་མེ་ཏོག་སེམས་ཀྱི་དབྱར་གཞུང་ནས་རྒས་མྱོང་མེད་ལ། དུང་བའི་དགའ་དུང་གི་ཁུ་བྱུག་ནམ་ཡང་སྙིང་གི་མཛེས་ལྗོངས་དེའི་ཆེད་དུ་གྲག་བཞིན་ཡོད། དྲན་པའི་གདུང་སེམས་ཀྱིས་གཟིར་ཐེངས་རེར་དུས་ཚོད་སྐར་ཆ་གཅིག་ཀྱང་འགྲོ་བར་དཀའ་མོད། ཁོ་མོའི་རེ་སྐུལ་དང་རང་གི་ཕུགས་འདུན་གྱིས་དེད་དེ་སློབ་སྦྱོང་ལ་ཤུགས་བརྩོན་བྱས་པས་དུས་ཚོད་ནི་ཡུད་ཙམ་ཞིག་ལ་ལོ་གཅིག་ཏག་ཏག་རྫོགས་སོང་། དུས་ཡུན་དེའི་རིང་ལ་ཁོ་མོའི་ཁ་པར་ཡོང་ཐེངས་རེར་སྙིང་ཁམས་སྤྲོ་སྣང་གིས་ཡོངས་སུ་ཁྱབ་འོང་། ཁ་པར་ལས་ཐོས་པའི་སྙིང་དམར་བོའི་བརྩེ་འཕྲིན་དག་གིས་ཡོད་ཚད་དབང་དུ་བསྡུས་ཏེ་ཁོ་མོའི་ཕྱོགས་སུ་འཁྱེར་འགྲོ་བས་ང་ནི་རང་དབང་མེད་པར་ལུས་སེམས་གཉིས་ཀ་ཁོ་མོའི་རྗེས་སུ་ཆགས་ཏེ་ཁོ་མོ་ངའི་སྙིང་གི་མེ་ཏོག་ནས་སྙིང་གི་གཡུ་ལོར་གྱུར་ཅིང་བརྩེ་བའི་གྲོགས་མོ་ལས་སྙིང་གི་དགའ་མར་གྱུར་སོང་།
རང་ཉིད་ལ་རིན་ཐང་ཆེ་བའི་ནོར་བུ་དེ་གཞན་ལ་རིན་ཐང་ཆེ་མིན་ཇི་ལྟར་ཡང་རང་ཉིད་ལ་རིན་ཐང་ཆེ་བས་གཞན་ལ་ཤོར་དོགས་དང་། གཞན་གྱིས་བེད་སྤྱོད་བྱེད་དོགས་ཀྱི་སེམས་ཁྲལ་ནི་རང་སེམས་ཀྱི་ཁོ་མོའི་རིན་ཐང་དང་ལྷན་དུ་ཇེ་ཆེ་ནས་ཇེ་ཆེར་གྱུར་ཅིང་ཐ་ན་ཁོ་མོ་དང་ཁ་པར་ལམ་གྱི་གླེང་མོལ་བྱེད་མཁན་རྣམས་ལ་ཡང་དོགས་ཟོན་དང་དགག་བྱ་བྱེད་དགོས་བྱུང་། ཁོ་མོ་ངའི་སེམས་ཀྱི་རིན་ཐང་བྲལ་བའི་ནོར་བུར་གྱུར་བ་ནས་ངས་ཁོ་མོ་ལ་སེམས་བསམ་པའི་ཡིད་ཆེས་བྱས། འདི་ལྟར་བྱེད་ཀྱང་འོས་ཏེ་ཁོ་མོ་ནི་སྐྱེ་གཟུགས་དང་། འབྱོར་བ་ཁོ་ན་མ་ཡིན་པར་མི་ཀུན་ལ་བསམ་ཤེས་བྱེད་ཤེས་པའི་མཛངས་མ་ཞིག་ཡིན་པ་མ་ཟད། ལ་རྒྱ་ལྡན་ཞིང་བློ་རྩ་བརྟན་ལ་བློ་གཅིག་སེམས་གཅིག་བྱེད་པའི་ཚུལ་མཐུན་སྤྱོད་བཟང་གི་བུ་མོ་གཞོན་ནུ་ཞིག་ཡིན།
ངས་ཁོ་མོ་ངོ་ཤེས་པའི་བརྒྱུད་རིམ་ནས་ཡོད་ཚད་བློས་བཏང་སྟེ་ཁོ་མོར་དགའ་བོ་བྱེད་དོན་ཡང་ཡིད་དུ་འོང་བའི་ཁོ་མོའི་གཤིས་སྤྱོད་དང་མཁས་ལ་མཛང་པའི་ཁོ་མོའིབློ་རིག་ལ་དུང་དྲགས་པ་ལས་ཕྱིའི་མཛེས་སྡུག་གི་ལང་ཚོ་གཅིག་བུ་ལ་ང་འདི་ལྟར་ཁོང་ལ་དགའ་མི་སྲིད། ཆུ་རྒྱུན་ལྟར་བཞུར་གྱིན་ཡོད་པའི་ལོ་ཟླའི་ཕྲེང་བ་རིམ་གྱིས་འདས་ཤིང་སྐོམ་པའི་ཆུ་དང་ལྟོགས་པའི་ཟས་ལྟར་གྱུར་པའི་ལྷན་འཛོམ་ཀྱི་ཉིན་མོ་དེ་ནི་ངེད་གཉིས་ཀྱིས་ཡུན་རིང་རེ་བས་སྒུག་པའི་དུས་ཚིགས་ཤིག་ཅི་ལ་མིན། ཁོ་མོས་བདག་ལ་ཁ་པར་འོང་སྟེ་བརྩེ་བའི་ཐུག་འཕྲད་བྱེད་པར་ཤོག་ཅེར་ཟེར་དུས་ངའི་ཡ་ཆུང་སྟོད་ལ་ཆེས་སྤྲོ་སྣང་དགུ་འགྱུར་གྱིས་འཕེལ་ཞིང་འཇིག་རྟེན་འདི་ལས་བརྒལ་ཏེ་ལྷ་དང་ཀླུ་ཡི་ཞིང་ཁམས་སུ་ཕྱིན་མོད། ང་ཨ་རིར་འགྲོ་རྒྱུ་ཡིན་ཟེར་བའི་ཁོ་མོའི་ངག་ཚིག་འདིས་ང་ལ་དོགས་སྣང་དང་། སུན་སྣང་མང་པོ་ཞིག་སྐྱེས་བྱུང་། ཁོ་མོ་ཨ་རིར་སོང་རྗེས་ངེད་གཉིས་སླར་ཡང་ཐུག་གམ། ཁོ་མོས་ང་སློབ་མཐར་མ་ཕྱིན་བར་དུ་ང་ཁོ་ན་སྒུག་སྲིད་དམ། ཨ་རིར་ཡོད་པའི་ཁོ་མོའི་སྤུན་མཆེད་རྒན་པ་དེས་ངེད་གཉིས་ལ་མོས་མཐུན་བྱེད་དམ་།
དོགས་འདྲི་འདི་དག་གཅིག་རྗེས་གཅིག་མཐུད་ཀྱིས་ཀླད་པའི་རྩ་སྦུགས་དུ་ཟུངས་ཁྲག་དང་ལྷན་དུ་འཕྱོ་བྱུང་བས་ཁོ་མོར་ཐུག་པར་འོང་བའི་འགྲུལ་བཞུད་དེ་དཀའ་ཚེགས་ཆེ་ལ་སྤྲོ་སྣང་དབེན་པའི་འགྲུལ་བཞུད་རིང་པོ་ཞིག་རེད། ཆར་བ་སིམ་སིམ་ཞིག་གིས་འཇིག་རྟེན་འདིར་བརླན་པར་བྱས་རྗེས་མངོན་པར་མི་གསལ་བའི་ཉི་འོད་ཅིག་གིས་གྲོང་ཁྱེར་ཡོངས་ལ་དྲོད་ཁོལ་བྱིན་འདུག་ལ། ད་དུང་ཡིད་མ་ཚིམ་པ་ལྟར་སླར་ཡང་ཆར་པ་སིམ་སིམ་ཞིག་འབབ་འགོ་བཙུག ཁོ་མོས་བཤད་པའི་ས་ཆ་དེར་སླེབ་དུས་ཆར་བ་སིམ་སིམ་དེས་ངེད་གཉིས་ཀྱི་ཡུན་རིང་སེམས་སུ་ཉར་བའི་བརྩེ་དུང་ལ་ཡིད་སྨོན་ཤོར་བ་ལྟར་ངེད་གཉིས་ཀྱི་ཕྱོགས་སུ་འཐོར་བྱུང་ལ་ཁོ་མོས་སེང་རས་དམར་པོ་ཞིག་གིས་འགོ་བོ་དཀྲིས་ཏེ་ཆར་བས་རློན་པར་བྱས་པ་ལ་ཅི་མི་སྙམ་པར་མཛེས་སྡུག་གི་ལང་ཚོ་ཡོད་ཚད་ངའི་ཆེད་ངོམ་པ་དང་འདྲ་པར་ང་ལ་སྒུག་འདུག ལང་ཚོའི་མཛེས་སྡུག་རྣམ་པར་བཀྲ་བའི་ཁོ་མོ་ནི་ཅི་འདྲའི་ཡིད་དུ་འོང་བ་ལ་ཨང་། ཁོ་མོས་ངའི་ཆེད་དུ་འདི་ལྟར་ངལ་བ་ཁྱད་བསད་བྱེད་བ་མཐོོང་དུས་ངས་ཁོ་མོའི་དྲིན་ལན་ཇི་ལྟར་འཇལ་དགོས་སམ།
འཇིག་རྟེན་འདིར་ངའི་སྙིང་ཉེ་བའི་མཛའ་མོ་ནི་ཁོ་མོ་གཅིག་པུ་ཡིན་ལ་ངས་དུས་ཇི་སྲིད་པར་ཁོ་མོ་ངའི་སྙིང་གི་ནོར་བུ་བརྩི་ངེས་ཡིན། འདི་ལྟར་བསམ་གཞིན་བསམ་བཞིན་ཁོ་མོའི་སྡོད་གནས་སུ་བསླེབས་པའང་མ་ཚོར། སྒོ་ཕྱེ་བའི་ཁྲོག་སྒྲ་དེས་ང་གློ་བར་དུ་ཧད་དུ་བཅུག ག་ལེར་ཁོ་མོའི་ལག་པར་འཇུས་ཏེ་འཐམ་འཁྱུད་ཀྱི་ཉེར་བསྡོགས་རྩོམ་པ་ན་གཟུགས་གཞི་ཡོངས་རྫོགས་དྲོད་ཀྱིས་འབར་ཞིང་ཡུན་རིང་གླེང་བའི་བརྩེ་དུང་གི་རོ་མངར་ཡོད་ཚད་མྱོང་འགོ་བརྩམས་ཤིང་འཇམ་ཞིང་མཉེན་པའི་ཁོ་མོའི་མཆུ་སྒྲོས་ཀྱི་འདབ་མ་ག་ལེར་ག་ལེར་ངའི་ཕྱོགས་སུ་བསྲིངས་འོང་། འཁྱུག་ཙམ་ཞིག་ལ་ཉིན་མཚན་བཞི་འགྲོ་སོང་། དེ་རིང་ནི་ངེད་གཉིས་ཁ་བྲལ་བའི་ཉིན་མོ་རེད། དགོང་མོ་དེར་ངེད་གཉིས་ཀྱིས་འབྱུང་འགྱུར་ལ་བསམ་གཞིག་དང་བྲལ་ཁའི་གདུང་ཚོར་ལ་མྱོང་རོལ་བྱས་ཏེ་མཚན་གང་གཉིད་སྐྱིད་པོ་ཞིག་གཏན་ནས་མ་ཁུག འོན་ཀྱང་བྲལ་དགོས་པ་ནི་འདུས་བྱས་ཀྱི་ཆོས་ཉིད་རེད་ལ་མི་རྟག་པའི་རང་བཞིན་ཡང་རེད། སེམས་པ་ཇི་ལྟར་སྐྱོ་ཡང་དེ་ནི་གཟོད་བསྲན་མི་བྱེད་ཀ་མེད་རེད། ངས་ཁོ་མོ་གནམ་གྲུའི་འབབ་ཐང་དུ་སྐྱེལ་འདོད་ཆེ་ཡང་ངས་ཀྱང་ཞོགས་ཀའི་ཆུ་ཚོད་ལྔ་བའི་ཟིན་བྱང་ཉོས་ཟིན་པས་གྱེས་ཁའི་གདུང་བ་དང་སེམས་ཀྱི་བརྩེ་འདང་མཚོན་པའི་འོ་ཞིག་བསྐྱལ་ཏེ་གྱེས་བྲལ་མི་བྱེད་ཀ་མེད་བྱུང་། ངས་གོམ་ཁ་མདུན་དུ་ཇི་ལྟར་སྤོས་ཀྱང་སེམས་པ་ཁོ་མོའི་དྲོད་སོབ་སོབ་ཀྱི་རུམ་དུ་ལྷག་སོང་ལ། གཟོད་དཀའ་བའི་གདུང་བ་ཞིག་གིས་དེད་པའི་དྲོད་མ་ཡལ་བའི་ཆུ་ཐིག་འགའ་བར་མ་ཆད་པར་ཁོ་མོའི་གནང་པའི་འདྲ་པར་དང་ལེགས་སྐྱེས་དག་གི་ཐོག་ཏུ་ལྷུང་བཞིན་འདུག །
མུ་འགོད་་་་
ཚང་མ་ཀློག་པ་ཡིན། སྙན་པོ་འདུག། མུ་འགོད་ལ་སྒུག་ཡོད།