ལོ་སྔོན་མའི་ཟླ་གསུམ་པའི་ཚེས་ ༡༤་ཉིན་རྒྱ་ནག་གིས་བོད་མི་ཚོའི་ཐོག་ཁྲག་དྲི་དྲོ་བའི་དྲག་གནོན་བྱས་པར་ངོས་འཛིན་གྱིས་བལ་ཡུལ་དུ་བོད་མི་དངས་བླངས་བ་ཚོས་ཟླ་རེའི་སྤྱི་ཚེས་བཅུ་བཞི་ཉིན་ནི་སེམས་ནས་བརྗེད་ཐབས་མེད་པ་ཡིན་པའི་ཉིན་མོར་བརྩི་བཞིན་པ་དང་། ཟླ་འདིའི་སྤྱི་ཚེས་༡༤ ཉིན་བོད་མི་དངས་བླངས་ལས་འགུལ་པ་གྲངས་ ༣༠ ཙམ་བལ་ཡུལ་དུ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་སྒོ་འགྲམ་ལ་འཛོམས་ནས་བོད་ནང་གི་བོད་མི་ཆབ་སྲིད་བཙོན་པ་གྲངས་ ༡༨༠༠་ལྷག་གི་མིང་ཐོ་དང་ཁོང་ཚོ་གློད་དཀྲོལ་ཆེད་དགོས་འདུན་ཡིག་ཆ། ད་དུང་དེ་ལ་རྒྱབ་སྐྱོར་ཆེད་མི་གྲངས་སྟོང་ཕྲག་ཁ་ཤས་ཀྱིས་ས་རྟགས་རྒྱབ་ཡོད་པ་བཅས་འབྲེལ་ཡོད་རྒྱལ་ཚོགས་ཀྱི་ལས་བྱེད་པར་སྤྲོད་ཞོར་ཞི་བའི་རྔམ་སྟོན་སྐད་འབོད་གྱི་ལས་འགུལ་ཟིག་སྤེལ་ཡོད་པ་དང་། མཐའ་དོན་ལས་འགུལ་བ་གཞོན་སྐྱེས་བུ་༡༩ དང་བུ་མོ་ ༦ བཅས་མི་གྲངས་༢༥ བལ་ཡུལ་གྱི་ཉེན་རྟོགས་པས་འཛིན་བཟུང་བྱས་ཡོད།
ལོ་སྔོན་མའི་བོད་ནང་གི་ཛ་དྲག་གི་དོན་རྐྱེན་དང་བསྟུན་བལ་ཡུལ་དུ་བོད་མི་དངས་བླངས་ལས་འགུལ་རུ་ཁག་ཁ་ཤས་ཟིག་བྱུང་ཡོད་པ་དང་། ད་ཐེངས་ཀྱི་ལས་འགུལ་གོ་སྒྲིག་པ་ནི་མི་རབས་གསར་བའི་དྲ་འབྲེལ་ཚོགས་པ་ཞེས་བའི་དངས་བླངས་བ་ཚོ་ཡིན་པ་རེད།
ཡིན་ཡང་ཟླ་འདིའི་ཟླ་འགོར་བལ་ཡུལ་བོད་ཀྱི་བདེ་དོན་ལས་ཁུངས་ནས་གནས་ཡུལ་རྒྱལ་ནང་གི་གནས་སྟངས་དང་བསྟུན་པ་བྱས་ནས་བོད་མི་ཚོས་བོད་དོན་འཐབ་རྩོད་གྱི་ལས་འགུལ་སྤེལ་མཚམས་འཇོག་དགོས་པའི་འབོད་སྐུལ་ཡིག་ཆ་གང་སར་དཀྲམ་པ་དང་མཉམ་ལས་འགུལ་སྤེལ་ནས་དཀའ་ངལ་རིགས་འཕྲད་ཚེས་འབྲེལ་བ་མེད་ཚུལ་ཀྱང་འཁོད་ཡོད། གསལ་བསྒྲགས་དེའི་ཐད་བོད་མི་དང་ལྷག་དོན་སྔོན་མ་ནས་བོད་དོན་ལས་འགུལ་སྤེལ་མཁན་དྭངས་བླངས་བ་ཚོའི་ཁྲོད་འདོད་པ་མ་ཁེངས་བའི་བསམ་ཚུལ་སྟོན་མཁན་དང་བློ་ཕམ་བྱེད་མཁན་མང་པོ་ཡོང་བཞིན་པ་རེད།
བལ་ཡུལ་དུ་གནས་འཆའ་བའི་བོད་དོན་འཐབ་རྩོད་པ་ཡོངས་ལ་ནམ་ཡང་འཚམས་འདྲི་དང་། གུས་འདུད་ཡོད།
ཁྱེད་ཅག་གིས་ཞུམ་མེད་ཀྱི་སྙིང་སྟོབས་ནི་ན་ལོ་ནས་ལྷང་ངེར་ཐོན་སོང་བ་བཞིན། ངའི་སེམས་ལ་ག་དུས་ཀྱང་ཁྱེད་ཚོ་ཡོད་ཨང་བསམ་པའི་སྤོབས་པ་བྱིན་བྱུང་།
ཁྱེད་ཚོ་ནི་བོད་གཞིས་བཞུགས་ཡོངས་ཀྱི་སེམས་ཁ་གསོ་མཁན་དང་པོ་དེ་ཡིན་ལ།
ཁྱེད་ཚོ་ནི་བྱེས་གྱར་བ་ཡོངས་ཀྱི་མདུན་ཐོན་གྱི་དཔའ་བོ་ངོ་མ་རེ་ཡིན་པ་སེམས་ལ་བྲིས་ཡོད།
ཁྱེད་ཚོས་ལུས་སེམས་ལ་འཕྲོད་བསྟེན་གང་གཟབ་ཐོག་ནམ་ཡང་མདུན་ནས་མདུན་དུ་བསྐྱོད་རོགས་ཞུ་བཞིན་ཡོད།
གངས་སེང་དཀར་མོའི་ནུ་ཞོས་བསྐྱངས་པ་མིན་ན་འདི་འདྲའི་དཔའ་སྤོབས་གང་ནས་འཛོམས། །
འབྲོང་གཡག་ངར་མའི་ཟུངས་ཁྲག་འཐུངས་པ་མིན་ན་འདི་འདྲའི་དཔུང་ཤ་ག་ལ་རྒྱས། །
ཕ་མེས་བསད་པའི་དགྲ་ཤ་རྩོད་པ་མིན་ན་འདི་འདྲའི་ངར་སྐད་ཅིའི་ཕྱིར་སྒྲོག །
བདེན་དོན་ཞིག་གི་རྒྱབ་རྟེན་བཙན་པོ་མེད་ན་འདི་འདྲའི་གཟི་བརྗིད་གང་ན་ཡོད། །
བོད་གངས་ཅན་པའི་དཔའ་བོ་དཔའ་མོ་ཁྱུ་གཅིག་གིས་ཡོད་ཚད་བློས་བཏངས་བྱས་ཏེ་འདི་ལྟར་མདུན་མཆོང་བྱས་པ་ལ་རྒྱབ་སྐྱོར་དང།་ གདོང་སེམས་མཉམ་བསྐྱེད་ཡོད། ཁྱེད་ཅག་གི་བཀའ་དྲིན་དང་དཀའ་སྡུག་འདི་མྱུར་དུ་ལམ་ལྷོང་ཡོངས་བར་སེམས་ནས་སྨོན་མདུན་གཟབ།
ང་ཚོའི་དམིགས་ཡུལ་གཅིག་དང་རེ་སྙེག་གཅིག་ཡིན། བོད་ཀྱི་དཔའ་སྒོད་ཚོ་བཀའ་དྲིན་ཞུ།