རྨ་མགུར་སངས་རྒྱམ།
ཉེས་ཅན་ཀྱི་གཏེ་བོ་རྒ་སྒྲ་ཧྤེ་བསད་པའི་རྗེས་སུ་ལི་རྦུ་ཡའི་གཞུང་གསར་བས་མ་འོངས་བར་ཁྲིམས་ཀྱི་དབང་བསྒྱུར་བྱེད་པའི་ལམ་ལུགས་ཤིག་གསར་དུ་གཏོད་ངེས་རེད། ལི་རྦུ་ཡའི་ཐོག་ཏུ་རྒ་སྒྲ་ཧྤེའི་ལོ་ངོ་༤༢་རིང་གི་དབང་བསྒྱུར་ནི་དེ་རིང་མཇུག་རྫོགས་པ་འདིས་འགྲོ་བ་མིའི་ཐོབ་ཐང་གི་ལོག་སྤྱོད་ཀྱི་དམིགས་བསལ་ལྡན་པའི་ཡུན་རིང་གི་དུས་རབས་མཇུག་རྫོགས་ནས་རྒྱལ་ཁབ་འདིར་ཐུན་མོང་གི་གོ་སྐབས་གསར་བ་ཞིག་འཆར་བ་རེད། རྒ་སྒྲ་ཧྥེའི་གདུག་རྩུབ་ཀྱི་དབང་བསྒྱུར་མཇུག་རྫོགས་པ་དང་མཉམ་དུ་ལི་རྦུ་ཡའི་མི་དམངས་ཀྱིས་ད་ལྟ་ཁོའི་དབང་བསྒྱུར་ཀྱི་ཐོག་ཏུ་ནག་ཉེས་བསགས་པའི་མི་ངན་དེ་ཚོ་ལ་འོས་ཤིང་འཚམས་པ་དང་དྲང་བདེན་གྱི་ཁྲིམས་གཅོད་ནན་མོ་ཞིག་ཡོང་བར་རེ་སྒུག་བྱེད་བཞིན་པ་དང། ལོ་ངོ་༤༢་རིང་ལ་ཕྱིར་མིག་ཅིག་བལྟས་ན་རྒ་སྒྲ་ཧྤེའི་དུས་རབས་ཀྱིས་རང་གི་རྒྱལ་ཁབ་དང་ཕྱི་ལོགས་ཀུན་ཏུ་འགྲོ་བ་མིའི་ཐོབ་ཐང་ལ་གཏོར་བཤིག་བཏང་བ་དང་མིའི་རིགས་ལ་བརྩི་བཀུར་མི་བྱེད་པའི་འཇིགས་སྐྲག་གི་སྙན་ཐོ་མང་བོ་ཞིག་རིམ་པར་ཐོན་དུ་བཅུག་ཡོད། སྤྱི་ལོ་༡༩༩༦་ལོར་བཙོན་པ་༡༢༠༠་བསད་པ་དེ་ནི་འགྲོ་བ་མིའི་ཐོབ་ཐང་གི་ལོག་སྤྱོད་ཀྱི་ཆེས་རིང་བའི་ཟིན་ཐོའི་ནང་གི་ཆེས་ཡོངས་སུ་གྲགས་པའི་མིང་ངན་གྱི་ལོ་རྒྱུས་ཤིག་བཟོས་ཡོད། སྤྱི་ལོ་༡༩༦༩་ལོ་ནས་རྒྱལ་ཁབ་འདི་ནང་དུ་མིའི་བསམ་བརྗོད་དང་མཐུན་འབྲེལ་གྱི་རང་དབང་ལ་ཁྱོན་ཡོངས་སུ་དྲག་གནོན་དང་། མནར་གཅོད་ཀྱི་བྱེད་ཐབས་དང་། ཆབ་སྲིད་ཀྱི་ཀུན་སློང་ལྡན་པ་རྣམས་འཛིན་བཟུང་དང་མི་མངོན་པའི་གནས་ཚུལ་རིམ་པར་བྱུང་་བ་དང་། རྒ་སྒྲ་ཧྥེས་གསར་གཏོད་བྱས་པའི་ཐུན་མོང་མ་ཡིན་པའི་ཆབ་སྲིད་ཀྱི་སྒྲིག་གཞི་ནི་རྒྱལ་ཁབ་གཅིག་སྡུད་དང་དམངས་གཙོའི་འོས་སྡུད་ལ་འགོག་རྐྱེན་བཟོ་བའི་བྱེད་ཐབས་གཅིག་བུ་ཡིན་པ་དང། སྤྱི་ལོ་༢༠༠༡་ལོའི་ཟླ་༩་ཚེས་༡༡་ཉིན་གྱི་ཨ་རིར་འཇིགས་སྐུལ་པའི་རྒོལ་རྡུང་བྱུང་པའི་རྗེས་སུ་འཛམ་གླིང་དུ་ཨ་རི་དང་ཡུ་རོབ་སྲིད་སྲིད་གཞུང་ཁག་གིས་འཇིགས་སྐུལ་རིང་ལུགས་པར་འཐབ་འཛིང་བྱེད་པའི་མཉམ་འབྲེལ་གྱི་ལས་དོན་ནང་དུ་རྒ་སྒྲ་ཧྥེ་ཡིས་ལོ་ངོ་བཅུ་ཕྲག་ཁ་ཤས་རིང་དུ་ཕྱི་ཕྱོགས་ཀྱི་འབྲེལ་ལམ་བཅད་ནས་ཁེར་རྐྱང་དུ་གནས་པ་རེད། དེར་བརྟེན། ད་ལྟ་ལི་རྦུ་ཡའི་འགོ་ཁྲིད་གསར་བ་ཚོས་ ་མིའི་རིགས་ཀྱི་རྩ་བའི་ཐོབ་ཐང་ལ་སྲུང་སྐྱོབ་བྱེད་པའི་གནད་དོན་དང་འགྲོ་བ་མིའི་ཐོབ་ཐང་ལ་སྣེ་ཁྲིད་བྱེད་པའི་གློ་བུར་གྱི་གོ་སྐབས་བཟང་བོ་ཞིག་ཐོབ་པ་ལ་བརྟེན་ནས་རྩ་ཁྲིམས་གསར་བའི་ནང་དུ་མིའི་རིགས་ལ་གུས་བཀུར་བྱེད་པའི་གནད་དོན་རྣམས་ངེས་པར་དུ་འགོད་ངེས་རེད། རྒ་སྒྲ་ཧྥེའི་སྲིད་གཞུང་དང་ངོ་ལོག་དམག་དཔུང་གཉིས་བར་གྱི་གདོང་གཏུགས་ནི་ད་ལོའི་སྤྱི་ཟླ་༢་བའི་ནང་དུ་རྒ་སྒྲ་ཧྥེའི་དབང་བསྒྱུར་ལ་ངོ་རྒོལ་བྱེད་པའི་གཞི་རྒྱ་ཆེ་བའི་མི་དམངས་ཀྱི་སྐད་འབོད་ཁྲོམ་སྐོར་གྱི་རྒྱུ་རྐྱེན་ལ་བརྟེན་ནས་འགོ་བརྩམས་པ་རེད། སྤྱི་ཟླ་གསུམ་པའི་ཉིན་དུ་རྒྱལ་སྤྱིའི་ཉེས་དོན་ཁྲིམས་ཁང་གིས་ལི་རྦུ་ཡའི་ནང་དུ་ནག་ཉེས་བསགས་པའི་མི་སྣ་རྣམས་ལ་ཞིབ་བཤེར་བྱེད་པའི་ལས་དོན་བསྒྲུབས་པ་དང་། སྤྱི་ཟླ་དྲུག་པའི་ཉིན་དུ་རྒྱལ་སྤྱིའི་ཉེས་དོན་ཁྲིམས་ཁང་གི་ཁྲིམས་གཅོད་པས་རྒ་སྒྲ་ཧྥེ་དང་ཁོ་བོའི་བུ་ཨལ་སི་ལམ་དང་ལི་རྦུ་ཡའི་གསང་བའི་ལས་ཁུངས་ཀྱི་འགོ་གཙོ་ཨ་རྦུ་སྒྲི་ལ་ས་ནུ་སེ་གསུམ་འཛིན་བཟུང་བྱེད་དགོས་པའི་འགན་ལེན་ཡིག་ཆ་སྤྲད་པ་དང་། མི་འདི་གསུམ་གྱིས་ཞི་བའི་ངོ་རྒོལ་བྱེད་པའི་མི་དམངས་ཀྱི་ཐོག་ཏུ་དྲག་གནོན་བྱས་པའི་གནད་དོན་དང་མིའི་རིགས་ལ་གནོད་སྐྱོན་བཏང་བའི་ནག་ཉེས་བསགས་ཡོད་པར་བཤད་ཡོད། དེར་བརྟེན། ལི་རྦུ་ཡའི་ངོ་རྒོལ་དམག་དཔུང་དང་ནུབ་རྒྱ་མཚོའི་སྤྱི་ཆིངས་སྒྲིག་འཛུགས་དམག་དཔུང་གཉིས་ཀྱིས་མཉམ་འབྲེལ་ཐོག་ནས་འཐབ་འཛིང་ཡུན་རིང་བྱས་པའི་ཁྲོད་དུ་རྒ་སྒྲ་ཧྥེ་དམར་གསོད་དུ་བཏང་བ་དང་ལི་རྦུ་ཡའི་མི་དམངས་ལ་རང་དབང་གི་བདེ་སྐྱིད་ཐོབ་ཡོད། དེ་བས་ལི་རྦུ་ཡའི་རྩ་ཁྲིམས་གསར་བའི་ཟིན་བྲིས་ཀྱི་ནང་དུ་ལི་རྦུ་ཡའི་མི་དམངས་ལ་དུས་རབས་གསར་བའི་ནང་དུ་རླབས་ཆེ་བའི་འགྱུར་ལྡོག་ཅིག་འབྱུང་ངེས་ཡིན་པ་དང་། ལི་རྦུ་ཡའི་ནང་དུ་སླར་ཡང་རྒ་སྒ་ཧྥེ་ཡི་གྲིབ་ནག་ཙམ་ཡང་འབྱུང་དུ་མི་འཇུག་པའི་བྱེད་ཐབས་འདི་ནི་འགྲོ་བ་མིའི་རིགས་ཀྱི་རང་དབང་ལ་གུས་ཞབས་གནང་ཞིང་ཁྲིམས་ཀྱིས་དབང་བསྒྱུར་བྱེད་པའི་ཐབས་ལམ་ལ་བརྟེན་ནས་ལི་རྦུ་ཡ་གསར་བ་ཞིག་འཛུགས་རྒྱུ་ཡིན་པའི་རྟགས་མཚན་ཡིན་ནོ།
རྨ་མགུར་སངས་རྒྱམ།་ལགས། ཐུགས་རྗེ་ཆེ། ཤིན་ཏུ་ནས་ཐུགས་རྗེ་ཆེ། ང་ཚོར་ཕྱི་ཕྱོགས་དང་ཡང་ན་འཛམ་གླིང་འཕོ་འགྱུར་གྱི་གནས་ཚུལ་མང་ཙམ་ཐོས་དགོས་ཀྱིན་འདུག གྲགས་ཆེ་བའི་དུས་བབ་དང་བང་ཆེན། ཁ་བརྡ་སོགས་ཀྱི་འཛམ་གླིང་སྤྱིའི་གནས་ཚུལ་འབྲི་བ་ཉུང་ཉུང་རེད། ཅི་སྟེ་ཚགས་ཤོག་དེ་དག་གི་རྩོམ་སྒྲིག་པ་དང་གསར་འགོད་པ། ཐ་ན་སློབ་སྟོན་པ་སོགས་ཀྱི་བོད་ཡིག་ཁོ་ན་ལས་མ་ཤེས་སྟབས་འཛམ་གླིང་སྤྱིའི་འགྱུར་འགྲོ་དང་ང་ཚོར་དགོས་པའི་རྒྱལ་སྤྱིའི་གནས་ཚུལ་འགོད་པ་ནི་གནམ་མཁའི་སྐར་མ་ཙམ་རེད་འདུག། དེ་དག་ནི་རྗེས་ལུད་ཀྱི་རྣམ་པ་དང་ཡང་ན་དུས་རབས་རྙིང་པར་མཁོ་བའི་བསམ་བློ་ཤུགས་ཆེན་པོ་ཡོད་པའི་རྟགས་མཚན་ཞིག་ཀྱང་ཡིན་པ་རེད། ང་ཚོར་འདི་ལྟ་བུའི་ཕྱི་ཕྱོགས་ཀྱི་གནས་ཚུལ་དེ་ཚོ་གོ་དགོས་པ་དང་། གནས་ཚུལ་དེ་ཚོས་ང་ཚོར་སེམས་འགུལ་ཐེབས་ངེས་ཡིན། མི་རིགས་ཀྱི་ལ་རྒྱ་དང་། མི་རིགས་ཆིག་སྒྲིལ། མི་མང་ལོངས་ཤོག་སོགས་ཀྱི་ང་ཚོར་ཁོང་ཚོའི་ལ་རྒྱ་དང་སྙིང་སྟོབས་དེ་དགོས་ཀྱིན། མདོར་ན་བཤད་ཕོད་པ་དང་སྒྲུབ་ཕོད་པའི་སྙིང་སྟོབས་དེ་དགོས་ཀྱིན།
རྒྱལ་སྤྱིའི་འཕོ་འགྱུར་གྱི་གནས་ཚུལ་དང་། འཛམ་གླིང་མི་དམངས་ཀྱི་རེ་འདུན། རླབས་ཆེ་བའི་དབུ་ཁྲིད་རྣམས་ཀྱི་སློབ་སྟོན་བཅས་ལ་ཤེས་རྟོགས་དང་རྒྱུས་མངའ་ཡོད་པའི་སྒོ་ནས་མིའི་རིགས་ཀྱི་རང་དབང་ལ་རྩོད་ལེན་བྱེད་དགོས།