ལུག་ཞོ་པོ་དང་ལུག་ཞ་ཡི་བརྩེ་དུང་གི་གཏམ་རྒྱུད། བོད་འགྱུར་མ།

རྟ་ནག་སྐལ་བཟང་ལུང་རིགས།

ལུག་ཞོ་པོ་དང་ལུག་ཞ་ཡི་མཉམ་པར།

ལུག་ཞོ་པོ་ལ་ཞི་བདེ་གཟེངས་རྟགས་ཐོབ་པ་ཐོས་པས་ལུག་ཞའི་སེམས་པ་སྤྲོ་བས་རབ་ཏུ་མྱོས་སོ།། ཁོ་མོའི་སེམས་སུ་ལུག་ཞོ་པོ་སྔ་མོ་ནས་ཕྱིར་ནང་དུ་ལོག་པའི་རེ་སྒུག་ཟབ་མོ་བྱས་ཡོད་སྐད། སེམས་སུ་འདི་ལྟར་སྟ་གོན་བྱས་ཡོད་དེ། ལུག་ཞོ་པོ་ནང་དུ་ལོག་ཚེ་ཆེས་ལྕི་བའི་འཐམ་འཁྱུད་ཅིག་གི་རྗེས་སུ་ཞིམ་པོའི་འོ་ཞིག་བྱས་ནས། “ཁྱེད་ལ་གཟེངས་རྟགས་ཐོབ་ཐལ།” ཞེས་བཤད་པ་དེའོ།།

༼ཀུ་ཤུའི་ཉིན་རེ་ཚགས་པར༽གྱིས་བསྒྲགས་དོན། ལུག་ཞོ་པོ་དེ་སྔ་པེ་ཅིན་དགེ་འོས་ཆེད་སྦྱོང་སློབ་གྲྭའི་རྒྱའི་སྐད་ཡིག་སྡེ་ཚན་གྱི་དགེ་རྒན་བྱས་མྱོང་ཡོད་ཅིང་། སྤྱི་ལོ༡༩༨༩ལོའི་དྲུག་བཞིའི་དོན་རྐྱེན་མ་བྱུང་བའི་སྔ་ནུབ་ཏུ་ཁོ་རང་ཨ་རིའི་ཀི་ལོན་པེས་ཡ་སློབ་གྲྭ་ཆེན་མོར་མཚམས་འདྲི་སློབ་གཉེར་བའི་ལས་རིམ་དུ་ཞུགས་ཡོད། ཕྱིར་རང་རྒྱལ་ཏུ་ལོག་ནས་མི་དམངས་ལས་འགུལ་གྱི་ནང་དུ་ཞུགས། ཁོང་དང་ཧོ་དི་ཅན། ཀྲུའུ་དོ། གོ་ཞིན་བཅས་བཞི་ལ་གནམ་བདེ་སྒོ་མོ་ཆེ་ཐང་ཆེན་གྱི་རྒྱལ་སྲས་བཞི་ཞེས་འབོད། ཁྲི་མུན་ལས་གློད་པ་ཐོབ་རྗེས་ཁོས་རྒྱུན་བསྲིངས་ནས་སྐྱོན་བརྗོད་དགག་སྒྲུབ་གྱི་བྲིས་རྩོམ་མང་དུ་སྤེལ་ཞིང་། གཞུང་གིས་ཁོ་རང་མིང་ཐོ་ནག་པོའི་མི་སྣ་རུ་བདམས་ནས་ཡུན་རིང་བོར་ཚོད་འཛིན་བགྱིས་པ་རེད་དོ།།

ལུག་ཞོ་པོ་ཡི་ཆུང་མ་ནི་སྒྱུ་རྩལ་ལས་རིགས་ཁྲོད་དུ་སྙན་གྲགས་ཡོད་པའི་བཟའ་ཟླ་ཞེ་འདང་ཅན་ཞིག་རེད། ཁོ་གཉིས་ཀྱིས་ངོ་ཤེས་པའི་དུས་ཚོད་ནི་གྲོགས་པོ་མཉམ་འཛོམས་ཀྱི་འདུ་ཚོགས་ཤིག་སྟེ། སྙན་ངག་ལ་མོས་པ་ཡོད་པ་དག་བརྩེ་བ་ཡིས་འདུས་པའི་དུས་ཚིགས་ཤིག་གོ།།

རང་ལོ་ཞེ་དགུ་ཡིན་པའི་ལུག་ཞ་ལ་ཡོན་ཏན་གྱིས་ཀུན་ནས་ཕྱུག་ཅིང་། མི་རྣམས་ལ་ཆེས་ཟབ་ཤོས་ཀྱི་བག་ཆགས་ཤིག་ནི་མཉམ་གཏུབ་བྱས་ཡོད་པའི་སྐྲ་ལོ་དེ་དང་། འགོག་རྒོལ་བུད་མེད་ཅིག་དང་མཚུངས་པ་དེའོ།། ཁོ་མོ་ནི་སྙན་ངག་རྩོམ་པ་མོ་ཞིག་ཡིན་པ་ལས་གཞན་ད་དུང་། རི་མོ་བ་དང་། བརྙན་ལེན་པའང་ཡིན་ནོ།། ཁོ་མོས་བཤད་རྒྱུར། ཆེས་དགའ་ས་ནི་ལུག་ཞོ་པོ་ཡི་བརྟན་བརླིང་རང་བཞིན་དང་། སྙོམས་ལས་དབེན་ཞིང་བརྟུན་པ་ཆེ་བའི་སྙིང་སྟོབས་དེ་ཡིན། ང་རང་ལུག་ཞོ་པོ་དང་གཉེན་བསྒྲིགས་པའི་(འགྱོད་པ་གཏན་ནས་སྐྱེས་མྱོང་མེད)རྒྱུ་མཚན་ནི་ཤིན་ཏུ་ནས་ལས་སླ་བོ་ཞིག་སྟེ། ཕན་ཚུན་ལ་བདེ་སྐྱིད་སྦྱིན་ཐུབ་པས་སོ།།

ལུག་ཞོ་པོ་ཁྲི་མུན་དུ་བཙུད་རྗེས། ལུག་ཞ་ཡིས་སེམས་བཏང་སྙོམས་སུ་བཞག་སྟེ་མི་རྣམས་ལ་འཛུམ་ཁ་སློང་བ་དང་། དུས་རྟག་ཏུ་ལུག་ཞོ་པོ་ལ་སྐོེར་བ་བྱེད་པ་དང་། དེབ་སྐྱེལ་བ་སོགས་བྱས་པ་རེད་དོ།། སྔ་ལོའི་སྤྱི་ཟླ་གཉིས་པའི་ནང་ལུག་ཞོ་པོ་ལ་བགྲང་བྱ་བཅུ་གཅིག་གི་ཁྲིམས་ཐག་བཅད་རྗེས། ལུག་ཞ་ལ་སྐར་མ་ཉི་ཤུའི་རིང་ལུག་ཞོ་པོར་སྐད་ཆ་བཤད་རྒྱུའི་གོ་སྐབས་ཐོབ་ཅིང་། ཁྱོ་ཤུག་གཉིས་ཀྱི་བར་དུ་ཆོད་པའི་མདུན་ཅོག་དེར་དམ་དུ་འཁྱུད་དེ། མགྲིན་པ་མཆི་མས་བརྣངས་ཞོར། “ཡང་བསྐྱར་ལོ་བཅུ་གཉིས་འཁྱོལ་ཐུབ་ཀྱིན་མི་འདུག”ཟེར།

“གལ་སྲིད་ཁོ་བོ་སྲེག་བཅད་བརྡར་གསུམ་བགྱིས་པའི་ཕྱེ་མ་ཞིག་ཏུ་གྱུར་སོང་ཡང་། མེ་མདག་དེས་ད་དུང་ཁྱེད་ལ་དམ་དུ་འཁྱུད་ངེས”འདི་ནི་ནོ་སྦེལ་ཞི་བདེ་གཟེངས་རྟགས་ཐོབ་རྗེས་ཀྱི་ལུག་ཞོ་པོ་ཡིས་བཙོན་ཁང་དུ་ལུག་ཞ་ལ་བྲིས་པའི་སྙན་ངག་ཅིག་གོ། (བརྩེ་དུང་གི་འཕྲིན་ཡིག་ནང་གི་དུམ་ཚན་ཞིག་རེད)སྙན་ངག་ཐུང་ངུ་འདིས་ཁྱོ་ཤུག་གཉིས་བར་གྱི་ཤི་ཡང་མི་འགྱུར་བའི་བརྟན་བརླིང་གི་བརྩེ་དུང་མཚོན་ཡོད་པ་ཡིན་ནོ།།

ལུག་ཞོ་པོ་ཡི་འགྱུར་བ་མེད་པའི་དམ་བཅའ་ཉག་གཅིག་ནི། ཅི་དང་གང་ལའང་འཛེམ་པ་མེད་པར་རྒྱ་ནག་མི་དམངས་ལ་དམངས་གཙོ་ཡི་ལེགས་སྐྱེས་ཤིག་བསྟབ་རྒྱུ་དེ་ཡིན་ཅིང་། ཁོང་གི་སྐད་ཆ་བཤད་སྟངས་ལྟར་བཤད་ན། སྲིད་དབང་སྒེར་གཅོད་པས་ཁོང་གི་ཞུམ་མེད་ཀྱི་སྙིང་སྟོབས་འགོག་དཀའ་བ་ཡིན་ནོ།། (ཁོང་ལ་ཡེས་གོང་གི་རི་བོ་སྤར་བའི་སྙིང་སྟོབས། ཅང་ཝེ་ཡིས་རྒྱ་མཚོ་བསུབ་པའི་སྙིང་སྟོབས། རྦབ་རྡོ་གྱེན་དུ་འདྲིལ་བ་ལྟ་བུའི་སྙིང་སྟོབས་ཡོད་དོ། )ལུག་ཞོ་པོ་ལ་འདི་ལྟར་རྒྱུན་སྲིང་གི་སྙིང་སྟོབས་ཤིག་ཞིག་བདོག་པའི་རྒྱུ་མཚན་གཙོ་ཆེ་བ་ཞིག་ནི་ལུག་ཞ་ཡི་རྒྱབ་སྐྱོར་བླ་མེད་ཡོད་པས་དེས་སོ།།

སྤྱི་ལོ༡༩༩༣ལོར་གྲོགས་པོ་མཉམ་འཛོམས་ཀྱི་འདུ་ཚོགས་ཤིག་ཏུ་ལུག་ཞོ་པོ་ཡིས་ལུག་ཞ་ཐོག་མར་ངོ་ཤེས། ལོ་ངོ་གསུམ་གྱི་དཀའ་སྡུག་གི་བརྩེ་བ་བརྒྱུད་མཐར། ༡༩༩༦ལོར་གཞི་ནས་གཉེན་བསྒྲིགས། བརྩེ་དུང་གི་སྒུལ་ཤུགས་ཀྱིས་རབ་ཏུ་བསྐུལ་བའི་ལུག་ཞོ་པོ་ཡི་སེམས་ཚོར་ཆུ་རྒྱུན་བཞིན་བར་མེད་དུ་བཞུར་ཏེ། དུང་བ་དང་བརྩེ་བས་ཀུན་ནས་གཏམས་ཤིང་། ཚོར་བ་ཕྱི་རུ་ལུད་པའི་བརྩེ་དེབ་མཐུག་པོ་ཞིག་པར་དུ་བཏབ། དེབ་མིང་ལ༼ལུག་ཞོ་པོ་དང་ལུག་ཞ་ཡི་སྙན་ངག་གཅེས་བཏུས༽ཟེར།

ལུག་ཞ་ཆེས་མཐོའི་ཁྱིམ་རྒྱུད་ཅིག་ཏུ་སྐྱེས་ཤིང་། དེ་སྔ་རྒྱལ་ཁབ་ཁྲལ་དོན་ཅུའུ་རུ་བྱ་བ་མོད་མི་དམའ་ཞིག་ཡོད་ནའང་། ལུག་ཞོ་པོ་ཡི་སླད་དུ་ལས་གནས་ཀྱང་རྩིས་མེད་དུ་བཏང་སྟེ། ལས་མེད་མི་འཁྱམས་པ་ཞིག་གི་ལས་སྐལ་དང་དུ་བླངས། ཅི་དང་གང་ལའང་འཛེམས་པ་མེད་པས་ལུག་ཞོ་པོ་ཁོ་ན་ནི་མོའི་ཡོད་ཚད་ཀྱི་ཡོད་ཚད་དུ་གྱུར་སོང་བ་ཡིན་ནོ།།

ལུག་ཞ་ཅིའི་ཕྱིར་དུ་ལུག་ཞོ་པོ་ཁོ་ནར་དགའ་བ་རེད་དམ། དེའི་ལན་དུ་མོས། ལུག་ཞོ་པོ་ཡི་རྒྱུན་སྲིང་ལྷོད་མེད་ཀྱི་བསམ་བློ་དང་། མི་ལྡོག་བརྟན་པའི་བརྩོན་སེམས་དེ་ལ་བདག་ཅི་ནས་ཀྱང་དགའ་འོ་ཞེས་ཟེར་རོ།། ཁྱོ་ཤུག་གཉིས་ཀྱིས་ད་བར་དུ་སྐྱིད་ཀྱི་རྟ་ཕོ་མཉམ་ཞོན་དང་། སྡུག་གི་ཁུར་བོ་མཉམ་ཁུར་བགྱིས་ནས་ཡོང་བ་ཡིན་ནོ།། ལོ་འདི་འགའི་རིང་ལ། ལུག་ཞོ་པོ་ཡི་སླད་དུ་ལུག་ཞ་ལ་གཉིད་བྲལ་གྱི་ནད་ཀྱིས་གདུངས་པས། གྲོགས་པོ་རྣམས་ཀྱིས་མོའི་ལུས་ཕུང་གི་གནས་སྟངས་ལ་སེམས་ཁྲལ་བྱེད་ཀྱིན་འདུག་ལ། ལུག་ཞོ་པོ་ལ་ཡང་སེམས་ངལ་རི་རབ་ལས་ལྕི་བ་འདུག་གོ།

རྒྱ་ནག་སྲིད་གཞུང་གི་ལྟ་བ་དང་མི་མཐུན་པའི་མི་སྣ་མང་བོ་ཞིག་གི་ཁྲོད་དུ། ཆབ་སྲིད་ཉེས་ཅན་པར་གྱུར་པའི་རང་ཉིད་ཀྱི་ཁྱོ་གའི་དཀའ་སྡུག་དང་། ཡུན་རིང་བོའི་ཚེ་སྲོག་གི་གནོན་ཤུགས་ལ་བཟོད་སྒོམ་བྱེད་ཐུབ་མཁན་གྱི་བུད་མེད་ཤིན་ཏུ་ནས་ཉུང་བ་ཡིན་ནོ།། དེ་ལྟར་ཡིན་ནའང་། ལུག་ཞོ་པོ་དཀའ་ངལ་དང་ཇི་ལྟར་འཕྲད་ནའང་། ལུག་ཞའི་སེམས་སུ་བདོག་པའི་སྐྱིད་ན་མཉམ་སྐྱིད་དང་། སྡུག་ནས་མཉམ་སྡུག་གི་འདུ་ཤེས་དེ་སུས་ཀྱང་གཞོམ་མི་ཐུབ་པ་ཡིན་ནོ།།

ལུག་ཞ་ཡིས་བྲིས་པའི་སྙན་ངག་ཅིག་གི་ཁྲོད་དུ། “འགྲུལ་ལམ་གྱི་ཕྱོགས་སུ་སྐྱོད་པའི་མེ་འཁོར་དེས། ངུ་ཤུམ་གྱིས་འཚོ་བའི་བདག་གིས་ལུས་པོ་ལེབ་ཀྱིས་གཅུར་སོང་། ངས་ཁྱེད་ཀྱི་ལག་པར་གཏན་ནས་འཇུ་མ་ཐུབ།”སྙན་ངག་འདིའི་ཁྲོད་དུ་ཁོང་གི་བརྩེ་བའི་སྡུག་བསྔལ་གྱི་ཟབ་ཚད་མཐོང་མི་ཐུབ་ནའང་། དཀའ་སྡུག་དང་བླང་གི་སྙིང་སྟོབས་དེ་མཐོང་ཐུབ་པ་ཡིན་ནོ།། ཁོ་གཉིས་ཀྱི་ནང་སེམས་འཇིག་རྟེན་གྱི་རྒྱུན་རིང་བརྟན་བརླིང་གི་བསམ་བློ་དང་། བརྩེ་དུང་གི་གཏམ་རྒྱུད་འདིས་མི་རྣམས་ཡིད་འགུལ་ཐེབས་སུ་འཇུག་པ་ཡིན་ནོ།།

http://news.creaders.net/headline/newsViewer.php?nid=447458&id=1014112དྲ་ཚིགས་འདི་ལས་བདམས་བསྒྱུར་བྱས།