ལུག་ཤ་ཚོན་པོ། (ཐོས་སྒྲུང་།)

བསྟན་འཛིན་ཡོན་ལྡན།

སྔ་མོར་སྣུམ་འཁོར་དར་ཁྱབ་ཆེན་པོ་མེད་པའི་དུས་ཞིག་ལ། མི་རྣམས་རྟ་ལ་བཞོན་ཏེ་འགྲུལ་བཞུད་བྱེད་པ་དང་། རྫ་མགོ་གྲོང་ཆུང་གི་མི་རྣམས་ཀྱིས་ཀྱང་རང་སའི་ཐོན་སྐྱེད་འབྲུ་རིགས་དང་ཤིང་འབྲས་སོགས་རྒྱལ་སའི་ཁྲོམ་གཞུང་དུ་འཚོང་དུ་འགྲོ་ཡི་ཡོད་པ་རེད། གྲོང་ཆུང་དེ་ནས་རྒྱལ་སར་སླེབས་པར་ཉིན་གསུམ་འགོར་གྱི་ཡོད་པས། ཡུལ་དེའི་བུ་སྤུན་གཉིས་ཀྱིས་འགྲུལ་པའི་ཞག་སྡོད་ཆེད་དུ། གྲོང་པ་དང་རྒྱལ་སའི་བར་དུ་ཞག་ཚུགས་མ་འདྲ་བའི་འགྲུལ་ཁང་ཁག་གཉིས་བཟོས་ཏེ་ཁོ་གཉིས་ཀྱིས་བདག་གཉེར་བྱེད་ཀྱི་ཡོད་པ་རེད། འགྲུལ་པ་རྒྱུ་ནོར་མང་པོ་ཡོད་མཁན་རིགས་དེར་སྡོད་སྐབས་མཚན་མོར་ལྐོག་གསོད་བྱས་ཏེ་རྒྱུ་ནོར་ཐམས་ཅད་བཅོམ་གྱི་ཡོད་པ་རེད། ཉིན་ཞིག་སྤྱང་གྲུང་འཛོམས་ལ་གློ་ཁོག་ཡོད་པའི་ཚོང་པ་ཞིག་རྒྱལ་ས་དེ་ནས་རིན་ཆེན་ནོར་བུ་མང་པོ་འཁྱེར་ནས་གྲོང་ཆུང་དེར་ལོག་སྐབས་ལམ་བར་ཡོད་པའི་འགྲུལ་ཁང་གཉིས་པར་མཚན་ཉལ་བྱས། སང་ཞོགས་ཚོང་པ་དེ་རྟ་ལ་སྒ་རྒྱབ་ནས་བཞོན་པའི་ཚེ་འགྲུལ་ཁང་བདག་པོས་རྟའི་སྒང་ལ་སྐྱོར་རོགས་བྱེད་པའི་ཚུལ་གྱིས་སྐེད་པར་ལག་ཉུལ་བྱས་པས་ཨམ་ཕྲག་ནང་དངོས་རྫས་མང་པོ་ཡོད་པ་ཤེས། ཚོང་མ་དེ་ཐོན་ཁར་ ‘‘ཁྱོད་རང་དོ་དགོང་འགྲུལ་ཁང་གཞན་ཞིག་ལ་སླེབས་ཀྱི་རེད། འགྲུལ་ཁང་དེའི་བདག་པོ་ངའི་གཅེན་པོ་རེད། ཁྱོད་རང་དེར་སྡོད་ཆོག་ལ་གཅེན་པོར་ངས་ལུག་ཤ་ཚོན་པོ་ཞིག་བསྐུར་ཡོད་ལབ་རོགས།’’ ཅེས་ལན་ཞིག་བསྐུར་བ་རེད། (དོན་དངོས་ལུག་ཤ་ཚོན་པོ་དེ་ནི། རྟ་ལ་བཞོན་པའི་འགྲུལ་པ་ཁོ་རང་ལ་ཟེར་བ་དང་། ཁོ་གསོད་ཅེས་པའི་གསང་བརྡ་ཞིག་བསྐུར་བ་རེད།) ཚོང་པ་དེ་དགོང་མོར་འགྲུལ་ཁང་གཞན་དེར་འབྱོར་རྗེས་བདག་པོ་དེར་གོང་ལྟར་ལན་སྤྲོད་པས། ཚོང་པ་དེ་སྔོན་ཚུད་ནས་གྲ་སྒྲིག་ཡོད་པའི་ཐོག་བརྩེགས་འོག་མའི་ཉལ་ཁང་ཞིག་ནང་ཉལ་དུ་བཅུག།ཉལ་ཁང་དེར་སྒེའུ་ཁུང་མེད་ལ། ཉལ་ཁྲི་ཡང་གྱང་གི་ཟུར་དུ་མེད་པར་ཁང་པའི་དཀྱིལ་དུ་ཡོད་པ་རེད། དེར་བརྟེན། ཁོར་ཡ་མཚན་ཆེན་པོ་སྐྱེས་ཏེ། མལ་ཆས་ནང་གོས་བཅུག་སྟེ་མི་ཡོད་པའི་རྣམ་པ་བཟོས་རྗེས་ཁོ་རང་གྱང་ཟུར་དུ་ཀེ་རེ་ལངས་ནས་བསྡད། དེ་ནས་མཚན་དཀྱིལ་ཙམ་ལ་ཁང་པའི་ཐོག་ནས་སྒྲ་གྲགས་པས། ཁོས་ཡར་བལྟས་སྐབས་བདག་པོ་དེས་ཁང་པའི་ཐོག་ཕྱེས་ཏེ་རྡོ་ཆེན་པོ་ཞིག་ཉལ་ཁྲི་སྒང་ལ་འཕངས་པ་མཐོང་བས། ཁོས་ ‘‘ཨ་རོ་’’ ཞེས་སྐད་ངན་འཆོར་ཁུལ་བྱས། བདག་པོས་ཁོ་ཤི་སོང་སྙམ་བཞིན་མར་ལྟ་བར་ཡོང་སྟེ་སྒོ་ཕྱེ་མ་ཐག་ཚོང་པས་གྲི་བསྣུན་ཏེ་སྐད་གཅིག་ཉིད་དུ་ཕྱི་མའི་ལྔ་ལམ་དུ་བརྫངས། ཚོང་པ་དེས་བུ་སྤུན་ཆུང་བ་དེ་ཡང་བསད་དེ་རྒྱུ་ནོར་ཡོད་ཚད་འཁྱེར་ཏེ་གྲོང་པར་ལོག་ཕྱིན་པ་རེད།