གནས་ཚུལ་གཏོང་མཁན། ཙ་ཡུས་ཕུན་ཚོགས།
ཕྱི་ལོ་༢༠༡༣ ལོའི་ཟླ་༡༢ ཚེས་༡༠ ཉིན་ཚང་མས་མཁྱེན་མངའ་ལྟར་སུད་སི་གནས་སྡོད་ལྷུན་གྲུབ་ཚང་ཀརྨ་བཀྲ་ཤིས་ཚེ་རིང་དང་། སྟག་ཚང་དཀོན་ཅོག་ཁྱིོམ་ཚང་གཉིས་ཀྱིས་རྒྱལ་ཚོགས་ལ་བོད་དོན་ཞུ་གཏུག་གི་ལས་འགུལ་དབུ་འཛུགས་གནང་སྟེ་ལོ་ངོ་ཧྲིལ་བོ་གཅིག་འཁོར་བའི་ཉིན་མོ་ཡིན་པ་དང་། གོང་ཚེས་ཉིན་བོད་དོན་ཞུ་གཏུག་ལས་འགུལ་ཐེངས་༢༤ བ་དང་། ༢༠༡༣ ལོའི་ལས་འགུལ་མཐའ་མ་དེ་སྤེལ་ཡོད་འདུག
གོང་བརྗོད་ནང་མི་གཉིས་ཀྱིས་༢༠༡༢ ལོའི་ཟླ ༡༢ ཚེས་༡༠ ཉིན་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་སྟབས་བསྟུན་བོད་དོན་ཞུ་གཏུག་གི་ལས་འགུལ་དབུ་འཛུགས་ཞུས་ཏེ་ལོ་གཅིག་ཧྲིལ་བོ་འཁོར་ཡོད་པ་དང་། ལོ་ངོ་གཅིག་གི་རིང་སུད་སུ་ཇི་ནི་ཝར་མཉམ་འབྲེལ་རྒྱལ་ཚོགས་མདུན་ཐང་དང་རྒྱལ་སྤྱིའི་འགྲོ་བ་མིའི་ཐོབ་ཐང་མདུན་བཅས་སུ་བོད་དོན་ཞུ་གཏུག་ལས་འགུལ་ཐེངས་༢༤ དང་།སུད་སི་ས་གནས་ Emmenbruck ནང་བོད་དོན་རྒྱལ་དར་སྒྲེང་འཛུགས་ཀྱི་ལས་འགུལ་ཐེངས་གཉིས། དེ་བཞིན་བོད་ཟས་སྦྱིན་གཏོང་དང་བོད་དོན་ཁྱབ་བསྒྲགས་ལས་འགུལ་ཐེངས་གཅིག་བཅས་ཁྱོན་བོད་དོན་ལས་འགུལ་ཐེངས་༢༧ སྤེལ་ཡོད་འདུག་ཅིང་། ལས་འགུལ་འདི་ནི་ཡུ་རོབ་ཁུལ་ནང་བོད་དོན་ལས་འགུལ་རྒྱུན་རིང་ཤོས་དེ་ཆགས་ཡོད་པ་མ་ཟད། ཁྱིམ་ཚང་འདི་གཉིས་ཀྱིས་ལོ་རྗེས་མའི་ཕྱི་ཟླ་དང་པོའི་ནང་ནས་སླར་ཡང་ལོ་གཅིག་རིང་ལས་འགུལ་འདི་བཞིན་མུ་མཐུད་རྒྱུན་སྐྱོང་གནང་རྒྱུ་ཡིན་འདུག
དེ་ཡང་ལས་འགུལ་འདི་ནི་ཟླ་གཅིག་གི་ནང་གཟའ་ལྷག་པ་དང་པོ་དང་། གཟའ་ལྷག་པ་གསུམ་པ་གཉིས་སུ་བསྟུད་མར་ཟླ་རེར་ཐེངས་གཉིས་རེ་སྤེལ་གྱིན་པའི་ལས་འགུལ་ཞིག་དང་། ལས་འགུལ་སྤེལ་སྟངས་དེ་ཡང་མི་མང་པོ་ལྷན་དུ་འཛོམས་ཏེ་སྐད་འབོད་སོགས་གནང་རྒྱུ་མ་ཡིན་པར། རྒྱལ་ཚོགས་མདུན་དུ་བོད་ཀྱི་རྒྱལ་དར་སྒྲེང་འཛུགས་དང་། བོད་ནང་གི་དཀའ་སྡུག་གི་གནས་བབ་འཁོད་པའི་ཡིག་ཆ་ཁག་འགྲེམས་སྤེལ། ལྷག་པར་དུ་སྐུ་ལུས་མེར་སྲེག་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་སྐུ་པར་འགྲེམས་འཇོག དེ་བཞིན་ཁོང་རྣམས་ཀྱི་སྐུ་ལུས་མེར་སྲེག་གནང་དགོས་པའི་རྒྱབ་ལྗོངས་འབྲེལ་བརྗོད་དང་ཁོང་རྣམས་ཀྱི་འབོད་སྒྲའམ་དགོས་འདུན་འཁོད་པའི་ཡིག་ཆ་ཁག་དང་འཕྲེད་དར། དེ་བཞིན་སྐུ་ལུས་མེར་སྲེག་གནང་བའི་ཐད་༧གོང་ས་མཆོག་དང་དབུས་བོད་མིའི་སྒྲིག་འཛུགས་ཀྱི་ལངས་ཕྱོགས་དང་དགོངས་ཚུལ་ག་རེ་ཡིན་པའི་སྐོར་གྱི་ཡིག་ཆ་དང་འཕྲེད་དར། ༧གོང་ས་མཆོག་གིས་དམིགས་བསལ་རྒྱ་རིགས་ཚོར་བཀའ་སློབ་བསྩལ་བའི་ཡིག་ཆ་སོགས་རྒྱ་ཡིག་དང་། དབྱིན་ཡིག འཇར་མན་ཡི་གེ་བཅས་ཀྱི་ནང་བསྒྱུར་ཏེ། ཕྱི་རྒྱལ་མི་རིགས་དང་། རྒྱལ་ཚོགས་ཀྱི་ལས་བྱེད། ལྷག་དོན་རྒྱ་རིགས་ཡུལ་སྐོར་བ་མང་པོར་འགྲེམ་སྤེལ་བྱེད་ཀྱིན་འདུག་ཅིང་། ཐེངས་རེ་རེ་བཞིན་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཆེས་མཐོའི་ལས་ཁུངས་གཉིས་ལ་དགོས་འདུན་སྙན་ཞུ་གཏོང་བཞིན་ཡོད་འདུག
འབྲེལ་གཏུག་ཞུ་ཡུལ།
ཁ་པར། 0041764774162 སྟག་ཚང་དཀོན་ཅོག
ཁ་པར། 0041763080018 ལྷུན་གྲུབ་ཚང་ཀརྨ་བཀྲ་ཤིས།
ཁྲབ་སྟོན་མཇུག་རྫོགས་པ་འདྲ
རང་དོན་བསྐྱུར་ནས་གཞན་དོན་ལྷུར་བླངས་པ།།
སྐལ་པའི་བར་དུ་རྒྱལ་སྲས་སྤྱོད་པ་ལ།།
རྟག་ཏུ་འཇུག་པའི་སེམས་དཔའ་འདི་དག་ལ།།
ཡོབ་སྒོར་དབྱར་མཚོ་བཞིན་དུ་རྒྱས་པར་ཤོག།།
ཡག་པོ་རེད་ཤུགས་རྒྱབ་ཤོག་ཨ། དངོས་གནས་ཁ་ཡོད་བོད་དོན་ཐོག་ཕྱག་ལས་འདི་འདྲ་དུས་ཡུན་རིང་པོ་གནང་་པ་ནི་ལོ་རྒྱུས་ཀྱི་གསེར་ཡིག་ལ་བཀོད་ནས་མི་རབ་རྗེས་མ་ཚོ་ལ་མིག་དཔེ་བཟང་པོ་ཞིག་རེད་།
ལས་འགུལ་སྤེལ་བར་ཐུགས་རྗེ་ཆེ། བོད་དོན་ལས་འགུལ་ཞིག་ལས་ཞུ་གཏུག་མིན་པ་འདྲ། ཞུ་གཏུག ཁྲིམས་གཏུག་སོགས་དོན་གཅིག་མིང་གི་རྣམ་གྲངས་མ་རེད་དམ།
ཐུགས རྗེ་ཆེ་