རྨ་མགུར་སངས་རྒྱམ།
མདོ་སྨད་གཅན་ཚ་རྫོང་གི་མར་ཁུ་ཐང་གྲོང་རྡལ་དང་སྣང་ར་ཡུལ་ཚོ་གཉིས་ཀྱི་ནང་དུ་བོད་ཀྱི་མདོ་དབུས་ཁམས་གསུམ་གྱི་ལོ་གསར་གཅིག་གྱུར་དུ་གཏོང་བའི་སྐབས་སུ་ས་གནས་ཡུལ་མི་དང་སྤྱི་བདེ་ཉེན་རྟོག་མི་སྣའི་བར་དུ་འཁྲུག་རྩོད་ཤོར་ཡོད་པ་དང་ལྷག་པར་དུ་རྫོང་གི་ལྟེ་གནས་སུ་གྱུར་བ་མར་ཁུ་ཐང་སྡེ་བ་རུ་ཕྱི་ཟླ་གསུམ་པའི་ཚེས་བཞིའི་དགོང་དྲོར་ཉེན་རྟོག་མི་སྣ་ཁ་ཤས་བོད་ཀྱི་ལོ་གསར་གཏོང་བར་བཀག་འགོག་གི་བྱེད་པའི་ཆེད་དུ་གྲོང་སྡེ་དེའི་མ་ནི་ལྷ་ཁང་དུ་ཡོང་ནས་ལོ་གསར་གཏོང་བར་གྲ་སྒྲིག་བྱས་ཡོད་པའི་ཤ་དང་ཞལ་ཟས་ལ་སོགས་འཕྲོག་བཅོམ་བྱེད་པའི་སྐབས་སུ་སྡེ་བའི་ཡུལ་མི་དང་ཉེན་རྟོག་པ་རྣམས་ཀྱི་བར་ལ་འཁྲུག་རྩོད་ཤོར་ཏེ་མི་གཉིས་འཛིན་བཟུང་བྱས་ཡོད་པ་དང་དེའི་ཕྱི་ཉིན་མར་ཁུ་ཐང་སྡེ་བའི་ཡུལ་མི་རྣམས་རྫོང་སྤྱི་བདེ་ལས་ཁུངས་ཀྱི་སྒོ་འགྲམ་གྱི་མདུན་དུ་སོང་ནས་འཛིན་བཟུང་བྱས་པའི་སྡེ་བའི་ཡུལ་མི་དེ་གཉིས་མྱུར་དུ་གློད་གྲོལ་མ་བཏང་ན་སྐད་འབོད་བྱེད་རྒྱུ་ཡིན་པར་ཉེན་བརྡ་བཏང་བ་ལ་བརྟེན་ནས་མི་དེ་གཉིས་ཉིན་དེར་གློད་གྲོལ་བཏང་ཡོད་ནའང་རྫོང་སྤྱི་བདེ་ལས་ཁུངས་ཀྱི་རེ་འདུན་བཏོན་པ་ལྟར་སྤྱི་ཟླ་གསུམ་པའི་ཚེས་བཅུའི་རྗེས་སུ་མ་གཏོགས་ལོ་གསར་བཏང་མི་ཆོག་པར་བཤད་པ་དེ་ས་གནས་ཡུལ་མི་ཚོས་ཁས་ལེན་བྱས་ཏེ་ཕྱིར་ནང་དུ་ལོག་སྟེ་ལོ་གསར་གཏོང་བར་ཕྱིར་འགྱངས་བྱས་ཡོད། དེ་དང་དུས་མཚུངས་སུ་སྣང་རའི་ཡུལ་ཚོའི་སྣང་ར་གསེར་ཁང་ནང་དུ་བོད་ཀྱི་ལོ་གསར་ཚེས་གཅིག་ལ་གྲོང་སྡེ་བརྒྱད་ཀྱི་ཡུལ་མི་རྣམས་མཉམ་དུ་འཛོམས་ནས་མ་ནི་གྲངས་གསོག་དང་འབྲེལ་བོད་ཀྱི་ལོ་གསར་མཉམ་གཏོང་བྱེད་པར་གྲ་སྒྲིག་བྱེད་བཞིན་པའི་སྐབས་སུ་སྣང་རའི་ཡུལ་ཚོ་མི་དམངས་སྲིད་གཞུང་གི་ལས་བྱེད་དག་བསླེབས་ནས་བཀག་འགོག་བྱས་པར་མ་ཟད། མི་ཚང་རེར་རྒྱ་སྒོར་སུམ་ཅུ་རེ་བསྡུ་རུབ་བྱས་ཏེ་ལོ་གསར་མཉམ་གཏོང་གི་ཆེད་དུ་ཉོས་ཟིན་པའི་ཤོག་སྦག་དང་ཞལ་ཟས་སོགས་འཕྲོག་བཅོམ་བྱས་ཏེ་མཉམ་འཛོམས་བྱེད་དུ་མ་བཅུག་པ་དང་ལོ་གསར་གཏོང་བར་གནོད་སྐྱོན་བཟོས་ཡོད་པ་རེད། གཅན་ཚ་རྫོང་དུ་ཟླ་བ་སྔོན་མར་དགོན་པ་ཁག་དང་སྡེ་བའི་མི་སྣ་རྒན་རབས་པ་རྣམས་ཀྱིས་བོད་ཕྱི་ནང་དང་མདོ་དབུས་ཁམས་གསུམ་གྱི་བོད་མི་རྣམས་ཀྱི་ལོ་གསར་མཉམ་གཏོང་གི་ཆེད་དུ་ལོ་ངོ་མང་བའི་རིང་དུ་རྒྱ་མི་དང་མཉམ་དུ་ལོ་གསར་གཏོང་བའི་སྲོལ་རྒྱུན་ལ་བཅོས་བསྒྱུར་བྱེད་པར་གསལ་བསྒྲགས་བྱས་པའི་རྗེས་སུ་གཅན་ཚ་རྫོང་མི་དམངས་སྲིད་གཞུང་གིས་སྤྱི་བདེ་མི་སྣ་དང་སྦྲགས་ནས་གཞུང་གི་ལས་བྱེད་མི་སྣ་རྩ་འཛུགས་བྱས་ནས་དགོན་པ་ཁག་དང་སྡེ་བ་ཁག་ཏུ་ཟླ་བ་གཅིག་གི་རིང་དུ་རྒྱལ་ཁབ་ཀྱི་སྲིད་ཇུས་སློབ་གསོ་སྦྱོང་བརྡར་བྱེད་པའི་ལས་འགུལ་སྤེལ་དུ་བཅུག་པ་དང་དགོན་པ་རེར་ལས་བྱེད་མི་སྣ་བཅུ་གཉིས་རེ་དང་སྡེ་བ་རེར་ལས་བྱེད་མི་སྣ་གཉིས་རེ་རྩ་འཛུགས་བྱས་ནས་དགོན་པ་དང་སྡེ་བ་ཁག་ཏུ་གཏན་སྡོད་བྱས་ཏེ་རྒྱལ་ཁབ་ཀྱི་བཅའ་ཁྲིམས་དང་སྲིད་ཇུས་ཁྱབ་བསྒྲགས་དང་སློབ་སྦྱོང་བྱེད་དུ་བཅུག་སྟེ་གྲྭ་བ་དང་མང་ཚོགས་རྣམས་ལ་རྟག་པར་ལྟ་རྟོག་བྱེད་བཞིན་ཡོད། དེར་བརྟེན། དེང་གི་དུས་སུ་གཅན་ཚ་རྫོང་མི་དམངས་སྲིད་གཞུང་གི་ལས་ཁུངས་ཁག་ཏུ་ལས་བྱེད་རྣམས་སྟོང་བར་ཆགས་ཏེ་ལས་དོན་སྒྲུབ་མཁན་མེད་པ་རེད། རྒྱལ་ཁབ་ཀྱི་སྲིད་ཇུས་སློབ་གསོ་སྦྱོང་བརྡར་བྱེད་པའི་ཚོགས་འདུ་ནི་དགོན་པ་ཁག་ཏུ་ཉི་མ་རེར་བསྡུ་སྐོང་བྱས་ནས་གྲྭ་བ་རྣམས་ཀྱིས་རྒྱལ་ཁབ་ཀྱི་བཅའ་ཁྲིམས་དང་སྲིད་ཇུས་སློབ་སྦྱོང་བྱེད་པར་བཙན་སྐུལ་བྱེད་བཞིན་པ་དང་སྡེ་བ་ཁག་ཏུ་རྒྱལ་ཁབ་ཀྱི་བཅའ་ཁྲིམས་དང་སྲིད་ཇུས་ཁག་ཁྱབ་བསྒྲགས་བྱེད་བཞིན་པ་རེད། གལ་སྲིད་གཅན་ཚ་རྫོང་གི་དགོན་པ་ཁག་དང་གྲོང་སྡེ་ཁག་ཏུ་རྒྱལ་ཁབ་ལ་ངོ་རྒོལ་བྱེད་པའི་གནས་ཚུལ་ཁག་ཁྱབ་སྤེལ་བྱུང་བ་ཡིན་ན་རྩ་འཛུགས་བྱས་པའི་ལས་བྱེད་མི་སྣ་རྣམས་གཞུང་གི་ལས་གནས་ཁག་ལས་གནས་དབྱུང་གཏོང་རྒྱུའི་བཀའ་ཁྱབ་བཏང་ཡོད། གཅན་ཚ་རྫོང་དུ་བོད་ལུགས་ལོ་གསར་གྱི་སྐབས་སུ་བོད་རིགས་ལས་བྱེད་ཚང་མར་གུང་སེང་སྤྲད་མེད་པར་མ་ཟད། རྫོང་དང་ཡུལ་ཚོ་ཁག་གི་སློབ་གྲྭ་ཁག་གི་སློབ་མ་རྣམས་བོད་ཀྱི་ལོ་གསར་གྱི་ཆེད་དུ་སོ་སོའི་ཁྱིམ་ཚང་དུ་མ་བཏང་བར་སློབ་གྲྭའི་ནང་དུ་བཀག་འགོག་བྱས་ཡོད་པ་རེད། ཡིན་ནའང་། དགོན་པ་ཁག་དང་སྡེ་བ་ཁག་ཏུ་བོད་ཀྱི་གཞིས་བྱེས་གཉིས་ཀྱི་ལོ་གསར་ལ་མཉམ་དུ་རོལ་པར་སྔོན་མ་དང་མི་འདྲ་བར་དགོན་པ་ཁག་གི་གྲྭ་བ་རྣམས་གྲྭ་ཤག་ནང་དུ་མཉམ་འཛོམས་དང་སྡེ་བ་ཁག་གི་བོད་རིགས་རྣམས་སོ་སོའི་མ་ནི་ལྷ་ཁང་དུ་མཉམ་དུ་འཛོམས་ནས་བོད་རབ་བྱུང་བཅུ་བདུན་པའི་རབ་གནས་ལྕགས་མོ་ཡོས་ལོ་སྟེ་བོད་རྒྱལ་ལོ་༢༡༣༨་ལོའི་གནམ་ལོ་གསར་བ་ཞིག་ལ་རོལ་བའི་རྣམ་པ་ཞིག་མངོན་ཡོད། གཅན་ཚ་རྫོང་གི་བོད་རིགས་མང་ཚོགས་ལ་བོད་ཀྱི་མདོ་དབུས་ཁམས་གསུམ་གྱི་ལོ་གསར་ཆིག་སྒྲིལ་བྱེད་པའི་བསམ་ཚུལ་འདི་ནི་༢༠༠༨་ལོའི་བོད་ནང་གི་ཞི་རྒོལ་ཆེན་མོའི་ནང་དུ་རྒྱ་ནག་གིས་བོད་རིགས་ཡོངས་ལ་མནར་གཅོད་བཏང་བའི་དཀའ་སྡུག་གི་ཁྲོད་ནས་བྱུང་བ་ཞིག་ཡིན་པར་འགྲེལ་བརྗོད་བྱེད་ཀྱི་འདུག གཅན་ཚ་རྫོང་གི་མགུར་དགོན་པ་དང་བདེ་ཆེན་དགོན་པ། ངང་རོང་དགོན་པ། ཀོའུ་བ་དགོན་པ། གསང་སྒྲོག་དགོན་པ་རྣམས་གཙོ་བྱས་པའི་སྣང་རའི་གྲོང་བརྒྱད་དང་། ཧོར་མོ་ཁག་གསུམ། སྐ་ཕུག་ཚོ་གསུམ་གྱི་རྒན་རབས་པ་ཚང་མས་སྣེ་ཁྲིད་དེ་ད་ལོ་ནས་བཟུང་རྫོང་དེའི་དགོན་པ་ཁག་དང་ཡུལ་ཚོ་ཁག་གི་སྡེ་བ་ཡོངས་ཀྱི་མང་ཚོགས་ཚང་མས་ལོ་ངོ་བརྒྱད་ཅུའི་ལྷག་གི་རིང་དུ་རྒྱ་མི་དང་མཉམ་དུ་ལོ་གསར་གཏོང་བའི་ཨ་མདོའི་ལུགས་སྲོལ་ལ་འགྱུར་བ་གཏོང་དགོས་པར་སྐུལ་སློང་དང་འབོད་སྐུལ་ཞུས་ཏེ་རྒྱ་ལོའི་ལོ་གསར་མི་གཏོང་བར་བཟོས་པ་དང་། གོང་ས་༸་སྐྱབས་མགོན་མཆོག་གཙོ་བོར་གྱུར་པའི་བོད་ཕྱི་ནང་གི་བོད་རིགས་ཚང་མ་དང་མདོ་དབུས་ཁམས་གསུམ་གྱི་ལོ་གསར་གྱི་དུས་ཚིགས་གཅིག་གྱུར་དུ་གཏོང་བའི་ལས་འགུལ་སྤེལ་ཡོད། དེ་ནི་རྒྱ་མི་རིགས་དང་མཉམ་དུ་ལོ་གསར་གྱི་སྤྲོ་སྐྱིད་གཏོང་འདོད་མེད་པ་དང་། གཙོ་བོར་གོང་ས་༸མཆོག་དང་བོད་ཕྱི་ནང་གི་བོད་རིགས་ཚང་མ་སྐྱིད་སྡུག་མཉམ་མྱོང་དང་དུས་ཆེན་གྱི་སྤྲོ་སྐྱིད་མཉམ་གཏོང་བྱེད་པའི་དམིགས་ཡུལ་ཡིན་པར་མ་ཟད། བོད་ནང་གི་མི་དམངས་ཀྱི་ཆོལ་གསུམ་གཅིག་སྒྲིལ་གྱི་བསམ་བློ་ནི་ཉིན་རེ་བཞིན་དུ་ཇེ་ཆེར་འགྲོ་བཞིན་པའི་མཚོན་རྟགས་ཤིག་ཀྱང་ཡིན། །
དངོས་གནས་དཔའ་བོ་རེད་
༄། །བཙན་པོ་མེས་དབོན་གྱི་རྗེས་འཇུག་འདི་ཚོར་རྗེས་སུ་ཡི་རང་དང་རྒྱབ་སྐྱོར་ཡོད། ད་ནི་ཟོག་བཞིན་དུ་མགོ་འཐོམས་ནས་འདུག་པ་དང་། ཕག་བཞིན་དུ་བསམ་མེད་ཉལ་ནས་འདུག་པ། ཁྱི་བཞིན་དུ་ལྟོ་རྗེས་འབྲང་ནས་འདུག་པའི་དུས་མ་རེད། ཐོད་ན་མྱིག་དང་། མགོ་ན་རྣ། ཁོག་ན་སྙིང་ཡོད་པའི་གཞིས་ལུས་ང་ཚོ་ཚང་མ་གཅན་ཚའི་རྗེས་སུ་སྙེག རྔ་བའི་རྗེས་སུ་སྙེག བོད་ཀྱི་ལོ་སར་གཅིག་གྱུར་བྱེད། སང་ལོ་ཆུ་འབྲུག་ནས་བོད་ཆོལ་ཁ་གསུམ་པོའི་ལོ་སར་དུས་གཅིག་བྱེད། མགོ་མེད་པའི་རེབ་གོང་དང་བླ་བྲང་གཉིས། ལུས་མེད་པའི་སྐུ་འབུམ་
བཅས་ལ་ཚང་མས་ལག་འཇུ་བྱོས། རྗེས་ལུས་འདི་ཚོར་ལམ་སྣ་དྲོངས། ཕྱི་ནང་ཚང་མས་ཐུགས་རྗེས་གཟིགས།