༼༡༽
ཨོ་ཟོབ་རྡོ་རྗེ་སྣ་ཡིས་ལག་དཀར་བསད།།
ཨེ་ཙི་སྨུག་ཀློང་ཕྲོད་ནས་ཀརྨ་ལྐུགས།།
ཨུ་ཚུགས་སྤྲེལ་ཚོགས་གླིང་ནས་ཕག་སྤེན་ཤི།།
ཨི་ཀ་རྒྱག་པའི་ལོ་སར་ངར་མི་དགོས།།
ཨ་ཁ་ཡང་དག་ཆོས་པ་ཁྱི་བཞིན་འཁྱམས།།
ཧ་ཅང་ཐལ་བའི་སྙིགས་ལྔའི་མུན་ནག་ཁྲོད།།
ས་སྟེང་ཕལ་ཆེར་ཁྲམ་པས་གང་བའི་ཚེ།།
ཤ་རུས་གཅིག་ཟེར་ཁ་གཡང་ངར་མི་མཁོ།།
ལ་རྒྱ་ཁ་ཁྱེར་རུལ་གསེང་ཁོག་ཏུ་སྦས།།
ར་རུའི་སྡུག་རྩུབ་ནང་ལ་ངོམས་པའི་ཚེ།།
ཡ་རབས་སྐྱེས་བུ་ཕལ་ཆེར་དགོངས་པར་རྫོགས།།
འ་ཅག་མངོན་ལྐོག་གཡོ་འཕྲུལ་ངར་མི་འདོད།།
ཟ་ཧོར་མཁན་པོའི་རྣམ་ཐར་སྒྲུང་གཏམ་གོ།།
ཞྭ་དམར་བསྟན་པ་ཧ་ཤང་སྟེགས་མདོས་མྱོང་།།
ཝ་སྐྱེས་སེང་ལྤགས་གྱོན་ལ་སྔགས་འཆང་རྟོགས།།
ཛ་ཡའི་བསྟན་པ་འུར་སྒྲོགས་ངར་མི་འགྲོ།།
ཚ་བུ་སྤྲུལ་སྐུ་བཟོ་བའི་སྲོལ་རྒྱུན་དར།།
ཙ་རི་སྒྲུབ་གནས་མི་གཙོ་ཁ་བཤད་རྒྱས།།
མ་འབད་ཐར་བ་ཐོབ་པའི་ཁ་ཕོ་སྒྲོག།།
བ་ལང་ཕྱུགས་ཀྱི་རྟུལ་ཞུགས་ང་མི་སྤྲོ།།
ཕ་མེས་རིག་གཞུང་ཚོ་འདུས་འོ་མར་འགྲན།།
པ་ལོ་སྔགས་འཆང་ཡོངས་ལ་དགྲ་བཞིན་བརྩིས།།
ན་གཞོན་ཀླད་སྟོང་ཕལ་ཆེར་ལྟ་ལོག་གྱུར།།
ད་སྐབས་དམིགས་འདུན་མེད་པའི་ལོ་སར་འུར།།
ཐ་དག་ཕྱོགས་རིས་རྩོད་བས་མཐུན་སྒྲིལ་གཏོར།།
ཏ་ཐཱ་གའི་བསྟན་པ་ཚོང་ལ་བསྐུར།།
ཉ་ཉོག་བྱ་བས་གཡེང་བའི་གངས་ཅན་པ།།
ཇ་ལོ་མེ་ལ་སྦར་རྣམས་ངར་མི་དགའ།།
ཆ་ལུགས་ཆོས་བཞིན་སྤྱོད་ན་རྙིང་མ་ཟེར།།
ཅ་དག་གསེར་དངུལ་རྒྱན་ལ་མཛེས་མ་ཟེར།།
ང་ཚོའི་མ་འོངས་མདུན་ལམ་མེད་མཐོང་ཚེ།།
ག་ས་གང་ལ་བལྟས་ཀྱང་ཡིད་རེ་མུག།
ཁ་ནས་བཤད་པ་ལག་ཏུ་བླངས་པ་མེད།།
ཀ་ནས་དག་ཅིང་ཀུན་རྫོབ་རྨོངས་ནས་འཁྲུལ།།
མ་རིག་རང་ངོ་མ་ཤེས་གྲོགས་པོ་རྣམས།།
རེ་ཞིག་དགྱེས་པ་རྡོ་རྗེས་གྱེས་བརྡ་སྟོན།།
ཞེས་ས་ཕག་ལོ་སར་ཟེར་བ་ལ་ཤྲཱིས་སོ།། །།