ལོ་ཙཱ་བ་གསར་བསྡུའི་གསལ་བསྒྲགས།

—–ཚེ་རིང་གིས་མཚམས་སྦྱོར་བྱས།

 
བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་ནི༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་དགོངས་གཞི་ལྟར། ཏཱ་ལའི་བླ་མའི་དགེ་རྩ་ཚོགས་པའི་རྒྱབ་སྐྱོར་དང་མཐུན་འགྱུར་འོག ལོ་ཙཱ་བ་བསྟན་འཛིན་རིག་བཟང་དང་ལུང་རྟོགས་དགེ་འདུན་གཉིས་ཀས་རྩ་འཛུགས་ཀྱིས་དམིགས་ཡུལ་དང་འཆར་གཞི་ལྡན་པའི་ཡིག་སྒྱུར་གྱི་ལས་དོན་གཞི་རྒྱ་ཆེན་པོ་ཞིག་བསྒྲུབ་པའི་ཚོགས་པ་ཞིག་ཡིན།

ཚོགས་པ་འདིའི་ཕུགས་འདུན་ནི། དེང་རབས་ཀྱི་ཚན་རིག་རང་བཞིན་གྱི་བསམ་བློ་སོགས་ལས་གྲུབ་པའི་བརྩམས་ཆོས་རྣམས་དམིགས་ཡུལ་དང་འཆར་གཞི་ལྡན་པའི་སྒོ་ནས་བོད་སྐད་ནང་ཚུར་བསྒྱུར་བ་དང་། ཡང་ན། ཉམས་ཞིབ་ཀྱི་ལམ་ནས་གསར་དུ་བསྡུ་སྒྲིག་བྱས་ཏེ། བོད་མི་རིགས་ཀྱི་སོན་རྩའི་འཕེལ་རྒྱས་ལ་ཉེ་བར་མཁོ་བའི་དེང་གི་རིག་གནས་ཀྱི་ཚན་ཁག་གལ་ཆེན་རྣམས་བོད་ཀྱི་སྐད་ཡིག་ཁྲོད་གཞི་རྐང་གི་སྤྱི་སྒྲོམ་བརྟན་པོ་ཞིག་འཛུགས་པར་ཕན་ནུས་ལྡན་པའི་ལས་དོན་ཞིག་བསྒྲུབ་རྒྱུ་དེ་ཡིན།

བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་གཙོས། བོད་དང་བོད་ཀྱི་ཤེས་རིག་ལ་གོ་རྟོགས་མཐོ་ལ་ལྷག་བསམ་དཀར་བའི་མི་སྣ་དག་གི་ལམ་སྟོན་མཐུན་འགྱུར་གྱི་རྒྱབ་རྟེན་དང་། ཕྱི་ནང་གི་ཤེས་རིག་དང་སྐད་ཡིག་གི་གནས་ཚད་མཐོ་པོ་ཡོད་པའི་ལམ་སྟོན་བློ་འདོན་མི་སྣའི་རྩོམ་སྒྱུར་དང་རྩོམ་སྒྲིག་གི་ལག་བསྟར་ལམ་སྟོན་གྱི་རྒྱབ་རྟེན་བཅས་ཀྱི་འོག དབྱིན་བོད་གཉིས་ཀྱི་སྐད་ཡིག་གི་ཤེས་ཚད་མཉམ་པའི་གཞོན་སྐྱེས་བཅུ་ཙམ་ལ་ལོ་ཙཱ་བྱ་བར་སྦྱོང་བརྡར་གྱི་མཐུན་རྐྱེན་ཆ་ཚང་གོ་སྒྲིག་བྱ་རྒྱུ་ཡིན་ཞིང་། སྦྱོང་བརྡར་གྱི་དུས་ཡུན་ལོ་གཅིག་དང་ཕྱེད་ཀའི་རིང་ཡིག་སྒྱུར་བྱེད་ཕྱོགས་ཀྱི་གཞི་རྩའི་ཤེས་བྱ་སོགས་ལ་སྦྱོང་བརྡར་སྤྲད་ནས་ཡིག་སྒྱུར་གྱི་ཤེས་ཚད་དང་ཉམས་མྱོང་སོགས་སྔར་ལས་ཚད་ལྡན་གྱི་གྲུབ་འབྲས་ཐོབ་རྗེས། ཡིག་སྒྱུར་ལས་རིམ་གྱི་ཐོག་མར༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དབྱིན་ཡིག་ཏུ་ལྗགས་རྩོམ་གནང་བའི་ཕྱག་དེབ་རྣམས་རང་རེའི་སྐད་ཡིག་ཏུ་བསྒྱུར་བའི་ལས་ཀ་དངོས་སུ་འགོ་འཛུགས་རྒྱུ་ཡིན།

བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གི་ངོས་ནས་ལོ་ཙཱ་བ་རྣམས་ལ་བྱ་བ་བསྒྲུབ་སའི་ལས་ཁང་གི་ཁོར་ཡུག་འཐུས་ཚང་ཞིག་དང་། སྡོད་ཤག་གི་ཆ་རྐྱེན་ཚད་ལྡན་བསྐྲུན་པ་སོགས་འཚོ་བའི་མཐུན་རྐྱེན་ལེགས་པོ་ཞིག་སྦྱོར་ཐབས་བྱ་རྒྱུ་ཡིན་ལགས་ན། བོད་ཕྱི་ནང་གཉིས་སུ་ད་སྔ་ཕལ་ཆེར་བྱུང་མ་མྱོང་བའི་ལོ་ཙཱའི་ལས་གཞི་ཆེན་པོ་འདིར་ཞུགས་འདོད་ཡོད་མཁན་ཚོས་ཕྱི་ལོ 2015 ལོའི་ཟླ 12 ཚེས 20 ཚུན་ལ་གཤམ་གྱི་གློག་འཕྲིན་ཐོག་སྙན་ཞུ་འབྱོར་དགོས།

• དགོས་ངེས་ཆ་རྐྱེན་ཁག


1. བོད་དབྱིན་གཉིས་ཀྱི་ཤེས་ཚད་དང་འབྲེལ་བའི་སློབ་གཉེར་ལག་ཁྱེར།

2. མ་རྩོམ་དང་བཅས་རང་ཉིད་ཀྱི་སྒྱུར་རྩོམ་རེ་དང་། དེ་མིན་རྩོམ་ཡིག་གཞན་ཡོད་ན་ཚབ་མཚོན་ཐུང་ངུ་རེ།

3. འཕྲལ་སེལ་ཙམ་མིན་པར་ཉུང་མཐར་སྦྱོང་བརྡར་གྱི་དུས་ཡུན་ཚུད་པའི་ལོ་ལྔའི་རིང་ལས་བསྒྲུབ་ཆོད་གན་འཇོག་ཐུབ་པ།

4. རང་ཉིད་ཀྱི་ངོ་སྤྲོད་ཉིང་བསྡུས་རེ་དང་། དྭང་བླང་དཔྱ་དངུལ་ལག་དེབ་དང་སྐྱབས་བཅོལ་ལག་དེབ་གཉིས་ཀྱི་ངོ་བཤུས།

༼འབྲེལ་གཏུགས།༽གློག་འཕྲིན། dragyurcentre@gmail.com / the_stepingstone@gmail.com

ཁ་པར། (91) 9900971955 / 9816458387

(བསྟན་འཛིན་རིག་བཟང་ལགས་ཀྱི་ངོ་དེབ་ནས་དྲངས།)