རླུང་དམར།
ཁ་འུར་ཆེ་ལག་འུར་ཆུང་བའི་བླ་རུལ་སོང་བ་ཡིན་ནམ
ལྟོས་ཤིག ཤི་བླ་ཞིག གསོན་བླ་ཞིག
ཁྱོད་ཀྱི་ཞོགས་པ་དེ་ཁ་ཏོན་དགེ་སྦྱོར་གྱི་གསོ་ལྷ་ཞིག་ཏུ་གྱུར་སོང་ཨེ
བེའུ་ངུས་ཏེ་ཁྱིམ་བྱ་གཉིད་ལས་དཀྲོགས་ཏེ་འདུག
ཐོ་རེངས་ཤིག་ལ ཇ་ཆུ་མེད་པའི་རྩམ་ཕོར་ལག་ཏུ་ཐོགས་ཏེ་མར་ཁུ་བཙགས
ཤོག་སྙུག་དེ་སུ་ཡིས་སྒོ་ཁྱིའི་སྔུན་ལ་གཡུགས
ཁྭ་ཏ་ཁྭ་ཏའི་གནས་མལ་ལ་འཕུར་སོང
རང་ཉིད་ཀྱི་གྲིབ་གཟུགས་ལ་མདུང་རྩེ་གཏད་པའི་གླག་རྒོད་ཀྱི་འདུ་ར་ཞིག
ཁྱོད་ཀྱིས་རྨོངས་གཉིད་ཀྱི་གླུ་ཤགས་ལེན་གྱིན་འདུག
ས་དང་གནམ་གོ་ལོག་ཏུ་བསྡེབས་ཏེ་འགྱོད་ཐོ་ཞིག་རྩོམ་པར་བྲེལ་ལོང་ཆེ
ཆགས་སྡང་གི་དུག་སྒྲོམ་དེ
མེ་དང་མེ་ལ་འཐབ་པའི་གཙན་གཡར་གྱི་འདོད་སྨྱོན་དམར་པོ་ཞིག
རྫུན་གྱི་ཐག་མདུད་རང་སྐེ་ལ་འདོགས་དོན་ཅི
རང་སེམས་རྡོ་ལེབ་ཀྱིས་གཅུར་དོན་ཅི