ཁྲོ་གཏུམ།
རོགས་མཐུན་གཞས་ཚིག་འབྲི་སྟངས་ཤིག ཡང་ན་དོག་དབྱིབས་ནད་དུག་གིས་ལམ་ཁ་བཀག་པའི་ཝར་བ་ཞིག་གི་སེམས་པ། ཝར་བ། ཁྱི་ཁ་རྩེད་པ། ཧོ་ཉུག་གམ་ཕོ་ཉུལ་བྱེད་པ། འདི་ནི་རྩྭ་ཐང་གི་རྫི་བོ་གསར་བུ་རྣམས་ཀྱི་སྣང་བ་སྣ་རྩེར་འཛིན་པའི་དུས་ཤིག ལྗང་བུའི་ Queens, རྒྱལ་མོའི་ལམ་ཀ འདི་ཀློག་གིན་ཀློག་གིན་ཧོ་ཉུག་ལ་འགྲོ་སྟངས་ཤིག་གི་ཚོར་བ་ཡོང་ལ། རྩྭ་ཐང་ནས་ཧོ་ཉུག་ལ་འགྲོ་བའི་སྲོལ་དེ་དེང་རབས་ཀྱི་རླབས་མཐོ་བའི་ཨ་རིའི་ཚན་རིག་ལྡན་པའི་གྲོང་ཁྱེར་ནས་ཧོ་ཉུག་བྱེད་འགོ་བཙུགས་ཤིང་། སྣང་འགྲོ་བུ་མོ་ཞིག་གི་སྒོ་སྟེགས་ཨང་ཀི་ཚུན་ཆད་བཙལ་སྟེ། རེ་སྒུག་གང་ཞིག་ལ་དམིགས་པའི་དུས་དེར་ཏོག་དབྱིབས་ནད་དུག་གི་ཁྱབ་རྒྱས་ནང་སྡོད་བཀའ་བཏང་བའི་ལེ་ལན་གྱིས་ཧོ་ཉུག་ལ་འགྲོ་བའི་ལམ་ཁ་བཀག་ཅིང་། དྲན་ཤིང་གི་མཛེས་པ་སྣུམ་པོ་དག་རིམ་གྱིས་རང་མོས་སྙན་ངག་གི་སྒྱུ་རྩལ་ལ་དྲངས་པའི་རོགས་དྲན་པའི་སྐོར་གྱི་ལ་གཞས་ཤིག མཐའ་མའི་ཚིག་དེ་བསམ་བློའི་བློས་གཏོང་ཞིག་སྟེ། བདེ་སྐྱིད་ལྡན་པའི་སྨོན་ལམ་བརྒྱབ་པའི་བློ་སྟོབས་འདི་ལྟ་བུ་ཞིག་མི་ཁ་ཤས་སུ་མ་གཏོགས་མེད་པ་ཞིག་རེད་བསམ།
ཕྱི་ལོ་ ༢༠༢༠ ཟླ་ ༥ ཚེས་ ༠༥ ཉིན་བྲིས།
Queens, རྒྱལ་མོའི་ལམ་ཀ
རྩོམ་པ་པོ། ལྗང་བུ།
Queens, རྒྱལ་མོའི་ལམ་ཀ
སྒོ་རྟགས་བརྒྱ་དང་བཅུ་གསུམ
ཚེ་རིང་མཚོ་མོ་བཞུགས་ས
ཨུ་དུམ་ཝ་ར་འཁྲུངས་ས
རྨི་ལམ་ཚོན་གྱི་རི་མོ
ངོ་ནི་ཤེས་ཀྱིན་མེད་རུང
སེམས་ཀྱི་གཏིང་ལ་སྐྱེས་ཡོད
ཐེངས་མ་བརྒྱ་ཕྲག་སྟོང་ཕྲག
སྒོ་འགྲམ་བརྒྱུད་ནས་ཕྱིན་ཡིན
སེམས་པ་ཤོར་ཤོར་དེ་གཅིག་བྱས
སྙིང་ཁམས་འཕར་འཕར་དེ་གཉིས་བྱས
Queens, རྒྱལ་མོའི་ལམ་ཀ
སྒོ་རྟགས་བརྒྱ་དང་བཅུ་གསུམ
ང་ཡི་ཚེ་རིང་མཚོ་མོ
རྨི་ལམ་ཚོན་གྱི་རི་མོ
སྐུ་གཟུགས་བདེ་མོ་ཡིན་ནམ
ཐུགས་སེམས་སྐྱིད་པོ་ཡིན་ནམ
ཁོ་རོ་ན་ཡི་རྗེས་ལ
གྲིབ་མ་མཐོང་ཡ་མི་འདུག
སྙིང་ཁམས་འཕར་འཕར་དེ་གཅིག་བྱས
སེམས་ཁྲལ་ཆེ་ཆེ་དེ་གཉིས་བྱས
Queens, རྒྱལ་མོའི་ལམ་ཀ
སྒོ་རྟགས་བརྒྱ་དང་བཅུ་གསུམ
ཉི་མ་ཁོད་ལ་བབས་སོང
སྤྲིན་པ་བྱིན་རླབས་འབར་སོང
མཛེས་པའི་ཚེ་རིང་མཚོ་མོ
འཛུམ་པའི་སྒོ་ལས་ཐོན་བྱུང
ཕོ་གསར་སྣང་འགྲོ་ཞིག་དང
ལག་པ་དམ་པོར་འཆངས་འདུག
ཁྱེད་རང་འཚམ་འཚམ་དེས་གཅིག་དགའ
ཁྱེད་གཉིས་སྐྱིད་སྐྱིད་ཅིག་ཡོང་རོགས
2020/4