འདྲེ་གླེན་པ།
སྤྱི་ཟླ་ 3 /31/2016 ཉིན་གནམ་གཤིས་དྭངས་ཤིང་ཉི་འོད་རབ་ཏུ་འཇམ། ཨོ་གླིང་གི་གྲོང་ཁྱེར་སེད་ནེ་ནུབ་ཕྱོགས་ཁུལ་གྱི་རི་སྔོན་པོའི་གནམ་གཤིས་ཀྱི་དྲོ་གྲང་ལས་མཐོ་སྒང་གི་ཚོར་བ་ནམ་ཞར་དུ་བསྐྱེད་ཐུབ་པ་དང་འགྲོ་འདུག་གི་སྐབས་སུ་བོད་ཀྱི་ས་ཁུལ་ཞིག་ཏུ་ཡོད་པའི་ཚོར་སྣང་བླ་ལྷག་ཏུ་འཕེལ་བས་ཕ་ཡུལ་མང་བ་དྲན་སོས་པ་ཡིན།
ཞོགས་པར་དུས་ཚོད་དགུ་པ་ནས་ནམ་རྒྱུན་ལྟར་ཉི་ཧོང་གི་ཟ་ཁང་ཞིག་ཏུ་ལས་ཞུགས་བྱས་པ་དང་ལས་ཀའི་བར་གསེང་དང་བྲེལ་འཚུབ་ཀྱི་བར་དུ་ལས་གྲོགས་དང་མགྲོན་པོ་ཚང་མར་ལབ་གླེང་མང་ཙམ་བྱས།
ཨོ་གླིང་ནས་མི་ངོ་ཤེས་མིན་གཉིས་ཆར་དང་པོ་འཕྲད་སྐབས་བདེ་མོ་ཡིན་མིན་གྱི་འཚམས་འདྲི་བྱེད་པ་ཡིན། སྤྱིར་བཏང་གི་མི་དག་འཚམས་འདྲི་བྱེད་པ་དང་བདེ་མོ་བཞག་ནས་སྐད་ཆ་མཚམས་གཅོད་རྒྱུ་ལས། མཐུད་དེ་ལབ་གླེང་མང་པོ་བྱེད་པའི་དུས་ཚོད་མེད་པ་དང་གོམས་གཤིས་ཀྱང་དེ་ཙམ་མེད་པ་ཡིན། འོན་ཀྱང་། རྒན་ཡོལ་བྱས་ཟིན་པའི་ཚེ་མཇུག་པ་རྣམས་སྐད་ཆ་བཤད་རྒྱུར་ཧ་ཅང་གིས་སྤྲོ།
ཉིན་གུང་ཡོལ་ཙམ་ཞིག་ལ་མགོ་སེར་བལྟས་ཚོད་ཀྱིས་མི་ལོ་བདུན་ཅུ་ཡོལ་འདུག་བསམ་པ་ཞིག་གཅིག་པུར་ཟ་ཁང་དུ་སླེབས་ཏེ་བདག་གི་ཁ་གཏད་དུ་བསྡད། ཉི་ཧོང་གི་སྲོལ་ཟས་ཤ་མེད་sushi མང་ཙམ་ཞིག་མངགས་པ་དང་ང་ལ་འཚམས་འདྲི་བྱས། དང་པོ་བདེ་མོ་ཡིན་དང་དེ་རིང་བྲེལ་བ་ཆེ་མིན་སོགས་དྲིས། ང་ཡང་དེ་ཙམ་བྲེལ་བ་མེད་པས་རེ་རེ་བཞིན་ལན་འདེབས་རྒྱས་ཙམ་བྱས། ཡར་མར་བཤད་རྗེས་བདག་ལ་ཁྱེད་རང་ཉི་ཧོང་ནས་ཡིན་ནམ་ཟེར། བདག་གིས་ལན་ཏུ་མིན། ང་བོད་པ་ཡིན་ཞེས་བཤད།
ཁོང་གི་གདོང་ལ་འཛུམ་ཞིག་ལངས་ཏེ་སྐད་མགོ་ཅུང་ཟད་ཆེ་ཙམ་གྱིས་ལག་པ་ཡར་བཀྱགས་ཏེ་དབྱིན་སྐད་དུ་free Tibet ཞེས་བཤད། ཁོ་བོ་བརྩིས་པའི་ང་རང་ས་ཆ་འདི་ནས་བོད་པ་ཡིན་ཞེས་ལབ་པ་དང་ལན་ཏུ་free Tibet ཟེར་བའི་དབྱིན་ཇི་བ་མི་བཞི་ལ་འཕྲད་པ་ཡིན། འདི་ཡིས་ཕྱི་སྡོད་བོད་པ་ཚོས་བོད་རང་དབང་རང་བཙན་གྱི་སྐད་འབོད་ཆེ་ཙམ་བསྒྲགས་ཐུབ་འདུག་བསམ་པའི་ཚོར་བ་བྱུང་། རེད་དེ་ད་ལྟའི་ཆར་ཡིད་ཕམ་པ་ཞིག་ལ། བོད་མིའི་སྒེར་ལངས་སུམ་བཅུའི་དུས་དྲན་སོགས་ཀྱི་སྐབས་སུ་རྒྱལ་བཙོང་བ་མང་པོས་སྣེ་ཁྲིད་དེ། བོད་རང་བཙན་གྱི་སྐད་འབོད་དང་རྒྱ་ནག་གི་མི་སེར་སྤེལ་ཡུལ་ཆགས་པའི་བོད་ས་ནས་China out in Tibet རྒྱ་ནག་བོད་ནས་ཕར་རྒྱུགས་ཤིག་ལ་སོགས་པའི་ཚེ་སྲོག་གི་སྐད་སྒྲ་དེ་དག་བཀག་འགག་བྱེད་བཞིན་པ་ནི་ད་ལྟའི་ཆར་ཅུང་ཟད་གོ་རྟོགས་སྤེལ་ཐུབ་ཡོད་པའི་འཛམ་གླིང་མི་མང་གི་བློ་ངོ་ནས་འབོར་སླ་བའི་ཆ་རྐྱེན་དུ་གྱུར་པའི་སེམས་འཚབ་དེས་དབུགས་རིང་རེ་ཚོད་ཚོད་དུ་ཤོར་ཏེ་ངེད་གཉིས་བར་གྱི་སྐད་ཆ་མཇུག་བསྡུས།
ཕྱི་དྲོ་དུས་ཚོད་གསུམ་པ་ནས་ལས་མཚམས་བཞག ལས་མཚམས་བཞག་པ་དང་དེ་ནས་མེ་འཁོར་བརྒྱུད་དུས་ཚོད་གཅིག་ལྷག་གི་སར་ཡོད་པའི་ས་ཁུལ་ཞིག་ཏུ་དགེ་རྒན་གསབ་སྦྱོང་ཞིག་ལ་ཆེད་བཅར་བྱས།
དགེ་རྒན་གསབ་སྦྱོང་ལ་བཅར་བའི་མི་མང་ཆེ་བ་ཡོ་རོབ་དང་ཨེ་ཤ་ཡ་ཡུལ་གྱི་ཕྱི་ཕྱོགས་ཀྱི་མི་ཡིན་པ་དང་Community གྲངས་ཉུང་མི་རིགས་ཀྱི་སྒེར་གྱི་སློབ་གྲྭའི་ངོ་ཚབ་ལས་ཡོང་བ་ཤ་སྟག་རེད་གདའ། དེ་དག་ལས་ཀྱང་ཁ་ཆེ་དང་རྒྱ་མི་མང་ཤོས་རེད་འདུག
ཁ་ཆེ་ནི་འཛམ་གླིང་གི་རྒྱལ་ཁབ་གང་སར་བཀྲམས་པའི་ཆེས་མི་འབོར་སྤེལ་བའི་མི་རིགས་ཤིག་ཡིན་པ་དང་ཁྲག་རྒྱུད་སྤེལ་བ་ཙམ་མིན་པར་མི་རིགས་ཀྱི་ལྟ་བ་དང་གོམ་གཤིས། ཆོས་ལུགས་སོགས་དུས་མཉམ་དུ་སྤེལ་ཐུབ་པའི་འཛམ་གླིང་གིས་ཞེད་སྣང་བལྟ་བའི་རིགས་ལ་བརྩི་བ་ཡིན། ད་དུང་ཁ་ཆེ་སྡོད་སའི་ས་ཁུལ་མང་ཆེ་བར་སོ་སོའི་ཆོས་དང་རིག་གཞུང་སྐད་ཡིག་སོགས་དར་སྤེལ་བྱེད་སའི་ལྷ་ཁང་དང་ཚོགས་ཁང་ཡོད་པ་དང་། སྦྱོང་རྩལ་དང་ཐབས་རྩལ་འདྲ་མིན་ལ་བརྟེན་ཏེ་དུས་རབས་དང་འཚམས་པའི་རང་གི་རིགས་རྒྱུད་ལ་ཆོས་དང་རིག་གཞུང་། སྐད་དང་ཡི་གེ མི་རིགས་རིང་ལུགས་ཀྱི་ལྟ་བ་སོགས་ངོ་སྤྲོད་བྱས་ཏེ་རང་གི་བུ་རབས་ཚ་རྒྱུད་གཙང་མ་གསོ་རྐྱང་བྱ་བ་ཡིན། ཕྱི་རྒྱལ་ནས་སྐྱེས་ཏེ་དེ་ནས་འཚར་ཡང་ཁ་ཆེའི་བྱིས་པ་དང་སློབ་ཕྲུག་སོགས་མཉམ་དུ་འགྲོ་སྐབས་ཁ་ཆེའི་རང་གི་སྐད་བཀོལ་བ་ལས་དབྱིན་སྐད་བཤད་ནས་འགྲོ་མཁན་ཧ་ཅང་གིས་ཉུང་བ་ཡིན།
རྒྱ་ནག་ནི་དེ་ལས་ཀྱང་ངར་ཏེ་རྒྱ་ནག་འདུས་སྡོད་བྱེད་སའི་དབྱིན་ཇིའི་ས་ཁུལ་མང་ཆེ་བར་རྒྱ་ནག་གི་སྒེར་བཙུགས་སློབ་གྲྭ་དང་ཚོང་ར་སོགས་རྒྱ་སྐད་བཀོལ་ས། རྒྱ་ཡིག་སྤྱོད་ས་སོགས་ཧ་ཅང་གིས་ཁོར་ཡུག་བསྐྲུན་ཡོད། ཕྱི་རྒྱལ་ལ་སྐྱེས་པའི་རྒྱ་རིགས་རྒྱ་སྐད་མི་ཤེས་མཁན་ནི་ནམ་མཁའི་མེ་ཏོག་ལྟ་བུ་ཡིན།
བོད་པ་ནི་རིགས་རྒྱུད་སྤེལ་བ་ལ་རྗེས་ལུས་ཡིན་པ་མ་ཟད་ཅུང་ཟད་ཡོད་པ་དག་ཀྱང་མིང་ཙམ་ཡིན། བོད་སྐད་ནི་མི་ཤོད། བོད་ཡིག་ནི་མི་ཤེས། བོད་ཀྱི་སྐད་ཡིག་གི་ཚོང་ར་དང་ཁོར་ཡུག་ནི་བསྐྲུན་ཐུབ་མེད། བོད་ཡིག་བོད་སྐད་ཅུང་ཟད་ཡག་ཙམ་ཡོད་པའི་གྲྭ་ལོག་དང་བོད་ནས་འབྱོར་བ་དག་གིས་སེམས་ཤུགས་ཆེ་ཙམ་ཁུར་ནས་ཧུར་ཐག་བྱ་མོད། དུས་རབས་དང་འཚམས་པའི་ཆེད་ལས་སྦྱོང་རྩལ་མེད་པས་བསླབས་ཀྱང་གྲུབ་འབྲས་ཐོན་མི་ཐུབ་པ། དགེ་རྒན་རྣམས་ནི་ནུབ་ཕྱོགས་པས་ལོ་མང་ཉམས་ཞིབ་བྱས་པའི་དགེ་རྒན་གསབ་སྦྱོང་སོགས་ལ་ཕྱིན་ཏེ་སློབ་སྦྱོང་ནི་མི་བྱ། སློབ་ཐབས་ནི་མེད།
དུས་རབས་རྙིང་བའི་སྐབས་ཀྱི་ཆེས་གྲུབ་འབྲས་ཐོན་དཀའ་བའི་སློབ་ཐབས་གཅིག་པུ་བེད་སྤྱོད་བྱ་བ། དགེ་རྒན་གྱིས་སྐད་ཆ་མང་པོ་བཤད་པ། མང་པོ་ཁྲིད་པ། སློབ་ཕྲུག་གིས་ཉན་དགོས་པ། དེ་ལས་འདས་པའི་ཐབས་རྩལ་གཞན་མེད་པ། སློབ་ཕྲུག་དྲི་བ་གཏོང་མཁན་བྱུང་ཚེ་དེ་ལ་ཁྲོ་བ། ད་དུང་ལན་འདེབས་བྱེད་མི་ཤེས་ཚེ་རྡུང་བ། དགེ་རྒན་ལག་དེབ་མེད་པ། སློབ་ཚན་གྲ་སྒྲིག་མེད་པ། འདི་དག་གིས་མིག་སྔར་གྱི་གནས་བབ་དེ་དག་བྱུང་།
ཤེས་པ་ཁ་ཤས་ཡོད།
ནང་ཁུལ་ལ་ཕྱོགས་རེས་བྱེད་ཤེས།
གྲུབ་མཐའ་ལ་འཐེན་ཁྱེར་བྱེད་ཤེས།
བླ་མ་ལ་རྨོངས་དད་བྱེད་ཤེས།
ད་དུང་ཆབ་སྲིད་ལའང་རྨོངས་དད་བྱ་བ་ཡིན།
མི་ཤེས་པ།
ཤེས་ཡོན་སྦྱོང་མི་ཤེས།
རིགས་རྒྱུད་སྤེལ་མི་ཤེས།
འཐབ་རྩོད་རྒྱག་མི་ཤེས།
རིག་གཞུང་སྐྱོབ་མི་ཤེས།
ཚོང་ལས་གཉེར་མི་ཤེས།
དེ་དག་ལས་འདས་པ་དག་ནི་དེ་ལས་ཀྱང་ངོ་།།
3/31/2016 ཉིན་གཅིག་གི་ལས་ཀ་ཡོངས་སུ་ཚར་རྗེས་ཕྱིར་ནང་དུ་ལོག་ཁར་ལམ་བར་ནས་མེ་འཁོར་དུ་བྲིས།
ད་བྱས་ན་ཚང་མ་ཤེས་མཁན་དེ་རང་མ་གཏོགས་མེད་པ་འདྲ་་་་་་ཧཧཧཧཧཧཧ་་་་་་་ངོ་མ་བགད་ཡ་་་་་་
མཆན་སྤེལ་བར་དགའ་ཡོད ། ཏྲེ་ཧོར་པ་ལགས།
ཡག་པོ་བྲིས་འདུག འདྲེ་མིང་བཀོལ་པ་ལས་མིང་དངོས་བཀོལ་ན་རིན་ཐང་ཆེན་པོ་ཡོད། གཅིག་ནས་ཆ་འཇོག་བྱེད་མི་སླེབས་ཡོང་། གཉིས་ནས་ལོ་རྒྱུས་སྒང་དུ་ལྷག་ཐུབ། ཡིན་ནའི། དབུ་མའི་ལམ་ལ་ཞེད་ཀྱི་ཡོད་ན་གནས་ཚུལ་ཁག་ཁག་རེད་དེ། མགོ་འཕྱི་ཁུང་ནང་བཅུག་ནས་སྡིག་དམོད་གནང་ཤག
ཀརྨ་བློ་གསལ་ལགས་ཀྱིས་དགོངས་འཆར་གནང་བ་བཀའ་དྲིན་ཆེ ། ང་ཡུབ་མཁན་ཞིག་མིན། ང་ལ་དོན་གྱིས་དོ་སྣང་བསྤྲད་མཁན་ཚོས་ང་ང་ཤེས་པ་ཡིན། ངོ་དེབ་དང་དྲྭ་མིང་སྐད་འཕྲིན་ད་དུང་སྒེར་དེབ་སོགས་ཚང་མར་འདྲེ་གླེན་པ་བཀོལ་ཡོད ། སྙུག་མིང་ལྟར་དུ་བཀོལ་བ་ལས་གསང་མང་ལྟར་དུ་བཀོལ་མེད ། ངོ་དེབ་སོགས་ན་པར་ཡང་མང་དུ་བཞག་ཡོད ། འོན་ཀྱང་། བཀའ་དྲིན་ཆེ ། ངས་བསམ་བློ་གཏོང་ཆོག
ལས་ཀའི་དཀའ་སྣང་གི་སྡུག་སྐད་འདིའི་ནང་ན་རང་གི་མི་རིགས། ཡུལ་སྲོལ། ཆོས་ལུགས་སོགས་གང་ལ་གུས་ཞབས་མེད་པའི་སྐད་ཆ་བཤད་འདུག་པས།
འདྲེ་ཁྱོད་ལ་དགྱ་མོ་ཞིག་གམ། ཡང་ན་ཧྭེ་མོ་ཞིག་མ་གཏོགས་ལག་ལ་མི་ཐོབ་པར་ཤོག།
བོད་པ་ཡིན་ཟེར་མ་འདུག། ཁྱོད་ལ་དེ་འདྲ་ལབ་ཆོག་པའི་བོད་སེམས་མི་འདུག།
གནམ་ལགས་ཀྱིས་མཆན་བདབས་པ་ལ་དགའ་ཡོད ། ང་སྒེར་གྱི་གནས་ཚུལ་ལ་དེ་ཙམ་ཇུས་གཏོགས་བྱེད་རྒྱུ་མ་བྱུང་ན་ཡང་གལ་མི་འདུག གཙོ་བོ་ངས་ག་རེ་གླེང་འདུག་མིན་གྱི་སྟེང་ནས་འགྲིག་ཡོད་མིན་དང་བསམ་ཚུལ་བཤད་ཐུབ་ན་ཕྱོགས་ཉིས་ཆར་ཕན་ཐོག་ཆེ ། དེ་མིན་ཁྱོད་ཀྱི་ཁ་དང་ངའི་སྣ་གླེང་ནས་བསྡད་ན་དུས་ཚོད་འཕྲོ་བརླགས་མ་རེད་དམ། གྲོགས།