ལྟས་ངན་པ་གྱ་གཅིག

རྒྱ་སྟོན་བུ་དར་རྒྱས།

མཁའ་དབྱིངས་སུ་སྤྲིན་ནག་ཐིབས་པས།
ཕུགས་འདུན་གྱི་ཁ་ཕྱོགས་མི་གསལ་བའི་དུས་སྐབས།
མི་སེམས་གུ་དོག་ལ་དྲང་བདེན་ངོ་མི་ཤེས།
་་་གུ་ཡངས་ནི་ཇི་ལྟར་ཡོང་།
དེ་བས་ན “བཟོད་སྒོམ” ནི་ཆོས་ཚིག་ཟབ་མོ།
“ལ་རྒྱ”་ནི་རྒྱན་ཚིག་ཉག་གཅིག
དོན་ལ་ནི་འཇིག་རྟེན་གྱི་ལྷིང་འཇགས་དཀྲོགས།
ལོག་སྤྱོད་པས་བཙན་ཐབས་བཟུང་།

མཐུན་སྒྲིལ་གྱི་གསེར་ཐག་བཅད།
དགྲ་བོ་ཡི་དགོས་འདུན་སྐོང།
མི་སེམས་ཡང་རྨས་མ་གྱུར།

ཨ་ཁ། ་་་་ མི་འདོད་པ་ཞེ་གཅིག

འགྲོ་ལམ་ལ་ན་བུན་སྟུག་པས།
ཕན་ཚུན་གྱི་ལངས་ཕྱོགས་མི་མངོན་པའི་དུས་སྐབས།
སྟོད་ཕྱོགས་མིག་ལོང་ཏེ་སྨད་ཕྱོགས་རྣ་འོན།
་་་བདེན་དོན་ནི་ཇི་ལྟར་རྟོགས།
དེ་བས་ན”རྩ་དོན”ནི་རང་དོན་འབའ་ཞིག
“ཆིག་སྒྲིལ”་ནི་ཆང་བཟིའི་གཏམ་གཅིག
དོན་ལ་ནི་གངས་ཅན་པའི་མཚན་སྙན་བརྫད།
རྗེ་འབངས་དད་དམ་ཉམས།
དཔའ་པོའི་ཞལ་ཆེམས་བསུབས།
མེས་པོའི་རུས་རྐང་དྲུད།
མི་ངན་ཁྲི་ལ་བསྐྱལ།

ཨ་ཡོ། ་་་་ མི་ལེགས་པ་ཞེ་གཅིག

བར་སྣང་ལ་ཆར་རླུང་ལྡང་བས།
བརྡ་འཕྲིན་གྱི་དྲ་ལམ་མི་ལེགས་པའི་དུས་སྐབས།
སྐབས་འཚོལ་བ་རྒྱུག་ཞིང་གསང་མྱུལ་བ་འཇབ།
་་་བབ་ལྷིང་ནི་ཇི་ལྟར་ཡོང་།
དེ་བས་ན “སྐད་འཕྲིན” ནི་དགྲ་བོའི་ཟམ་པ།
“ངོ་དེབ་” ཀྱང་ཟམ་ཆེན་ཉག་གཅིག
དོན་ལ་ནི་དགྲ་གཉེན་གྱི་གོ་ལྡོག་འཛོལ།
དཀར་ནག་གི་མདོག་ནོར།
བདེ་རྫུན་གྱི་གནས་རྨོངས།
དབྱེན་དཀྲུག་གི་ལམ་བཙལ།
འཆལ་གཏམ་གྱི་རི་བརྒལ།
ཨ་རོགས། ་་་ ལས་ངན་པ་ཞེ་གཅིག

རི་སྒང་འདིར་ཆར་ཞོད་ཆེ་བས།
མི་གཅིག་གི་དབང་འཛིན་མི་ལྕོགས་པའི་དུས་སྐབས།
ཆར་ཆུས་རི་གྲོང་གཏོར་བས་མི་རྣམས་སེམས་ངལ་ལྕི།
་་་བདེ་སྐྱིད་ཀྱང་ཇི་ལྟར་འོངས།
དེ་བས་ན “བཅའ་ཁྲིམས” ནི་སྙན་རྩོམ་འདྲ་མོ།
“འདྲ་མཉམ”ནི་ཚིག་སྦྱོར་སྙན་མོ།
དོན་ལ་ནི་རི་སྒང་འདིར་ཆུ་ལོག་གི་གོད་ཆག་བྱུང་།
མང་གཅོའི་ཀ་བ་འགྱེལ།
འབངས་མིས་གྱེན་ལངས་རྒྱབ།
བདེན་པའི་འཕྲེད་དར་འཕྱར།
འཕྲེད་ཉལ་དཔོན་ངན་ཡིབ།

ཨ་རེ། ་་་་ ལྟས་ངན་པ་གྱ་གཅིག

14/08/2021