ནམ་མཁའ་ནས།
རྒྱ་ནག་མི་དམངས་རང་དབང་གི་རྨོངས་གཉིད་ལས་སད་རྒྱུ་ཧ་ཅང་དཀའ་མོ་ཞིག་ཡིན། རྒྱ་མི་རིགས་འདི་གྲོ་ཁོག་རྒྱག་ན་དེས་ཚིམ་ནས་གཞན་གྱི་བདེ་སྡུག་ལ་དོ་སྣང་མི་བྱེད་པར་སོ་སོའི་མདུན་གྱི་ལམ་ཆུང་ནང་ཤར་བསྐྱོད་བྱེད་རྒྱུ་ལས་ཆབ་སྲིད་ཀྱི་ཕྱོགས་སུ་འགན་མེད་དུ་བསམ་ཡོད།མི་རིགས་འདི་ལྒང་བུ་བཞིན་ཅི་ཙམ་མནོན་ཐུབ་དེ་ཙམ་སྒུར་མཁན་ཞིག་ཡིན། གལ་སྲིད་གློད་པའི་ཉིན་མོ་ཡང་ལྒང་བུ་ས་ལ་བརྡབ་པ་བཞིན་འཕགས་འཚགས་ཡོད་ཚད་མཆོངས་འདོད་མཁན་ཞིག་རེད། འདི་ནི་མི་རིགས་འདིའི་རང་གཤིས་དངོས་མ་ཞིག་ཡིན་པ་སྔ་རྗེས་གང་ལ་བལྟས་ཀྱང་ཤེས་ཐུབ།དཔེར་ན་མའོ་ཡི་དུས་སུ་རྒྱལ་ཁབ་ཡོངས་རྫོགས་རིག་གནས་གསར་བརྗེ་སྐབས་སྨྱོས་ཟིན་པ་བཞིན།བུ་ཕྲུག་ཚོས་རང་གི་ཡབ་མེས་དང་ཕ་མེས་ལའཐབ་རྩོད་དང་སྡོད་གནས་སོགས་གཏོར་བཤིགས་གཏོང་པ་ལ་ཐེ་ཚོམ་དང་འཇིགས་སྣང་ཅི་ཡང་མེད།ཐ་ན་ཡབ་མེས་ཀྱི་དུར་ས་ཡང་བརྐོ་སྔོགས་བྱེད་ཐུབ་པ་མ་ཟད།དུར་ས་ནས་ཐོན་པའི་རང་གི་ཕ་མའི་རུས་པ་ཡང་འཐབ་རྩོད་བྱེད་ཐུབ།
གཉིས་པ། ཏིན་ཞོ་ཕེན་གི་དུས་སུ་དེང་རབས་ཅན་བཞི་མངོན་འགྱུར་གྱི་རྨི་ལམ་ཞིག་རྨས་སྟེ།ཚང་མ་དེའི་ཕྱོགས་སུ་འཁོར་ནས་ཞིང་ཕྱུག་སྒེར་བདག་དང་སྒེར་གཉར་ཚོང་ལས་སོགས་ཀྱི་ལྟོ་གོས་ཁོ་ན་ལ་འབད་པ་ལས་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་ལ་དོན་སྣང་བྱེད་མཁན་ཧ་ཅང་ཉུང་།༨༩ལོའི་དོན་རྐྱེན་དེ་ཏིན་དང་ཁོའི་སྲིད་བྱུས་ཀྱི་ལྡོག་ཕྱོགས་སུ་སློབ་ཕྲུག་ཚོས་ཧའོ་ཡོ་པང་ལ་མྱ་ངན་འདུ་འཛོམས་དང་འབྲེལ་དམངས་གཙོའི་ལས་འགུལ་སྤེལ། ཡིན་ཡང་སློབ་ཕྲུག་ཚོའི་དམིགས་འདུན་དེ་ལམ་སློང་མ་བྱུང་བར་དྲག་དམག་གིས་དྲག་གནོན་བྱས་ཏེ་ཁྲག་དྲི་འཛམ་གླིང་ལ་ཁྱབ།སློབ་ཕྲུག་ཚོའི་ཕ་མའི་སེམས་དང་རུས་གསེང་དུ་ད་དུང་ན་ཟུག་ཆེ།འོན་ཀྱང་ལོ་ངོ་ཉི་ཤུའི་རྗེས་སུ་རྒྱ་ནག་མི་དམངས་དུང་ཕྱུར་༡༣གྱི་སེམས་ནང་ཕལ་ཆེར་བརྗེད་ཡོད།
གསུམ་པ།
དེང་སང་རྒྱ་ནག་མི་དམངས་ཚང་མ་དཔལ་འབྱོར་འགྲན་བསྡུར་དང་ལྐོག་ཟ་རུལ་སུངས་ནང་དུ་འཁོར་ནས་སྨྲ་བརྗོད་རང་དབང་དང་མིའི་ཐོབ་ཐང་རྩོད་ལེན་བྱེད་མཁན་ཧ་ཅང་ཉུང་།དཔལ་འབྱོར་འགྲན་བསྡུར་གྱི་འགོས་ནད་དང་དབུལ་ཕྱུག་ཁྱད་པར་གྱིས་ན་ཟུག་འདིས་རྒྱ་ནག་གི་སྲིད་གཞུང་མགོ་རྟིང་ལོག་པའི་རེ་བ་ཆེ།༢༠༡༡ལོར་དབུལ་ཕྱུག་ཁྱད་པར་གྱིས་དབང་ཤུགས་ལ་མ་བཟོད་པར་སློབ་ཕྲུག་གསོད་པ་དང་འགས་གཏོར་བྱུང་བ་མ་གཏོགས་ཆབ་སྲིད་ཀྱི་རང་དབང་མེད་པ་ལ་ངོ་རྒོལ་བྱེད་མཁན་ཧ་ཅང་ཉུང་།རྒྱ་ནག་མི་རིགས་འདིའི་སེམས་གཤིས་ཁོ་རང་དངུལ་ཡོད་ན་ཅི་ཞིག་བྱེད་འདོད་ཀྱང་བྱེད་ཐུབ་པའི་བསམ་བློ་འདི་ཤུགས་ཆེ། འཛམ་གླིང་གི་ཆབ་སྲིད་པ་ཚོས་ཀྱང་རྒྱ་ནག་མི་རིགས་ཀྱི་སེམས་གཤིས་ལ་འབྲེལ་འདྲིས་དང་འདིའི་གཤིས་ཀ་མ་ཤེས་བས་རྐྱེན་གྱིས་རྒྱ་ནག་འཛམ་གླིང་གི་ཁྲོམ་ར་བཅུགས།དེང་སང་རྒྱ་ནག་དཔལ་འབྱོར་གྱི་སྟོབས་ཆེ་རུ་ཕྱིན་དུས་ཨ་རི་དང་ཡོ་རུབ་ཀྱིས་གང་བཤད་པ་ཉན་རྒྱུ་ཕར་ཞོག་ཚུར་འཛམ་གླིང་ལ་བཀོད་འདོམས་བྱེད་འདོད་པའི་སྤོབས་པ་སྐྱེས་ཡོད་པ་མ་ཟད།ཨ་རི་དང་ཡོ་རུབ་གཉིས་ཀྱིས་ཀྱང་བསྟུན་གང་ཐུབ་བྱེད་ཀྱི་ཡོད། གལ་སྲིད་ད་རུང་ཡང་རྒྱ་ནག་འདི་དཔལ་འབྱོར་གྱི་དཀའ་ངལ་ནང་ཡོད་ཚེ་ནུབ་ཕྱོགས་ལ་བསྟུན་གང་ཐུབ་བྱེད་ངེས་ཡིན།
ད་ནི་རྒྱ་ནག་གི་དབུལ་བོ་དང་ཕྱུག་པོའི་བར་གྱི་སེམས་ཀྱི་ན་ཚའི་མེ་ལྕེ་དང་དབང་ཆེན་གྱིས་དབང་མེད་ལག་ནས་ལྐོག་ཟ་རུལ་སུངས་ཀྱི་ན་ཟུག་གི་མེ་ལྕེ་འབར་ཉེན་ཆེ་བས་རྒྱ་ནག་གི་སྲིད་གཞུང་མགོ་རྟིང་ལོག་སྲིད་པ་ཞིག་རེད། དེ་མིན་ཁྱོད་ཚོས་གཟིགས་དང་ཨ་རི་དང་ཡོ་རུབ་གང་དུ་ཡོད་པའི་རྒྱ་ནག་མི་རིགས་འདིའི་རང་ཉིད་ལུང་པ་གང་དུ་ཡོད་པའི་མི་རིགས་དང་ལུང་པ་དེའི་སྐད་རིགས་མི་སྦྱངས་ལ་ཐ་ན་ལུང་པ་ནང་གི་བརྙན་འཕྲིན་ཡང་མི་བལྟ་བར་རྒྱ་ནང་གི་བརྙན་འཕྲིན་ཁོ་ན་བལྟ་གི་ཡོད། རྒྱ་ནག་གི་བརྙན་འཕྲིན་ནི་ནམ་ཡིན་ཡང་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་བཤད་པ་ཞིག་ག་ལ་ཡོད། དེའི་རྐྱེན་ཆབ་སྲིད་ཀྱི་རྨོངས་གཉིད་ལས་སད་ཐུབ་རྒྱུ་ཧ་ཅང་དཀའ་མོ་ཞིག་རེད། དཔེར་ན་ང་ཚོ་བོད་ནས་ཡོང་བའི་གསར་འབྱོར་ཡོངས་ཀྱིས་དྲང་མོ་བཤད་ན་བོད་ན་ཡོད་དུས་ད་ལྟ་བཞིན་དུ་རྒྱ་ནག་གིཆབ་སྲིད་ཀྱི་རྫུན་གྱི་གོང་བུ་ཆ་ཚང་ང་ཚོས་ཤེས་ཐུབ་ཀྱི་མེད།ང་ཚོ་ཕྱི་ལོགས་སུ་འཁྱམས་པ་ནས་བཟུང་གནས་ཚུལ་ངོ་མ་དག་ཤེས་ཐུབ་པ་འདི་ཕྱོགས་གཞན་གྱི་གནས་ཚུལ་བསྒྲགས་པ་དང་སྐད་རིགས་གཞན་གྱི་དེབ་ཐོག་ནས་ཤེས་ཡོད།
མཐར་ཐུག་རེ་བ་ནི།རྒྱ་ནག་མི་དམངས་ཀྱི་སེམས་སུ་ཡོད་པའི་དབུལ་ཕྱུག་གི་ན་ཚ་དང་གོ་གནས་ཡོད་པའི་དབང་ཆེན་ཚོས་དབང་མེད་ཚོར་དབང་ཤུགས་ཚད་པའི་ན་ཚའི་མེ་ལྕེ་འདི་འབར་དུ་འཇུག་རྒྱུ་དང་བཙན་བྱོལ་གཞུང་གི་ཆབ་སྲིད་ཀྱི་ཁ་ཕྱོགས་ལ་འགྱུར་བ་གཏོང་དགོས་བ།བོད་མི་ཚོས་ནུབ་ཕྱོགས་ཨ་རི་དང་ཡོ་རུབ་སོགས་སུ་རེ་བ་ཁོ་ན་བྱེད་རྒྱུ་འདི་མཚམས་འཇོགས་དགོས་ཀྱི་འདུག དོན་གྱི་སྙིང་པོ་བཤད་ན་ཁྱིམ་ཚང་ཞིག་དང་རྒྱལ་ཁབ་ཞིག་གི་འགྲོ་ལུགས་གཅིག་པ་རེད་ལབ་ན་འགྲིགས། འདིའི་རྒྱུ་མཚན་ནི་གལ་སྲིད་ཁྱིམ་ཚང་དབུལ་བོ་ཉམ་ཆུང་ཞིག་གི་འཚོ་བ་ཇེ་ལེགས་སུ་འགྲོ་དགོས་ན་ཁྱིམ་ཚང་རང་གི་ནང་མི་ཚོས་འབད་བརྩོན་བྱེད་རྒྱུ་ཞིག་ལས་ཁྱིམ་མཚེ་དང་།སྡེ་བ་དེས་ཁ་ནས་སྙིང་རྗེ་ཟེར་བ་མ་གཏོགས་སུས་ཀྱང་ལག་ལེན་དངོས་ཀྱི་ཐོག་ནས་རོགས་པ་བྱེད་མཁན་སུ་ཡང་མེད་པ་བཞིན།ཐ་ན་ཁྱིམ་ཚང་ཉམ་ཆུང་དེར་འགལ་ཟླར་གྱུར་བའི་ཁྱིམ་ཚང་ཕྱུག་པོ་ཞིག་ཡོད་ཚེ་ཁོ་གཉིས་བར་འདུམས་འགྲིག་བྱེད་པའི་མི་དེ་ཚོས་ཀྱང་ཁྱིམ་ཚང་ཕྱུག་པོ་དེར་བདེན་ཁ་སྤྲོད་པ་ལྟ་བུ་ཞིག་རེད།ཁྱིམ་ཚང་ཉམ་ཆུང་དེར་བདེན་པ་ཡོད་ཀྱང་ཁོ་ལ་དཔལ་འབྱོར་གྱི་ནུས་ཤུགས་མེད་པས་དྲང་བདེན་གྱི་སྐད་ཆ་བཤད་མཁན་ཉུང་།དེ་བཞིན་འཛམ་གླིང་རྒྱལ་ཁབ་དག་ཀྱང་རྒྱ་ནག་གི་དཔལ་འབྱོར་ལ་རེ་བ་རྒྱགས་དགོས་སྟབས་ཁ་ཞེ་གཉིས་མེད་ཀྱིས་བོད་ལ་རྒྱབ་སྐྱོར་བྱེད་མཁན་མེད།དེ་མིན་འཛམ་གླིང་སྟེང་ན་ཧི་མ་ལ་ཡ་གོ་མ་མྱོང་བའི་རྒྱལ་ཁབ་གང་རེད།འཛམ་གླིང་གི་མཐོ་སྒང་འདིའི་བདག་པོ་བོད་པ་ཡིན་པ་མ་ཤེས་མཁན་རྒྱབ་ཁབ་གང་རེད། ཡིན་ཡང་ཐབས་སྐྱོ་བ་ཞིག་ལ་བོད་ནང་ནས་བཙན་བྱོལ་གཞུང་ལ་རེ་བ་རྒྱབས་བོད་ཕྱི་ནས་ནུབ་ཕྱོགས་སུ་རེ་བ་རྒྱབས་སྟེ་དུས་རབས་ཕྱེད་ཀ་འདས།ཡིན་ཡང་བོད་ནང་གི་དཀའ་སྡུག་ནི་སྔར་བཞིན་མེ་མདའ་འོག་དུ་ལུས་ཡོད།དུས་རབ་ཉེར་གཅིག་ནང་བོད་ཕྱི་ནང་ཚང་མ་གཉིད་སད་ནས་བོད་རེ་བས་འཕོངས་བ་ཤེས་སྟེ་རང་སྲོག་གཏོང་གི་ཡོད་པ་ཡང་། ཕྱོགས་གཅིག་ནས་བློ་ཕམ་ཞིང་ཡིད་སྐྱོ་བ་ཞིག་རེད།ཕྱོགས་གཞན་ཞིག་ནས་རང་ཁྱིམ་འདི་རང་གི་མི་ཡི་སྙིང་སྟོབས་ཀྱིས་སྐྱོངས་དགོས་ཤེས་འདུག་པས་སྤོབས་པ་རབ་ཏུ་སྐྱེས།
རྒྱ་ནག་ལ་དམངས་གཙོ་དང་རང་དབང་བྱུང་ན་བོད་ལའང་དེ་གའི་འགྲིག །རྒྱ་ཆེ་ས་ནས་བལྟས་ན་བོད་རྒྱ་ནག་དང་ཁ་བྲལ་རྒྱུ་དཀའ་མོ་རེད་ལ། རྒྱ་ནག་བོད་དང་ཁ་བྲལ་རྒྱུ་ཡང་དཀའ་མོ་རེད། བོད་ལ་རང་དབང་ཆ་ཚང་བ་ཞིག་མ་བྱུང་བར་དུ་བོད་ཀྱི་གནད་དོན་ཐག་གཅོད་བྱེད་རྒྱུ་དེ་བས་ཀྱང་དཀའ་མོ་རེད། དོན་དམ་པའི་བོད་ཀྱི་བདག་དབང་དེ་རྒྱ་ནག་ལ་ཡོད་པ་མ་རེད། བོད་པ་ལ་ཡོད་པ་རེད། ཡིན་ཡང་་་་་་་་་་་་་་།
རྟོགས་སད་དང་ལྟོགས་སད།