ཕྱི་ལོ་༢༠༡༡ལོའི་ཟླ་༩་པའི་ཚེས་༢༩་ཉིན།
རྒྱ་གར་རྒྱལ་ཡོངས་ནང་གི་ཆེས་སྙན་གྲགས་ཅན་གྱི་ལྡི་ལི་གཙུག་ལག་སློབ་གྲྭ་ཆེན་མོའི་ཡན་ལག་བུད་མེད་མཐོ་སློབ་ལད་ཌེ་ཞེ་རེ་རམ(LadyShri Ram )ནང་ལྡི་ལི་བོད་རང་བཙན་སློབ་ཕྲུག་ཚོགས་པའི་བཀོད་སྒྲིག་འོག་“བོད་ཀྱི་འདུ་འཛོམས་”་ཞེས་པའི་བོད་དོན་དྲིལ་བསྒྲགས་ཀྱི་ལས་འགུལ་ཞིག་སྤེལ་ཡོད་ལ། ལས་འགུལ་འདུ་འཛོམས་ཀྱི་ཐོག་མར་རྒྱ་གར་གཞོན་སྐྱེས་ཚོར་བོད་ཀྱི་སྲོལ་རྒྱུན་རིག་གཞུང་དང་འབྲེལ་བའི་བཀྲ་ཤིས་ཞོལ་འབག་ངོ་སྤྲོད་གནང་བ་མ་ཟད། ལྡི་ལི་བོད་རང་བཙན་སློབ་ཕྲུག་ཚོགས་པའི་རིག་གཞུང་ཚན་ཁག་གིས་དངོས་སུ་བོད་ཀྱི་གནའ་བོའི་རིག་གཞུང་གི་ཆ་ཤས་གང་དེ་འཁྲབ་སྟོན་གནང་བ་་ལ་ཚོགས་ཁང་ནང་འཛོམས་པའི་རྒྱ་གར་སློབ་ཕྲུག་ཡོངས་ཀྱིས་དགའ་བའི་ཐེལ་མོ་དྲག་ཏུ་བརྡེབས་སོང་ལ། དེ་ནས་རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་འགན་འཛིན་རྡོ་རྗེ་ཚེ་བརྟན་ལགས་ཀྱིས་རྒྱ་གར་གྱི་མི་རབས་གསར་པ་ཚོར་བོད་ཀྱི་དངོས་ཡོད་གནས་ཚུལ་གོ་རྟོགས་སྤེལ་ཆེད་དང་ཁོང་ཚོའི་ཁོངས་ནས་བོད་དོན་ལ་གདུང་སེམས་མཉམ་བསྐྱེད་དང་ཁ་ཞེ་གཉིས་མེད་ཀྱི་རྒྱབ་སྐྱོར་ཡོང་བར་སྤྱིར་བོད་ཀྱི་གནའ་བོའི་ལོ་རྒྱུས་དང་མི་ལོ་དྲུག་ཅུའི་རིང་གི་རྒྱ་ནག་གི་དྲག་གནོན། ལྷག་པར་བོད་ནང་གི་ད་ལྟའི་ཛ་དྲག་གི་གནས་བབ་སྐོར་ལ་ངོ་སྤྲོད་དང་འགྲེལ་བཤད་ཞིབ་རྒྱས་བསྐྱོན་པར། རྒྱ་གར་སློབ་ཕྲུག་ཚོའི་ངོས་ནས་རང་ཉིད་ཀྱི་སེམས་སུ་གནས་པའི་བོད་དོན་དང་འབྲེལ་བའི་དྭོགས་གཞི་ཁག་ཕྱི་རུ་བཏོན་ནས་དྲི་བ་འདྲ་མིན་དང་བསམ་ཚུལ། ནང་སྒོས་སུ་ཕན་ཚུན་དབར་ལ་སེམས་ཐག་ཉེ་པོའི་སྒོ་ནས་གྲོས་བསྡུར་ལྷུག་པོར་བྱུང་།
དེ་ཡང་རྒྱ་གར་མི་སེར་ཡིན་པའི་ལྡི་ལི་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་ལ་དྭགས་པ་རིག་འཛིན་དཔལ་མགོན་ལགས་ཀྱིས “་ད་ནི་ང་ཚོ་ཁྲོམ་གཞུང་ལ་བཏོན་ནས་ངོ་རྒོལ་སྐད་འབོད་བྱེད་པ་ལས་ཀྱང་ཤེས་ཡོན་གྱི་བརྒྱུད་ལམ་འདྲ་མིན་བརྒྱུད་ནས་རྒྱ་གར་གྱི་མི་རབས་གསར་པ་ཚོར་བོད་ཀྱི་གནས་བབ་སྐོར་ལ་གོ་རྟོགས་སྤེལ་བའི་དུས་ལ་བབ་འདུག་ལ། ཕྱོགས་གཞན་ཞིག་ནས་ཁོང་ཚོར་ཡང་བོདདོན་གྱིས་རྒྱ་གར་རྒྱལ་ཁབ་ཀྱི་བདེ་འཇགས་སྐོར་ལ་ཐེབས་པའི་ཤུགས་རྐྱེན་ཁག་ཧ་གོ་རུ་འཇུག་རྒྱུ་ནི་བོད་མི་ཡོངས་ཀྱི་སྐབས་བབ་ཀྱི་ལས་དོན་གལ་ཆེ་ཤོས་དེ་ཆགས་འདུག”ཅེས་བརྗོད་སོང་།
བོད་རང་བཙན་སློབ་ཕྲུག་ཚོགས་པས་ལས་འགུལ་གྱི་ཁ་ཕྱོགས་མི་རབས་གསར་པའི་གཞོན་སྐྱེས་ཚོར་གཏོད་དགོས་པའི་རྒྱུ་མཚན་གཙོ་བོ་ནི་ང་ཚོས་མི་རབས་གསར་པ་ཚོ་ནི་སྤྱི་ཚོགས་གང་ཞིག་ཁ་ལོ་བསྒྱུར་བའི་གཞི་རྩའི་ནུས་ཤུགས་དང་ཐོན་ཁུངས་གསར་བ་ཞིག་ལ་ངོས་འཛིན་བྱེད་ཀྱི་ཡོད་ལ། ཤེས་ཡོན་སྡེ་ཚན་ཁོངས་ཀྱི་མི་རབས་གསར་བ་ཚོའི་ལྷག་བསམ་ཟོལ་མེད་ཀྱི་རྒྱབ་སྐྱོར་ལ་བརྟེན་ནས་འཛམ་གླིང་ནང་གི་དྲང་བདེན་མ་ཡིན་པའི་ཆབ་སྲིད་ཀྱི་དབང་སྒྱུར་ཡོད་ཚད་བདེན་པའི་ཐབས་ལམ་གྱི་ནུས་སྟོབས་འོག་ནས་མགོ་རྟིང་བསློག་ཐུབ་པར་ཡིད་ཆེས་བྱེད་ཀྱི་ཡོད། རེ་བ་དང་ཡིད་ཆེས་དེའི་ངོས་ནས་ལྡི་ལི་བོད་རང་བཙན་སློབ་ཕྲུག་ཚོགས་པའི་ཚོགས་མི་ཡོངས་ཀྱིས་སློབ་ཞོར་གྱི་ཆུ་ཚོད་ཡོངས་རྫོགས་བེད་སྤྱད་དེ་ལྡི་ལི་གཙུག་ལག་སློབ་གྲྭ་ཆེན་མོའི་ཡན་ལག་མཐོ་སློབ་འདྲ་མིན་གྱི་འཛིན་སྐྱོང་སྡེ་ཚན་ཁག་གི་གནད་ཡོད་མི་སྣ་ཚོ་དང་མཉམ་དུ་འབྲེལ་བ་བཙུགས་ནས་ལོ་རེར་ཁོང་ཚོའི་རྒྱབ་སྐྱོར་ལ་བརྟེན་ནས་རྒྱ་གར་དང་བོད་ཀྱི་མཁས་དབང་ཁག་མཐོ་སློབ་འདྲ་མིན་ནང་གདན་འདྲེན་ཞུས་ནས་བོད་ཀྱི་ཆབ་སྲིད་ལོ་རྒྱུས་སྐོར་ལ་བགྲོ་གླེང་བཀོད་སྒྲིག་དང་། བོད་ཀྱི་རང་བཙན་འཐབ་རྩོད་དང་འབྲེལ་བའི་གློག་བརྙན་གཟིགས་འབུལ། བོད་ཀྱི་སྲོལ་རྒྱུན་གཞས་སྣ་གཟིགས་འབུལ། བོད་དོན་དང་འབྲེལ་བའི་ཕྱག་དེབ་དང་ཡིག་ཆ་གལ་ཆེན་ཁག་རིན་མེད་ཐོག་འགྲེམས་སྤེལ་སོགས་བྱས་ནས་རྒྱ་གར་གྱི་མི་རབས་གསར་པ་ཚོའི་ཁོངས་ནས་བོད་དོན་རྒྱབ་སྐྱོར་བ་ཙམ་མ་ཡིན་པར་རྒྱ་གར་མི་རིགས་ཚོའི་ཁོངས་ནས་བོད་དོན་འཐབ་རྩོད་ཀྱི་སྣེ་ཁྲིད་མི་སྣ་གང་མང་བསྐྱེད་བསྲིང་བྱེད་པར་འབད་པ་བྱེད་ཀྱི་ཡོད།
དེ་ཡང་དེ་རིང་གི“བོད་ཀྱི་འདུ་འཛོམས་”ཞེས་པའི་ལས་འགུལ་གྱི་གལ་ཆེའི་རང་བཞིན་དང་དམིགས་ཡུལ་སྐོར་ལ་ལྡི་ལི་བོད་རང་བཙན་སློབ་ཕྲུག་ཚོགས་པའི་གཞི་རིམ་ལས་འགུལ་གྱི་འབྲེལ་མཐུད་པ་ཚེ་རིང་བཀྲ་ཤིས་ལགས་ཀྱིས་“ང་ཚོས་རྒྱ་གར་གྱི་རྒྱལ་ས་ལྡི་ལི་ནང་གིོ་ལས་འགུལ་ཕལ་ཆེ་བ་ཤེས་ཡོན་གྱི་བསྟི་གནས་དང་མཐོ་སློབ་ཁག་ནང་སྤེལ་བ་ལ་ཡང་འཆར་གཞི་རྒྱ་ཆེན་པོ་ཞིག་དང་དམིགས་ཡུལ་རྒྱང་རིང་པོ་ཞིག་བཟུང་ཡོད། གང་ཡིན་ཞེ་ན་ད་ལྟའི་རྒྱ་གར་གྱི་མི་རབས་གསར་པ་ཚོ་ནི་མ་འོངས་པའི་རྒྱ་གར་རྒྱལ་ཁབ་ཀྱི་ཆབ་སྲིད་ཀྱི་གནད་དོན་ཐག་གཅོད་བྱེད་མཁན་དང་གཞུང་གི་སྲིད་བྱུས་ཁག་གཏན་འབེབས་གནང་མཁན་གྱི་དཔུང་སྡེ་ཞིག་ཡིན་པས། ང་ཚོས་ད་ལྟ་ནས་ཁོ་ཚོར་བོད་དོན་སྐོར་ལ་གོ་རྟོགས་ཡག་པོ་སྤེལ་ཐུབ་པ་ཡིན་ན་ཁོང་ཚོས་མ་འོངས་པར་ཆུང་ས་ནས་རྒྱ་གར་ནང་གི་བོད་མི་སྐྱབས་བཅོལ་བའི་དཀའ་ངལ་ཁག་ལ་་དངོས་ཤུགས་བརྒྱུད་གསུམ་ནས་རྒྱབ་སྐྱོར་བྱེད་ངེས་ལ། ཆེ་ས་ནས་ད་ལྟའི་བོད་རྒྱ་གཉིས་དབར་གྱི་དཀའ་རྙོག་སེལ་བར་ཕྱོགས་ཡོངས་ནས་ནུས་པ་བསྐྱོན་ངེས་རེད”་ཅེས་བརྗོད་སོེང་།
དེ་རིང་གི་ལས་འགུལ་འདི་བརྒྱུད་ནས་ང་ཚོས་རྒྱ་གར་གྱི་སློབ་ཕྲུག་ཚོའི་ཁོངས་ནས་བོད་དོན་སྐོར་ལ་དོ་སྣང་བྱེད་མཁན་གྱི་སློབ་ཕྲུག་གང་མང་ཞིག་བསྡུ་རུབ་བྱེད་ཐུབ་ཡོད་ལ། དེ་ཡང་ལས་འགུལ་གྱི་མཐའ་མར་གཙོ་བོ་བོད་ཨ་མདོ་རྔ་པའི་ནང་གི་ད་ལྟའི་ཛ་དྲག་གི་གནས་བབ་ཞི་འཇགས་ཡོང་ཆེད་དང་། བོད་ཀྱི་ཆབ་སྲིད་བཙོན་པ་བློ་བཟང་། གྲྭ་འཇིགས་མེད་རྒྱ་མཚོ་སོགས་གློད་གྲོལ་ཡོང་ཆེད་ས་ཡིག་བསྡུ་བྱས་ནས་ལས་འགུལ་དེ་རྒྱལ་ཁའི་ངང་མཇུག་བསྒྲིལ་བ་ཡིན། ང་ཚོའི་དེ་རིང་གི་ལས་འགུལ་བསྒྲིལ་ཟིན་པ་རེད་མོད། ང་ཚོས་ཁོང་ཚོར་ཤེས་ཡོན་གྱི་འབྲེལ་ལམ་ཡག་པོ་བཙུགས་ཐུབ་ཡོད་པའི་རྒྱུ་མཚན་གྱིས། ང་ཚོའི་དབར་གྱི་བོད་དོན་དང་འབྲེལ་པའི་ཆབ་སྲིད་ཀྱི་སྡིངས་ཆ་མཇུག་བསྒྲིལ་མེད། དེ་ཡང་ སང་ཉིན་ནས་བཟུང་སྟེ་ང་ཚོས་དེང་རབས་ཀྱི་དྲ་ལམ་བརྒྱུད་ནས་ཁོང་ཚོ་དང་མཉམ་དུ་བོད་དོན་དྲིལ་བསྒྲགས་ཀྱི་ལས་འགུལ་གཞན་ཞིག་དབུ་འཛུགས་བྱ་ངེས་ཡིན།
བོད་རང་བཙན་སློབ་ཕྲུག་ཚོགས་པས་བོད་མི་ཚོའི་རང་བཙན་འཐབ་རྩོད་ཀྱི་ལས་འགུལ་ལ་གདུང་སེམས་མཉམ་བསྐྱེད་ཀྱི་ཐོག་ནས་ལས་འགུལ་འདྲ་མིན་རྩོམ་གྱིན་ཡོད་ལ། ང་ཚོ་ནི་ལས་འགུལ་པ་དང་གཞོན་སྐྱེས་མི་སྣས་གྲུབ་པའི་རྒྱལ་སྤྱིའི་རང་བཞིན་གྱི་ཚོགས་པ་ཞིག་ཡིན་ལ། ཤེས་ཡོན་དང་། འཚེ་མེད་ཞི་བའི་ལས་འགུལ། གཞི་རིམ་གྱི་བཀོད་སྒྲིག་ལ་སོགས་པའི་སྦྱོང་བརྡར་ཁག་བརྒྱུད་ནས་བོད་མིའི་གཞི་རྩའི་ཐོབ་ཐང་དང་ཆབ་སྲིད་ཀྱི་རང་དབང་རྩོད་ལེན་བྱེད་ཀྱིན་ཡོད་ལ། ང་ཚོའི་ལས་གཞི་ཁག་བརྒྱུད་ནས་གཞོན་སྐྱེས་ཚོར་འགོ་ཁྲིད་ཀྱི་སྦྱོང་བརྡར་སྤྲད་དེ་ཁོང་ཚོས་མ་འོངས་པར་འཛམ་གླིང་ནང་གི་དྲང་བདེན་གྱི་འཐབ་རྩོད་དང་ལས་འགུལ་ཁག་གི་ཁྲོད་དུ་སྣེ་ཁྲིད་བྱེད་ཐུབ་པའི་ནུས་པ་བསྐྱེད་བསྲིང་བྱེད་རྒྱུ་དེ་ཡིན།