བློ་བཟང་སྨྲ་མཁས།
ཟླ་མེད་རྣམ་དཔྱོད་གསེར་གྱི་ལྡེ་མིག་གིས།།
འཕགས་བོད་རྩ་འགྲེལ་མཛོད་ཀྱི་སྒོ་ཕྱེ་ནས།།
བཤད་སྒྲུབ་ཆོས་ཀྱིས་འགྲོ་རྣམས་ཚིམས་མཛད་པའི།།
རྗེ་བཙུན་བློ་བཟང་དགེ་འདུན་སྤྱི་བོས་མཆོད།།
དེ་ཡང་ལུང་རིགས་སྨྲ་བའི་དབང་ཕྱུག་ལྷ་རམས་པ་རྗེ་བློ་བཟང་དགེ་འདུན་མཆོག་ནི་རབ་བྱུང་བཅུ་དྲུག་པའི་ཤིང་འབྲུག་སྟེ་ཕྱི་ལོ་༡༩༦༤ལོའི་ཧོར་ཟླ་༣པའི་ཚེས་༡༨ཉིན་གྱི་སྐྱ་རེངས་དང་པོའི་དུས་སུ་མདོ་སྨད་གཅན་ཚའི་ཡུལ་གྱི་ཁོལ་ས་ཐང་སྡེ་བར་ཡབ་རྟ་ལོ་དང་ཡུམ་སྒྲོལ་མ་གཉིས་ཀྱི་སྲས་སུ་འཁྲུངས། ཡབ་ཡུམ་གཉིས་ལ་སྲས་སྲས་མོ་བརྒྱད་ཡོད་པ་ལས་རྗེ་ཉིད་གཉིས་པ་ཡིན་ཞིང་མཚན་ལ་ནམ་མཁའ་ཐར་གསོལ།
དགུང་ལོ་བརྒྱད་ཀྱི་སྟེང་ཡི་གེ་འབྲི་ཀློག་དང་སུམ་རྟགས་སོགས་ལ་སྦྱང་བརྩོན་བྱས་ནས་ས་ཁུལ་དེའི་སློབ་ཆུང་མཐར་ཕྱིན། དགུང་ལོ་བཅོ་ལྔའི་སྟེང་བསྟན་པའི་གསལ་བྱེད་ཆེན་མོ་བླ་བྲང་བཀྲ་ཤིས་འཁྱིལ་གྱི་དགེ་བཤེས་ཨ་ཁུ་དགེ་འདུན་རྒྱ་མཚོ་ཆེ་བ་ཚང་གི་མདུན་ནས་གསང་སྟབས་ཀྱིས་རབ་བྱུང་དང་དགེ་ཚུལ་གྱི་སྡོམ་པ་མནོས། ལ་མོ་བདེ་ཆེན་གྱི་ཆོས་སྒོར་ཞུགས་ནས་དགེ་བཤེས་གྲགས་པ་ཚང་ཡོངས་འཛིན་དུ་བསྟེན་ཏེ་བསྡུས་གྲྭ་དང་བློ་རྟགས། གྲུབ་དོན་ས་གསུམ་བཅས་ལ་སྦྱངས་ཞོར་སུམ་རྟགས་དང་སྙན་ངག་མེ་ལོང་མའི་ལེའུ་གསུམ་གའི་དཔེ་བརྗོད་དང་བཅས་སྦྱངས་བརྩོན་མཛད།
དགུང་ལོ་ཉེར་གཅིག་པར་བློ་རྒྱུགས་དང་རྩོད་རྒྱུགས་ཀྱི་རྩེར་སོན་བཞེས་པས་བླ་བྲང་བཀྲ་ཤིས་འཁྱིལ་གྱི་ཚོགས་ཆོས་སུ་ཞུགས་ནས་ཨ་ཁུ་འཇམ་དབྱངས་རྒྱ་མཚོ་ཚང་དང་ཨ་ཁུ་ཡོན་ཏན་ཚང་གཉིས་ཀྱིས་ལེགས་པར་བསྐྱངས། རིགས་ལམ་མྱུར་ཞིང་རྣོ་བ་དང་། ཚིག་གི་བརྗོད་པ་གཙང་བ་སོགས་དོན་གཉེར་ཅན་རྣམས་ལ་བློ་གྲོས་ཀྱི་པད་མོ་འབྱེད་པའི་བཀའ་དྲིན་མཛད།
ཕྱི་ལོ་༡༩༨༩སྟེ་དགུང་ལོ་ཉེར་ལྔའི་སྟེང་ཐུགས་བསྐྱེད་ཆེན་པོས་གསང་སྟབས་ཀྱིས་འཕགས་ཡུལ་དུ་འབྱོར། ༧གོང་ས་མཆོག་གི་གསེར་ཞལ་མཇལ་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས། སྒོ་མང་མཁན་པོ་ད་ལྟའི་འབྲས་སྤུངས་མཁན་ཁྲི་རྗེ་བཙུན་བློ་བཟང་བསྟན་པ་ལས་བརྩི་བཞག་གསན། མཁན་ཁྲི་མཆོག་དང་ཁྲིད་རྒྱུན་མན་ངག་གི་གཏེར་མཛོད་ཆེན་པོ་རྗེ་ཡོན་ཏན་རྒྱ་མཚོ། ཀུན་གླིང་ཡོངས་འཛིན་མངའ་རིས་དགེ་བཤེས་བློ་བཟང་ཚུལ་ཁྲིམས་སོགས་གཙུག་ཏུ་བཀུར་ནས་སྐབས་དང་པོའི་འཛིན་གྲྭར་ཞུགས། ལོ་གཅིག་འདས་ཙམ་ནས་དོན་གཉེར་ཅན་ཚོས་ནན་སྐུལ་ཞུ་བ་ལ་བརྟེན་ནས་དཔེ་ཁྲིད་གནང་ཞིང་བཀྲ་ཤིས་སྒོ་མང་གོང་འོག་གི་ཐུན་མོང་མ་ཡིན་པའི་རིགས་ལམ་གྱི་འགྲོས་ཐུགས་ཁུར་རྒྱ་ཆེར་གནང་།
ཆུང་གཞོན་ནུའི་དུས་ནས་སློབ་གཉེར་ལ་གཞོལ་བའི་ཐུགས་གཤིས་དང་རྡོ་རུས་ཐུག་པ་ལྟ་བུའི་བརྩོན་འགྲུས་བསྐྱེད་པ་ལས་འཇང་དགུན་ཆོས་སོགས་གདན་གསུམ་རིགས་སྨྲ་འདུས་པའི་དབུས་སུ་ལུང་རིགས་རྣོན་པོས་ཕས་རྒོལ་འཇོམས་པའི་སྤོབས་པ་གཟེངས་སུ་ཐོན་པས་སྒོ་མང་བློ་བཟང་དགེ་འདུན་ཞེས་མཁས་གྲགས་གདན་ས་གསུམ་ལ་ཁྱབ།
དགུང་ལོ་༣༨སྟེང་འཕགས་བོད་ཀྱི་མཁས་གྲུབ་རྣམས་ཀྱི་དགོངས་པ་མཐར་ཐུག་ལ་དཔྱོད་པའི་མཁྱེན་རབ་ཕུལ་དུ་ཕྱིན་པ་མངའ་བའི་དབང་གིས། ལོ་ངོ་དྲུག་གི་རིང་དགེ་ལུགས་རྒྱུགས་སྤྲོད་ལ་སོང་བའི་འབྲས་རྟགས་སུ་ལྷ་རམས་ཨང་དང་པོའི་དང་པོ་ཡི་མཚན་བཏགས་གནང་། ལོ་དེར་ཆོས་བརྒྱུད་རིས་སུ་མེད་པའི་སྨོན་ལམ་འཕར་མ་ཞིག་གནས་མཆོག་རྡོ་རྗེ་གདན་དུ་ཚུགས་པ་དང་། སྨོན་ལམ་དམ་བཅའི་སྐབས་སུ་བཀའ་པོད་ལྔའི་དཀའ་གནད་ཕྲ་མོ་ནས་ཚིག་འཁྲི་ཚུན་ལ་ཡང་ཞིབ་ཆ་ཤིན་ཏུ་ཕྲ་བ་གནང་བ་སོགས་ཀུན་གྱིས་དགའ་དད་ཀྱི་མེ་ཏོག་གཏོར།
ཁོང་ནི་ནམ་རྒྱུན་བསྡུས་གྲྭ་ནས་མཛོད་འདུལ་བར་དཔེ་ཁྲིད་འཆག་མེད་དུ་གནང་ཞིང་རྟག་ཏུ་ཞི་ཞིང་དུལ་བའི་ངང་འཆད་རྩོད་རྩོམ་གསུམ་གྱིས་ངལ་སྣང་ཡེ་མི་མཛད་པར་རང་གི་སློབ་མར་ཐུགས་བརྩེ་བ་ཆེན་པོས་རྩ་འགྲེལ་ངོ་སྤྲད་དེ་གཞུང་དོན་ལ་མཛུབ་མོ་རི་སྟོན་གནང་ཞིང་། མཐའ་གཅོད་པའི་རིགས་པས་ཚིག་དོན་གྱི་འཁྲུལ་བ་ཚར་གཅོད་ཅིང་ཐོས་པའི་དོན་ལ་གཏིང་ཚུགས་པའི་གོ་བ་སྐྱེད་པར་བྱེད་པའི་སྐྱེས་བུ་ཞིག་གོ
ཕྱི་ལོ་༢༠༠༤ལོར་རྡོ་རྗེ་འཆང་ཆེན་པོ་ལ་མོ་ཡོངས་འཛིན་ཚང་གི་བཀའ་དགོངས་སྤྱི་བོར་བཏེགས་ནས་ཕ་ཡུལ་ལ་ཕེབས་ནས་བླ་སློབ་གཉིས་ཞལ་མཛོམས་བྱུང་། ལ་མོ་བདེ་ཆེན་གྱི་རྩོད་ཡིག་ལྗགས་རྩོམ་མཛད། ལོ་འཁོར་རྒྱུགས་སྤྲོད་སོགས་བཙུགས་ནས་ཡུལ་ལུང་དེར་ཆོས་ཀྱི་ཆར་རྒྱུན་ཕབ། ཕྱི་ལོ་༢༠༠༨ལོའི་ཕྱི་ཟླ་༥ཚེས་༢༡ཉིན་རྒྱ་ནག་གི་སྨན་ཁང་ཞིག་ཏུ་སྐུའི་བཀོད་པ་ཆོས་དབྱིངས་སུ་བསྡུས་པའི་ཚུལ་བསྟན།
གསུང་ལས་སྐྱེས་པའི་སློབ་མའི་ཚོགས་ནི་མདོ་སྔགས་གཞུང་ལུགས་ལ་སྦྱངས་པ་མཐིལ་ཕྱིན་གནང་སྟེ་མཁས་གྲལ་མཐོན་པོར་བསླེབས་པ་ནི་བགྲང་གིས་མི་ལང་ལ། དེ་དག་ལས་བོད་ཕྱི་ནང་གཉིས་དང་ཧི་མ་ལ་ཡའི་རི་བརྒྱུད། སོག་པོ། ར་ཤི་ཡ་སོགས་ཀྱི་དགོན་སྡེ་ཁག་ཏུ་དཔེ་ཁྲིད་བྱེད་བཞིན་པའི་དགེ་བཤེས་ལྷ་རམས་པ་དང་ཚོགས་རམས་པ་སོགས་མདོར་ན་ཀུན་མཁྱེན་བླ་མའི་ཡིག་ཆའི་ཁྱབ་ཁོངས་སུ་གྱུར་པའི་དགོན་སྡེ་ཁག་ཏུ་ཁོང་གི་གསུང་རྒྱུན་གྱིས་ཕལ་ཆེར་མ་ཁྱབ་པ་མེད་པ་ལྟ་བུར་གྱུར་པ་སོགས་དམ་པ་གང་གི་རྣམ་ཐར་གྱི་ཆ་ཙམ་བརྗོད་པ་འདི་ནི་གང་ཉིད་མྱ་ངན་ལས་འདས་ཚུལ་བསྟན་ནས་ལོ་འཁོར་བཅུ་གཉིས(༢༠༠༨-༥-༢༡____༢༠༢༠-༥-༢༡)འཁོར་བའི་རྗེས་དྲན་གྱི་ཚུལ་དུ་ཀླུ་འབུམ་བློ་བཟང་སྨྲ་མཁས་ཀྱིས་ཟླ་༥ཚེས་༢༠ཉིན་རྫོགས་པར་བྲིས།
སྐྱབས་སུ་མཆིའོ། །ངེས་པ་དོན་གྱི་མཁས་དབང་ཆེན་མོ་རྗེ་བཙུན་བློ་བཟང་དགེ་འདུན་མཆོག