བློ་བཟང་རིན་ཆེན།
སྙན་པའི་གྲགས་པ་ཕྱི་ནང་ཀུན་ལ་ཁྱབ།།
དམིགས་མེད་སྙིང་རྗེས་རང་རྒྱུད་ཡོངས་སུ་བརླན།།
བཅུ་ཕྲག་ཡོན་ཏན་དུ་མའི་གཏེར་འཛིན་པ།།
མཚན་ལྡན་བཤེས་གཉེན་རྣམས་ལ་གཏིང་ནས་གུས།།
རབ་བརྟན་སེམས་པ་བཟང་པོའི་ས་གཞི་ལ།།
རབ་མཛེས་སྙན་ངག་ལྷ་མོའི་སྐུ་འཁྲུངས་ན།།
རབ་དགའ་བརྩེ་བ་ཟབ་མོས་བློས་བསླངས་ནས།།
རབ་བྱུང་འཛིན་གྲོགས་རྣམས་ལ་སྐྱེས་ཤིག་ཕུལ།།
ཉིན་མཚན་ཀུན་ལ་དམག་འཐབ་བྱེད་པ་ལས།།
བརྩེ་སེམས་ཟོལ་མེད་མངའ་བའི་གྲོགས་དང་ལྷན།།
སངས་རྒྱས་བསྟན་པའི་རོ་བཅུད་མངའ་བ་ཡི།།
བོད་ཀྱི་སྐད་ཡིག་སྦྱོང་ན་མི་དགའ་ཨང་།།
ཁམས་དང་མོས་པ་མི་འདྲ་བདེན་མོད་ཀྱང་།།
ཕུལ་བྱུང་གཙུག་ལག་ཁང་འདིར་བསླེབས་པ་ན།།
རང་རང་དགའ་བའི་གཞུང་ལ་མ་སྦྱངས་ན།།
རྗེས་མར་ཡུལ་ལ་ལོག་སྐབས་ཀྱེ་མ་ཧུད།།
ངུར་སྨྲིག་ན་བཟའ་གསོལ་བའི་ཉིན་མོ་ནས།།
དམ་པའི་ཆོས་སྒོར་ཞུགས་པའི་ཐག་བཅད་ཅིང་།།
ཁམས་དང་མོས་པ་མི་མཚུངས་ཐ་དད་ཀྱང་།།
རྒྱུན་ཤེས་ཙམ་གྱི་ཕྱི་མའི་ལམ་ཆས་དགོས།།
རྒྱ་བོད་དབྱིན་གསུམ་སུམ་དག་རྟགས་གསུམ་ལ།།
མཁས་མང་འདུས་པ་རྒྱ་མཚོའི་ཆུ་ཀློང་ནས།།
ཅི་ཡང་མ་སྦྱངས་ཕག་ལྟར་ཉལ་བ་ན།།
ཀོ་གྱོང་མཆིལ་མས་སྦངས་དང་ཅི་མི་མཚུངས།།
ནང་ཆོས་ཆེད་དུ་སྦྱོང་བའི་སྐལ་མེད་ཅིང་།།
སྙན་ངག་ལོ་རྒྱུས་དངོས་ཁམས་ཚན་རིག་སོགས།།
ཕྱི་ནང་རིག་གཞུང་ཤེས་བྱའི་དགའ་ཚལ་དག །
རང་གི་མདུན་ན་བདོག་པ་མཁྱེན་དགོས་སྙམ།།
འདི་ཕྱི་གཏན་གྱི་འདུན་མར་མ་བསམས་ཀྱང་།།
ཚེ་འདིའི་མ་དང་ཉེ་བའི་གཉེན་བསམས་ན།།
དཔག་བསམ་ལྗོན་པ་མངའ་བའི་འདུན་ས་ནས།།
དལ་འབྱོར་ཆུད་ཟོས་བཏང་ན་མི་ཕངས་ཅི།།
2020/6/25 དགོང་མོར་<<འཛིན་སྙན་རྩོམ་གླིང་>>དུ་རྩེད་མཚར་དུ་བྲིས།