ཆང་སྐྱེས།
ལྷག་པ་དཀར་པོའི་ཚོམས་ར་དྲོད་ཀྱིས་ཁེངས།།
ལྷག་སེམས་དཀར་པོའི་ཚོགས་གཙོ་འཛུམ་གྱིས་ཕྱུག།
ལྷག་དོན་དྲ་གྲོགས་རྣམ་པ་མཐུན་སྒྲིལ་ཆེ།།
ང་ཚོས་མཉམ་དུ་ལྷག་དཀར་ཉིན་མོ་བསུ།།
ལ་སྟོད་འབྲོག་གི་ལུག་ཆུང་འཚོ་རོགས་དང་།།
སྨད་ཕྱོགས་རོང་གི་འབྲུ་དྲུག་སྡུད་གྲོགས་ཚོ།།
ང་ཚོ་ཚང་མ་རིགས་རྒྱུད་གཅིག་གི་རེད།།
ལྷག་པ་དཀར་པོའི་ཉིན་མོ་འཛུམ་གྱིས་བསུ།།
གཞིས་ན་འཚོ་བའི་ཕུ་ནུ་མིང་སྲིང་དང་།།
བྱེས་སུ་གྱར་བའི་ཁ་ཡ་ན་ཟླ་ཚོ།།
ང་ཚོ་ཚང་མའི་ལས་དབང་གཅིག་ཏུ་གྲུབ།།
དེ་རིང་ལྷག་དཀར་ཉིན་མོ་དགའ་བས་བསུ།།
ཁྱོད་ཀྱིས་རྒྱུད་དྲུག་པི་ཝང་དཀྲོལ་བཞིན་ཤོག།
བདག་གིས་དགའ་བའི་གླུ་ཆུང་ལེན་བཞིན་ཡོང་།།
ཁྱོད་དང་འུ་གཉིས་ཁྱིམ་ཚང་གཅིག་གི་རེད།།
ལག་ཟུང་གཅིག་ཏུ་སྦྲེལ་ནས་ལྷག་དཀར་བསུ།།
ཁྱོད་ཀྱིས་འཛུམ་མདངས་དམར་པོ་གྲོལ་ཏེ་ཤོག།
ང་ཡིས་ཁ་བཏགས་དཀར་པོ་བཟུང་ནས་ཡོང་།།
སེམས་པ་དྲོན་མོའི་སྟེང་ལ་སེམས་པ་གླན།།
ལྷག་དཀར་དུས་ཀྱི་ཉིན་མོ་ཚང་མས་བསུ།།
ཁྱོད་ཀྱིས་བོད་ཡིག་འབྲི་བཞིན་ཤར་ནས་ཤོག།
ང་ཡིས་བོད་སྐད་བཤད་བཞིན་ནུབ་ནས་ཡོང་།།
ཁྱོད་དང་ང་ཡི་འདུན་པ་གཅིག་ལ་འཇོག།
ཡོད་ཚད་ལྷུན་གྱིས་འགྲུབ་པའི་ལྷག་དཀར་བསུ།།