རོང་པོ་བློ་བཟང་རིན་ཆེན།
ང་རང་ཨིན་གཞས་སྙན་མོ་ཞིག་ལོངས་སུ་སྤྱོད་བཞིན་ཁང་པའི་ཡང་ཐོག་ཏུ་ལྷོད་ཀྱིས་རྒྱང་ལྟ་བྱེད་སྐབས། རྒྱང་རིང་གི་མཚམས་སྤྲིན་གྱིས་ང་ལ་གྱེས་བརྡ་གནང་ཞོར་ཕྱིར་མིག་ཐེངས་གཅིག་བལྟས་ཏེ་ཡུན་གྱིས་བཞུད་སོང་། ཕྱི་ལོགས་སུ་མུན་པ་རིམ་གྱིས་འཐུག་པོ་འཐུག་པོར་གྱུར་ཏེ་འདུ་ཁང་གསར་པའི་རྒྱ་ཕིབས་ཀྱང་མི་མངོན་པར་གྱུར། དེ་རྗེས་ང་རང་གཅིག་པུ་བསམ་གཞིག་གི་ཀློང་ལ་འགྲིམས་ཏེ་འདི་ལྟར་བསམས་བྱུང་།
མི་ནི་ཇི་འདྲའི་མཚར་སྣང་ལྡན་པ་ཞིག་རེད། རང་ཉིད་ལ་ཁ་ཞེ་གཉིས་མེད་ཀྱིས་ལྷག་བསམ་རྣམ་དག་དང་། བདེན་པ་བདེན་ཐུབ་ཀྱི་སྐད་ཆ་བསྙད་ཀྱང་། རང་ནུས་གང་ལྕོགས་ཀྱིས་ཕན་པ་སྒྲུབ་མཁན་དག་ལ་སྣང་མེད་དང་གཡོ་ཟོལ་རྐྱང་རྐྱང་གིས་སྐྱེལ་ཅིང་། རང་ཉིད་ལ་ཕན་ཐོགས་སྣ་གཅིག་བསྒྲུབས་མ་མྱོང་ཞིང་། ལྷག་བསམ་འཁྱུག་ཙམ་ཡང་དཀར་མ་མྱོང་བའི་མིང་གྲགས་ཅན་རེ་མཐོང་མ་ཐག་གམ། ཡང་ན་གདོང་གི་སྐྱི་ལྤགས་བཟང་ས་ཞིིག་ལ་འཕྲད་ཚེ་ཁ་གདངས་ཤིང་མིག་ཅེར། ལུས་པོ་འཁུམས་ཤིང་མཆི་མ་ཤོར་ནས་སེམས་གཏམ་ལྷུག་ལྷུག་ཏུ་བརྗོད་ཀྱང་མགོ་བོ་བྱ་དེ་ལྟར་གཡུགས་པ་ནི་ཇི་འདྲའི་མཚར་སྣང་སྐྱེ་འོས་པ་ཞིག་མ་རེད་ཨང་།
མ་གཞི་དབང་ཆ་ཡོད་མེད་དང་། དབུལ་ཕྱུག་གང་ཡིན། མཛེས་སྡུག་ལྡན་མིན། མིང་གྲགས་ཡོད་མེད་སོགས་ཅི་ཡིན་ལ་མ་ལྟོས་པར་གཞན་ལ་གུས་བཀུར་དང་མཛའ་འབྲེལ། རྗེས་སུ་ཡི་རང་དང་གཏམ་བརྗོད། བཀའ་དྲིན་རྗེས་དྲན་དང་བརྩེ་སེམས་ཟོལ་མེད་བྱེད་པ་སོགས་ནི་མི་ཞིག་ལ་དགོས་ངེས་ཀྱི་ཡོན་ཏན་དང་། རིན་ཐང་གཞལ་དུ་མེད་པའི་མཛེས་རྒྱན་ཞིག་ཡིན་པར་གདོན་མི་ཟ། འོན་ཀྱང་གམ་གྱི་གྲོགས་དང་། བརྩེ་བའི་ནང་མི་སོགས། རང་ལ་བློ་སེམས་ཁ་བ་བཞིན་དཀར་བའི་མི་རྣམས་ལ་དེ་ལྟར་མི་བྱེད་པ་ནི་ཁྲེལ་རྒོད་རང་བཞིན་དུ་ཤོར་ཞིང་ཞེན་པ་གཏིང་ནས་ལོག་པའི་རང་བཞིན་ཞིག་མ་རེད་དམ།
ཁོ་བོས་འདི་ལྟར་བསམ་གཞིག་ཐར་ཐོར་ཞིག་བཏང་བ་འདི་འཚིག་ཇ་ཕོར་གང་འཐུང་ཞོར་ཡིག་གཟུགས་སུ་བརྩམས་ཏེ་བརྩེ་བའི་ཆོས་གྲོགས་ཤིག་ལ་ཡུན་རིང་མ་མཇལ་བས་ལེགས་སྐྱེས་སུ་ཕུལ་སྐབས། དཀར་གསལ་ཟླ་བ་ནམ་མཁའི་དཀྱིལ་ལ་སླེབས་ཤིང་། མཛེས་སྡུག་རྣམ་པར་བཀྲ་བའི་སྐར་ཚོགས་ཀྱིས་ང་ལ་དགའ་བའི་འཛུམ་མདངས་དཔག་ཏུ་མེད་པ་གནང་བྱུང་།
2018/12/29ཉིན་མགྲོན་ཁང་ཆུང་ཆུང་ཞིག་ཏུ་བྲིས།