ལྷོ་ཕྱོགས་བེ་ཏའི་ཡུལ་དུ་སྤྲིངས་པའི་འཕྲིན།

ཤ་ཀླན་འཇམ་དབྱངས་གྲགས་པ།

ཀཱ་ལི་བྱུ་རུ་བསྟར་ལ་བརྒྱུས་འདྲའི་ཁ་སེམས་མཐུན་པའི་གཏམ་སྦྱོར་འདི༎
ག་ལེར་རི་མོའི་གཟུགས་སུ་བགྱིས་ཏེ་ང་ནས་ལེ་བར་སྟོང་གི་སར༎
ཅ་ཅོའི་གཏམ་ཉོག་ཡོངས་སུ་བསྐྱུར་ཏེ་ཆ་ལུགས་མཐུན་པར་སྟོབ་ལགས་ན༎
ཇ་ཆུའི་རིན་དང་མཐོང་ལས་མེད་ཀྱང་ཉ་ཉོག་འབའ་ཞིག་མ་ཡིནསྙམ༎
ཏ་ལ་དང་ནི་བེ་ཏའི་ཡུལ་དེར་ཐ་ཆད་བདག་ཀྱང་དོང་མྱོང་མོད༎
ད་ལྟའི་ལུས་སེམས་ལེ་ལོས་བཅིངས་པས་ན་ཟླའི་ཚོགས་ལ་འགྲན་ནུས་མིན༎
པ་སངས་ཨ་མའི་ཞལ་ཏ་དྲོན་མོས་ཕ་རོལ་གྲོགས་དང་འགྲིག་མཐུན་ཏེ༎
བ་སོགས་ཕྱུགས་རྗེས་ལང་ཚོ་མ་ཟད་མ་དེའི་སྐུ་དྲིན་ཅིས་མི་དྲན༎
ཙ་རི་ལྟ་བུའི་གནས་ཆེན་འདི་ནི་ཚ་གདུག་ཆེ་བས་འབར་ལ་ཁད༎
ཛ་ལང་སྤྱོད་པས་དུས་ཚོད་འདའ་ན་ཝ་མོ་ཡིན་ཡང་ཕངས་སྙམ་བྱེད༎
ཞྭ་མོ་ལྟར་དུ་བཤེས་རྣམས་བཀུར་ཏེ་ཟ་ཟིའི་གཡེང་བ་རབ་སྤངས་ན༎
འ་ཅག་གླེན་ལྐུགས་ཅན་ནི་མིན་པས་ཡ་མཚན་ཡོན་ཏན་ཅིས་མི་འཕེལ༎
ར་བ་གངས་རིས་བསྐོར་བའི་ཡུལ་དང་ལ་ལུང་སྟོང་གིས་བར་དུ་ཆད༎
ཤ་ཚའི་གཉེན་དང་གྲོགས་ཀྱང་བོར་ཏེ་ས་ཆེན་འདི་ཡི་གཉའ་བར་ལུས༎
ཧ་ཅང་ཀློང་ཡངས་ཡུལ་གྲུ་འདི་ནས་ཨ་རོགས་འགའ་དང་གཡེང་ཆེ་ན༎
ཧ་ཅང་ཕྱིས་ནས་འགྱོད་པ་ངེས་པས་ཨ་མའི་བུ་ཚོས་སེམས་ལ་ཟུངས༎
ཞེས་པ་འདི་ཡང་ལེགས་བཤད་མིན་ལ་ཉེས་པར་བཤད་པའང་ཡིན་དོགས་མེད༎
སྤྲང་པོའི་སེམས་སུ་ཇི་ལྟར་འཁོར་བ་དེ་ལྟར་ཡི་གེའི་གཟུགས་སུ་བྱས༎
སྡིག་དང་ཉེས་པའི་ཚོགས་ཤིག་མཆིས་ན་དམ་པའི་སྤྱན་སྔར་མཐོལ་ལོ་བཤགས༎
འདིར་འབད་དགེ་བས་གྲོགས་དག་རིག་པའི་བཙན་ས་ཟིན་པའི་མཐུ་ཐོབ་ཤོག །
14 8
2009ལ་བྲིས།