མདའ་མོ་ཚང་རྨོག་རུ་བསྟན་པ།
ཕྱི་ལོ་༢༠༡༡།༡།༩རེས་གཟའ་ཉི་མ་ཉིན་གྱི་ཞོགས་པ་སྔ་པོར་ལམ་བྲོ་ཞིག་སྒྲིག་སྟེ་རྒྱབ་རི་མཐོན་པོའི་རི་རྩེར་འགོས་པ་ཡིན།བོད་རྩིས་ཀྱི་དབང་དུ་བྱས་ན་དགུན་གྱི་གྲང་ངར་ཆེ་བའི་སྐབས་ཡིན་ཀྱང་།འདི་ཕྱོགས་སུ་ཚ་གྲང་གི་ཁོད་སྙོམས་པ་མ་ཟད།རི་འདབས་དང་ཆུ་འགྲམ་ན་སྔོ་ལྗང་ལྡན་པའི་ཞིང་ཁ་དང་སྔོ་ཚལ་མང་པོ་ཞིག་མཐོང་རྒྱུ་འདུག་་ངེད་དང་ལམ་གྲོགས་གཉིས་ཀྱིས་ཁེར་ལམ་ཞིག་དེད་དེ་ཤིང་ནགས་མང་པོའི་དཀྱིལ་ནས་ཐོན་པ་ཡིན།སེར་ཐིང་ཐིང་གི་ཉི་འོད་གངས་རིའི་སྟེང་ཕོག་པའི་འོད་མདངས་གསལ་པོ་མཐོང་བཞིན་འདུག་་སྤྲིན་པ་ལག་མཐིལ་ཙམ་ཡང་མེད་པའི་མཁའ་དབྱིངས་སུ་གངས་རིའི་འོད་མདངས་འཁྱིལ་འདུག་པས་ལོ་ངོ་བཅུ་གསུམ་ལྷག་ཏུ་ཁ་བྲལ་དུ་གྱུར་བའི་ཕ་ཡུལ་གངས་ལྗོངས་དེ་བདག་གིས་དངོས་སུ་དྲན་སོང་།
དགོད་བྲོ་བ་ཞིག་ནི་རི་ངོགས་ཀྱི་ཤིང་ནགས་གསེབ་ནས་ཆུ་ཚོད་གཅིག་དང་ཕྱེད་ཙམ་ལ་ངེད་གཉིས་ཀྱི་ལམ་ཁ་བོར་བས་བྲག་ཁུང་དང་ནགས་རྫོང་མཐུག་ས་ནས་གཅན་གཟན་སྟག་དང་གཟིག་གི་དོན་སྤྱི་འཇིགས་པོ་ཞིག་མིག་མདུན་དུ་ལྷང་ངེར་ཤར་ཡོང་གིན་འདུག་་རྒྱ་གར་ཤིང་འཐུ་བ་ཞིག་གིས་ལམ་ཁ་བསྟན་ཞིང་།རྡོ་ཁང་ཞིག་རལ་ཞིག་གི་ནང་དུ་སེམས་བཟང་བྷ་བྷོ་ཞིག་གིས་མངར་ཇ་ཕོར་གང་སྤྲད་པ་ནི་ཞལ་ཟས་རོ་མངར་དང་ལྡན་པ་ཞིག་རེད།
གངས་རི་དེ་ནི་རྒྱ་གར་གྱི་ཤར་ཕྱོགས་མངའ་ཁུལ་དུ་གཏོགས་པའི་མི་ན་ལེ་དང་།ལ་དྭགས་ཀྱི་རི་རྒྱུད་རེད།འདི་ནས་མི་ན་ལེ་བར་དུ་ལེ་དབར་དགུ་བཅུ་ལྷག་ཡོད་པ་དང་།མི་ན་ལེར་ནད་རིགས་སྣ་ཚོགས་ལ་ཕན་པའི་རང་བྱུང་གི་ཆུ་ཚན་ཁག་ཅིག་ཡོད་པ་དང་།གངས་རི་དང་།ནགས་རི།རྫ་ཆུ་སོགས་གནས་ཀྱི་བཀོད་པ་མཛེས་ཕྱིར་རྒྱ་གར་གྱི་གློག་བརྙན་འཁྲབ་སྟོན་པ་མང་པོ་ཞིག་གིས་གནས་འདི་ལ་དུང་བ་བྱེད་པ་མ་ཟད།འཇིག་རྟེན་མཐུན་འཇུག་གི་ལམ་དུ་ཕྱོགས་པའི་ལོ་གཞོན་ཕོ་མོ་ཚོ་ཡང་གནས་འདིར་སྤྲོ་འཆམ་ལ་ཡོང་སྟེ་མི་ཚེ་གོ་རིམ་གྱི་འགོ་འཛུགས་པའི་ལུགས་སྲོལ་ཞིག་ཡོད་པ་རེད།ད་དུང་བོད་ཀྱི་སྨན་རྩིས་ཁང་གི་སྨན་ཕྲུག་ཚོས་སྨན་རྩྭ་རི་རྒྱུད་འདི་རུ་འཐུ་བཞིན་ཡོད།
རི་རྩེ་འདི་ནས་ནུབ་ཕྱོགས་སུ་བལྟས་ནའང་རྩེ་མོ་གངས་ཀྱིས་གཡོགས་པའི་རི་རྒྱུད་ཅིག་མཐོང་ཐུབ།དེ་ནི་བོད་མི་མང་པོ་ཞིག་ལ་རྒྱུས་མངའ་ཡོད་པའི་རྡ་རམ་ས་ལའི་ཉེ་འཁྲིས་ཀྱི་རི་རྒྱུད་ཡིན་པ་དང་།ལོ་ཤས་གོང་རྡ་སའི་རི་རྒྱུད་ཀྱི་གངས་རི་ཞུ་སྟེ་རྫ་རི་སྐྱ་སེང་བ་ཞིག་ཏུ་གྱུར་ཡོད་ནའང་།ཉིན་ཤས་གོང་དུ་རྡ་སར་ཁ་བ་ཆེན་པོ་ཞིག་བབས་པར་བརྟེན་རྫ་མགོའི་ཁ་བ་བརྗིད་ཆགས་སུ་གནས་ཡོད།འདི་ནས་རྡ་རམ་ས་ལ་བར་ཏུ་ལེ་དབར་༡༨༠ལྷག་ཡོད་པ་དང་།རྡ་རམ་ས་ལ་ནི་ཕྱི་རྒྱལ་གྱི་མི་རིགས་མང་པོ་འདུས་སྡོད་བྱེད་སའི་ས་ཁུལ་དང་གྲོང་ཁྱེར་ཞིག་རེད།
རི་སྒང་གཟར་པོ་འདི་ནའང་རྒྱ་གར་གྱི་ལྷ་ཁང་ཞིག་འདུག་ལ།ལྷ་ཁང་ནང་དུ་ཧིན་རྡུའི་བླ་མ་དང་།ལྷ་ཡི་སྐུ་བརྙན་ཁག་ཅིག་འདུག་་ད་དུང་ཚོན་མདོག་ནག་པོས་གྲུབ་པའི་ལྷ་དབང་ཕྱུག་ཆེན་པོའི་ལིང་ག་ཞིག་ལ་ཚོན་རྩི་དམར་པོ་བྱུགས་ཏེ་མཆོད་པ་བྱེད་ཀྱིན་འདུག་་རྒྱ་གར་ཁོ་རང་ཚོས་བཤད་ན་འདི་ལའང་རིག་བྱེད་ཀྱི་ངག་རྒྱུན་ལྟ་བུའི་ལྷ་སྒྲུང་མང་པོ་འདུག
ས་གནས་འདི་ལ་མན་ཊེ་ཞེས་སུ་འབོད་པ་དང་།སློབ་དཔོན་རིན་པོ་ཆེ་དང་འབྲེལ་བ་ཆེ་བའི་བུ་མོ་མན་དཱ་ར་བའི་ཡབ་ནི་ས་གནས་མན་ཊེ་ཡི་རྒྱལ་བོ་རེད།ད་ལྟའི་མན་ཊེ་རྫོང་ནི་རི་གཞུང་སུམ་མདོ་ཞིག་ཏུ་ཆགས་འདུག་པ་དང་།ཆུ་ཆེན་བཞུར་སའི་གྲམ་ཁ་ཞིག་ན་ཁང་བརྩེགས་དང་།རླངས་འཁོར།མི་ཚོགས་ཚང་མ་འཚང་ཁའི་རྣམ་ཅན་དུ་ཡོད།འདི་ནི་འགྲུལ་བཞུད་ཀྱི་ལམ་ཁ་སྟབས་བདེ་ཞིག་མིན་ནའང་འགྲུལ་བསྐྱོད་པའི་ས་ཚིགས་གལ་ཆེན་ཞིག་རེད།
མན་ཊེ་རྫོང་ནས་ལེ་དབར་བཅོ་ལྔའི་མཚམས་སུ་ང་རང་རི་སྒང་དུ་འགྲོ་སའི་ས་གནས་འདི་ཡོད་ལ།ས་གནས་འདིའི་མིང་ལ་པོན་ཊོ་ཟེར།ས་གནས་འདི་ན་༡༩༦༥་ལོར་སླེབས་པའི་སྐྱབས་བཅོལ་བོད་མི་སྟོིད་པའི་སྐྱིད་གྲོང་སོགས་ནས་ཡིན་པའི་བོད་པའི་ཁྱིམ་ཚང་༣༥་ཙམ་འདུག་་ཁྱིམ་ཚང་འདི་ཚོ་ས་གནས་ཡུལ་མི་དང་འབྲེལ་ཉེ་ནའང་།ཁོ་ཚོའི་ཁང་ཐོག་ན་དར་ལྕོག་ཁྲ་ལམ་མེར་ཡོད་པ་འདིས་བོད་ཞེས་པའི་ཐ་སྙད་ཞིག་བློ་ངོར་རང་བཞིན་གྱིས་གྲུབ་ཡོང་བ་ཞིག་འདུག་་
ས་གནས་འདི་ན་ཧིན་རྡི་དང་།པན་ཇབ་སོགས་ཀྱི་དགོན་པ་ཁ་ཤས་འདུག་ལ་སྔ་དགོང་དུ་རྒྱང་བསྒྲགས་ལས་སོ་སོའི་ཆོས་ལུགས་ཀྱི་ཆོ་གའི་འདོན་དབྱངས་ཀྱི་སྐད་མགོ་ཧ་ཅང་མཐོ།བོད་པའི་གྲོང་སྡེ་འདི་ན་བྱིས་པ་དང་ལོ་གཞོན།དར་མའི་རིགས་ཉུང་ཉུང་རེད།ཚོང་པ་དང་།ལས་བྱེད།སློབ་ཕྲུག་ཚང་མ་ས་གནས་གཞན་དུ་ཡོད་ཚོད་འདུག་་རྒན་རྒོན་ཚོས་འཁར་རྒྱུག་དང་མ་ཎི་འཁོར་ལོ་དྲུད་དེ་ཞོགས་པའི་ཆུ་ཚོད་དྲུག་པ་ནས་གྲོང་སྡེ་ནང་ཡོད་པའི་ལྷ་ཁང་དུ་བསྐོར་བ་བྱེད་པ་དང་།ཉིན་གུང་ཆུ་ཚོད་གཅིག་རིང་འདོན་པ་འཚོགས་ཀྱིན་འདུག་་
སྔོན་ཆད་སྡེ་བ་འདིའི་ནང་སློབ་གྲྭ་ཞིག་བཙུགས་ཏེ་ལོ་ཤས་རིང་རྒྱུན་བསྐྱངས་འདུག་མོད།དེང་སང་གི་ལོ་གཞོན་ཚོ་ཆང་ས་རྒྱག་འདོད་མེད་པ་དང་།ཆང་ས་བརྒྱབ་ཀྱང་བྱིས་པ་མང་པོ་སྐྱེས་འདོད་མེད་པའི་དབང་གིས་སློབ་གྲྭའི་ནང་བྱིས་པའི་སྟོང་སྟེ་སློབ་གྲྭ་སྒོ་བརྒྱབ་པ་རེད་ཅེས་ཨ་མ་ཞིག་གིས་འགྲེལ་བརྗོད་བྱས་སོང་།
སྡེ་བ་འདིའི་ནང་ལོ་གྲངས་དགུ་བཅུ་ཅན་དང་།བརྒྱད་ཅུ་ཅན་སོགས་ལོ་ལོན་མང་པོ་ཞིག་ཡོད་པ་མ་ཟད།ཁོང་ཚོའི་གཟུགས་པོ་ཡང་ཧ་ཅང་ཐང་པོ་རེད།འདིའི་སྐོར་ཨ་མ་རྒྱལ་མོ་དང་གླེང་མོལ་བྱས་པར།ང་ནི་ལོ་༦༥་ཡིན།འདི་ནས་ཆུང་ཤོས་ཀྱི་གྲས་རེད།འདི་གའི་མི་རྒན་ཚོ་ཚེ་ཐག་རིང་པོ་ཡོད་པ་དེར་མང་པོ་ཞིག་ཡ་མཚན་གྱིན་ཡོད་པ་རེད་ཟེར།རྒྱུ་མཚན་དྲིས་པར།ང་ཚོས་སྔོན་ཆད་ནས་ཉིན་གུང་གི་ཞལ་འདོན་ཆགས་མྱོང་མེད་པ་དང་།རྗེ་བཙུན་སྒྲོལ་མ་ལ་དད་པ་ཆེན་པོ་རེད།མི་ཚོས་བཤད་ན་དེ་ཡིན་རྒྱུ་རེད་ཅེས་ལབ་ཀྱིན་འདུག་ཟེར།
ལོ་དགུ་བཅུ་ཅན་གྱི་ཨ་མ་ཞིག་མཉམ་སྐད་ཆ་བཤད་པ་ཡིན།ཁོ་མོ་ཧ་ཅང་གསལ་པོ་ཡོད་པ་མ་ཟད།ཁྱིམ་མཚེས་གཡས་གཡོན་དང་སྒོའི་ཕྱི་ནང་དུ་འཁར་རྒྱུག་མེད་པར་འགྲོ་བཞིན་འདུག་་ཁོ་མོར་བུ་ཕྲུག་༡༢་སྐྱེས་ཡོད་པ་དང་།ཆུང་དུས་དཀའ་ལས་ཞེ་དྲག་བརྒྱབ་ཡིན།ད་ཆར་ང་ལ་དཀོན་མཆོག་གི་ཐུགས་རྗེ་དང་།ན་མ་བཟང་མོའི་བཀའ་དྲིན་གྱིས་དཀའ་ངལ་གང་ཡང་མེད།ཡིན་ནའང་།མགྱོགས་པོར་ཤི་རྒྱུར་རེ་བ་རྒྱག་གིན་ཡོད་ཟེར།
ཁྱོ་ཀ་ནི་སྔོན་ནས་གྲོངས་སོང་ཟེར་བཞིན་ཨ་མ་ལགས་ཀྱིས་གཞས་ཚིག་ཅིག་སྐྱོར་སོང་།མེ་ཏོག་ནམ་ཟླ་ཡལ་སོང་།།གཡུ་སྦྲང་སེམས་པ་མ་སྐྱོ།།བྱམས་པའི་ལས་འཕྲོ་ཟད་པར།།ང་ནི་སྐྱོ་རྒྱུ་མི་འདུག་ཟེར།གཞས་འདི་བཏང་རྗེས་ཨ་མ་དང་ང་གཉིས་གད་མོ་ཤོར་སོང་།
སྟབས་མི་ལེགས་པ་ཞིག་ནི་ཨ་མ་ལགས་ཀྱིས་སྟོད་སྐད་དྭངས་མ་བསྐྱོན་གྱིན་འདུག་པས་ངེད་ཀྱིས་ཆ་ཚང་གོ་མ་ཐུབ་མོད།ཁོ་མོའི་སེམས་ནད་ཆེ་ཤོས་ནི་ད་ཆར་ཉེ་འཁྲིས་སུ་ཡོད་པའི་རྒད་པོ་ཁ་ཤས་ཀྱིས་ཁོ་མོར་མགོ་བསྐོར་བཏང་སྟེ་ཅ་དངོས་ཁག་ཅིག་ལྐོག་ལེན་བྱས་ཚུལ་ཡང་ཡང་བཤད་བྱུང་།
གྲོང་སྡེ་ནང་ཡོད་པའི་ལྷ་ཁང་གི་དཀོན་གཉེར་ནི་རྒྱ་གར་ལྷོ་ཕྱོགས་གདན་ས་གང་རུང་ཞིག་ནས་དགེ་བཤེས་བཏང་མྱོང་ཡོད་པ་ཞིག་རེད།ཁོ་བོར་རིག་གནས་ཀྱི་རྨང་གཞི་མེད་པར་ལེགས་བཤད་ལྗོན་དབང་ཞིག་གི་ཁ་ཕྱེས་ཏེ།བླ་མ་མཆོག་དང་དབྱེར་མེད་པའི།།འཇམ་པའི་དབྱངས་ལ་གུས་བཏུད་ནས་ཞེས་སོགས་སྐད་ཤུགས་ཆེན་པོས་སྐྱོར་བཞིན་འདུག་པས་ང་ལ་བརྗོད་མི་བདེ་བའི་ཚོར་བ་ཞིག་བྱུང་།འདི་ནི་དགེ་བཤེས་ཁོ་རང་གི་སྐྱོན་མ་ཡིན་པར་གདན་ས་གྲྭ་སའི་འགྲོ་སྟངས་ཤིག་གི་སྐྱོན་ཡིན་ལ།ཨ་ལགས་ཤ་བསྟན་དར་ལྷ་རམས་པས་ཀྱང་ལྷ་རམས་བཏང་སྟེ་ཕྱིར་ཕ་ཡུལ་དུ་ལོག་རྗེས་ཨ་མའི་དྲི་བ་ཞིག་ལ་ལན་མ་ཕོག་པའི་རྐྱེན་གྱིས་རིིག་གནས་ལ་དོ་སྣང་བྱས་པའི་ལོ་རྒྱུས་ཤིག་ཡོད།
ཕྱི་ལོ་༢༠༠༥ལོར་ད་ལྟའི་སྒོ་མང་མཁན་ཟུར་བློ་བཟང་བསམ་གཏན་ནམ་མངའ་རིས་དགེ་བཤེས་ཟེར་བས་བོད་ནས་གསར་དུ་འབྱོར་མཁན་ཚོར་ཐོག་མའི་མཇལ་ཁའི་སྐབས་ཁྱེད་ཚོ་གཉོམ་ཆུང་ཚུལ་མཐུན་གྱིས།རིག་གནས་མ་སྦྱངས།རྩོམ་མ་འབྲི།དེ་ནས་འགྲིག་འགྲོ་གིན་རེད་ཅེས་བསླབ་བྱ་བསྐྱོན་གྱིན་ཡོད་པ་རེད།འདི་ནི་ལོ་རབས་རྙིང་པ་ནས་བརྒྱུད་པའི་སྟོང་ལོ་གསར་བའི་མི་རྒན་ཞིག་གི་བསམ་བློའི་ཁ་ཕྱོགས་རེད།འདི་ནི་དགོན་སྡེ་གྲྭ་ཚང་གི་སློབ་གསོའི་ཁ་ཕྱོགས་ཀྱི་མཚོན་དོན་ཙམ་ཡང་རེད།
འདི་ནི་རིག་གནས་ལ་བློ་ཁ་ཡངས་མོ་ཅན་སྐོར་ཞིག་གིས་གདན་ས་གྲྭ་ཚང་ལ་བལྟས་ཏེ་འཁང་ར་ཤོར་དགོས་པའི་གཞི་རྩ་ཡིན་ལ།མཁྲེགས་བཟུང་བ་དག་གིས་རིག་གནས་བ་ཚོས་བསྟན་པ་བཤིག་པར་བཤད་པའི་འབྱུང་རྐྱེན་ཡང་ཡིན་པར་སྙམ།
ངས་དགེ་བཤེས་ལགས་སུ་ཚེས་བཟང་དུས་བཟང་ལ་ཁོ་ཚོར་གསུང་ཆོས་རེ་གནང་ན་བཟང་བར་བཤད།དགེ་བཤེས་ལགས་ཀྱིས་ཆོས་བཤད་རྒྱུར་ཁོ་རང་ལ་མི་ཚང་བའི་ཆ་རྐྱེན་གཉིས་བཤད་སོང་།གཅིག་ནི་ངའི་སྐད་ཆ་ཁོ་རང་ཚོས་གོ་གིན་མི་འདུག་་གཉིས་ནི་ཆོས་གྲྭའི་ནང་གི་རྩོད་པ་དང་ཁྱབ་མཐའ་ཁོ་ཚོས་མི་གོ་གི་་་ཆོས་ཚིག་སྟབས་བདེ་བྱས་ཏེ་འགྲེལ་བཤད་རྒྱག་མི་ཤེས་ཀི་ཟེར།
རེད་ཡ།ལྷིང་འཇགས་དང་ཁུ་སིམ་གྱི་རི་གྲོང་འདི་ན་རླུང་བུ་དང་འགྲོགས་ཏེ་ཁོར་ཡུག་དཀྲོགས་མཁན་ཞིག་ཡོད་པ་ནི་མ་ཎི་འཁོར་ལོའི་སིང་སྒྲ་དང་།རི་སྒང་གི་ལབ་རྩེ་ལས་དཔང་མཐོ་བའི་དར་ལྕོག་གི་ཐག་སྒྲ་དག་རེད།
ཀློག་མཁན་རྣམ་པ་ལགས།བོད་ནང་གི་དྲ་ཚིགས་ཤིག་ལ་དམིགས་ཏེ་བྲིས་རྐྱེན་ཆབ་སྲིད་དང་མ་འབྲེལ་བར་བྲིས་ཡོད།
རྨོག་རུ་བསྟན་པ་ཟེར་བ་འདི་ལ་གྲྭ་ས་ནས་མཁོ་བ་ནི་དབུ་ཕར་གྱི་ལག་ཁྱེར་མ་གཏོགས་མེད་པ་སྔོན་མ་ནས་ཐོས་མྱོང་ཡོད།ད་ཕལ་ཆེར་གང་རུང་ཞིག་ཐོབ་ཚར་ཡིན་རྒྱུ་རེད།
གང་ལྟར་སྐུ་མཁྱེན་རང་ཉིད་ཀྱི་མི་གཞི་སྤྱི་ཚོགས་ནང་ཚད་ག་བར་སླེབ་འདུག་པར་རྟག་ཤིང་དཔྱད་ནས་
གསུང་རོགས།སེ་འབྲས་དགའ་གསུམ་གང་ནས་མི་སུ་ལ་རིག་གནས་སྦྱང་མ་བཅུག་པ་རེད།
ངས་ནི་མི་་ལོ་ཉི་ཤུ་ལྷག་ལ་གནས་དེ་ནས་རང་གི་གང་ནུས་གྱི་སློབ་སྦྱོང་ལ་འབད་ཀྱང་སྐད་ཆ་དེ་འདྲ་
ཐོས་མ་མྱོང།ད་ནི་བླུན་པོ་ཁ་བཙུམ་ན་བསྟན་པ་ལ་ཕན་ནོ།ཞེས་གསུངས་བ་སེམས་ལ་ཉལ་རོགས་ལོ།།
རྨོག་རུ་བས་ཡིད་དབང་འཕྲོག་པ་ཞིག་བྲིས་འདུག ཐུགས་རྗེ་ཆེ། སོང་ས་བསྡད་ས་ནས་འདི་ལྟ་བུའི་ཡུལ་སྐོར་ཟིན་ཐོ་རེ་འབྲི་རྒྱུ་མ་རྗེད། འུ་ཚང་ལ་ཡུལ་སྐོར་ཟིན་ཐོའི་ཕྱོགས་སུ་སྟོང་ས་ཆེན་པོ་ཞིག་ཡོད་པ་དེ་ཁྱོད་དང་ང་ལྟ་བུ་ས་ཆ་གཅིག་ནས་སྡོད་མི་ཚུགས་པ་དག་གིས་མི་སྐོང་ན་སུས་སྐོང་།
སྟོང་ཆ་་་
སྐྱག་པ་ཞིག་བཏང་ཡང་ཁ་བརྡའི་ནང་དུ་བཀོད་འགྲོ་གི རྨོག་རུ་བསྟན་པས་སློབ་སྦྱོང་ཅུང་ཙམ་བྱེད་རྒྱུ་ན་ཁ་བདེ་བོ་ཞིག་ཡོད་པ་རེད། ཡིན་ནའང་སྤྱི་ཚོགས་ནང་དུ་རླུང་གིས་ཁུར་སོང་ནས་སྐད་ཆ་བཤད་དུས་སློབ་སྦྱོང་གི་རྒྱབ་རྟེན་དང་བཅས་པའི་བྲོ་བ་འདྲ་ཡོད་པ་མ་རེད། ཡིན་ནའང། ང་ལ་ཇུས་གཏོགས་ཡོད་པ་མ་རེད།
རྒན་རྨོ་རུ་ལགས། མཐོང་ཐོས་བྱུང་བའི་དངོས་ཡོད་གནས་ཚུལ་རྣམས་གཞི་ལ་བཞག་ནས་ཚིག་སྦྱོར་བཟང་པོས་སྤེལ་བའི་རྩོམ་ཡིག་འདི་འདྲ་ནི། རྒྱ་ཆེའི་ཀློག་པ་པོ་རྣམས་ལ་ལེགས་སྐྱེས་ཡག་ཤོས་དེ་རེད། ཡིན་ནའང་། མཐོང་ཐོས་རྒྱ་ཆུང་ལ་རང་ཞེན་ཧ་ཅང་ཆེ་བའི་ཕྱོགས་རིས་མིག་ཅན་རྣམས་ལ་ཅི་ཆ།
གྲོགས་པོ་རྨོག་རུ་བསྟན་པ་ལ་མུ་མཐུད་སྤོབ་པ་ཆེན་པོའི་སྒོ་ནས་ཟིན་ཐོ་སྤེལ་ཞིག་ ཧ་ཅང་གི་ཡག་པོ་འདུག་ རྒྱབ་སྐྱོར་ཡོད། སོ་སོས་རྡོ་ཞུ་མ་ཤེས་པར། མིས་མདའ་རྒྱབ་པར་མིག་ཚ་ན་སྡུག་རྐྱོང་རེད།
རྨོག་རུས་ཧ་ཅང་ཐད་པོ་བྲིས་འདུག རྩོམ་ཡིག་འདི་འདྲ་བྲིས་ན་བཙན་བྱོལ་བོད་མིའི་བོད་ཡིག་ཉམས་དམས་སླར་གསོ་ས་ཐུབ་པར་རོག་སྐྱོར་དང་། ལྷག་པར་ན་གཞོན་ཚོར་མིག་དཔེ་ཡག་པོ་ཡོང་ངེས་འདུག ཐུགས་རྗེ་ཆེ། ཉིར་རེར་མ་བྱུང་ནའང་། ཉིན་འགའི་ཉིན་ཐོ་དགོད་ཐུབ་པའི་རེ་བ་བྱེད་བཞིན་ཡོད། ཞོར་གྱི་གཏམ་༌༌༌༌༌༌༌༌༌༌༌༌༌༌༌༌༌༌༌༌༌༌༌༌གདན་ས་ཁག་སོགས་ལ་རིག་གནས་སྦྱོང་བའི་ལམ་སྲོལ་མི་འདུག་ཟེར་བའང་ཧ་ཅང་ཐད་པོ་དང་འོས་པོ་གསུངས་པ་རེད། དུས་རབས་གྱུར་ཟིན་ནས་འདུག དེང་གི་འཁྲུག་ཆ་དོད་པོའི་སྤྱི་ཚོགས་འདིའི་ནང་དཔེ་ཆ་རྐྱང་པའི་དགེ་བཤེས་ལྷ་རབ་གཅིག་ལས། རིག་གནས་པ་ཞིག་གིས་དཔེ་ཆེའི་འགྲེལ་བཤད་ཏོག་ཙམ་ཤེས་པ་དེས་སྤྱི་ཚོགས་ལ་ཕན་འབྲས་ཆེ་བ་་ཡོད་པ་དངོས་ཡོད་རེད། དེས་ན། ང་ཚོའི་གདན་ས་ཁག་ཏུའང་། དཔེ་ཆའི་ཞོར་དུ་རིག་གནས་དང་སྐད་ཡིག་གཞན་གྱི་རྒྱན་ཆ་འདོགས་པའི་སྲོལ་གསར་ཞིག་དར་ན། ཅི་འདྲའི་ཕན་ཐོགས་ཁྱད་པར་བ་ཞིག་ཡོང་བ་འདུག་ཨང་། སྐད་ཆ་འདི་ལ་ངོ་མ་རིན་ཐང་ཆེན་པོ་རེད།
རྨོག་རུ་མཁས་པ་ཡིན་མིན་ནི་མི་ཤེས། ཡིན་ན་ཡང་ཡུལ་སྐོར་ཟིན་ཐོ་འདི་ནི་ཧ་ཅང་ཡག་པོ་ཞིག་བྲིས་འདུག ཐུགས་རྗེ་ཆེ།
གད་མོ་ལྷུག་ལྷུག་ཏུ་ཤོར་སོང། ཨ་ཧ་་་་ཨ་ཧ་་་་ཨ་ཧ་་་་་
དྲགྲོགས་རྣམ་པས་དགོངས་ཚུལ་གནང་བར་བཟང་།ང་ཚོས་བོད་ཀྱི་སྐད་ཡིག་གི་སྟོང་ཆ་ཞིག་དང་ལོ་རྒྱུས་ཀྱི་ས་བོན་ཞིག་བསྐྲུན་ཕྱིར་སྤྱི་ཚོགས་དང་འབྲེལ་བའི་ཡུལ་བསྐོར་ཟིན་ཐོ་འབྲི།
འདི་ནི་མི་ཞིག་གནམ་འོག་འདིར་ཡོང་བའི་དགོས་དོན་ཙམ་ཡང་རེད།
མཁན་པོ་དགའ་དབང་ལགས་དང་།ཨ་ཁུ་ཡེ་ཤེས་སོགས་ཕེབས་པ་བཟང་།
རྨོག་རུའི་མི་ཚེར་ནག་ཐིག་ཐེབས་ས་གདན་ས་ནས་རེད། ཁོང་གདན་སར་རླུང་ལྡང་ཡང་ཁག་མེད་ཀི་ཡ།
དྲྭ་གྲོགས་མདའ་མོ་ཚང་རྨོག་རུ་བསྟན་པས་ཉིན་ཐོའི་སྐོར་ལས་འཕྲོས་པའི་རྩོམ་ལེགས་པོ་ཞིག་བྲིས་འདུག
ཁྱེད་ཀྱི་མཚན་དངོས་བྲིས་ཏེ་འདི་ལྟར་རྩོམ་བྲིས་པར་རྗེས་སུ་ཡི་རངས་དང་ཐུགས་རྗེ་ཆེ་ཞུ་བཞིན་ཡོད།
ཁྱེད་ནི་དེང་དུས་རབས་གསར་པའི་འཁྱོག་འགྲོས་དང་བསྟུན་ཏེ་རྒྱལ་བསྟན་ཉམས་གསོ་དང་གདན་སའི་སློབ་གཉེར་བ་རྣམས་ལ་རིག་གནས་སྦྱོང་དགོས་གལ་ཆེ་ཡིན་ཚུལ་སོགས་གསུང་པ་ནི་ཐུགས་ཅིས་མི་བདེན།
རྒྱབ་སྐྱོར་གཙང་མ་ཞུ་བཞིན་ཡོད།
འོན་ཀྱང་ངས་དྲི་བ་ཞིག་ལ།
ཁྱེད་ཀྱི་ཉིན་ཐོ་དེར་་་་་་་
༡་་་་་་རི་རྩེར་འགོས་པ་ཡིན།
༢་་་་་སློབ་གྲྭའི་ནང་བྱིས་པའི་སྟོང་སྟེ།
༣་་་་་རི་སྒང་གི་ལབ་རྩེ།
ཞེས་པའི་མིང་ཚིག་འདི་དག་ལ་ངས་གོ་བ་ཡག་པོ་ཞིག་བྱེད་ཐུབ་ཀྱི་མི་འདུག
ཁྱེད་ལ་དུས་ཁོམ་འདྲ་མཆིས་ཚེ་ལན་ཅིག་གནང་རོགས།